عزاي إنك رجاي العذب لو كل الدروب عثور،للكاتبة/ اديم الراشد

عزاي إنك رجاي العذب لو كل الدروب عثور،للكاتبة/ اديم الراشد



البـارت الاول .. .
.
في المنطقه الشرقيه تحديداً في الخفجي في حي ساكن حي متماسك ومتعاون .

في بيت ابو خلف
في احد الغرف فز خلف على صوت الباب اللي انفتح بكل قوته وصفق بالجدار قبل يفهم وش اللي صار نزل راسه بسرعه قبل توصله المكنسه اللي طارت وصفقت بالجدار وطاحت والتفت يناظر من هاللي داهمه شاف وجدان وسالم وغيث متخبيين ورا الدولاب بخوف
خلف بغضب : وش صااااير وش بلاكم يا مجانين !؟
قبل يتكلمون سمعوا صراخ وعد اللي تنادي من برا
وقرب غيث بخوف : خلف تكفى فكنا من وعد
خلف ضربه بشويش بطرف رجله: وش مسووييين !؟ قربت وجدان وهي تجلس جنبه وهي تضحك من قوة الخوف : والله ما قصدنا كنا جالسين بالسطح وبالغلط انعدم الغسيل ما انتبهنا
خلف طارت عيونه بذهول: وش مطلعكم السطح فجر !؟
ابتسمت وجدان بفشله : هو امس خربنا الغسيل وتو اكتشفته وعد
دخلت وعد واختفوا كلهم ورا خلف ووقف خلف بتعب : في وجهي هالمره في وجهي
وعد بغضب: ماشاء للله كل مره بيخربون وتحطهم في وجهك
خلف : بالغلط يابنت الحلال
سالم : والله بالغلط
وعد : خلك انت يا ثور!؟ انا بلاي من هالبقره اللي معكم ؟؟
لفوا كلهم على وجدان اللي شهقت بصدمه : انا بقره !؟ وعد : بقررره عندك مانع!؟
وجدان بضحك: اللي تبييين انا بقره وستين بقره بس نطلب العفو
التفت لها خلف ببتسامه وهو يضربها بخفه ودخلت ندى : خييير وش هالحرب من صبح الله
وعد :جهزتي فطور ابوي انتي ولا جايه تشوفين وش فاتك!؟
ندى سكتت بضحك ورجعت للمطبخ قبل تقلب عليها
وجات حنان ببتسامه : صباح الخير خليف ( تصغير اسم خلف)
اتجهه لها خلف ببتسامه : صباح النور والنوير
مدت له حنان ملابسه : تأخرت اليوم في النوم !؟ فيك شي
خلف : قصدك تأخرت افكك الهوشه
ضحكت حنان : يلا عشان تلحق لدوامك
اخذ خلف اغراضه ودخل وهو يناظر اماني اللي تنظف وهي رافعه صوت الاغاني وعايشه جوها
وهو فعلاً في بيتهم كل انسان له جوه الخاص
استعد وجهز وطلع وهو يسمع سوالف امه وعمته بالحوش واصوات هواش وعد
قرب وهو ينزل يبوس راس امه وبعدها عمته نوريه: صباح الخير
ام خلف : هلا هلا يا امي صباحك خير ياحبيبي
ام وعد: هلا يا خلف يا ولدي ما مريت فيصل تصحيه بطريقك!؟؟
خلف : وهو باقي ما صحى!؟
ام وعد : نصحيه مافيه فايده وابوك بينزل للفطور الحين ومايحصله
ابتسم خلف وهو ينادي : وعععد وانا اخوك شوفي شغلك مع فيصل
ضحكت ام وعد : يا خلف انا لو ابيها تصحيه بقولها بس تعرفها بتهاوش هي وياه
ضحك خلف : تدرين ان ربي راحمني ان وعد قويه وشايله عني نص هالبلاوي ولا وكان انجنيت
ام خلف : بسم لله عليك
جات اماني ببتسامه وهي تغني بضحك :صبح صباااح الخير من غير ما يتكلم
ولما غنى الطير ضحك لنا وسلم
خلف : الله الله تعالي تعالي يا اروق وحده في هالبيت
جلست اماني جنبه : والله اني اكافح عشان اروق
مدت له ورقه : خذ هاذي اغراضنا اللي نبيها
اخذها خلف وهو يناظر بهدوء ورجعها لها وهمس : ابوي ما بيرضى عليها كلها!؟
اماني بنفس الهمس : تعال المطبخ
طلعوا متجهين للمطبخ المزدحم وغمزت اماني لوعد تطلع غيث ووجدان وسالم
خلف: وش السالفه !
اماني : ندى قولي له
قربت ندى تسكر الباب
وعد : ندىى وش مسويه !؟
ندى ضحكت وهي تطلع من جيبها شطرطون عليه بصمه ورفعته وكلهم يناظرون
اخذه خلف يقلبه : وش ذا!؟
سكرت الباب ولفت بمكر : ابوي امس بصم على اوراق وبعدها نام ويوم شفت اصبعه طرت لي فكره اخذت الشطرطون ولزقته على اصبعه وسحبته بشويش وصارت بصمة ابوي فيه
حنان شهقت: ليييه وش تسوين ببصمة ابوي
تكتف خلف متعجب : وش بتستفيدين اصلا
ندى : مو صح لازم نكتب الطلبات في ورقه ولا نقدر ناخذ هالطلبات من البقاله لين ابوي يبصم عليها ويقتنع بها كلها !؟ وان مافيها خرابيط ولا شي يكلفه فلوس
وعد:اييييه
اخذت ندى الشطرطون ببتسامه وهي تلصقه على اصبعها بالعكس وحطت اصبعها في البصمه وبصمت وطبعت بصمة ابوها بالضبط في الورقه ورفعتها بضحك: الحيييين تقدرون تشترون الللي تبون من البقاله وابوي يدفع بسلام
لفوا عليها بذهول وهم مصدومين وكان ابو خلف من حرصه ما يقدرون يشترون شي من البقاله على حسابه الا ببصمته ومن ضمنها اغراض البيت
وعد : انتي مجنونه يا بنت
حنان بخوف: لو درا ابوي بيذبحنا
ندى : ماهو داري وبعدين ترا ابوي لا يقرا ولا يكتب يعني ماهو داري
خلف : اسم انك تعبتي وفكرتي بنسويها مررره وحده وبس وفيصلوه لا يدري
ضحكت ندى : يعني اليووووم بنسبح في الخرابيط
خلف اخذها بضحك: بتسبحين بس الله يستر لا ينتبه ابو ممدوح ويقول لابوي
اماني : ما هو مركز هاذي مقاضي كل اسبوعين يعني ماهي يوميه
سكتوا على صوت ابوهم اللي نزل والكل طلع للفطور واخيراً مدت اماني الورقه: يبه هاذي المقاضي ناقصه
التفت ابو خلف: خلف اقراها
اخذها خلف يراقبهم ببتسامه وهو يدقق فالورقه : رز ، شاهي ، حليب ، سكر ، صابون و... وكمل باقي طلبات البيت
واخذها ابوه وهو يطلع البصمه من جيبه وبصم عليها : خذها لابو ممدوح ولا تاخذ غيرها
خلف : ابشر
وقف ابو خلف يناظر فيصل اللي توه ينزل وهو يسحب نفسه ووقف : انت متى بتصير رجال وتقوم مع الناس هاااه
سكت فيصل مارد والتفت ابوه بغضب: خلص افطر وراكم مدارس
لفوا على صوت الباب اللي فاصل بين بيتهم وبيت جدهم قايد
اتجهه له خلف وفتحه ببتسامه : ارحبي يا مضاوي
مضاوي : هلااا والله وش ذا الصبح الزييين مصبحين على وجهه خليف
وهمست : زييين ماهو ابوك اللي فتح الباب ولا ما صبحنا بخير
ضحك خلف : لا يسمعك تراه معصب
ضحكت مضاوي : اسكت لو يدري وش انا جايه ابي يهون عليه اسبه ولا اطلب هالطلب
قرب خلف بضحك: وش تبين !؟
مضاوي : طال عمرك صحيت الصبح وشميت ريحة فولكم واشتهيته بس نظراً لكثافه السكانيه في بيتكم ادري ما انتم مخلين شي عشان كذا بسألك عندكم فول!؟ وانا اسويه !؟
ضحك خلف : ادخلي تفاهمي مع ندى انا مالي شغل في امور المطبخ
اعتدلت مضاوي وهي مبتسمه بفشله ودخلت : صباح الخير
الكل : صباح النور
ابو خلف : وش عندك يا مضاوي مسيره من صبح الله
مضاوي بفشله: ا ابد اتطمن عليكم
خلف اشر لندى تقوم وفزت وهي تركض لمضاوي واخذتها بهمس : هاه وش فيك!؟
مضاوي : عندكم فول!؟
ضحكت ندى: كنت حاسه بتجين تدورين عشان كذا حطيت لك على جنب
مضاوي : كفوو على بنت اخوي
ابو خلف: مضاااااوي
طلت : سم
ابو خلف: كلمي عيال نايف يجهزون عشان اوديهم مع العيال للمدرسه
اخذت مضاوي الصحن : ابشر
ورجعت وهي تهمس : خلصوا وتعالوا تقهوو معنا
ندى: طيب
وقف ابو خلف وهو يستعجلهم يجهزون ماعاد فيه وقت
_______________________.
وفي بيت الجد قايد
دخلت مضاوي بصحن الفول مستبشره بس فجعها عقاب اللي من صبح الله وهو مستشط ويصارخ ويصحي اخوانه
وواقف متكتف وهو لابس بدلته العسكريه وكان (يشتغل على الحدود )
هيا :بشووويش يا عقاب على اخوانك
التفت لها وهو مقطب : هيون لا ترفعين ضغطي انتي بعد
طلع عبد العزيز يلبس بسرعه ولفت مضاوي : شهد عزوز بسرررعه ترا ناصر ينتظركم ومعصب
طلعت شهد تركض وهي توقف عند سحر : سحر سوي شعري عجزت فيه
التفت عقاب بغضب: ويييين على الله كل هالكشخه!؟ تراها مدرسه جدلي شعرك وامشي
ناظرته شهد بضيق وصدت وقربت مضاوي وهي تعطيه كوب شاهي: ياخي علامك عليها خلها تكشخ تراها انثى
عقاب : اقول مضاوي كلي هالفول اللي تطوفين به وريحينا
ضحكت مضاوي وهي ترجع تجلس : بكيفك ياعدو الجمال
طلع الجد ابو ناصر: وراك ياذا الجني صراخك واصل اخر الحاره
مضاوي : بعد يا يبه ما تعرف عقاب
عقاب طنش وجلس بجنب جده بعد ماباس راسه: ياجدي مايطيعون من ساعه وانا اقول خلصوا عمي ينتظر ما فيه فايده يمشون على بيض
الجده ام ناصر مرت وهي معصبه بعد : انا ادري سنه لين يقومون وسنه لين يطلعون
سكتوا على صوت ابو خلف ينادي : وييينكم
طلعوا عزوز وشهد: جاهزين عمي
قرب ابو خلف يسلم على ابوه وامه وطلع لانه مستعجل وطلع عقاب وهو ينادي : عزوز
التفت عبد العزيز : هلا
مد له عقاب فلوس : خذ مصروفك وانتبه لنفسك
عزوز : ابشر
قربت شهد ببتسامه: وانا مالي نصيب
التفت لها عقاب ببتسامه: افا وانا اخو شهد لك دبل النصيب
عطاها مصروفها وهو يحرص عليها كالعاده وراحت وعقاب يناظر عمه اللي كانت سيارته وانيت غماره وحده قدام شهد ووجدان وغيث وفي الحوض عزوز فيصل اللي كان اخر مرحله فالثانوي وسالم اللي للحين بالمتوسط
وواضح طفشانين كلهم والتفت وهو يشوف خلف اللي واقف ببتسامه : صبحه بالخيييير خليف
لف خلف : هلا هلاا بالنار والشرار
عقاب : هلابك تعال تعال للقهوه جدي يحتريك
خلف : يلا اخذ اغراض اهلي وارجع
رجع عقاب مستعجل : سحر عهد وينكم
عهد: بسم للله وش فيك !؟
عقاب: بيجي خلف انتبهوا لا تطلعون وجهزوا القهوه
عهد : طيب
دخلت المطبخ وهي متبسمه وهمست : سحر يقول عقاب جهزي القهوه خليف جاييي
وقفت مضاوي وهي تضحك : للله الله عين السيح جااي بتنزل له احسن قهوه
لفت هيا تضحك وهي تشوف سحر مبتسمه وهي ما تبين ردة فعلها لكن معروفه مشاعرها
( كانوا من زمان يعروفون سحر لخلف وخلف لسحر) وماكانت سحر تشوف في هذا شي غلط بالعكس متأمله خييير في خلف اللي كان طوق النجاة من تشدد عقاب
ولا هي الا ثواني وسمعوا صوت خلف يدق الباب : يااا اهل البيت
عقاب بصوت عالي: اقلط اقلط
دخل خلف وهو يسكر الباب اللي بينهم : صبحهم بالخير
ابو ناصر وام ناصر: صباح النور يا خلف
خلف : كيف اصبحتوا
ابو ناصر : حمدلله
ام ناصر: وين امك وعمتك ما صبحوا
خلف : بيجون شوي
ام ناصر : وراها اختك هالجنيه من صبح الله تهاوش !؟ ضحك ابو ناصر : الظاهر في كل بيت جني ( يقصد عقاب وصراخه ووعد وصراخها )
عقاب : افا يا جدي وش قصدك
صد خلف مبتسم وهو عتبان على وعد وهواشها اللي اذا عصبت يطلع صوتها : تعرفون فيصل لازم يرفع ضغط اهل البيت كلهم
ام ناصر : الله يعين بس
خلف :ما جاء عمي محمد!؟
ابو ناصر: لا جاء ولا ندري عنه ؟ الظاهر لو يموت في ديرة اليهود محد درا عنه
عقاب : الله يصلحه مدري وش يبي هناك
خلف : يوسع صدره
ابو ناصر: ماعليه ماعليه، يلا ياخلف وانا جدك خلنا نروح لدكاننا
ابتسم خلف :ابشر بس اقضي اغراض البيت وألحقك
ابو ناصر : زين الله يعطيك العافيه ( خلف
اللي كانت امنيته يكون في السلك العسكري او في المجال العسكري ولكن رفض ابوه خوفاً عليه يصيبه خطر او انه يتعب بما ان خلف يعاني من " الربو الحاد جداً )ومن بعدها جلس خلف مع جده اللي كان عنده محل جميع لاجهزه والالكترونيات وصيانتها وقرر يكون عنده بما انه مهتم في هالامور )
_______________________.
في سطح بيت ابو خلف
كانت سحر واقفه وهي تسولف مع وعد واماني وكان فيه بعد باب في السطح يفتح البيوت على بعض
لفت وعد وهي تشوف سحر اللي حاطه طرحتها على راسها: وش بلاك انتي من بيشوفك في السطح
ضحكت سحر: والله عاد هاذي اوامر عقاب مدري من بيشوفني بس اتوقع انه يشوف شي ما نشوفه
اماني : بسم لله وش يشوف يعني
وعد : لا ووالله ياحبيبتي هذا مرض في راس اخوك !؟ خييير انهبل وقعد
سحر: ماعلينا من اخوي ! تعالوا بنجلس ونسولف زين عقاب بيطلع لدوام بعد شوي
اماني : ماعليه نخلص البيت ونجي تعرفين الحوسه
سحر: زي..
انقطع صوتها وهي تسمع صوت عقاب يناديها وسكرت الباب ونزلت تركض: سم
عقاب : وش تسوين فوق السطح ؟
سحر: انشر الغسيل
عقاب : لابسه الطرحه ؟
سحر : ايه
عقاب : يلا انزلي لا تطلعين فوق الا لضروره
سحر: طيب ابشر
عقاب : يلا انا رايييح تبون شي
سحر: سلامتك
طلع عقاب وكعادته يطير ومستعجل ونزلوا البنات كلهم يجهزون قهوتهم وسوالف بما انهم اغلبهم ما كملوا دراستهم وجالسين في البيت
_______________________.
وفي بيت النوخذه ابو ثنيان
في غرفة عالي فيها صوت فيروز في هالغرفه كانت ليلى واقفه بعد ما لبست فستانها اللي مليان بألوان الصيف لفت وهي تعدل شعرها وتغني معه طلت تفتح الشباك وابتسمت ونزلت وهي تسمع صوت ابوها وامها وشيخه : صباح الخير
ابو نهيان : صبحچ الله بالخييير والسرور
ام نهيان: تعالي يمه قعدي تريقي ويانا
لفت ليلى : شيخوووه بس خلي هالكتب والله راسي عورني وانتي مستمره
شيخه لفت تناظرها ببتسامه: شعليچ انتي خليتچ بروحچ
ابو نهيان: تعالي اتركيها براحتها
جلست ليلى : يبه وين بتروح الحين!
ابو نهيان: بروح السوق يبه وراي اشغال
ليلى :طيب اروح وياك عادي!؟
ابو نهيان: يابنتي مايصير اليوم خليه باكر احسن
لفت ليلى بضيق : يلا مو مشكله
ابو نهيان: وانتي يا ام نهيان جزاتچ الله خير قعدي جابر خليه يلحقني صوب الشغل
ام نهيان: زين
طلع ابو نهيان ولفت ليلى بملل وهي ما تعرف احد في الخفجي بس يوسع صدرها سوالف الحريم اللي يجون عند امها
وطلعت لغرفتها وهي تقلب الكاميرا بتفكير وحطتها وهي تشغلها
راحت لراديوا الموجود وهي تغير بالقنوات بس ابتسمت اول ماسمعت اغنيه تصلح لرقص سكرت الباب ببتسامه وبدت تمارس تسليتها الوحيده وهي الرقص الشرقي وكانت تحب تصور عشان تشوف ادائها
_______________________.
عند خلف
اللي وقف متكتف قدام بقالة ابو ممدوح وهو يدعي ما يكشف التلاعب اللي سووه ببصمة ابوه ابتسم وهو يدري ان اطباع ابوه عجيبه غريبه !؟ وطريقة تصرفهم معه اغرب
ضحك بنفسه يقول ( الناس تسرق البصمات تسوي بها مصايب !؟ وحنا نسرقها نشتري فيها اغراض من البقاله! والله عجب )
ماكان راتب خلف يساعده انه يغني اهله تماماً عن صرف ابوه عليهم عشان كذا كثيير احيان ينصاع لبخل ابوه
مد يده يعدل نظارته الطبيه واخذ نفس اول ما بدا ابو ممدوح يجهز الطلبات ويحاول خلف يخفي الخرابيط على قولة ابوه (شبسات ، غازيات، حلويات )
رجع لبيتهم دخل وهو ينادي وركضوا له البنات واجتمعوا حوله
ضحكت ندى: ضبطت الخطه
خلف : نشف ريقي لين ضبطت تخيلت بس ان ابو ممدوح يقول لابوي وحزتها وش يفكنا
وعد ببتسامه: بالله عليكم سارقين بصمة ابوي عشان هالخرابيط
اماني : والله هالخرابيط على قولك لو ما سرقنا هالبصمه ما كان شفتيها الا كل سنه مره وكله عشان ما نكثر مصاريف على ابوك
خلف: خلاص خلاص هي مره وتوبه المهم سكروا على الموضوع وانا برجع لشغلي تبون شي
حنان: ماقصرت كفيت ووفيت
رجع خلف لشغله مبتسم وهو ينبسط اذا شاف خواته مبسوطات حتى لو هي اشياء بسيطه
اخذ طريقه لمحل جده ودخل وسلم وجلس وهو كعادته ابتداء شغله بفك وتصليح
وفي عز اندماجه رفع راسه على صوت تصفيير يعرفه زين نزل الاغراض من يده وطلع يضحك : ناددر!؟ وش فيك تعال
همس نادر من بعيد بضحك: تعال مابي انشب مع جدك
لف خلف وهو يشوف جده مشغول وطلع له : ليه وش قايلك جدي!؟
ضحك نادر: كل ما يشوفني يهاوشني عشان التدخين وكأنه يقول لا تخرب حفيدي معك
ضحك خلف وهو يعرف معاناة نادر مع ابوه وجده : بسيطه يا رجال المهم غريبه وش جايبك هنا
نادر : كنت فاضي قلت امرك وين عقاب !؟
خلف: مداوم
سكتوا على مرور عدد من الرجال وبينهم شخص له هيبته يغطي وجهه الشيب وواضح ماهو من اهل السعوديه
نادر : شفت هالشايبب!؟
خلف : ايه منهو !؟
نادر : ساكن في اسفل الحارهاسمه النوخذه ابو نهيان كويتي
عدل خلف نظارته وابتسم : ايييه واضح ماهو من اهل الحاره
نادر : ايه له فتره يروح ويجي بس معطيه الله خييييير
خلف : الله يرزقنا
لف نادر : ليه ما تجرب تشتغل معهم فالبحر وتجارته!؟ ضحك خلف: انهبلت يا نادر ابوي ما خلاني فالبر بيخليني فالبحر
نادر : والله انا بسوي دراسه ادرس فيها حالة ابوك الغريبه
ابتسم خلف : شوف ربي يقسم الارزاق على الناس ورزقي فالدنيا هو اني ادرس عجايب اطباع ابوي
ضحك نادر : اي والله صادق
وصد نادر بضحك وهو رغم انه يتضايق من ابو خلف وهواشه المستمر له الا انه مايقدر يكرهه خلف ابد اللي عكس ابوه
اما خلف كان يضيق صدره على نادر اللي كان كل مايشوفه ابوه مع نادر يهاوشه ويقول ( لا تمشي مع ولد محمد الخبل ) >> ( يقصد فيها ان ابو نادر شخصيته ضعيفه واذا احد غلط عليه مايرد ولا يدافع عن نفسه وولده ويخليه ، بالمجمل يقولون له الخبل )
لف نادر بسرعه وهو يرمي الزقاره ويطفيها: اسمع الوعد الليله في محلنا!؟
خلف : زين
راح نادر ورجع خلف لمحله
_______________________.
وفي بيت الجد
كانوا البنات بطرف والحريم بطرف
جو البنات كان واضح سوالف ولعب ولفت هيا : وعد!! وش سالفة المعهد اللي تقولينه!؟
وعد : ايييه !؟ هذا الله يسلمك كلمت خالي ماجد يسجلني بمعهد ادرس اي شي ينفعني بدال ما انا جالسه هنا
شهقت سحر : امااانه بتدرسين!؟ طيب عمي كيف بيرضى وخلف !؟
ضحكت ندى : اذا على ابوي مقدور عليه اهم شي مايدفع شي وبكذا يوافق
اماني :اما خلف يازينه خلف مأيد الموضوع كلياً بالعكس يقول كملوا وانا معكم
عهد : سبحان الله الخالق الفارق لو قايلين لعقاب بنكمل بيتوفى بجلطة ثلاثية الابعاد
ندى: ياخي انا فكرت في تصرفات اخوكم !؟ ماشفت فيها الا مرض
وعد اللي تكرهه تصرفات عقاب الللي بكل تأكيد تعتبره مريض نفسي : والله اذا ودك تكملين كملي ما عليك من احد لان محد يدوم لاحد ومصيرك تحتاجين شهادة تنفعك
سحر بضيق: من يقنعه عاد!؟
هيا: والله عقاب ماهو مريض بس يخاف عليكم مايبي شي يأذيكم
حنان: بالنسبه لي اشوف تصرفاته من حبه لكم
وعد بغضب: اي حب انتي وياها لو كله حب كان اقل شي ضمن لهم مستقبل يرفعهم عن الناس لو صار له شي
ناظرتها هيا بحده وصدت وعد بغضب وقبل ينتهي النقاش فزوا على صوت ترحيب ام ناصر
وطلت عهد : اوووه عمي محمد وصل
طلعوا كل البنات اللي يحبون محمد ومحمد يحبهم بما انه محروم من نعمة العيال يحاول قد مايقدر يعوض نقصه في عياال اخوانه
بعد ما الكل سلم لف محمد ببتسامه: جيبوا الشناط يا بنات والله يا اني جبت لكم هدايا
ركضت ندى ومضاوي وعهد يتسابقون على الشناط
وجلست وعد والتفت محمد ببتسامه: اهليييين يا وحش
ناظرته وعد بضحك: عمي الله يرضى عليك وش وحش
محمد : وانا صادق!؟ كل ما كلمت ابوك ولا خلف الا انتي تهاوشين وراه
صدت وعد بضحك: والله من هالبزران
محمد : اجل لو تزوجتي وجبتي عيال وش بتسوين تنهبلين !؟
لفت وعد بضحك: لا والله لا بتزوج ولا بجيب عيال
محمد بضيق بان عليه وهمس: لا تقولين كذا يا وعد وانا عمك تراهم نعمه لا ترفسين النعمه
انخطف لون وعد وتفشلت وسكتت وهي تدري ان عمها مجروح من هالامر
فتحت مضاوي الشنطه وصرخت بفرح: الله عطورراااات
ام ناصر: وجع وش ذا الصراخ
الجازي: سمي بالله يا مضاوي
وقف محمد مبتسم: اصبروا اصبروا انا اوزعها
حنان ببتسامه: والله كثر الله خيرك يا عمي كل مره تكلف على نفسك
ابتسم لها محمد : افا والله ياحنونه ؟ انا وش عندي بالدنيا اغلى منكم
رفعت يدينها مضاوي ببضحك: يالللله تخلي لنا اخوي محمد وترزقه من واسع فضلك
الكل : اميييييين
الكل مجتمع حول محمد وهو يوزع هداياه مبتسم ويكفيه هالابتسامه
_______________________.
في المحل
كان خلف واقف وهو يراقب اهل السوق لكن هالمره يراقب الجديد في السوق وهو النوخذه ابو نهيان
ولف على صوت واحد يقول : سلام عليكم يالاخو
التفت له خلف وهو يرفع نظراته : سم وعليكم السلام
جابر: انا جديد على هالسوق وبسألك عن دكان النوخذه تدله ؟
ابتسم خلف :هلا فيك ودكان النوخذه هذا هو خامس دكان على يمينك
تحرك جابر بس رجع : العذر والسموحه بس ما تشرفت بمعرفتك؟
اعتدل خلف : خلف ال قايد
مد يده جابر يسلم عليه ببتسامه: معك جابر ال نهيان ولد النوخذه ابو نهيان
خلف : يا هلا فيكم شرفتونا ونورتوا السوق يا اهل الكويت
ابتسم جابر برضا : الشرف لنا ياخلف
خلف : اقلط القهوه زاهبه
جابر : مره ثانيه صيفت على ابوي واجد
خلف : لاازم توعدني
جابر : ان شاء الله اقرب فرصه
راح جابر وخلف يناظره وماكان خلف مستغرب وجود الكويتين ابداً لانه بحكم ان الخفجي على حدود الكويت دايماً الكويتين فيها والسعودين في الكويت ومتعايشين مع بعض ومتفاهمين
تقدم لجده اللي جاء وهو يقول : خلف وانا جدك قفل المحل خلنا نلحق قبل صلاة الظهر نصلي ونروح البيت
خلف: ابشر
قفل المحل خلف واتجهه لجده وهو يمشي جنبه
خلف: اقول جدي مريت دكان النوخذه!؟
ابو ناصر: اي والله مريته وعزمته وحلف ما يبي يكلف على احد
خلف : مرني ولده جابر بعد وعزمته للقهوه واعتذر
ابو ناصر : خلهم على راحتهم توهم ما استقروا
خلف : الله يعين
_______________________. .
وفي سيارة ابو خلف
في الحوض
كان فيصل حاط الكتاب على راسه عازل بينه وبين الشمس ومقابله عزوز وسالم اللي نايم
فيصل: عزوز !؟انت صامل معي !؟
عزوز قرب : صامل بس محد مخلينا نطلع تعرف عقاب وجدي
فيصل : ترا حتى انا عندي خلف وابوي بس الموضوع ذكاء يا اخوي وحنا مارح نسوي شي بنطلع نسهر مع اصحابنا ونجي خلف وعقاب بعد يسهرون محد قالهم شي
كان عزوز يتردد كثير والسبب عقاب : طيب كيف بنطلع
فيصل: ابد بعد العشاء قل انك تعبان وبتنام ماتبي احد يزعجك وقل انك بتنام بالسطح وانا بعد وذا ناموا كلهم طلعنا محد يدري
رجع عزوز لورا وهو يشيل هم اذا بغى يطلع وخصوصا انه يدري انهم بيروحون لشله ماهي طيبه كثير واكيد عقاب بيسأل عنهم وهو مايعرف يكذب على عقاب
لكن فيصل كان جريء وقوي ومايهتم لاحد
سكتوا بوصولهم للبيت
_______________________.
في بيت ابو خلف
دخل خلف مع دخول فيصل وسالم وهو متحضن سالم الدايخ من النومه
حنان : جيتوا بوقتكم يلا عشان بننزل الغداء
فيصل : وش فيكم مستعجلين!؟
رفع خلف يده يناظر الساعه : حتى عقاب ما جاء من الدوام للحين
وعد : عمي محمد جاء وتعبان يبي يتغداء بسرعه وينام
وجدان : بشروني وقولوا جايب لنا هدايا
ضربها فيصل : انتي ما تتوبين عند هالشحاذه !؟
التفت له خلف بغضب: وش فيك عليها!؟
فيصل : طويلة لسان
سحبه خلف بهدوء وهو يكلمه بغضب هامس : مليون مره اقولك اذا مديت يدك على خواتك كسرتها لك تسمع ؟
سحب يده فيصل ودخل واخذ خلف نفس واتجهه للمطبخ واول ما دخل طاحت عيونه على المعمول اتجهه له : اوووه هذا معمووول
ناظرته اماني بضحك: ايييه معموول ولا هو اي معمول معمول سحر
ابتسم خلف بخفه وهو متعود انهم يطقطقون بهالموضوع وماكان عنده اي اعترض بالعكس راغب وقابل فالنهايه هو بيتزوج اكيد من بنات عمه
لف بضحك وهو متحضن الصحن : يعني تضمنون مستقبل زاهر
ندى بضحك: نضمن لك كرش زاهره
لف خلف بضحك وهو يقول : سااالم تعال إلحقنا بالغداء
طلع متجهه بيت جده
ابتدوا البنات يجهزون الغداء والنظام انه بيت الجد وبيت ابو خلف يتناوبون على الوجبات يوم الغداء والعشاء في بيت الجد ويوم في بيت ابو خلف
_______________________.
وفي بيت الجد
كانوا الجد والجده وابو خلف ومحمد جالسين ودخل خلف وفيصل وسالم
وفز محمد يرحب واحتضن خلف بحب وهو يغلييييه حيل وابعد خلف مبتسم : اشتقنا لك ياعمي وينك ابطيت علينا !؟
محمد : والله ياخليييف لو تشوف وش هناك ما تجي هنا ابد
ضحك خلف : مابي اشوف ابي السلامه
ابو ناصر : اقول لا تخرب عيالنا معك خلهم في حالهم
ضحك محمد وهو يخبط على كتف ابو خلف : اقول يا ناصر اذا ودك تعرس ابد لقيييت الديره اللي تسر قلبك
لفوا كلهم يناظرونه واولهم ابو خلف اللي جازت له الفكره بس قال ابو ناصر ينفي الفكره: معصي ما يتزوج من ديرةٍ ماهي ديرته اص اص على افكارك الشينه
ابو خلف صد وهو يضحك : مكفيني اللي عندي
قاطعهم دخول عقاب اللي يمسح جبينه بتعب: سلام عليكم
الكل : عليكم السلام
قرب يسلم على محمد ولف له ابو ناصر: عجل بدل وألحق معنا
عقاب : يلا يلا
_______________________.
وفي المطبخ
كانوا البنات يجهزون الاغراض ووالكل طلع للغرفة الموجود فيها باقي الحريم
لكن باقي هيا ووعد وقربت هيا مستعجله : وعد رجعتي لعقاب غداء!؟
لفت وعد: مدري عن البنات لكن انا معصي ما ارجع له
هيا لفت بصدمه: وش بلاك انتي عليييه!؟ تراه ماهو ذابح ابوك
صدت وعد بكرهه : خليييه يستريح بس وبعدين احسن لا ترجعون له خلو طاقته تهبط ويفك خواته من شرهه
هيا : إنا لله وإنا إليه راجعون انتي لسانك متبري منك
اخذت الصينيه وطلعت وتركت وعد اللي كان دائماً عقاب ضدها في كل الامور ودائماً يشوفها البنت السليطه طويلة اللسان اللي لو يصدر من خواته تصرف غلط او كلمه غلط على طول يتهم وعد فيها ولهذا السبب تكرهه وعد ويكرهها
لكن في الممر اللي قريب المطبخ مر عقاب وسمعها وشد على يده بغضب : هييين هييين يا العوبا يا ام لسان انا اوريك شري زين
كمل طريقه للحوش غاضب منها ومن طولة لسانها
_______________________.
وفي الحوش
الكل مجتمعين حول السفره ينتظرون عقاب ومحمد متحضن غيث وهو يقرب له كل شي بالسفره والكل مبتسم
وتقدم عقاب وهو يخبط كتف خلف ببتسامه : اقول خليف اليوم فتحوا بوابة التقديم ما ودك تقدم !؟
التفت ابو خلف بحده: يقدم وين!؟؟
عقاب : في العسكريه!؟
ابو خلف : لا مايبي يقدم هو مرتاح في وظيفته
شد خلف على اسنانه بهدوووء وابتسم وهو مخنوق من خوف ابوه الزايد عليه واللي يحسسه بالنقص واللي يعاني خلف منه اكثر من معاناته من الربو
لف محمد يمسح ظهر خلف بحب وهو يكرهه ان احد يجرح احد بسبب مرض او مشكله يعاني منها : لا والله لا يقدم خليف ولا شي اريح له يداوم مع ابوي وش له بالعسكريه والشقا ما تشوف وجهك يا عقاب كنت مزيون الحين ماش طاح كرتك
ضحك عقاب : ايييه معاد يمديك تكشخ بي
الكل صاروا يحاولون يغيرون السيره ويقفلوون عليها وساعدهم ان ملامح خلف مايبان فيها الزعل ابد
_______________________. .
وفي بيت النوخذه
كانت ليلى واقفه ببتسامه هي تستقبل ابوها : قووه يبه
ابو نهيان : الله يقويچ يبه
جابر : ترا انا معاه
ضحك ليلى : قواك الله
جابر ضحك: الله يسلمچ
شيخه : تأخرتوا يبه!؟
ابو نهيان : والله اهل المنطقه ماقصروا من صباح الله خير وهم عندنا ماقدرت اهدهم واطلع
ام نهيان : ماشاء الله عليهم حريمهم بعد ما خلونا زارونا واستانسنا وياهم
ابو نهيان: طيبين والله طيبين وااجد
ليلى : يبه تكفى باكر بروح وياك السوق
جابر بغضب: على كيفچ هنيه مو مثل الكويت
ابو نهيان: بسس صوتك لا يرتفع على اختك وبعدين يا ليلى يا يبه مايصير تروحين وياي لكن باكر تروحين انتي وامچ وشيخه وتمشون شوي وتردون البيت
ليلى: زين يبه
سكتت وهي تنتظر متى يجي بكره وتطلع وتشوف هالدنيا
_______________________.
الليل
في بيت الجد
كانوا كل العيال جالسين حوالين محمد اللي يحكي ويعبر عن اللي شافه في الغرب من جمال طبيعه وجمال بشر
وكلهم يناظرونه بذهول وهم كل واحد من هول الوصف اللي يوصفه محمد فاتح فمه
لكن تنحنح عقاب وانتبه لنفسه ولف : عمممي اللي يهديك لا تجلس توصف كذا
التفت خلف يناظر فيصل وعزوز وسالم اللي كانوا في اقصى مراحل الهيمان من خيالاتهم بعد وصف محمد
ضرب الصحن قدامهم وفزوا وهم يبعدون
فيصل : وش فيييك!؟
خلف: وييين وصلت انت وياه
عقاب : ولد انت وياااه لم نفسك
ضحك محمد : عقاب حتى احلامهم بتسلط عليها
عقاب : من زين احلامهم قم انت وياه قم
عزوز: وش فيك يا عقاب بنسمع
عقاب : انا ولد ابوي !؟؟وش بتسمع
فيصل : يعني حلال عليك حرام علينا
خلف: فيصلوه اقصر الشر وقم
وقف فيصل يغمز لعزوز يقوم عشان ينفذون خطتهم
ولفوا على سالم اللي جالس مبتسم: وانت يالاخو
سالم: وشو !؟؟
عقاب : اقضب الباب يلا وراكم مدارس
وقف سالم بضحك وطلع معه غيث
واعتدل عقاب بمزح: ايييه ياعمي كمل
طارت عيون خلف : توووك طارد العيال ؟
عقاب : هذاك قلتها عيال يعني مايصلح لهم هالكلام
محمد : يصلح لك انت اجل
ضحك عقاب : ايه كمل كمل
ضحك خلف وهو يقول : انا بالنسبه لي ما ابي اسمع
عقاب :وين بتروح !؟
خلف : لنادر
وقف عقاب : خذني معك
محمد بهمس : ابوك يدري!؟
خلف صد بضيق: اكيد لا ولو درا بيحلف اني ما اروح المهم انه يحسب اني عندك
عقاب : يلا اجل بلبس واجي
خلف : زين ببلغ خواتي واجي
راح خلف لبيتهم ودخل وهو ينادي بهمس : وعد وععد
طلت وعد من الغرفه : تعال هنا
دق الباب ودخل وهو يشوف خواته كلهم بغرفتهم دخل يجلس بهدوء : اسمعوا انا بطلع لنادر اذا سأل ابوي بتقولون عند عمي محمد طيب!؟؟
وعد : ماعليك روح
حنان بتردد: بس اخاف يروح ومايحصلك
خلف: ماعليك مب عارف اذا محد قاله ، فيصل وين
وجدان: من شوي قال بينام فالسطح و لا احد يجي
خلف : يلا زين تبون شي!؟
ندى: انتبه على نفسك بس
طلع خلف لعقاب اللي ينتظر وطلعوا متجهييين لمكانهم المعتاد
_______________________.
في بيت ابو نادر
بعد العشاء كانوا جالسين بهدوء في حوشهم
ولفت ام نادر: نادر امي وش قلت يمه في بنت خالتك
سكت نادر بتفكير : لللحين ما قررت يمه
ابو نادر: وش تنتظر وانا ابوك !؟
نادر : انتظر الوقت اللي استعد فيه وتستعد نفسي
ابو نادر: تراها ماهي قضية فلسطين الموضوع زواج
ضحك نادر: ادري يبه لكن خلني افكر شوي ، المهم انا بطلع لخلف وعقاب برا
ام نادر: لا تطول يمه ارجع بدري
نادر: ابشر
ابو نادر بتردد: مالك نيه تترك عقاب وخلف!؟ ما طابت نفسك من كلام ناصر !؟
وقف نادر بهدوء: تدري ان لا عقاب ولا خلف مثل ناصر
ابو نادر: لو قالهم ناصر يتركونك بيتركونك
نادر: يبه تكفى سكر السيره
اخذ اغراضه وطلع وهو مايدري وش هالذنب اللي مسوينه عشان كلٍ يوقف ضد صداقتهم
_______________________.
وفي بيت ابو نهيان
بعد العشاء كل واحد اخذ طريقه لغرفته الا ليلى اللي كانت مجهزه جلستها بالحوش وجالسه وهي معاها الراديو ومعها كتاب الروايه اللي تقراه وهييي تحلللم بمواصفات هالبطل اللي في الروايه
وفي عز اندماجها سمعت صوت ترحيب فالجهه الخلفيه من بيتهم وطلت وهي تشوف مجموعة شباب يسلمون على بعض
واحد تعرفه دايم تشوفه بالحاره واثنين غريبين كان منهم واحد يكح بشكل مستمر وواحد كان بيده بكت دخان لكن دخله اول بدا اللي معاه يكح استغربت وجودهم ذا الوقت في الحاره
بس طلعوا متجهيين لمكان بعيييد وجلسوا هناك وماعاد تشوفهم
رجعت تكمل كتابها وهي تغني مع الراديو وما اهتمت كثيير
_______________________.
وفي اسفل الحاره
كان نادر يكافح نفسه عشان مايطلع زقارته ويدخن عند خلف اللي يتعبه الدخان وهو اصلا من ساعه يكح
عقاب تقدم وهو يعطيه مويه واخذها خلف مبتسم
عقاب : اييه يا نادر!؟ وش سالفة هالزواج اللي تقوله
نادر اعتدل وهو يجهز القهوه : ابد امي ودها اتزوج وعاد بيني وبينكم انا بعد خاطري اتزوج
خلف بصوت متقطع من الكحه: طيب وش يمنعك!؟ نادر: القصه ان امي جازت لها بنت خالتي اللي ساكنين في حفر الباطن
عقاب : طيب!؟؟
نادر: وانا ما اعرف خالتي الا بالاسم ما اعرف بنتها ولا اعرف وش وضعهم عشان كذا متردد
خلف : اصبر وصلّ استخاره وشف وش يصير
عقاب : مثل ما قال خلف وانا اقول اعقلها وتوكل
نادر : خلوني انا انتم وش وضعكم !؟؟مالكم نيه
عقاب: انا معروف وضعي ماني متزوج لين ازوج خواتي
خلف: اعقل يا عقاب اخواتك بيجيهم نصيبهم كن في نفسك
ضحك نادر : اكبر خواتك وجاها نصيبها عند هالمزيون اللي جنبك
ابتسم خلف ولف عقاب يناظره : اي والله هاذي اكبر نعمه
نادر: والباقين مثل ماقال خلف نصيبهم بيجي
عقاب : موضوع غير قابل لنقاش
خلف : ماعلينا غيروا السالفه دوروا شي يوسع الصدر
عقاب : لحظه ياهوه شفتوا لللي نازل فالحاره جديد!؟ يقولون كويتي !؟
نادر: ايييه نوخذه كويتي له فتره نازل وبدا شغله فالسوق
عقاب :ماشاء الله بأهله!
نادر: اييييه
خلف : شفت ولده بالسوق واضح طيبين
عقاب : بكره ماعندي دوام انزل ان شاء الله لسوق ونشوف جيرانا الجديدين
كملوا سوالف وسط صوت خلف المكتوم اللي تقطعه كحه
.
.
انتهى البارت ♥

الموضوع الأصلي: عزاي إنك رجاي العذب لو كل الدروب عثور،للكاتبة/ اديم الراشد || الكاتب: صواديف عشاق || المصدر: منتديات صواديف عشاق

https://s-eshq.com/vb

كلمات البحث

العاب ، برامج ، سيارات ، هاكات ، استايلات

المصدر: منتديات صواديف عشاق

---

u.hd Yk; v[hd hgu`f g, ;g hg]v,f ue,vKgg;hjfmL h]dl hgvha]