منتديات صواديف عشاق - عرض مشاركة واحدة

10-05-2023

الجزء الثاني عشر ( الثناعش ):.

(( يوم الاربعاء .. بيت ابو سعود ))

( الساعة 11 الصباح ))

طلعت دلع من غرفتها .. اليوم تاخرت ف النوم .. بالعادة تقوم الساعة 9 ونص ولا عشرة .. بس لانها سهرت امس .. فاليوم عوضت الي سهرته ..

نزلت تحت وسوت لها كوب كوفي كالعادة مع ساندوش لبنة .. ورجعت طلعت فوووق ..

ويوم جات بتدخل غرفتها التفتت على غرفة سعود اللي كان بابها مفتوح والمكيف فيها مطفي .....

دلع باستغراب : مو معقووولة ..!؟؟!!؟ راح الشغل ..!؟!؟! معجزة ..!!!!

شافت الخدامة طالعة من غرفة سالم اللي جنبها ...
دلع : يا ريني ....
ريني : نأم مدام ...؟؟
دلع : سعود طلع .........؟؟؟
ريني : لأ.... من امس مافي جا ...
دلع : ؟؟؟؟ ما جا...؟؟ وانا اقول هذا مو معقووول يروح الشغل .. وخصوصا انه اليوم اربعاء .. شكله نايم عند واحد من ربعه .....
دلع للخدامة: طيب خلاص روحي شكرا ....

راحت الخدامة تكمل شغلها .. ودلع دخلت غرفتها تقرالها كتاب تتسلى فيه ..

___________________________________

(( ف مركز الشرطة .. ))

( الساعة 2 الظهر )

كان سعود قاعد في زنزانة التوقيف مع 3 اشخاص .. ما يعرف عنهم ولاشي .. وكل واحد وجهه ما يطمن بخير ابد .... للي مجروح وجهه .. واللي وجه من الوصاخة صاير اسود وريحته طالعة .. والثاني الدب اللي قاعد بدون فنيلة بس بسروال السنة ...

وهو الويحد فيهم اللي كان قاعد بملابس نظيفة وشكله مرتب ... والكل يطالعه نظرات تخوف .....

شوي الا يجي الضابط جايب الغدا ... فتح الباب ..
الضابط : سعود ...
سعود قام : نعم ..؟؟؟
الضابط : هذا غداك ارسلوه اهلك ...
اخذ سعود الكيس بامتنان : مشكور ما تقصر... بس لو سمحت
الضابط : نعم ..؟؟
سعود : ا... ما اقدر استخدم التليفون ...
الضابط ابتسم : بسالك وبردلك خبر قريب انشالله
سعود : مشكوووور ...

التفت الضابط : هذا غداكم انت وياه ...

حط الضابط الغدا ع الارض وطلع وسكر الزنزانة وراه وراح ....

اما سعود فقعد ومااات خوف يوم شاف الثلاثة يطالعونه كلهم بوقت واحد ويطالعون اكله..
سعود " يماااا... بسم الله علي.. اخاف اغص بالاكل الحين واموووت من عيونهم "

فتح الكيس وحصل صحن مغلف بقصدير .. ويوم كشف القصدير كان فيه خبز ومشاوي .. كباب واوصال لحم .. وقطع دجاج .. مع علبة بيبسي ...

ابتسم سعود .. كان مرررة الجوع بيقطعه ... الا ويقطع وناسته ..

الاول : اقول يابو الشباب ... منت بعازمنا ...؟؟؟؟
الثاني : أي يعني بتاكل كل هذا لوحدك ..؟؟؟

فتح سعود عيونه ع الاخير من الخوف .. اخذه له قطعة كباب واوصال حطها ف خبزة ... والدف الصحن للثلاثة : ا .. خذوووه حلال عليكم .... ما ابغاه

الدب : متاكد ....؟؟؟
سعود : ا.. أي أي متاكد .. م .. ما ابغى شبعان .. و ... والحمدلله ..

بدوا الثلاثة ياكلون وسعود في آخر الزاوية وياكل لوحده وميت من الخوف " ياربيييييي طلعني من هالمكان قريب .. "

___________________________________

(( بيت ابو فيصل ))

( الساعة 5 العصر .. )

دخل ابو فيصل البيت وكان تعبان من الشغل ... وماله خلق ولا احد ...

شوي الا تقرب منه بنته الصغيرة شوق : بابااااااااا .... انتا زييييييت ( انتا جيت )
ابو فيصل بدون نفس : هلا حبيبتي ... تعبان وخري عني....
تعلقت شوق الصغيرة برجله : ما ابغى ... ابغى تسيلني ( تشيلني )
ابو فيصل : لا حول ولا قوة الا بالله .. ( على صوته ) اقولك وخري عني تفهمين .. وخري لايجيك كف الحين يصقع راسك بالجدار .. !!!!!!!

خافت شوق وراحت تركض لامها اللي كانت ف المطبخ وتسوي الغدا ...

شوق متعلقة بامها وتصيح : ماما .. ما ماااااااااااا ..
نسايم بالملعقة اللي بيدها : نعم حبيبتي ..؟؟ وشفيك تصيحين ...؟؟
شوق : اهئ اهئ .. بابا ... بابا يبغى ... يدلبني ( يضربني )....!!
نسايم اتنهت : رجع بابا ...؟؟
شوق : أي ... اهئ اهئ ...
نسايم : استغفر الله العظيم واتوب اليه .... طيب حبيبتي .. روحي غرفتك ولما يجهز الغدا بجي باخذك ..
شوق : لاااااااااااااااااااا ...

نسايم حطت الملعقة وشالتها وودتها لغرفة .... وبعدها مرت على غرفتها وحصلت زوجها هناك ...

نسايم مبتسمة : رجعت ..؟؟؟
ابو فيصل معقد حواجبه وضايق خلقه : يعني وش شايفة ..؟؟
نسايم " يارب صبرني بس .." : شلون الدوام ...؟؟
ابو فيصل : زففففففففت ....!!
نسايم ابتسمت ابتسامة اوسع : معليش .. لانه اليوم اربعاء .. يللا بكرة ترتاح وتنام زين....
ابو فيصل ولا كانه يسمعها : خلص الغدا..؟؟
نسايم : أي جاهز احطه الحين ...؟؟ ولا تتسبح اول ...؟؟
ابو فيصل : اكيد الحين .. ماني قادر اتسبح .. بعد الغدا بتسبح وانام ..
نسايم وهي طالعة : على راحتك ...

طلعت نسايم وراحت تحط الغدا " مااااااالت عليك وعلى اللي بيسولف معاك .. ما تنعى وجه والله "

___________________________________

(( بيت ابو سعود ))

( الساعة 6 ونص المغرب )

ام سعود كانت قاعدة ف غرفتها وتفكر بوالدها الللي الحين مرمي ف السجن وما تدري وش صار عليه .. وشلون عايش ..؟؟ وش يشرب..؟؟ وش ياكل ..؟؟ ما تدري عنه أي شي...

ومن الخوف قامت وراحت لغرفة ابو سعود اللي جنب غرفتها... ودخلت

ام سعود بعصبية : ابو سعووود ... يا عبدالله قووووم ...
قام ابو سعود من النوم : وش فيييييييك ...؟؟ وش صاير..؟؟
ام سعود : وش صاير بعد ...؟؟ ولدك ف التوقيف وانت نايم على سرير مريح ...!!!!!
قام ابو سعود بزهق : ما عندك سالفة والله ... اذا هذي سالفتك .. لو سمحتي برى ابغى انام ....
ام سعود قعدت على السرير : شوووووووف ...!!! ولدك ياللي ما عند قلب ف التوقيف .. وتقوللي ابغى انام ...؟؟!؟!!؟!؟!
ابو سعود : والله ولدك اللي جاب كل هذا لنفسه .. لو انه تعاون معاي وخلاني اساعده كان الحين هو في بيته مرتاح ومريّح .. بس ولدك اللي بعناده دايم يجيب لنفسه المشاكل ...
ام سعود : طيب قوووم .. قووم الحين روح طلع الولد بلا كلام المبادئ والاخلاق حقك هذا .....
ابو سعود عصب : ماني رايح مكان .. وهالمرة خليه يدفع ثمن اغلاطه بدون تدخلي .. انا ماني داخل ف الموضوع .. خليه يحل مشكلته بنفسه ويتحمل اللي سواه ..
ام سعود : يا ربيييييي منك ... افففففففففف ... انا مدري شلون صرت ابووو ...!!!
ابو سعود : وانا مدري انتي شلون صرتي ام .. اللي زيك خطابة ويخب عليهم بعد ....!!

بدى صوت الاثنين يعلى ... وهواشهم يزيد .....

ام سعود : خليني اكلم ولدي... وولا والله لا اروح بنفسي مركز الشرطة واطلعه ...
ابو سعود : قسم بالله ان رحتي هناك لا يكون آخر يوم بيني وبينك ..
ام سعود : دامك تهدد.. اتصل ف ولدي .. ابغى اكلمه.. اتصل اشوووووووف ... !!
ابو سعود : اللهم طولك يا روووح ...!!! يا حرمة استهدي بالله وخليني انام ارتاح شوي .. يكفي طول اليوم من الصباح وانا ف الشغل اكد واتعب ... !!!!
ام سعود : يووووووه ... ترى زهقتنا بهالسالفة .. انا بالشغل .. وانا اتعب .. درينا .. وتراك مو اول واحد ولا آخر واحد يشتغل من الصباح ويتعب ....

ابو سعود قام ومسكها وطلعها من الغرفة وسكر الباب .........

ام سعود من ورى الباب : طيب يا عبدالله .... انا اوريك ....
ابو سعود يتحرطم : مااالت عليك من حرمة ... !!!!!!

___________________________________

(( بيت ابو بندر ))

( الساعة 8 بالليل )

ابتسم رائد وهو بنزل من السيارة .... كان شايل بيده كيس صغير فيه هدية لدانة ..
مشى لباب البيت ودق الباب .... وبعد دقيقة انفتح الباب .. وكانت دانة ...

دانة : اهليييييييييييييييييييييييين .... نور البيت ...!!!
رائد باسها على خدها : بنور الحلوين ....

استحت دانة ومشت مع زوجها للمجلس .. كانت لابسة فستان لتحت الركبة بشوي .. ابيض وعليه نقش باللون البيج ... وداخل فيه تركواز .... ومستشورة الشعر وفاتحته ..

دخلوا المجلس وجلسته دانة وجنبها رائد .....
رائد : شلون الحلوة اليوم ...؟؟؟
دانة : بخير الحمدلله .... انت شلونك ...؟؟ وشلون الشغل ..؟؟
رائد : الحمدلله كل شي حلووو .. دام الحلووو هذا كله قدامي ...
ابتسمت دانة بخجل ونزلت راسها ....

رائد : تستحين دانة ....؟؟؟؟!!!! خخخخخخخ
دانة حمر زيادة وجهها .............
رائد : فدييييييييت اللي يستحي انا ...... هههه
دانة : رائد خلاااااااااااص .......
رائد :خخخخخ طيب خلاص خلاص ... شوفي شصار بوجهك .... أي صح
دانة : شفيك ..؟؟
طلع رائد الكيس : جبتلك هدية ...
دانة متفاجأة : شكرااااااااا ... ليش كلفت نفسك ..؟؟
رائد : مافي كلافة ولاشي .. كم دانة انا عندي...؟؟

ابتسمت دانة وافتحت الكيس وشافت داخله علبة كحلية من المخمل .. طلعتها وفتحتها .... الا تحصل ساعة حلوة من الذهب الابيض .... تلمع في وجهها ..

ما عرفته دانة وش تقول ... التفتت على رائد والمتنان واضح عليها : تجننننن ...!!!!!
رائد : اهم شي عجبتك ....
دانة : من جد مررررررررة رووووووعة ... !!!!

طلعت الساعة ولبستها ف يدها ... ورفعتها عشان يشوفها رائد عليها...

مسك رائد يدها وباسها : يدك هي اللي تحليها والله .. !!

----------------------------------------------

@@@@@@@@@@@@@@@@@@@@@@@@@@@@@@@@@@@@@

بعد يومين من الاحداث السابقة .... سعود للحين ف التوقيف ... وللحين مو راضي يعترف بشي .. ويقول انه ماله دخل بالسالفة كليا ...

اما ابو سعود .. فكان ينتظر ويشوف ولده وش بيسوي وشلون بيطلع نفسه من الموقف اللي انحط فيه ...... وكان متوقع يصير أي شي فيه ... بما فيه السجن ....

دانة ورائد عايشين حياتهم على احسن حال .. وما في شي يشغلهم الا المستقبل وبس...!!

ابو فيصل قعداته مع ابو غادة كثرانة ... وصاير يحرضه على اهله .. وانه لازم ما يعطيهم حرية زايدة ولازم ينتبهلهم على الطالعة والنازلة .. وابو غادة مع كل يوم تبدا فكرة جديدة تدخل في باله ....

(( يوم السبت .. مكتب المحامي حمد ))

( الساعة 1 الظهر )

خلص ثامر محاضراته بدري .. وقرر يطلع ويتغدا .. وهو بالسيارة .. فكر يمر على اخوه بندر ويطلع معاه يتغدوا سوا ....
طلع جواله ودق على بندر .....

بندر : الو ...
ثامر : الووووو ...
بندر : هلا ... هلا ثامر ...
ثامر : كيف الحال ...؟؟
بندر : هههه بخير .. توني من ساعتين شايفك ....
ثامر : هههههه أي والله صدقت ...اسمع ... انت وين الحين ..؟؟
بندر : انا ف الطريق للبيت ليش...؟؟
ثامر : والله ..؟؟؟ اصبر طيب لاترجع .....
بندر : ليش..؟؟
ثامر : قوم خلينا نروح لنا مطعم نتغدى سوا ... من زمان عن الغدا ف المطاعم ..
بندر : أي والله فكرة ... خلاص .. يقولون فتحوا كنتاكي ف المريكبات جديد .. تروح ..؟
ثامر : المريكبااااات ...؟؟ ياحبك للاماكن البعيدة ....
بندر : يللا عاااد.. والله جديد .. نروح نشوف المكان ...
ثامر : خلاص طيب .. اشوفك هناك ...
بندر : اوكي ...
ثامر : مع السلامة ...
بندر : مع السلامة ..

سكر ثامر عن بندر وغير طريقه للمريكبات .......

___________________________________

(( قدام الثانوية .. سيارة ابو غادة ))

( الساعة 2 الظهر .. )

كانت غادة واقفة برى مع اورى كالعادة وينتظرون سياراتهم ... يحبون الوقفة برى عشان الحارس ياخذ وقت بين ما يتصل ف المدرسة ويقولهم على السيارات اللي جات واسماء البنات .. عشان كذا صاروا يوقفون برى ....

وبين ما غادة واقفة شافت سيارة وقفت قدامها وانفتح الشباك .. وشاااافت ابوها واقف..

نقزت غادة من الفرح : وااااااااااي ... بابا جاي ياخذني ... !!
اروى وقفت : هذا ابوووك..؟؟ والله مو شكله كبير
غادة ضربتها على كتفها : يا حمااارة تراه ابووي .. يللا بروح باي
اروى : هههه باي ...

ركبت غادة قدام جنب ابوها وتحركت السيارة ......

ويوم صاروا على الشارع العام .... ينتظرون الاشارة تفتح

ابو غادة : ممكن سؤال ..؟؟ وش كنتي تسوين برى ..؟؟
غادة : واقفة انتظر السواق .. ما دريت انك بتجي تاخذني
ابو غادة : يعني لو دريتي اني انا جاي آخذك بتدخلين ...
غادة : لأ.... احسن لما اوقف برى .. اشوف السيارة وعلى طول اركب .. مو اقعد واستنى ساعة تتكرم الابلة تنادي ...
ابو غادة بحدة : طيب اسمعي .. من بكرة طلعة كذا برى مافي ... فاهمة ...؟؟
غادة : أي بس بابا انا دايم اوقف برى ما تقول لي شي ..
ابو غادة : خلاااص .. من اليوم مااافي .. تقعدين برى وش تسوين..؟؟ تبين احد يتحرش فيك يعني ..؟!؟!؟! ها..؟!؟!!؟ تكلمي .. تبغي شباب يغازلوووونك ...!؟!؟؟!!؟
غادة انصدمت : بابا وش قاعد تقوووول ...؟؟؟ لا تكلمني كذا ... انت تعرفني زين.. انا تربيتك .... !!!!! شلون تقول لي كذا ..؟؟؟؟
ابو غادة بدا يصارخ : وشكلي ما عرفت اربي ... جايبلي وحدة توقف برى تستعرف جمالها قدام الشبااااب واللي رايح واللي جاي....!!!!!! من بكرة لو اشوووفك برى ياويلك .. ولا تحسبين اني ما بكون موجود وما بشوفك.. تراني اراقب كل حركة تسوينها بس بدون ما تدرين فاهمة ...!؟؟!؟! من الحين اقوولك ... احترمي نفسك وخلك ماشية زي الناس .. ولعب بنات الشوااارع هذا مو عندي فاااهمة ..!.!؟!؟!!؟؟!؟!؟!

انصدمت غادة ... ابد ما توقعت .. ابوها .. صديقها . يقول لها هالكلام .. وش بقى .. بهالكلام اتهمها باشياء كثيرة مو من اخلاقها اصلا ... واشياء ما سوتها من الاساس ..

ما درت بعمرها الا ودموووع القهر نازلة على خدودها ..... وما وقفت لين وصلوا البيت .. وساعتها نزلت وصقعت الباب .. ودخلت البيت وهي داخلة ف صياح قوي ..

ام غادة شهقت : هييييييييي.... شفيك ...؟؟ غادة حبيبتي كلميني ..

غادة ما عطتها وجه وكملت مشيها لغرفتها .....
بعدها دخل ابو غادة معصب ...

ام غادة : شفيها البنت ...؟؟
ابو غادة : بنتك هذي لو ما ربيتها من جديد.. ما اكون ابراهيم ...
ام غادة : ليش وشفيك ..؟؟ وش سوت ..؟؟
ابو غادة منفعل : واقفتلي قدام الرايح والجاي حضرة جنابها عشان الناس يشوفونها ويعاكسوووونها ....!!!!!!!!
ام غادة : ابراهيم وش هالكلااااام.. ترى بنتنا متربية تربية زينة .. ما يصير تتكلم عليها كذا
ابو غادة عصب : انتي مو شغلك .. انا وبنتي وكيف اتكلم عنها وكيف اعاملها وانا حر .. فاهمة ..؟؟؟؟؟
ام غادة : الحين انت وشفيك...؟ داخل تبغى تهاوش غصب..؟؟ غصب تتهاوش ...؟؟
ابو غادة بعناد : أي ابغى اتهاااوش .. عند مااانع .. اصلا انا ما اهاوش لو ماكان في شي غلط ....

تركها وطلع لغرفته يغير ملابسه .....

ام غادة : اعووووذ بالله .. هذا وش صارله اليوووم ..؟!؟!؟!؟!؟!

___________________________________

( ف كنتاكي المريكبات .. ))

( الساعة 2 ونص )

بما انه كنتاكي هذا جديد ... فكاااان مرررررة زحمممة .. والطلبات جات متاخرة ...

قعد ثامر وبندر اخيرا بعد ما حصلوا لهم طاولة فاضية ياكلون عليها ...

ثامر : شلون الشغل .......؟؟
بندر : بخير الحمدلله ..
ثامر : والقضية اللي مستلمها وش صار فيها .....؟؟
بندر : والله القضية هذي بتطلع لي قروووون .. تدري للحين الشرطة ما عرفت من صاحب الشقة ....!!!
ثامر : أي شقة...؟
بندر : الشقة اللي قلت لك صادوووهم فيها ...
ثامر : آآه .. أي أي صح تذكرت ... تعال . الحين هالشقة وين مكانها ...؟؟
بندر : في حي ( .... )
ثامر : طيب وين بالضبط ....؟؟
بندر :عمارة ال (.....) الدور السادس .. الشقة رقم 22 ..
ثامر : لا تقوووووول .............!!!!!!!!
بندر : بسم الله وشفيك ....؟؟
ثامر: متاكد من الشقة ........؟؟
بندر : أي متاكد ليش..؟؟؟

سكت ثامر شوي وكمل اكله وهو ساكت ..........

بندر : ثامر ....؟؟ انت تعرف شي عن هالشقة ...؟
ثامر بدون ما يطالع ف بندر : لأ....
بندر: اجل وش السالفة قوووووول ...؟؟
ثامر تنهد بعدين : اقولك بس انا مالي دخل ...
بندر : طيب بس قووول وش تعرف عنها ...؟؟

ثامر : بندر انا مرة كنت معزوم انا وخويي عبدالملك ف شقة واحد من الربع القريبين زي ما قال .. المهم هو ولا مرة راح ذاك المكان وانا نفس الشي .. عشان كذا رحنا سوا .. المهم يوم دخلنا الشقة .. وقعدنا شوي .. ما عجبنا الوضع .. اغاني والصوت يفقع الاذن .. كاننا ف ديسكو ... عاد انا يوم التفت على المطبخ الصغير الموجود ف الشقة .. كانوا الشباب يصبون لهم شي ف كاسات صغيرة .. عاد انا جاني فضووول اعرف وش السالفة .. رحت وسالتهم وش هذا .. الا رد علي واحد منهم .. هذا اللي بيخليك مرتااااااااااااح ... انا انصدمت وفهمت وش يقصد هو .. وبسرعة مسكت عبدالملك .. وجينا بنطلع .. الا وتجيني الصدمة الثانية .. يوم فتحت الباب .. شفت حرمة عجوووز ومعاها 3 بنات ... وكل وحدة مغطية وجهها ... الا وتقول العجوز .. وين يا حلوين.. ما بعد تبدى الحفلة .. انا هنا اتخرعت .. طلعت اركض ووراي عبد الملك لين ما وصلنا للسيارات .. ركبناها وتحركنا من هالمنطقة .. وما قلنا لاي احد عن السالفة ..

بندر كان يسمع بكل اهتمام : ومافي أي واحد من اللي كانوا موجودين تعرفهم ..؟؟
ثامر يتذكر : ممممم .... لأ
بندر : وعبدالملك ما يعرف أي واحد منهم .......؟؟
ثامر : مدري والله ما سالته .... اصلا ما ما جبنا طاري هالسالفة من جديد ... وكانها ما صارت .. يعني نسيناها كليا ...
بندر : ومتى صار كل هذا ...........؟؟
ثامر : ا... من حوالي 5 شهووور
بندر : طيب .... تذكر شكل أي واحد فيهم زين ...؟؟
ثامر : اذكر شكل اللي كلمني عن الشراب ... وغيره ما ركزت عليهم ..
بندر : طيب تعرف سعود ولد عبدالله ال ( ..... )؟؟؟
ثامر : سعود ...؟؟ لأ ..
بندر : تصدق احس انه هالقضية قريب بتخلص ... وبتنحل .. وكل واح متورط فيها بيتحاسب ......................
ثامر : شلون ...؟؟
بندر : بعدين بتعرف .. كمل كمل اكلك ...

وكملوا اكلهم وبعدين رجعوا البيت عشان يرتاحون شوي قبل ما يروحون لدواماتهم ...

___________________________________

(( بيت ابو سعود ))

( الساعة 5 المغرب )

ام سعود كانت معصبة وقاعدة ف الصالة ....

ام سعود " افففففف ... هذا وش اسوي معاه ..؟؟ ناوي يفضحنا يعني ...؟؟ ما بقى احد ما درى انه ولدي ف السجن .... والله وراحت فيها سمعتك يا باسمة..!.!!!!!!
وش بتسوين .. وش بتسوين...؟؟؟؟؟ مدري والله .. بس هالرجال بيجنني .... ناوي يذبحني وانا توني صغيرة ...!!!!!!!! افففففففففف "

جات لينا : مامااااااااااااا .... ماما ....
ام سعود بزهق : نعم..؟؟ خير ..؟؟ وشتبغين بعد ..؟!؟!؟
لينا : بسم الله ...!!!!! وش قلنا .. هذا وللحين ما قلت شي .. لو اقووول وش بتسوين..؟؟
ام سعود عصبت : قولي بسرعة ولا انقلعي مالي خلقك ... !!!
لينا : خلاص خلاص .. مو لازم ... انا بقول لابوي ع الاقل يسمع ......!!!
ام سعود : تعاااالي هنا .. تعالي يللي ما تربيتي زي الناس .. انا شكلي بعيد تربيتك من جديد .. واقص لك لسانك هالمرة ....!!!

لينا شردت بسرعة لغرفتها وقفلت الباب وشبكت النت وقعدت تكلم صديقاتها ع المسن..

وف الصالة ....

قررت ام سعود تدق على القسم ... وبالفعل دقت ....

الموظف : الووووووو
باسمة : الوووو السلام عليكم ...
الموظف : وعليكم السلام ....
باسمة : لو سمحت اخوووي .. انا ولدي عندكم ف التوقيف ... وابغى اكلم لضابط المسؤووول ...
الموظف : مافي احد مداوم الحين صراحة غير الضابط مشاري....
باسمة : طيب ممكن تعطيني اياه لو سمحت ....؟؟؟
الموظف : لحظة بس ....

شوي الا حولها على الضابط مشاري اللي كان يستجوب سعود .....

الضابط : الووو
باسمة : الو السلام عليكم
الضابط : وعليكم السلام ..
باسمة : اخوووي انا ام سعود .....
الضابط : يا هلا والله ... آمري اختي ...
باسمة : ياخوي ولدي وش صار عليه ...؟؟ وش بتسوون فيه ...؟؟
الضابط : يا اختي انتي عيني خير .. وانشالله ما يصير الا اللي كتبه ربي..
باسمة : ليش ولدي وش مسوي ..؟؟
الضابط : للحين مانا متاكدين .... بس لما نتاكد بنبلغكم انشالله .....
باسمة : اجل ليش حاطينخ ورامينه ف المركز....؟؟؟؟
الضابط : يا اختي هذي اجراءات سمية لازم نطبقها ......
باسمة قامت تصارخ: وش رسمية ... ماخذ ولدي ومخليه ينام ع الارض وياكل من الاكل الخربان وتقول لي اجراءات رسمية ..!؟!؟!؟! دامكم مو متاكدين من الشي اللي مسويه ولدي المفروض ما تحتجزووووه ....!!!!!!
الضابط انفعل : يا ام سعود ... انتي تعرفين ولدك بالضبط وش مشتبه فيه ...؟؟؟ قبل ما تقعدين تهاوشين وتعترضين ع القوانين .... اتاكدي ولدك وش مسوي ....؟؟
باسمة : وش مسوي ...؟؟؟

الضابط : ولدك مشتبه فيه انه مستاجر شقة .. يهرب لها خمر .. ومخدرات ... ويجيبون فيها بنات ... وصارت فيها كثير حوادث اغتصاااب ...!!!!!!!!!!!!
باسمة انصدمت : ولدي انا ..؟!؟!؟!؟!؟ سعووود ..!؟!؟!؟!
الضابط حس انه ام سعود منصدمه : بس للحين ما اتاكدنا من انه هو اللي مستاجرها .. بس في ناس شاهجين انه هو .. وهالناس هذي هم ربعه .... عشان كذا في ادلة قوية ضده ... بس للحين ماهي كافية عشان تدينه ...!!!!!!
باسمة سكتت وبعدين قالت : اخ مشاري....
الضابط : نعم ...؟؟
باسمة : ان كان ولدي له يد ف هالسالفة .. لله يخليك حطه ف السجن للابد .. خليه يتعفن فيه ... ما نبغى نشوووف وجه طول الحياة ..... طلبتك تنفذ لي هالشي لو صدق ولدي كان ف السالفة ......!!!!!!!!!!!!!!

انصدم الضابط .. بس بنفس الوقت تفهم مو قف باسمة ... اللي ربت ولدها وتعبت عليه –كما يظن- والحين يفاجئها بجريمة زي هالجريمة ..... !!!!!!!!!!!!

___________________________________

(( بيت ابو غادة ))

( الساعة 7 بالليل )

كانت غادة قاعدة ف الصالة تطالع تلفزيووووون .... وجنبها سمر اختها معاها ... وامها قاعدة تكلم ف التليفون ....

شوي الا ابوها نازل وقالب وجهه ومكشر .....

سمر : اووه اوووه ... وش فيه ابو الشباب معصب...؟!؟!؟!؟!

حقرها ابوها وكمل مشيه لين ما وصل عند ام غادة واشر لها تسكر السماعة شوي ..

سكرت ام غادة : وين رايح...؟؟
ابو غادة : يعني وين..؟؟ بروح اتمشى انا وعثمان ......
ام غادة : طيب بتتعشى معانا ولا معاه..؟
ابو غادة : بتعشى معاه ...
ام غادة : الله معاك ..
ابو غادة :توصون على شي.........؟؟
ام غادة : سلامتك ...
سمر : الا نبغى ....
ابو غادة : افف .. شتبغين خلصيني...
سمر : ابغى اروح المكتبة ..
ابو غادة : ليش..؟؟
سمر : ابغى اقلام....
ابو غادة بعصبية مالها داعي : مافي اقلام .. توني من يومين مشتريلك مقلمة كاملة.. وين وديتيها ...
سمر : ضاعت ...
ابو غادة : مو شغلي.. خليك بدون مقلمة عشان تتعلمي تحافظي على الاشياء ... لاقي الفلوووس ف الشارع انا .......؟؟ ولا قاعد لكم على بنك...!!!!!!!!؟؟

طلع من البيت بعد ما سكر الباب بقوة ...

سمر : يووووووووه .. هذا وش فيه معصب كذا..؟؟؟ ولاعمره سوى هالحركات ....!!
ام غادة : معليه ولا تحطين ف خاطرك .. معصب شوي من الشغل ..

لفت غادة زعلانة : لا مو من الشغل .. من الصباح وهو يهزئ فيني وانا ساكتة له ... خلاااص عاااااد .. تراه زهقنا ... وش فيه قلب فجأة كذا ...؟؟ ما سوينا له شي...!!!!

ام غادة تنهدت : ه.... لا حول ولا قوة الا بالله ..

@@@@@@@@@@@@@@@@@@@@@@@@@@@@@@@@@@@@

(( يوم الاحد .. بيت ام عبيد ))

( الساعة 4 العصر )

ام سعود : والله يا ام عبيد تعبت معاه ... تخيلي ينام ف غرفة ثانية .. وما ياكل معانا .. وطول وقته برى ... وما يقعد يسولف ولا يكلمنا .... وبس هواش ف هواش.....

ام عبيد : انتي الغلطااانة ...!!
ام سعود : انا ......؟!؟!!؟ وش سويت انا .. هو اللي دايم يتسبب ويسوي مشاكل..
ام عبيد : انتي يالهبلة .. المفروض ما تخليه ينام ف غرفة بروحه ...
ام سعود : وش اسويله ..؟؟ اقفل عليه الباب ف غرفتي يعني ..؟؟
ام عبيد : لا يا ذكية .... روحي وراه الغرفة ذيك.. لتخليه يبعد عنك ابد ويروح غرفة ثانية .. خليك دوم مع زوجك ف نفس المكان .... دلليه وراعيه وطيبي خاطره عشان يصير خاتم ف اصبعك.....
ام سعود : ما ينفع .... ينررررررفز .... مررة يقهههر .. حركاته سخيفة ...
ام عبيد : معليه .. طولي بالك وكبري عقلك .. ودلليه شوي .. وبتشوفين بعد فترة ما بيرفضلك ولا نص طلب.....
ام سعود : رايك كذا ..؟؟؟
ام عبيد : مو بس رايي .... رايي كل الناس كذا ....
ام سعود : خلاص بشووووف
ام عبيد : مو تشوفين .... من اليوم تتغيرين ... من اليوم .. صارحي زوجك بكل شي .. وخليك طيبة معاه .... وبتتحسن علاقتكم انشالله ...

___________________________________

(( سجن التوقيف .. ))

( الساعة 9 بالليل )

كان سعووود طفشااان وواصلة معااااه .. خلااااااااااص .. هالمكان ما يقدر يتحمله ابد ... ولا عمره انحبس بمكان اكثر من 5 ساعات ... بس في هالمكان بالذات .. صارله 3 ايام ... ينام على الارض ... عايش ف الحر وعل المكيفات الضعيفة واللي ريحتها مرة موحلوة ... هذا غير الطفش والملل ... الثلاثة اللي معاه يخوفون ومالهم امان .. مايدري وش سالفتهم .. وش مسوين....؟؟ يمكن ذابحين ناس .. يمكن خاطفين ناس... او يمكن ارهابيين ...!!!!! كان مرة خايف ويااااائس لدرجة ....

وقف عند الحدايد او اللي يسمونها بالاحرى ( القضبان ) .. وقام يصاااارخ : طلعوووونيييييييييييييييييييي.... خلاااااااص ... خلاص والله خلااااااص ... حرام عليكم ابغى اطلللللللع .... اقولكم طلعووووووووووووني ... الحين طلعووووني ... انا ولد عبدالله ماني قاعد ف الهامكان ... سمعتووووووووووو .... انا ما اقعد ف هالمكاان .. انا مكاني مو هناااااااااااا... مو هنااااااااااااا..... طلعوووووووووووووووووووني ... الحين تطلعوووني .. دقوا على ابوي وهو بيتفاهم معاكم ... دقوا عليه الحيييييييييييييييييييييييين ....!!

جا الضابط معصب : نعم..؟؟ خير...؟؟ وش عندك تصارخ ...؟؟

سعود : ما تسمع ...؟؟ اقولك طلعنييييي.... والله طفشت .. !! انا ما سويت شي فاهم...؟؟ ما سويت شي....
الضابط : هالموضوع تناقشه مع الضابط مشاري من معااااااي ....
سعود بانفعال : وينه هالضااابط مشاااري ها...؟؟؟ ناديلي اياااه الحين ... الحين جييييييبه ........
الضابط : بس عااااد..!.!!!!!! انت لك وجه تتكلم بعد ...؟؟ اللي زيك ماله حق ينطق بحرف واحد .....
سعود مسك شعره وشده بقوة : انت ما تفهم ...؟؟؟؟ ابي اطلع ابي اطللللللللع .... !!
ما ني قادر اتحمممممممممممممممممممل ....!!!!!!!

تركه الضابك وراح وخلاه يكمل صرااااخ مع الجدار ....

---------------------------------------------
(( بيت ابو سعود ))

( الساعة 11 بالليل )

بعد ما هاوشت لينا وخلتها تطلع وتنام .... ودلع بعد نامت .. وتاكدت انه سالم نايم ومعاه فيصل بالغرفة ..... قعدت ف الصالة بعد ما لبست شي زي الناس .... تنتظر زوجها وهي تحاول انها تكون الزوجة الطيبة الحنووونة المتفهمة اللي يتكلمون عنها الناس دايم .......... واللي تراعي زوجها وتحرص على راحته ومصلحته ....

شوي الا دخل ابو سعود .......

قامت ام سعود وقربت : تاخرت ....؟؟؟
ابو سعود بهدوء : كان عندي واحد جاي يبغاني بموضوع ....

كان خاطرها تسال عن الموضوع بس مسكت نفسها وسكتت ... ما تبغى تخرب كل شي هي مخططة له .....

باسمة : احطلك العشا...؟؟؟
ابو سعود مستغرب : ها...؟؟؟ أي طيب ... بغير وبنزل ....

ابتسمت باسمة وراحت تحط له الاكل لاول مرة من مدة طويلة .. صح ما كان ودها .. بس اللي ببالها كان يستاهل هالتنازلات ......

ويوم نزل ابو سعود قعدت معاه وتعشوا والوضع كان هادئ .. سوالف عادية ... وطبيعية مرة .....

ابو سعود : كم باقي للمدارس...؟؟؟
ام سعود : حوالي شهر ونص .. بعدين اجازة اسبوووع .. وبعدين يداومون شهرين تقريبا .......
ابو سعود : الله يعينهم ....
ام سعود : ترى انا هالمدرسة اللي تدرس فيها لينا مو عاجبتني ابد ....
ابو سعود : ليش...؟؟
ام سعود : مديرتهم مرررررة كريهة ...
ابو سعود : رجعنا ...؟؟؟ شعليك من الحرمة انتي ..؟؟ اهم شي التدريس فيها زين .. ومدرسة محترمة .. كل اللي فيها راقيين .. مافيهل لحوووج وهمج ..... !!!!!

قلبت ام سعود وجهها وكملت اكلها بهدوووووووء .......

ابو سعود : شرايكم ناخذ لنا شاليهات ع الويكند ....؟؟؟
ام سعود : ممممم ... مع انه ام فلان عازمتني على عرس ولدها ... بس بشووووف ...
ابو سعود حط الاكل على السفرة وقلب وجهه : بس هذا اللي انتي فالحة فيه...؟؟ عزايم واعراس ...؟؟؟ عيالك وينهم من حياتك ها...؟؟ انا ويني من حياتك..؟؟ قوليلي ... لاني صراحة ما ادري .. وصرت بصراحة اشك انك تعتبرينا عائلتك....!!!!!!

قام وطلع غرفته ينام .. وتركها قاعدة محبطة .. وتلوم نفسها على اللي قالته ...

@@@@@@@@@@@@@@@@@@@@@@@@@@@@@@@@@@@@

(( يوم الاثنين ... بيت ابو فيصل ))

( الساعة 11 الصباح )

رن التليفون الصباح على غير العادة ... قامت نسايم من النوم وردت ...

نسايم : الوووو ....
ام نسايم : الوووو ... السلام عليكم
تجمعت الدموع كلها ف عيون نسايم : ماما...؟!؟!؟!؟ يا هلا وعليكم السلام ..
ام نسايم : كيف حالك يا بنتي ..؟؟ وحشتيني والله ...
نسايم : ماما حتى انتوا وحشتوني << طلع العرق الحجازي الحين ... !! خخخخخ
كيف بابا وعمو عصام وعمو غازي...؟؟؟؟
ام نسايم : طيبين والله كلهم يسلموا عليكي.... ها ايش صار مع عسمان..؟؟ ( عثمان بالحجازي ههههه )
نسايم تنهدت : ه ... خليها على ربي يا ماما ؟.. واللهي مو راضي .. وكل ما كلمته بالموضوع ... يقوم يهاوش ويسكره ...
ام نسايم : ياربيييييي... هادا ايش مفكر نفسه ....؟؟؟ تراكي بنتنا قبل ما تكوني جوزته ( زوجته ) ..........!!!
نسايم : والله يا ماما اكلمه... ودايما يصارخ ويزاعق عليا .. وانا ما سويت له حاجة .. بس .. تعبت واللهي تعبت .... ايش اعمل..؟؟؟
ام نسايم : اففففف... شوفي يا بنتي .. هادي الاشكال .. ما ينفع معاها اليب.. انا حخلي ابوكي يكلمه ويتصرف معاه .. جاله البلا انشالله ... يبغى يحرمني من بنتي ..!؟!؟ لا والله العظيم لا اوريه ... انتي ما عليكي .. سوي ولا كانك كلمتيني طيب..؟؟ وانا حخلي ابوكي يأدب هلّي ما اعرف ايش شكله ...؟!؟!؟! ولا يهمك ... خليها على امك..... !!
نسايم ابتسمت : هههههه تسلمي يا ماما .. خليه يكلمه .. لاني مرة تعبت وقرفااانة من هالعيشة .... !!!!

___________________________________

(( بيت ابو سعود ))

( الساعة 12 ونص الظهر )

كانت قاعدة في غرفتها وزهقانة ... القعدة ف البيت خلتها تعوض الوزن اللي خسرته ايام كانت مكتئبة وما تاكل شي .... والحين نقدر نقول انه جسمها صار من احلى ما يكون ... بس طبعا النفسية عكس كل هذا ....

يوم عن يوم . دلع تزداد يأس من هالحياة .. ويوم عن يوم تزيد ساعات قعدتها ف الغرفة لوحدها .... ويوم عن يوم بعد .. صارت تتمنى الموت .. ويوم عن يوم .. ابتعدت عن أي شي يخليها تحتك في ام سعود ويسبب لها مشاكل.. لانه اللي جاها للحين كافي .. ما تبغى اكثر من كذا .........

ممدة على السرير وماسكة المجلة اللي قرأتها اكثر من 20 مرة هالاسبوع .. وتقراها من جديد .. لابسة بيجاما وردية ... ورافعة شعرها أي كلام .. وطبعا الوجه اقشر املح..

جا على بالها تطلب لها فطور من مطعم .. بس ما عرفت وش تطلب ... وبعد التفكير .. خطر على بالها تطلب بيتزا للغدا اللي ما بقاله غير ساعتين تقريبا .. بس بعدين فكرت انه قبل ما يوصلوا لينا وسالم من المدرسة بربع ساعة بتطلب .. عشان ما يبرد الاكل ..

ومع هذا كان خاطرها فاكل من برى ... جات بتتصل من الغرفة بس تذكرت انه ام سعود شايلته .. عشان كذا طلعت من الغرفة وتاكدت انه ام سعود مو موجودة ف البيت ابد .. ونزلت للدور اللي تحت .... رفعت سماعة التليفون واتصلت على مطعم وطلبت فطاير جبن وزعتر ولبنة ....

وقعدت على التفزيون تشوف لها أي شي يسليها .... ويوم مرت الخدامة ....

دلع : اقووول ريني ....
ريني : نأم...؟؟
دلع : وين ماما باسمة ...؟؟
ريني : ماما باسمة روووح بيت ماما شريفة ..
دلع : اهاا .... طيب سعود راح الشغل اليوم بعد...؟؟
ريني : مافي معلوووم
دلع : شلون ما في معلوم...؟؟ ما شفتيه الصباح ...؟؟
ريني : ما في موجود ... انا مافي شوف من 3 يوم....
دلع عقدت حااجبها : ها...؟؟ شلون..؟؟ ما رجع البيت ابد ...؟؟
ريني : لأ ....
دلع : غرييييييييييييييييييبة...!!!!
ريني : تبغي شي تاني ....؟؟
دلع : ها..؟؟ لأ خلاص روحي شكرا .....

راحت الخدامة وخلت دلع مستغربة من السالفة ....

دلع : هذا وين راح...؟؟ مو معقولة صارله 3 ايام مو ف البيت..!؟!؟!؟ والله لو يدري عمي لا يذبحه .....!!!!! الا بس والله يمكن .. انا ما صرت اشوووفه ابد ... اجل صدق السالفة ... الله يستر بس ......

___________________________________

(( جامعة محمد بن فهد ))

( الساعة 1 الظهر )

كانت ريم ف الجامعة وقاعدة ف الكافيتيرا متنرفزة وواصلة معاها .......

وحدة من البنات : شفيك معصبة ...؟
ريم بانفعال : هالسواق انا بذبحه ... خلاااااص زهقت .... !!!!!
البنت : ليش...؟؟
ريم : يعني صارلي ساعة ونص انتظر .. قلنا الطريق طويل طيب .. بس مو كذا يتاخر ...!! اففففففففففففففففففف
البنت : هههههه تبين اوصلك.....؟؟
ريم : لأ.... ما ابغى شكرا ...

طلعت جوالها واتصلت على ابوها .....

ابو رائد : الوووو ...
ريم : الووو .... بابا والله زهههههههههقت ...!!
ابو رائد : ليش ..؟؟ شفيك حبيبي ...؟؟
ريم : تخيل صارلي ساعة ونص قاعدة انتظر السواق ... بس ما جا .... بابا انا مرة تعبانة ابغى انام .....
ابو رائد : طيب زين بشوفلك رائد .....
ريم : اوكي ... باااي

سكر ابو رائد من بنته ودق على رائد ....

رائد : هلا والله .....
ابو رائد : هههه يا حليلك يا رائد ... والله وصاير رايق ... اثره الزواج فادك كثير ...!!!
رائد: هههههههه شخبارك يبا ...؟؟
ابو رائد : بخير .... كذا يالقاطع ما تتصل تشوف شخباري ..؟؟ تبغاني انا اللي اتص دايم يعني ...؟؟
رائد : هههههههه افاااا .. اصلا انت دومك على بالي ... بس يبا تعرف ابو بندر الله يهديه .. ما يحب احد يفتح جواله او يكلم فيه وهو ف الشغل ... يقول وقت الشغل شغل .. ووقت السوالف سوالف .....
ابو رائد : ادري .. والله انه رجال .. هو الوحيد اللي عرف يضبطكم والله ... عفيا عليه ... الا صح والله .. اخذتني بالسوالف ونسيت اقولك شي ....
رائد : آمر .....
ابو رائد : ما يآمر عليك عدو .. بس اختك مدري وش فيه السواق تاخر عليها .. صارله ساعة ونص ما راح لها .... وهي تقول انها مرة تعبانة .... وخلص دوامها من زمان وتبغى ترجع ترتاح .... تقدر تروح تجيبها ...؟؟؟؟
رائد : يبااااااا ... حرام عليك وربي جامعتها بعيدة .... والله مرة بعيدة عن الورشة .. !!!!
ابو رائد :معليه يا رائد .. بس اليوم ... وانا هالسواق الحيواااان بتفاهم معاه بعدين .. بس اهم شي اختك الحين ... تدري فيها ما تتحمل شي لا عصبت .. واخاف تبدى تصيح هناك .. واذا صاحت محد بيوقفها ....
رائد : هذي البنت تدليعك لها والله خربها ... يبا البنت كبرت .. خلاص .. كم باقيلها عشان تتزوج ..؟؟ اقل من سنتين .. خليها تعتمد على نفسها ... وخليها تنتظر لين ما يوصل لها السواق .... بلا دلع وبلا خرابيط ....!!!!
ابو رائد : يا رائد هذي ريم ... مو أي احد ... تكفى قوم جيبها .. الله يخليك ..
رائد تنهد : ه..... خلاص تامر امر ... ابشر .. الحين بطلع بجيبها .. وبرجع معاها البيت..
ابو رائد : فديتك انا .. هذا ولدي اللي افتخر فيه ...!!!

سكر رائد عن ابوه وراح يجيب اخته من الجامعة بعد ما استأذن من ابو بندر طبعا اللي وافق على طووووول وبدون تردد ....

___________________________________

(( بيت ابو سعود ... ))

( الساعة 7 بالليل )

نزل ابو سعود اللي كان توه قايم من النوم .... وقعد ف الصالة مع لينا وسالم ...

ابو سعود : وين فيصل ..؟؟ غريبة مو معاك اليوم...؟؟
سالم : أي اليوم بيروح مع زوجة ابوه عشان تودي خواته الصغار .. عندهم مو عد تطعيم
ابو سعود : اي .. شخبار الثانوي معاك....؟؟
سالم : بخير الحمدلله ....
ابو سعود : يللا شد حيلك ....

التفت ابو سعود على لينا اللي كانت تتفرج على الصور اللي عنجها بالآي بود ...

ابو سعود : وانتي يا ام التكنولوجيا ... وشلون الدراسة معاك..؟؟ ولا ماتدرين ولا وين ربي راميك...؟؟؟
لينا تركت الآي بود : حرااام عليك ولله اني اذاكر .....
ابو سعود : متى تذاكرين انشالله ..؟؟ انا ما اشوفك غير تلعبين ف البيت ....
لينا : اذاكر بس محد يشوفني ...

ورجعت مسكت الآي بود وحطت السماعات ف اذنها وقعدت تسمع اغاني ..

ابو سعود : هذي اختك مجنووونة اغاني ...!!
سالم : ههههههه كلها مجنووونة مو بس ع الاغاني ....
ابو سعود : دلع وين...؟؟
سالم : والله مدري .. بس اكيد ف غرفتها ....
ابو سعود : طيب روح ناديها خليها تقعد معانا .. حرام تقعد ف الغرفة بروحها كذا ...
سالم قام : انشالله ...

راح سالم ينادي دلع ... اما لينا فشالت السماعات فجأة وكانها تذكرت شي ..
لينا : أي صح بابا .....
ابو سعود : ها..؟؟ وش طلباتك بعد اليوم...؟؟
لينا ابتسمت بدلع : بابا ... حبيبييييييييييييييييييي ... يا قلبي انا ...
ابو سعود : طيب وبعدين ...؟؟
لينا : بابا نبغى نروح البر ف الويكند .....
ابو سعود: البر.........؟!؟!؟؟! ما اصدق .... وش الطاري الحين ...؟؟
لينا : ادري قرف ووصاخة .. بس مدري .. اليوم وحدة من البنات سوت عرض عن رحلتها مع اهلها للبر وكان مرة حلووو وشكله وناااسة ...
ابو سعود مسوي فيها مهتم : وايش الوناسة ف الموضوع ...؟؟؟
لينا تتفلسف وهي ولا دارية عن شي : اا.. يعني .. الجلسة حول النار والاغاني والطق .. وسواقة الددسن .... احس مرررة فلة ..!!
ابو سعود : طيب ما قالولك عن الحمامات شلون شكلها ...؟؟ حفر ف الارض ... وبنص الليل يمكن يطلعلك عقرب ولا حيةولا ضب ف الخيمة .... ولا قالولك عن الحر .. وعن الرمل اللي يطير ف الاكل وانتي تاكلين...؟!!؟!؟

لينا قامت بخوووف : وي وي وي .. كل هذا ...؟؟!!؟ خلاص خلاص خلاص ... هونت ماني رايحة ولا مكان ....

الا بدخلة ام سعود : بدال البر شرايكم نروح الشاليهات ....؟؟؟؟؟

لينا بوناسة : أي والللللللله...!؟!؟!؟!!؟ وناااااااااسة
ابو سعود طالع ام سعود باستغراب : مو توك امس تقولين عندك عرس وما تبين تفوتينه....؟؟؟
ام سعود بطيبة : اهلي وزوجي اهم من أي عرس ف هالكوووون ....!!!!
لينا مو مصدقة : ما اصدق ... ماما فيك حرارة ولا شي...؟؟؟

ام سعود خزتها بقوة ..........

لينا : خلاص خلاص .. بس صدق مرة متغيرة هاليومين .... شصاير ف الدنيا ..؟!!؟؟!
ام سعود : يعني مو عاجبك هالتغيير ...؟؟
لينا : لا لا لا اكيد عاجبني ... بس اسال يعني .....
ابو سعود حايس بوزه : الله يديم هالتغيير بس .....!!!!
ام سعود بضحكة مصطنعة : ا... آمين يا رب ... الحين عبدالله وش قلت على الشاليهات..؟؟؟؟
ابو سعود : ان ما عندي أي مانع .. شوفي العيال وقرروا وين تبغوا تروحوا ....
لينا من الوناااسة : وااااااااااااااي .... فلة فلة فلة .. هالويكند خيااااااااااااااااال .....!!!

شوي الا تجي دلع ومعاها سالم .. وام سعود من شافتها بغت تطردها بس مسكت نفسها .....

دلع مبتسمة : السلام عليكم ...
ابو سعود : وليكم السلام... وينك يا دلع...؟ ليش قاعدة ف غرفتك .. تعالي انزلي واقعدي هنا .. محد غريب ...
دلع قعدت جنب لينا : تسلم يا عمي .. بس كنت اصلي .....
ام سعود : الحين تصلين...؟؟ ليش ما صليتي المغرب من زمان ...؟؟؟
دلع : ا.... لأ .. كنت اصلي العشا ....

ام سعود سكتت .. كان خاطرها تفشل دلع بس دلع شكلها طلعت اذكى منها وعرفت كيف تفشلها ...

لينا : وااااي سالم .. تخيل بنروح الشاليهات الويكند...
سالم فرح : والله....؟؟؟ غريبة وافقتوا ... حلوووو...
لينا : تخيل حتى امك موافقة .. وتقول ما بتروح عرس .. تقول اننا اهم من اعراسها ..
سالم : احلفي ... وش هالتطور ..؟ غرييييييييييييييييبة ...!!! من وين طالعة الشمس اليوم ....؟؟؟

وجه باسمة حمّر من الفشلة .. ما توقعت يوم انه نظرة عيالها لها كذا .... ما كانت تتوقع انهم يائسين من انها تحن عليهم ف يوم ... بس مع هذا الشعور... ما هز منها ولا شي ....

قامت ام سعود : انا بجيب الشاهي ....

دلع هذي الساعة اخذت فرصتها ...

دلع : عمي ...؟؟ شفيك سكت ...؟؟؟
ابو سعود : دلع لا تساليني هالسؤال من جديد ...
دلع : عمي حرااام عليك .. هذا ولدك وشلون تطرده من البيت ...؟؟؟؟؟
ابو سعود : من قالك اني طردته ...؟؟؟ ان ما طردته ولا شي ..
دلع : اجل وينه....؟؟؟ ما جا البيت من زمان .....
ابو سعود تنهد وفكر شوي بعدين : يا دلع انا لازم اقولكم الحين السالفة .. عشان ما تسالوني كثير .. بس ما ابغى احد يناقشني ولا يسالني ليش سويت كذا .. انا ابوه وانا ادرى بمصلحته ... وسويت اللي اتاكدت انه صح ....

لينا : بابا شسالفة ...؟؟
ابو سعود : اسمعوا .. انا بقولكم السالفة كاملة .. من الاول للاخير.. اخوكم سعود .. انا غلطت في تربيته .. كنت مشغول عنه .. دلعته زيادة عن اللزوم وعطيته كل شي يتمناه ... لين طلع وتجاوز الحدود .. وصاير يغلط اغلاط كبيرة مرة .. ما اقدر اتغاضى عنها .. ولا يقدر المجتمع نفسه اللي احنا فيه بتغاضى عنها بعد ... اخوكم سوى تصرف .. مو لازم اذكره ... بس استاهل على هالشي انه الشرطة تتصل وتطلبه للتحقيق...

لينا فاتحة عيونها الثنتين ع الاخير : لا تقول ....!!! ذبح احد ...؟؟؟
ابو سعود : اففففف... قلت لك مو شغلك .. بس اخوك الحين ف التوقيف يحققون معاه ويشوفون اذا كان متهم ولا لأ ... ساعتها بيصدرون في حقه الحكم اللي يستاهله ... وانا بما اني مو راضي على افعاله الاخيرة ابد .. وتغاضيت عن زلاته الكثيرة .. وصلت لمرحلة ما اقدر اسكت عنه .. ولا يتعاقب على اللي يسويه .. فان كان ما سوى شي فبيطلع من التوقيف ويكمل حياته عادي بس في هالحالة انا ماني مهمله زي اول .. بربيه من جديد واخليه يطلع رجال زي الناس ... زي سالم .. اما اذا طلع مجرم وسجنوه .. فانا اول واحد بكون راضي عن هالحكم .. لاني خلااااص .. اكتفيت من مشاكله وافعاله ... خليه يتحمل مسؤولية تصرفاته شوي ... الرجال كبر... واللي زيه الحين متزوجين وفاتحين بيوووت ومكونين عائلة ..... !!!!

سكتوا الكل من الصدمة ... وكل واحد فيهم قام يفكر بالشي اللس سواه سعود واللي يستاهل الواحد عليه يدخل التوقيف ويكون تحت التحقيق .... وكل واحد وتفكيره عاد

دلع "!!!!!!!!!! ما اكتفيت يا سعووود..؟؟ ما كفاك اللي جاني منك .. سويته ف ناس ثانية يعني ..؟ سويتها ف غيري ... حسبي الله عليك .. ذنبي وذنب كل اللي جرحتهم ف رقبتك يوم القيااامة ... الله يصلحك بس .."

لينا "سعووود محشش ...!!!! والله محشش.. اجل وش سوى عشان يودونه السجن ..؟؟ اكيد مسوي شي كبير ... يعني ذابح احد .. متهاوش مع احد ... صادم احد .. او شي زي كذا ... بس احسن يستاهل ... فكة منه ومن مشاكله ومن اسلوووبه الشين.......!!!!"

سالم "ابوووي معاه حق .. وزين ما سوى .. يا كثر ما سكت لسعود وتغاضى عنه .. بس هو ما يفهم .. خلاااص .. معمي على عيووونه .. ما يقدر يميز بين الصح والغلط .. خليه يمكن يتعلم درس ما ينساه طول حياته ... ويتادب بعدها ...."

___________________________________

(( بيت ابو رائد ))

( الساعة 9 بالليل )

دخل ابو رائد معصب البيت ....

ام رائد : وشفيك...؟؟ عبدالهاااااااااااادي ..

التفت ابو رائد : نعم..؟؟
ام رائد : شفي معصب ..؟؟ عسى ما شر ..؟؟
ابو رائد بضيق : ياخي هالسواق بيجنني ... صارله اكثر من 3 شهووور وماهو راضي يتعلم عربي .. والمشكلة ما يعرف يتكلم انجليزي بعد ... عجزت وانا احاول اكلمه .. واتفاهم معاه ... بققققققققققر ... ما يفهم ...!!!
ام رائد : طول بالك معليه ... اصبر عليه شوي شوي يتعلم ..
ابو رائد : ون يتعلم ...؟؟ هذا خلاااص انا اصلا طردته .. قلت له لا اشوووف وجهك الا ف المطار ....
ام رائد : والحين مين بيوصل البنت الجامعة ..؟؟
ابو رائد : مدري والله... رائد
ام رائد : ودوام رائد..؟؟ لا تنسى ما نبغى ابو دانة يزعل عليه ....
ابو رائد بعد تفكير : خلاص انتي ما عليك .. انا عندي واحد يوديها الجامعة ويجيبها ..
ام رائد : مين ...؟؟
ابو رائد : عندي موظف محترم مرة وانا اثق فيه بصرااحة ... اسمه احمد .. ويصير اخو ابو بندر ... رجال محترم وكبير وعاقل ....
ام رائد خافت : وا قردي ...!!! بتخلي بنتي تطلع مع سعودي... وعزوووبي بعد .!.!؟!؟
ابو رائد بضيق : يا حرمة بلاحركات الحريم السخيفة هذي ...!!! خلاص قلنالك نثق فيه .. والبنت ما عليها شر انشالله ... لا تخافين عليها ... انا طالع المكتب ..

طلع ابو رائد المكتب بعد ما طرد السواق وقرر يطلب من احمد يوصل ريم الجامعة كل يوم ويجيبها ....

@@@@@@@@@@@@@@@@@@@@@@@@@@@@@@@@@@@@@

نهاية الجزء الثاني عشر ..

شرايكم ...؟؟ بالله عليكم ما خقيتوا على رائد..؟؟
سعود ...؟؟؟ وش بيصير عليه .. ووش مصيره ف النهاية هذي كلها ..؟؟
وام سعود ..؟ وش ورى هالتغيير ..؟؟ ووش بتسوي ف الايام الجاية..؟؟
ابو فيصل...؟؟ وش بيصير معاه ومع اهل زوجته اللي قايمين عليه..؟؟
وابو غادة .. وش سر هالتغيير...؟؟ وليش يعامل بناته كذا ..؟؟
خالد .. اروى .. وينهم عن هالجزء .. ووش صار عليهم ....؟؟

كل هالأسئلة الطويلة والمحيّرة .. اجوبتها انشالله
ف الاجزاء الجاية .....
كل الشكر والتقدير لكل من يتابع القصة ويقرأها
وأوعدكم بالأفضل انشالله ...