منتديات صواديف عشاق - عرض مشاركة واحدة

10-09-2023

ياأميمتى الله يزيد طول أعميرك..
يللي بعد بونا مالقينا غيرك
***
الله يزيد طول أيامك.
ياأميمتى ومانفقدوه كلامك.
ومانفقدوا تقعميزنا قدامك.
وإنتى بيننا بالراي وتشاويرك.
ومانفقدوا تغميرتك وسلامك.
ولانفقدوا تقعميزت مناديرك.
***
الله يمد فاها أنفاسك.
ياأميمتى ياباهية فى ناسك.
ماأسمح رداك والمحرمة على راسك.
وماأسمح الحنة ف قصتك وأظفيرك
وماأسمح الخاتم ف الصبيع مقاسك.
ياأميمتى يللي قليل أمتيلك.
إنتى تاج فوق الراس يسلم راسك.
ولو نقدر ندير ف وسط قلبى نديرك
***
ياأميمتى ياحنة.
يللي أقدامك تحت منها الجنة
إلا رضايتك ماعاد شي نتمنا.
ياأميمتى وراضي عليا ضميرك.
بلا رضايتك ماعاد فاها بنة.
الدنيا وماتسواش حتى أظفيرك.
***
ياأميمتى الودادة..
ياغالية ياأحنينة بزيادة.
زي ركبتك محال نلقى وسادة.
ولا حن زي حنك إللي ف أصديرك
إللي مفرقاته بين هدا وهدا.
وقد من يشوفك أميمة يديرك.
***
ياأميمتى يابية..
كلامي إللي قلته عليك أشوية.
ومهما نزيد نقول زيه وزيه.
مانوفيش لاحقك ولا تقديرك.
ياأميمتى المولى يصونك ليا.
ويعطيك من عمرى يزيد أعميرك.
وياأميمتي يدومه رضاك عليا.
ودعاك ف صلاتك وفي تكبيرك