منتديات صواديف عشاق - عرض مشاركة واحدة - عزاي إنك رجاي العذب لو كل الدروب عثور،للكاتبة/ اديم الراشد

11-29-2021

البارت الثاني..

وفي بيت ابو خلف
في غرفة البنات كانوا يسولفون بهمس عشان مايطلع صوتهم وفجأه دق الباب ودخلت ام خلف بهدوء: بنات
جلست وعد : هلا عمتي امري فيك شي!؟
ام خلف بهدوء: مريت غرفة العيال ماشفت خلف وييينه ما رجع!؟
وعد وقفت : عمتي خلف عند عمي محمد
ام خلف : لله يهديه تأخر
حنان : ماعليه عمتي نامي وحنا ننتظره
ام خلف : انا ما عندي مشكله بس اخاف ابوك يصحى
ندى: لا ابوي في سااابع نومه
طلعت ام خلف وهي تنتظر خلف بخوف وهي تدري لو صحى ابو خلف وما حصله بيقوم الدنيا
لكن الحظ ما اسعفهم وصحى ابو خلف وطلع ولا شاف لا فيصل ولا خلف
اتجهه لغرفة البنات بغضب: وعد وعد
فزت وعد تركض: سم
ابو خلف: وين اخوانك!؟
وعد : فيصل نايم بالسطح وخلف عند عمي محمد
ابو خلف : عند محمد هالحزه!؟؟ ماوراه دوام ما وراه شغل!؟
وعد : ان شاء للله يبه شوي ويجي
ابعدها ابو خلف وطلع متجهه لبيت ابوه لكن شاف البيت سكوووون مافيه احد وغرفة محمد ظلام
والتفت وفزت مضاوي برعب : بسم لله الرحمن الرحيم
ابو خلف : شايفه جني
مضاوي : وش دراني!؟ احد يجي هالحزه
هيا : ناصر بسم لله وش فيك!؟
ابو خلف : وييينه خلف!؟
لفوا البنات يناظرون بعض بتوتر: ا مع محمد
ابو خلف: محمد ناايم
سكتوا البنات والتفت ابو خلف بغضب : وين عقاب
سحر: ماهو فيه عمي
ابو خلف : كنت دااري
رجع مع الباب وسكره بينهم وهو يشوف وعد وام خلف وندى واقفين بتوتر طلع لسطح والكارثه ان فيصل ماهو فيه بعد وانهبل ونزل وهو يصارخ : وعععععععد تكذبييين علي انتي تكذبين
وعد : وش فيك يبه !؟
ابو خلف: فيصل ماهو موجود
لفوا بصدمه وقالت وعد: مدري عنه قالي بينام
ابو خلف سحبها بيدها : انا ادري انك تغطيييين عليهم لكن هييين انا اربيك واربيهم
دفهاوطلع على الباب ينتظر وهو يتحلف فيهم
_______________________.
وفي اطراف الحاره
عند عبدالعزيز وفيصل لللي بعد ما سهروا وسعوا صدروهم وهم راجعين وقفوا بتوتر مايدرون كيف بيدخلون وابو خلف على الباب والامر والادهى انه معصب
عزوز: وش بنسوي
فيصل : بننتظر لين يدخل
عزوز: بس واضح انه معصب اخاف كشفنا
فيصل كان خايف بس مايبين: لا ما ... سكت اول ماشاف خلف وعقاب راجعين وهمس: هو ينتظر خلف اكيد معصب منه
عزوز: ياخوفي يكشفنا بعد
فيصل: لا لا بيلتهي في خلف تعال تعال نجي من الجهه الثانيه
ركضوا لجهه الثانيه وخلف وعقاب كانوا في وجهه المدفع وقفوا بصمت اول ما شافوا ابو خلف اللي واقف بقميص النوم وهو متكتف على الباب
همس عقاب: جااااك الموت يا تارك الصلاة
خلف : استعنا بالله
تقدموا بخطوات ثابته وابو خلف يراقبهم
خلف : سلام
ابو خلف : الله لا يسلم فيكم مغز ابره!؟
عقاب : افا يا عمي وش سوينا !؟
ابو خلف : اقصر صوتك ياعل مالك صوت ، الساعه 3من وين جاي انت وياه هالحزه!؟
خلف: كنا عند الشباب وخذانا الوقت
ابو خلف: تكذب علي انت وياااه!؟ كم مره قايل لكم ما تذلفون لولد محمد الخبل؟؟ خلف : يبه اذكر الله
ابو خلف : ادخل انت وياه ادخل
عقاب : اخر الليل ياعمي الناس نايمه
ابو خلف : انت طس لبيتكم وكلامي معك الصباح
تفشل عقاب اللي كان طول عمره له هيبه لكن اذا كان ابو خلف فيه تختفي ويغسل شراعه ويمسح بكرامته الارض
دخل بيتهم وهو خايف على خلف وقف للباب الفاصل بينهم وهو يقرب اذنه يبي يسمع
وفز على مضاوي اللي قربت مع الظلام وهي تضربه بشويش
عقاب : وجع وش فيك فجعتيني خبله انتي!؟
مضاوي : الله اعلم من الخبل !؟ وش نبي تنصت على الناس اخر الليل
سكتها عقاب وهو يحط يده على رقبتها وكتم راسها بصدره عشان ما تتكلم ويسمع
ضربت مضاوي بغضب: كتمتني يا خبل
عقاب : اصصصص ابي اسمع اص
كانت بتتكلم بس سكتها للمره الثانيه وهو يرجع يسمع
_______________________.
وفي بيت ابو خلف
الكل صحى والكل ينتظر انفجار ابوهم
وركضت ام خلف لخلف لكن وقفها صوت ابو خلف: وخري عنه محد خربه الا دلعك
غمض خلف بهدوء: وش صار يبه ليه كل هالصراخ !؟ خلف : كم مره اقولك ما تسهر برا البيت!؟ وكم مره اعلمك عند نادر هالخبل ولد الخبل!؟؟ تبي تعق فيني انت ولا وش سالفتك
خلف : يبه نادر ماله شغل في اللي انت تقوله!؟ وبعدين وش ذنبه اذا ابوه خبل على قولك!؟ ترا كلنا خلق الله وبدال مايكون ابو نادر بعينك خبل المفروض يكون انسان كافي خيره وشره ومسالم
ابو خلف: عشت وشفت والله هذا اللي جنيته من نادر واهله اخر العهد ولدي يرد علي الكلام
خلف: محشوم يبه ..
سكته ابوه بغضب: نهاية الكلام والله يا خلف لو اشوفك ولا اسمع انك مع نادر ما يصير طييب
صد خلف بغضب وزعل ولكن وقفته كحته المعتاده وركضت امه : بسم لله عليك ياحبيبي بسم للله عليك
لكن قال ابو خلف: وييين اخوك هالثور !؟؟
خلف التفت وهو يحاول يسيطر على صوت صدره المكتوم : مدري عنه خبري فيه نايم بالسطح
فجأه نزلت وعد وقالت : يبه فيصل نايم فالسطح!؟
ابو خلف: شلوون نايم انا ما حصلته
طلعوا كلهم لسطح وكان فيصل نايم واتجهت ابو خلف بغضب وهو يسحبه: فصييييل وييينك من ساعه هاه
بكل براعة وتمثيل فز فيصل: يبه وش فيك
ركضت ام وعد : بسم الله عليه فجعته يا ابو خلف
ابو خلف: من ساعه جايك ما انت فيه
فيصل: يبه كنت بالحمام يمكن جيت وانا فيه
صد ابو خلف بضيق ونزل
ورجع فيصل يمثل النوم وقربت ام خلف لخلف اللي جالس على الصبه وقال بتعب : ندى
لفت ندى: سم
خلف :جيبي فراشي هنا
ام خلف : يمه انزل تحت عن البرد
خلف : لا يمه بنام هنا
حنان بهدوء: خليف الله يسعدك لا تنام بالبرد وتتعب تعال تحت
خلف: ماعليه هنا احسن وهواء نظيف
وعد: خلاص ندى جيبي فراشه ترا كلها نومه بينامها
كانت وعد حريصه ما يضغطون على خلف اكثر ويزعجونه بمسألة مرضه ويخلونه على راحته
خلف : يمه حبيبتي روحي نامي مافيني شي
ام خلف : طيب يمه خذ علاجك
خلف: مايحتاج يا امي انا طيب
وعد : عمتي روحي ماعليك
بعد اصرارهم راحت ام خلف وجلس خلف بهدوء
_______________________.
وفي الطرف الثاني
ترك عقاب مضاوي بعد ماتهاوش معها كالعاده وبعد ماشيك على اخوانه اخذ فراشه وطلع للحوش ينام هناك بما انا الجو حلو لكن وقف وهو يسمع اصوات بيت عمه بوضوح
تقدم بهدوء بعد ماشاف عزوز ناااايم من التعب وقطب حواجبه بكرهه اول ماسمع صوت وعد
وفجأه دخل صوت ندى: خلف انا اقول احسن تنام تحت
خلف : يا ندى وش فيك انتي بعد اقول ما فيني شي
ندى: وذا الكحه اللي تكحها !؟
وعد بطريقة تدعم فيها خلف : وش بلاك انتي بعد من عمر الدنيا وخلف يكح ماصار شي !؟ خلاص لا تطول السالفه حطي الفراش خلي لادمي ينام
نزلت ندى الفراش وراحت وقربت وعد تفرشه وقف خلف وطلع للحمام واتجهت وعد بغضب لفراش فيصل وهي تضربه برجلها بغضب: فيصلوه قم قم قامت قيامتك
انصدم عقاب من حركتها ( وش فيها ذا المهبوله على المسكييين ؟ )
لكن وعد رجعت تنادي: لا تسوي نفسك نايم وقم
رفع راسه فيصل بملل: وش فيك!؟
وعد: تراني سكت وغطيت عليك وماقلت لاحد انك توك جاي انت وعزوز من برا لكن هاذي اخر مره تسمع!؟ والحين تقول من وين جيييت!؟ وش مطلعك ومحد يدري عنك
فيصل: وعددد خلاص عاد لا تكبرين الموضوع ويجي خلف ويسمع وبعدها تكبر صدق!؟ طلعنا شوي مع اصحابنا وجينا ماكفرنا
وعد بغضب: ماكفرت وانت ريحة الزقاير تعج منك ياغبي!؟ ولله لو يدري ابوي يدفنك بمكانك
فز فيصل يبوس راسها: تكفين ياوعد لا احد يدري وانا اوعدك ماعاد اطلع اخر الليل ابد
وعد : ولا عاد تدخن!؟
فيصل: ابد ماعاد يطب فمي
وخرته وعد بغضب: انخمد وبكره نتفاهم
ابتسم فيصل: ابشر ياوحش
رجعت وهي تضربه وانسدح بسرعه وطلعت وعد لكن انهبل عقاب وهو يناظر عزوز!؟؟ ( معقوله رايح وانا مادريت به!؟ وزقاير بعد ؟! )
اتجهه لعزوز ناوي يتوطى ببطنه بس شافه فعلاً نايم وقرر يأجل الموضوع لصبح لكن وعد هالسوسه مايخفى عليها شي
رجع لفراشه وهو يسمع صوت وعد رجعت لخلف : خليف نمت
رفع راسه خلف بتعب: لا
وعد تقدمت وهي مع ادويته :خذ علاجك للاحتياط وتعرف الجو هالايام بارده
نزل خلف ببتسامة تعب: يعني ما رح تخليني لين اخذه؟
ضحكت وعد: يعني اخذه بالطيب
اخذ خلف ورجع ينسدح بتعب ورجعت وعد تنزل وهي فعلاً مايخفى عليها في بيت ابوها شي تعرف كل شي وتعرف نقطة ضعفهم كلهم لكن تبقى ستر وغطى عليهم
_______________________.
ومن بكره
تووو نور الفجر باان واصوات الاذان ورفع راسه خلف على صوت ركض ابعد البطانيه وهو يشوف سالم وغيث ووجدان يركضون متجهين للحبل اللي عليه ملابسهم واخذوها بحذر عشان ما تخرب باقي الملابس وتدفنهم وعد ورجعوا يركضون بس وقفت وجدان ببتسامه: خلف صحيناك!؟
سالم: زين انك صحيت عشان تلحق الصلاة
خلف : أقاموا!؟
سالم: لا باقي يمدينا
قرب غيث يمد يده لخلف عشان يقومه واعتدل خلف ووقف معه وهو يبتسم له
واتجهه لفيصل يناديه : فيصصصصل يلا صلاة قم يلا
بعد جهد رفع فيصل راسه بتعب: مقدر اداوم اليوم
قرب خلف بحذر: وش فيك!؟ مريض!؟
فيصل : ايييه
غيث: كذااب فيصل عشان مايداوم
خلف: اقول انزل انت بس
ولف لفيصل: قم قم صل وبعدين نتفاهم
نزل خلف وفيصل وسالم وغيث متجهين للمسجد
_______________________. .
وفي بيت الجد قايد
كانت الجده ام ناصر تدور بينهم وتصحيهم لصلاة وتناديهم وكلٍ يقوم وعقاب مايقوم على سيرة
لكن فز اول ما حس بكاس مويه انكب عليه ورفع راسه مصدوم بس شاف مضاوي اللي رمت الكاس وانحاشت
وفز وهو يصرخ : مضاااااوي
وانحاشت مضاوي بخوف وهي تتوزى ورا امها
وفجأه نزل عقاب بغضب: تعاالي
الكل انحاش عن طريقه ولفت ام ناصر: وش بلاك
عقاب بغضب: يا جده كم مره اقولها لا تصحيني بالمويه
مضاوي : احسسسن نصحيك لصلاة وعبادة ربي ولا حياة لمن تنادي
عقاب : والله والله والله لاخذها من عيونك يا ام لسان
ام ناصر: انت للي تحدنا لييه ماتقوم تصلي
هيا ضحكت من المطبخ: يقول النوم سلطان يمه
لف عقاب بغضب : وانا صادق ما تركتها بكيفي وبعدين الحين اصليها تونا فالوقت
دخل الجد وعزوز جايين من الصلاة والتفت الجد بغضب: عقاااااب وينك عن الصلاة ؟
عقاب : ماصحيت ياجدي
الجد: عجيييب والله هذا وانت قدوة اخوانك!؟
عقاب: ترا اول مره ياجدي
الجد : خلصنا بس اخلص صل
طلع عقاب يصلي وهو يتحلف بمضاوي للحين
_______________________.
وفي بيت النوخذه
فزت ليلى تركض من نومها قبل يطلع ابوها : يبه يبه
لف ابو نهيان : ليلى شنو فيچ خرعتيني يابنتي
ليلى ابعدت شعرها وهي تبتسم: بتروح الدكان !؟
ابو نهيان: ايه
ليلى لفت بضحك: زين انت وعدتنا نروح ويا امي السوق
ابو نهيان : ايه
ليلى : والسوق يبه يبي له فلوس
ضحك ابو ليلى وهو يفتش جيبه: والله يا بنتي ما معي الحين روحي حق جابر قولي له يعطيج فلوس
ليلى ميلت فمها بضيق : يبه انت تعرف جابر بس اجيب طاري الفلوس يحمق علي ( يعصب) ويزفني ( يهاوشني)
صد ابو نهيان : زين زين انا اكلمه روحي ناديه
راحت ليلى مبتسمه وهي تدق باب جابر اللي طلع وهو يمشط شعره: خير اللهم اجلعه خير شعندچ من صباح الله خير!؟
ليلى ببتسامه تغيضه: ابوي يناديك تحت
نزلت قبله وشافت امها عند ابوها ووقفت بينهم ببتسامه
جابر: هلا يبه
ابو نهيان: معك فلوس!؟
جابر : معي
ابو نهيان: زين تنطر هنيه لين ما يصير حزة السوق وتاخذ امك وخواتك لسوق وانا اذا جيت بالليل اعطيك فلوسك
جابر : بس يبه انا
ابو نهيان: شفيك انت!؟ إحنا في منطقه غريبه امك ماتدل فيها شي تبيهم يهيتون بالسوق ما احد معاهم اسمع الكلام بس
ناظر جابر بحقد في ليلى ولفت ليلى تهمس: يبه قوله اذا بغيت شي ما يرفض اني اخذه
ابو نهيان لف لجابر: اذا ليلى تبي شي لا تردها
جابر: يبه هاذي خبله كل شي تاخذه
ابو نهيان : شعليك فيها انت !؟ قلنا لك بنعطيك بيزاتك .
صد جابر بغضب وطلع ابو نهيان ولف جابر واسرع لليلى اللي لفت ورا امها وهي تتحامى فيها
ام نهيان: وخرر يا صبي !؟ ما تشوفها ورا ظهري ولا خلاص طالت وشمخت
جابر بغضب: يمممه علمي بنتچ هاذي لو ما قضبت لسانها وشرها عني والله والله اصكها راشدي ( كف) يربيها من جديد
ليلى بضحك: ماعوووزك حبيبي الله يخلي ابوي يكسر ايدك اذا مديتها
شيخه: بس بس انتم ما تشبعون نجره وهواش خلاص
جابر: زييين يا ليلووه زين انا اراويچ شغلچ
تركهم وطلع لغرفته ولفت ام نهيان بغضب: انتي وبعدين معاچ ما تيوزييين عن اخوچ طفرتيييه طلعتيه من طوره
ليلى : يمه هو اللي يبدا
شيخه: ليلووه يالعياااره كلنا شايفينچ
صدت ليلى بضحك: خلاص يا جماعه اروح اراضيه
طلعت تركض لغرفة جابر وفتحتها وهي تبتسم وفز جابر بغضب: ولا حقتني بعد!؟
غمضت ليلى اول ما ركض لها وهو يمسك شعرها قالت بضحك: لا لا ياخوي تعوذ من ابليس لا يوسوس لك وتذبح اختك
جابر : ياليت اذبچ وافتك انتي ما تستحين ما تنتخين !؟ لسانچ شطوله!؟
ليلى : ياخوي المسامح كريييم انا اخيييتك اصغر العنقود مايصير تطقني
جابر : والله !؟
ليلى ابعدت وهي تبوس راسه: العذر والسموحه ياجابر ماقصدت والله
ابعد جابر بشك: خييير شعندج تأسفين
ليلى: افا انت اخوي وانا احبك واعتذر منك
ابتسم جابر بخفه وهو متعود على حركاتها: زين زين خلاص سامحتچ
ليلى: ياااااحبيبي والله
طلعت وهي ترجع لغرفتها ببتسامه وفتحت الشبابيك وهي تحب الصبح ونسيمه
(اذا فيه شي غلط رقعوا لنا يا اهل الكويتï؟½ï؟½ï؟½ï؟½)
_______________________.
وفي بيت ابو خلف
كانوا مجتمعين على الفطور وخلف يراقب حنان اللي تمشط شعر وجدان وتسرحه لها بالشرايط واماني كالعاده تقراء لابوها الجريده
وام خلف وام وعد جالسيين يسولفون بينهم
ونزلت ندى بهدوء: يبه
لف ابو خلف : خييير؟؟
ندى: فيصل يقول ماهو مداوم مريض !
فزت ام وعد: وش فيه ؟
ابو خلف : اقول قولي له لو مايجي بجي اتوطى ببطنه
وعد: خليه انا اروح له
طلعت وعد وهي تناظر في فيصل اللي يممثل التعب تقدمت وهي تخصر : فيصلوه فز على حيلك
فيصل: مقدر انا تعبان
وعد : تكذب على من هاه على من اقسم بالله يا فيصل لو ما تفز على حيلك وتلبس وتنزل وتطس دوامك والله لانزل واقول لابوي وخلف وين كنت
فز فيصل بخوف : وش فيك يا وعد كملي جميلك والله تعبان صدق
وعد : من دون كلام قم اللبس وانزل وتعرفني ما اعيد كلامي مرتين
نزلت وتركت فيصل المذهول اللي يعرفها ما تثني كلامها وللحين ما يقدر يخالفها وهي عنده بمثابة ابوه وخلف قام بملل ولبس ونزل والكل يناظره
ابو خلف : وش بلاك انت ؟؟
فيصل : كنت مصدع وعطتني وعد مسكن
ابو خلف : ماشاء الله
جلس فيصل بجنب خلف اللي يناظره بشك يعرف انه يكذب ومتعود على كذبه
ولف خلف على امه اللي تمسح على كتفه وهمست: هاه يمه كيف صدرك تحس انك احسن
نزل خلف يبوس يدها: ايه يمه بخيييير دامك معي
ام خلف : الله يرضى عليك
قربت حنان وهي تمد لخلف سنادويش بعد ما رتبت ساندويشات اخوانها اللي بياخذونها للمدرسه معهم : خلف خذ
اخذها خلف وهو ينزلها قدامه : تأكلها اماني انا بطلع وراي شغل
ابو خلف : خللف
لف خلف : سم
ابو خلف : لا اعيد كلامي
خلف : زين
اخذ اغراضه وهو يناظر خواته: تبون شي!؟
الكل : سلامتك
طلع متجهه للباب وقدامه ابوه بس وقف او ما حس احد يسحبه وراء
لف وشاف فيصل واقف وهمس : خليف معك فلوس
خلف : ايه ليه!؟
فيصل : ابي مصروف مابي ساندويش وعصير
خلف : ليه وش فيها
فيصل: خلف انا كبرت كل العيال معنا صاروا مايجيبون هالسنادويشات الا انا حتى عزوز عقاب يعطيه مصروف
سكت خلف بضيق ومد يده لجيبه وهو يعطيه اللي معه والتفت وشاف سالم وغيث يناظرونه
جلس وهو يناديهم: تعالوا
غيث : خلف ابي ريالين
ضحك خلف : ابشششر يا سي السيد كم غيث عندنا
ابتسم غيث وقرب خلف : سالم تعال كم تبي انت
سالم بحرج: لا مابي انا
فيصل ضربه بخفه: اخس يا عزيز النفس
خلف : فيصل بكسرها
فيصل: خلاص اسفين
خلف : ليه يا سالم !؟
سالم: ما احتاجها انا معي فسحتي
هز راسه خلف باعتراض : ماعليه زيادة الخير خيرين
كان سالم منحرج وهو يشوف انها اخر الريالات اللي بجيب خلف ومامعه شي الا كم ريال هو حاول يرفض بس غصبه خلف واخذها متفشل من خلف اللي يعطيهم كل شي معه ويجلس بدون شي
طلعوا لكن وجدان وقفت خلف: شفتك تعطيهم ما تخاف الله وتقول عندي اخت مسكينه اعطيها معهم
ضحك خلف : افا شلون نسينا ام لساااان تبشرين وانتي بعد كم تبين
وجدان بضحك: ابي خمسسه ريال
خلف : اووف خمسه !؟ وش بتسوين بها
وجدان: بكشخ فيها على بنات المدرسه وبشتري كل شي بالمقصف نفسي فيه واشتري لشهد بعد لانها دايماً تشتري لي معها
ضحك خلف بضيق صدر وهو يتحسر على اخوانه من بخل ابوه : ابشري وتم هااذي خمسة ريال
اقبلت عليه وجدان تضممه وتبوس راسه ويده وضحك خلف يدفها بمزح: يلا المدرسه تحتري
طلعت وجدان بسرعه
_______________________.
وفي بيت الجد قايد
كان عقاب كالعاده يعقب على اخوانه لكن مسك عزوز بطرف وهو معصب: تعال تعال انت ابيييك ابيك
عزوز بخوف : ليه!؟
عقاب: وين كنت امس طاس!؟ اخر الليل انت وفيصلوه
عزوز : هاه
عقاب: هاه !؟ تحسب اني غشيم انت مستغفلني ورايح !؟ ولا زود عليها محد يدري ، الحين تعلمني وين رحتوا امس
عزوز: والله ما رحنا مكان شين كانوا عازمينا عيال معنا بالمدرسه واستحينا منهم
عقاب: وانا هنا رجل كرسي ليه ما قلتي
عزوز: تعرف عمي بيرفض ان فيصل يروح واذا فيصل ما راح انت بتعيي اني ما اروح
عقاب: ماشاء الله ! اسمعني زين ياعزوز هاذي اول مره واخر مره تسويها تبي تطس مكان تقولي وانا اللي اوديك اما هياته على كيفك معصي
عزوز :ابشر ، بس انت كيف دريت
عقاب : مب شغلك ويلا يلا على مدرستك وانتبه لدروسك وفيصلوه الهايت ذا لا تمشي وراه بكل شي يقوله حط عقلك في راسك
عزوز : طيب
اخذ السجاده اللي لاف فيها كتبه ونزل بسرعه ونزل عقاب لكن ابتسم بمكر اول ما شاف مضاوي واقفه عند الراديو تضبطه على اذاعة اف ام اخذ شماغه وهو يلفه بحركه دائريه واتجهه لها
وصرخت مضاوي او ماعرفت وش نيته وقبل تنحاش حشرها بالزاويه
مضاوي : عقااب امانه لا كل شي لا التلسيع ( مدري تعرفون ذا الحركه ولا بس حنا المعنفين)
عقاب : سبحان الله اتفقنا كذا اقولك كل شي الا المويه وتسوينها والحييين صار دورك
مضاوي وهي ضامه نفسها بخوف : عقاب والله تعلم بالجسم
عقاب : هذا اللي ابيه
ابعد وهو يلف الشماغ ونفضها بسرعه وهو يوجهها لها ولسعتها وصرخت مضاوي وعقاب يضحك
وطلعت عهد : كفوووو اخوي كفو برد حرتنا فيييييها
سحر : اوووح والله تعور
هيا : ياويلك من امي يا عقاب
مضاوي : ييييمه يبببببه وينكم خليتوني عند هالمفتري
شهد بضحك: عقاب لحظه قبل تكمل عطني مصروفي بروح عمي عصب
وقف عقاب وهو يعطيها المصروف وركضت مضاوي وهي تسحب طاسة المويه اللي بطرف : والله ان قربت لرشها عليك
صفقت عهد بضحك: اييييوه شكل اليوم فيه تسليه جديده
لف عليهم عقاب وهو يلسع فالهوى ودخلوا كلهم المطبخ بخوف
وطلعوا ام ناصر وابو ناصر: عقاااب وش تسوي
عقاب : اخذ حقي
مضاوي : تكفى يا يبه بنتك بتروح فيها
نزل الجد يبي يبعد عقاب بس وقفهم دق الباب وكان خلف اللي وقف برا وهو يسمع صوت مضاوي عالي وقرر يدخل يشوف وش فيه وركضت هيا تفتح ودخلوا البنات
واول ماشافته مضاوي صرخت وهو تطلع شباصتها ورمتها بضحك على خلف . نخيتك يا خلييف يا ولد اخوي تاخذ حقي وفكني منه
ضحك خلف وهو يسحب شماغه: ابشري بعزك ياعمممتي مضاوي ابشري
عقاب : خييير وش ذا الغش
مضاوي : لا والله فزعه فزعه
ابتداء حرب تلسيع الاشمغه بين عقاب وخلف لكن كان خلف اسرع من عقاب اللي رجع ورا وتعثر وطاح ونط عليه خلف يثبته والكل يضحك
ابو ناصر: ايييه تستاهل يالفسقان
عقاب: غش غششش وتغرير
مضاوي : تكفى ياخلف خلني بنتقم انا
خلف : تعالي
طارت عيون عقاب : مضاوي مويه لا
مضاوي بضحك شرير : تونا متفقيييين ان التلسيع لا وعيييت وجاء دوري
صبت كل المويه على عقاب اللي يصارخ ويتحلف ولف خلف اللي يضحك : هيييييا افتحي الباب النحشه النحشه
فتحت هيا الباب وركض خلف وهو يقول بصوت عالي وضحك: الوعد الدكان ياجدي
طلع يركض وهو يدري عقاب بيلعن خيره لو مسكه
وانحاشت مضاوي وهو تدخل ورا محمد اللي توه صحى من النوم
عقاب: والله ما تسلمين لكن ماهو الحين
الجد وقف : يلا يلا بس عشان تروح معنا
عقاب: ماعليك رايح عشان اتوطى في بطن خلف
محمد : ههههههههه يا شين الهياط ياعقاب مزعجنا فالاخير كفخوك
عقاب: ماعليه ياعمي كل شي ماخوذ حقه
لف ينادي: عهد جهزي لي ملابس
طلعت عهد مبتسمه: طيب طيب
وقفت سحر على الباب وهو مبتسمه لخلف اللي في كل الاحوال يدافع عن البنات كلهم سواءً مزح او جد ضحكت وهي للحين صوت ضحكته في اذنها ورجعت تكمل الفطور وهي تسمع هواشهم
_______________________.
وفي بيت النوخذه
تجهزوا يطلعون لسوق ونزل جابر اللي مهتم بمظهره جداً وهو يضبط شماغه والتفت على ليلى بغضب: خييير لا يكون بتروحين ويانا بهالشكل
لفت ليلى تناظر نفسها بالمرايه وكانت لابسه عبايه سودا وطرحه : ليه شفيه شكلي
ام نهيان : ليلوووه عن العياره ! لا يمه بتلبس نقاب
جاب: عبالي بعد
شيخه: يلا خلونا نروح بدري
ولفت ليلى تلبس النقاب لكن كان هالنقاب يكشف عيونها وحواجبها وشوي من جبينها ( هو نفسه اللثمه عندنا مدري تعرفون نقاب الكويتين او لا ï؟½ï؟½)
ولفت وهي ترمش بعيونها بعبط: تكفى جابر بالله ما اجنن
لف جابر بغضب بيضربها بس مسكته امه : بس بس يا يمه ذبحتوني
ولفت على ليلى تضربها: وانتي خلاص طقت چبدي منچ
ضحكت ليلى: اتغشمر وياكم
جابر: احسن لچ ما تعيدنيها
شيخه: ياربي منكم جهال انتم!؟
جابر: يلا بس
طلعوا متجهين لسوق وليلى بتموت من الوناسه
_______________________.
اما في طريق خلف
للي وقف خلف اول ما حس انه انكتم وقف وهو يكح جلس وهو يكح ويحاول ياخذ نفس لين يهدأ واول ما هدى رفع راسه ووقف لكن هاجمته الكحه من جديد وهو يشوف جابر جاي يمشي وكل شوي يلف يضرب وحده وراه بالمسبحه وواضح مزح لكن ماعطته كحته مجال يشوف هاللي وراه وصد وهو يكح
وفجأه قال جابر: خلف !؟خلف صح
مارد خلف ويحاول يسيطر على كحته واخيراً قال بصوت مبحوح: ايه هلا جابر
جابر: شفيك مريض!؟
خلف اللي كرهه انه يوقف قدامه وهو وجهه مخنوق وصوته مايطلع من كثر ما يكح ورفع يده يمسح على صدره :شوي عن اذنك
راح وتركه وماعطاه مجال يتكلم
ام نيهان: تعرفه !
جابر :ايه هذا واحد بالسوق
ام نهيان: شفيه خنت حيلي
شيخه: الظاهر مريض
جابر : مدري عنه
ليلى: شعلينا فيه يلا بنلحق
جابر: اييه عاد انتي لا احد يكلمچ اذا صرتي بتروحين السوق لو يموتون كل الناس قدامچ ماعليچ
طنشت ليلى وهي تناظر حولها متجاهله اللي صار
_______________________.
وفي بيت ابو خلف
ركضت ندى على صوت الباب وفتحته وابتسمت : هلا هلا خالي ماجد هلا
طلعت ام وعد: هلا هلا بأخيي
ماجد: هلافيييك
طلعت حنان: يوووه ياخالي توني اقول اشتقنا لك ماجيت من زمان
ماجد: تشتاق لك العافيه ياحنون لكن انشغلت
طلت اماني من فوق وهي فرحانه ونزلت تركض: هلا هلا باللي له الخافق يهلي
ضحك ماجد وهو يتسقبلها بالاحضان: هلا با ام الاحساس والرقه
اماني : شكرا يا خال
ام وعد: يلا يلا جيبوا القهوه
رفع ماجد الكيس اللي معاه يعطيه ندى: خذي هالخرابيط على قولتك مريت البقاله قلت اجيب معي شي
ندى: ياخالي والله انك نعمه
ضحك ماجد: ايييه بطينيه ادخلي ادخلي
جلسوا ولف ماجد: وين الباقين
ام وعد: تعرف مدارس ووعد راحت لبنات عمها وبتجي الحين
ماجد: ايييه عاد وعد لازم تشقر على احوال الرعيه هنا وهناك
ام وعد : ايه الله يصلحها
اماني مرت تركض : بنادي وعد
ماجد : عجلي
_______________________.
وفي بيت الجد
كانت ام خلف والجده جالسين بالحوش والبنات بالسطح يسولفون مع وعد
لكن دخلت عليهم اماني مبتسمه: وعود خالي ماجد تحت
لفت وعد ببتسامه: والله
مضاوي : يووووه الحييين تختفون كلكم
ضحكت وعد:عاد هذا ماجد
عهد: اففف ياليت عندي خوال
اماني بضحك: اذكري الله راس المال خال واحد لا تصكينه عييييين ويموت
ضحكت عهد: عاد مالقيت الا ماجد اصكه عين على وش ياعيني
هيا: ازعجتونا بماجد طسوا له فكونا
انسدحت مضاوي وهي تكتب : خلصوا وتعالوا بنلعب
سحر: وش بنلعب!؟
مضاوي : حيوان جماد انسان
سحر: نلعب لين يجون يلا
وزعت مضاوي الاوراق وهم يلعبون والغش الواضح الصريح عند مضاوي لكن تنكر وتجحد بقوة وجهه
_______________________.
وفي السوق
دخل خلف بعد ما هدا وفتح دكانهم وجلس بتعب ماله حيل يطلع برا ودخل جده وعقاب اللي تقدم وهو ناوي يغسل شراعه بس ابعد وهو يشوف وجهه احمر واضح مكتوم
ابو ناصر: خلف فيك شي!؟
خلف : لا ياجدي
ابو ناصر: وجهك احمر
خلف: عوايد ياجدي
ابو ناصر : عقاب يلا يلا طلع الاغراض اللي بنحرج عليها وسمعني صوتك
طارت عيون عقاب: جدي تكفى كل شي الا اني احرج
ابو ناصر: ليييه عيب ولا حرام
عقاب : لا بس مابي
ابو ناصر: اصه بس من تبي يصارخ انا ولا خلف يلا بس اطلع وخلصني
عقاب صد بغضب وهو يطلع الاغراض ووقف يحرج عليها بكرهه لكن جمد وانقطع صوته اول ما مروه عايله لكن معهم بنت عليها جمال عيون سكته ما قدر يفتح فمه وينطق وتصلب يناظرهم ليييين تعدوه وفز على صوت محمد: عقاب وراك متصلب
التفت له بهدوء: سبحاان الله الخالق
محمد : سبحانه بس وش شفت
قبل يرد عقاب وصله صوت ابو ناصر: عقاااب وين صوتك
صد عقاب بضيق: سبحان الله الخالق اللي خلق جدي
ضربه محمد بمزح: استح على وجهك
مارد عقاب ودخل محمد يناظر خلف اللي جالس قدام مكتبه وهو مفكك ازاريره ويحاول يشتغل : خليف فيك شي
خلف : لا
جلسوا وهم يسولفون ووقف خلف وطلع عند عقاب اللي يدور على هالبنت بعيونه
خلف : وش بلاك من تدور!؟
عقاب لف : والله ياخليف شفت لك شوفه لا اله الا لله
خلف لف بملل: يالييييل اعداك عمك
عقاب: لا بس غريبين على السوق وغير كذا غصب تناظر
خلف : منهم!؟
عقاب: مدري
ضحك خلف:على الله الخلايف وااضح العايله كلها خربانه
ضحك عقاب وهو يدورها
_______________________.
وفي بيت ابو نادر
طلع ابو نادر وكان نادر جالس مع امه اللي للحين تحاول فيه يتزوج
نادر : طيب يمه طيب وخلينا نقول اني وافقت انا ماعرف البنت
ام نادر: ما يحتاج يمه والله والله لو تشوفها ما تصدق عيونك بسم الله عليها عقل وثقل وركازه وجمال ماشاء الله تبارك الله بتعجبك صدقني حلوووه حلوه حلاوه تبهر العين وانا يمه خاطري فيها لك
ابتسم نادر اللي كان قلبه رهيف وخضر يحب الزين والجمال: ا طيب يمه تدرس ولا لا
ام نادر: تدرس بس بتخرج قريب
نادر: وكم عمرها انا ما اتذكرها
ام نادر بتفكير قديم : والله يمه يوم جابتها امها ونوير بنت عمتي جايبه بنتها ساره
تكتف نادر بملل: وش عرفني نوير متى جابت بنتها ساره
ضحكت ام نادر : لا لا سنة يموت جدك
ننادر: لا حووول
ام نادر: كبيييره يا يمه كبيييره
نادر: يعني كم تقريباً
ام نادر: فوق العشرين
نادر: كذا زييين اجل ، بس تقولين حلوه
ام نادر : ابد تقول للقمر قم وانا اجلس مكانك صدقني يايمه لو تشوفها ما تغمض عيونك حتى
نادر ضحك: يازين وصفك يمه بس وش اسمها قلتي
ام نادر: شوووق وش فيك نسيت
ضحك نادر : زين يمه زين موافق خلاص
وقفت امه وهي تزغرط وطلع نادر يضضحك وهو يفكر باوصاف امه اللي تخليه تخيل انسانه قمة فالجمال وتحمس يشوفها
_______________________.
وفي السوق
كانت ليلى مفتونه وهي تقضي وتتهاوش هي وجابر على كل شي تشتريه ووقفت بغضب تنتظره يحاسب لكن شافت هالاثنين اللي اللي واقفين وهي تتذكر وين شافتهم كان واحد خلف اللي شافته مع جابر بس اللي معه من شهقت اول ماشافت نادر اللي يناديهم بعيد وراحوا له تذكرت انها شافتهم في الحاره بالليل لكن خلف للحين يكح وهي في كل مره تشوفه يكح استغربت بس لف على جابر يقول : يلا يلا بسرعه برجعكم وارجع اساعد ابوي
تحركوا كلهم ومروا من عندهم وجابر مشغول ما انتبه لهم بس سمعت ضحكهم وخلف وصوته المبحوح يقول : الله يخلف عليك يانادر
ورد نادر يضحك: وش اسوي يا خلف اقول كم عمرها تقول سنة يموت جدي جت
عقاب: واااضح حياتك ورديه يا نويدر
نادر بضحك: الله يكفينا شر عيونك يا عقاب
لفت ليلى تناظرهم وهي سمعت اساميهم كلهم لكن نزلت عينها بسرعه اول ماشافت عقاب يناظر خافت ولفت بسرعه مع جابر
اما عقاب شهق : يا عيال لا تفوتكم
لفوا يدورون هاللي وسوست بعقاب بس ما شافوها
خلف :مافيه فايده انت عيونك زايغه دايم
عقاب: والله غصب علي
نادر بضحك: انا مقدر اناظر صراحه انتظر فارسة احلامي اللي جت سنة جدي يموت
الكل :هههههههههههههههههه ههههههه
افترقوا وكل واحد راح يكمل شغله
_______________________.
وفي بيت ابو خلف
كانت وعد جالسه مع خالها وهو يبشرها ان المعهد قبلها
ابتسمت وعد بفرح : الله يعطيك العافيه ياخالي
ماجد: ابد يا وعد ما سويت شي
ام وعد: الله يستر من ابو خلف
ماجد:ماعليك خلف فيه وانا فيه
اماني: بس كيف بتروحين وتجين له بعيد
ماجد: تروح معي تسكن عندي وتجي في اجازة الاسبوع
شهقت ام وعد: يمه لا لا تكفى ياماجد والله يذبحنا ابو خلف
وعد : وش دعوه يمه ترا مع خالي
ام وعد: ادري بس ابوك بيرفض
حنان:والله ابوي صدق بيعصب حتى خلف ما يقدر يسوي شي اذا عصب
ندى: لا ماعلييييك بيقنعه خالي وخلف ويطيع
ام وعد: انتي بس كنت في وحده وصاروا ثنتين
ماجد: بس بس خلوها علي
سكتوا وهم خايفين بس وعد وندى ابداً ماهم مبالين حتى
_______________________.
في بيت الجد قايد
كالعاده الكل اجتمع على الغداء لكن هالمره الضيف ماجد اللي الكل يعرفه ومتعود عليه ويحبه الا عقاب اللي ما يحبه كثير لانه يدري انه هو اللي مقوي راس وعد وممشي كلامها
اما محمد كان جوه قريب جو ماجد ويستانسون مع بعض وامورهم فالسليم وطبعا عزوز وفيصل وسالم رايقين معاه
وقف خلف اول ما جاء له غيث يقوله ان وعد تبيه دخل شافها متكتفه بالحوش : وعد وش فيك ؟
وعد : تعال ابيك
مشى معها خلف وجلس وجلست وعد : خليف خالي ماجد جاء ويقول ان المعهد قبلني
رفع راسه خلف بهدوء :ماشاء الله مبروك ، لكن كلمتي ابوي
وعد: لا هذا دورك وخالي قال بيكلمه
سكت خلف بتفكير وهو مبسوط ان وعد انقبلت ووعد ذكيه وتستحق الفرصه بس الحييين كيف يقنع ابوه
وعد : هاه خليف وش قلت !
خلف :انا ماعندي مانع بس المعهد بعيد ومن بيوديك ويجيبك !؟
وعد: خالي يقول اجي اعيش عنده عشان مايصير كلافه عليكم بالتوصيل تعرف انت الوضع
خلف : هاذي اصعب ياوعد اصعب
وعد : تكفى حاول
وقف خلف : طيب ابشري
ابتسمت وعد : الله يخليك ذخر
رد خلف عليها الابتسامه وطلع وهو قلقان من هالموضوع ماهو ضامن موافقه ابوه
_______________________.
الليل في بيت النوخذه
كانت ليلى مثل العاده اذا اشترت شي جديد تحب توريه ابوها كانت تلبس وتنزل مع الدرج بدلع وضحك : يبه شوف نفنووفي شرايك فيه حلو
ابو ليلى : ماشاء لله ماشاء الله انتي يا ليلى تحلين النفنوف مو هو اللي يحليچ
جابر : يبه يبه الله يهداك لا تقص علييييها وتخليها تاخذ مقلب بنفسها والله مايصير
ليلى : يمممه يممه يالغيييره ماني راده عليييك موووت حره
ابو نهيان: وانتي يا شيخه شنو اشتريتي
شيخه : ابد يبه كم كتاب اتسلى فيهم
ليلى : يبه تكفى بنتنا شوفوا لها حل بتموت من هالكتب
جابر: خلييها على الاقل فيه منها فايده مو مثلچ شاقه القاع وقايله امباع ( مثلï؟½ï؟½) شهقت ليلى :يببببببه شوفه
ابو نهيان: بس يا جابر وش فيك على اختك
جابر ضربها بضحك: اتغشمر وياها يبه
ابو نهيان: انا بدخل اخذ لي غفوه قبل العشاء مابي ازعاج
ام نهيان: زين
بعد ماطلع ابوها طلعت ليلى لغرفتها وهي تسحب الفيديو من الكاميره تبي تدخله بالدي في دي حاولت تشغله ما اشتغل
طلعت تنادي شيخه وجابر بس ماعرفوا له حطته على طرف بملل
_______________________.!
وفي بيت ابو خلف
كانوا جالسين كلهم بالحوش وماجد موجود وخلف يناظره يبيه يبدأ
وقال ماجد:اقول يا ابو خلف
خلف : سم يا ماجد
ماجد وهو يناظر وعد: قدمت لوعد في المعهد اللي قريب بيتي وقبلوها
لف ابو خلف بقوه: وشو!؟؟
خلف : يبه مافيها شي اذا تعلمت شي ينفعها
ابو خلف : وش اللي تتعلم خلاص ماعاد لها الا بيت رجلها
كانت وعد بتتكلم بس وقفها خلف وهو يسكتها: يبه الدنيا ماهي بيت وزواج في احتياجات ثانيه
ماجد: يا ابو خلف ما خبرتك جاهل
ابو خلف : مايصير يا ماجد وبعدين افرض اني قبلت وين تروح من يوديها محد فاضي
ماجد: بسيطه تجي عندي واذا خلصت دوامها ارجعها
حط ابو خلف يدينه على راسه: لا لا مايصير
خلف : يصير يا يبه يصير انت بس تعوذ من ابليس
فيصل : شلون يصير!؟ شتبي بالدراسه خلاص
لفوا كلهم بغضب عليه واولهم وعد اللي قالت بغضب: انت اقصر لسانك احسن
ماجد : اذا انت ما تهتم بالدراسه براحتك لكن الناس الفاهمه تبي تدرس وتتعلم
كانوا البنات يراقبون بعض بخوف وسكت ابو خلف: بفكر بفكر
ماجد : معك يومين عشان تلحق على بداية الدوام
ابو خلف : يصير خير
طلع وتركهم ولف خلف على فيصل: انت ورا ما تاكل تبن!؟ هاه وش دخلك فيها تدرس ولا تنسدح
فيصل: انا صادق خلاص وش تبي
وعد : فيصلوووه احسن لك اسكت
ماجد: فكونا من الهواش الحين وقومي يااماني عطيني اغراضي بروح
حنان: وين ياخالي ماشبعنا منك!؟
ماجد: والله عندي شغل يومين وارجع ان شاء الله
وقفوا يودعونه ولفت ام وعد بضيق: ياوعد يا امي وش لك بالشقى انتي
وعد: وش اللي وش لي بالشقا يمه انا بشوف نفسي بدرس بتعلم ترا ما احد دايم لاحد
خلف : خلاص يا وعد اهدي وان شاء الله هينه
الكل سكت وبدا الجو يضيق واختفوا وجدان وسالم شوي بس رجعوا وهم يبتسمون: ممكن تناظرونا شوي
الكل لفوا عليهم ووقفت وجدان: بما ان الوقت بدري قررنا نفرش بالسطح ونجهز لكم اجواء توسع صدوركم شوي
ندى: اصدميني وقولي انك مسويه قهوه وشاهي
سالم: قهوه وشاهي وخرابيط البنت اليييييوم بدعت
وجدان بضحك: بمساعدتك طبعاً
وقف خلف ببتسامه: جت في وقتها
طلعوا كلهم مذهولين ان وجدان اخيراً تحركت وقررت تسوي شي فالبيت واجتمعوا على القهوه وهم يسولفون كالعاده بس وقفت وجدان بعد ما اخذت طاقية سالم وهي تدور عليهم بضحك وتغني : طاق طاق طاقيه رن رن يا جرس
ضحكوا كلهم وهم عارفين نيتها باللعب وكملت تدور عليهم وغمضوا ينتظرونها ترمي الطاقيه وراء احد فيهم ورمتها ورا غيث وابعد وهي تضحك: يلا
لفوا كل واحد يدور الطاقيه وراه وصرخ غيث اول ما حصلها وراه وانطلق يركض ورا وجدان اللي تضحك وتصرخ كل ما قرب غيث منها واخيراً جلست وجدان بمكانه قبل يمسكها
ورجع غيث يغني بنفس الاغنيه غنتها وجدان ورجعوا يغمضون لكن اول ما فتحوا والتفت خلف شاف الطاقيه وراه وضحك: ياا كبر الثقه يا غيث حاطها وراي
اماني: ياويلي عليك بتروح من اول لفه
ركض غيث وخلف يتثاقل بركضته عشان مايمسكه وغيث يضحك والكل يصارخون واخيراً وصل مكان خلف وجلس بتعب ووقف خلف بضحك وهو يرجع يغني مثلهم ويلف واخيراً حط الطاقيه ورا وعد اللي وقفت بشر وهو تضحك وركض خلف والبنات يشجعونه وقبل يوصل مكانها مسكته وصرخوا : يووووه
خلف : غش غش وصلت خلاص
وعد : مو على كيفك ماجلست
ندى: خلف مايمديك تغش
ضحك خلف بتعب : يهبيييي ما اقواها
وعد : اذكر الله علي
قطع عليهم صوت مضاوي اللي تدق الباب اول ماسمعت اصواتهم وضحكهم: هيييييه فكو لي بلعب معكم
وقف سالم يفتح لها هي وهيا ودخلت مضاوي تلعب وهيا جلست تتقهوى
ووقف خلف : انا بروح لعقاب وعمي محمد نادو البنات معكم حرام يجلسون لحالهم( يقصد خوات عقاب )
اماني : حرااام سحر تجلس لحالها
سحب خلف شعرها بضحك: اص بس لا تسمعك البنت
مضاوي : ليييه ما تسمعها !؟ ترا معروفه
هز راسه خلف بعجز من طولة لسانهم ونزل وتركهم
_______________________.
انتهى البارتâ™¥

الوافي معجب بهذا