.. أول ما أولادنا بييجوا الحياة بنفتكر إنهم ملكنا وإن الطبيعي إنهم يسمعوا كلامنا لأننا الأكبر وعندنا حكمة ومعرفة بالأفضل ليهم. أول “لأ” منهم بتخضنا، بنحس إننا لازم نسيطر علشان يتربوا لأن دورنا إننا نربيهم. وكل ما كبروا و “لأ” كبرت، كل ما زودنا العقاب أو المكافأة وشددنا على مراقبة تنفيذهم لأوامرنا. كتير من الأهل بيكتشفوا إن ولادهم مابيعملوش الأمر غير قدامهم وكتير بيلاقوا إن الأولاد بتسمع الكلام فترة وبعد كده خلاص – مابيبقاش فيه عندهم دافع للمذاكرة، للتمرين، للأكل الصحي، لتقنين استخدام الموبايل، لعمل شئ مفيد، للصلاة، لعدم شرب السجاير … ده مش طبيعي وبقى ظاهرة منتشرة في حياتنا المعاصرة للأسف علشان نقدر نربيهم مهم يبقى عندنا تأثير عليهم وإن يبقى عندهم استعداد وتقبل انهم يسمعوا كلامنا ووجودنا معاهم يكون المرجع الثابت الوحيد في حياتهم خصوصا من ناحية غرس القيم والمبادئ بس اذا هما سمحوا لينا بالتأثير ده. ده محتاج ثقة فينا وفي طريقتنا معاهم وعلاقتنا بيهم علشان يبقوا حاسين بالأمان لما يحتاجونا ويبقوا عارفين اننا حنقدر نتواجد معاهم ونسمعهم بدون عنف، بدون حكم، بدون لوم، بدون تعنيف أو إهانة لآرائهم أو نظرتهم للأمور أو تفكيرهم أو مشاعرهم. لما تلاقي ولادك بيحكوا لك عن حاجات غريبة سمعوها أو شافوها أو مروا بيها بدون ضغط او استجواب منك، بيكون عندك فرصة تربي لأنهم سمحوا لك ان يكون لك دور و تأثير و رأي. انك تربي هو انك تتواجد وقت ما يحتاجوا لك و انك تكون قادر تسمع وتفهم . ده محتاج منك وعي عن ايه اللي محتاج تلاحظه زي تصرفاتهم وحالتهم النفسية والمزاجية وانك تعرف تتعامل معاهم بالشكل المناسب حسب كل موقف ووقت ومكان. كمان محتاج انك تبقى واضح في تصرفاتك وكلامك وانك تكون حاسس بهدوء نفسي داخلي و توازن. التربية عملية مستمرة مش بتقف عند موقف واحد منهم، و لكن بتبدأ عند رد فعلك وتصرفك في وبعد الموقف. التربية مش سيطرة لأننا منقدرش نجبر حد على سمعان كلامنا، لكن نقدر بالتفاهم والقدرة على الاستيعاب وقت اللزوم وبصدق مشاعرنا ووضوح أفكارنا إننا نكون نقطة الرجوع. نقدر إننا نكون موضع الثقة والشخص اللي بيرجعوا ليه وقت ما يحتاجوا يتكلموا ويفكروا لما يواجهوا موقف محتاجين ياخدوا فيه قرار. الطريقة اللي بنستخدمها ​ممكن تشجع وتخلق حافز داخلي وممكن تنفر وتزهق وتوصل العكس. طريقة الكلام ممكن تهدم أو تبني ولادنا. خلينا نتحكم في نفسنا وتصرفاتنا وكلامنا، خلينا نحسن اختيار طريقتنا في التعامل علشان نعرف نأثر ونربي. الثقة بتحتاج وقت وبتتبني من خلال مواقف وتصرفات بتبان نتيجتها بعد سنين. انا عارفة قد ايه ده صعب لأن حبنا وقلقنا وخوفنا عليهم بيخلينا عايزين نطمن انهم ماشين صح ومحدش بيلعب في أفكارهم وبيأثر عليهم بشكل سلبي وإننا أكتر ناس خايفين على مصلحتهم. مشاركتهم بخبراتنا مهمة طبعا، بس الأهم ثقتنا فيهم وفي قدرتهم على إيجاد حل لمشاكلهم والتعامل مع التحديات اللي بيواجهوها. ولادنا محتاجينا نبقى في ضهرهم وجنبهم لما يحتاجونا بس هما أقوى مما نتخيل وعندهم إمكانيات خاصة بيهم. خلينا نهتم بصحتنا النفسية علشان نقدر نبقى مدركين ومتحكمين في اختيارتنا وطريقتنا معاهم ونكسب ثقتهم علشان لما نربي يكونوا فاتحين ودانهم و قلبهم لكلامنا ويكون له التأثير المطلوب لبناء شخصيتهم ومستقبلهم. ..

hgjvfdm ,ughrjih fhgwpm hgktsdm gghihgn hgjvfdm hgktsdm fhgwpm