منتديات صواديف عشاق - عرض مشاركة واحدة - عزاي إنك رجاي العذب لو كل الدروب عثور،للكاتبة/ اديم الراشد

11-29-2021

البارت السادس..

وفي بيت الجد قايد
كانت ام ناصر بالحوش وتناديهم وتصحيهم لييين الكل صحى لكن سحر وعقاب اليوم محد صحى منهم لكن صحى عقاب بانزعاج: وش فيكم تصارخون
ابو ناصر : والله مدري كيف بتزوج وتصير ابو عيال وانت ما يصحيك الا الهواش والصياح
مضاوي : لا تزوجه يبه ماهو كفو خله عند امي تصحيه
عقاب : جدي اذا تبي حياة بنتك سكتها
ابو ناصر اللي كان يضحك: تعال بس اجلس
عزوز : شهد روحي صحي سحر
شهد : مليون مره صحيتها وقالت مابي روحي وخليني
ام ناصر: مدري وش بلاها البنت اليوم
عقاب : ليه وش فيها!؟
هيا : شكلها مريضه
عهد : تقول مريضه بس مدري
وقف عقاب وهو يطلع لغرفتهم دق الباب ينتظر وجاه صوت سحر الغاضب: شهههد طسي عني
عقاب: افتحي يا سحر
فزت سحر بخوف وهي تمسح دموعها وتعدل وجهها وفتحت الباب : هلا
عقاب : وش فيك!؟ ليه تبكين
سحر: ما ابكي كنت نايمه
عقاب : ليه مانزلتي للفطور
سحر: تعبانه شوي
سكر عقاب الباب : تعالي اجلسي
سحر قربت وهي مرتبكه وقرب عقاب يمسح على كتفها: وش فيك يا حبيبتي قولي تدرين ان كل شي يضايقك يضايقني
هزت راسها بضيق: والله مافيني شي يا عقاب
عقاب : افا يا سحر انا حافظك واعرفك زين ومتأكد ان فيه شي مضايقك وقولي لا تخبين على اخوك قولي من مضايقك وانا امسحه لك من وجهه الارض
ناظرت سحر فيه بعيون مليانه دموع كان صعب انها تقوله مابي خلف لكن كرامتها فوق كل شي ومستحيل تجبر خلف عليها وهو مايبيها وصعب هي تعيش معه وتعرف انه مايبيها كانت خايفه من عقاب وخايفه من العواقب بالقوه نطقت وقالت : بس ماهقيت بتنصرني الحين
فز عقاب: افااااا وانا اخو سحر والله لنصرك لو ان نصرك موتي
هنا انهارت سحر تبكي وخاف عقاب وجلس وهو يحضنها يبي يهديها وطال بكاها وعقاب خايف واخيراً قالت: تكفى يا عقاب مابي خلف مابي اتزوجه
ابعد عقاب بذهول وصدمه : وشوووو ، انهبلتي انتي وش فيه خلف ما تبينه!؟
سحر : ما ابيييه تكفى يا عقاب
عقاب : لا تجننيني وشلون ما تبينه !؟ احد قايل شي!؟ وسكت بتفكير وقال: لا يكون وعد العوبا قايله شي
سحر: لا لا بس انا ما ابيه ما اشوفه الا اخو ما ابيه
ابعد عقاب بذهول : من سنين تدرين انه بيتزوجك! توك تفطنين انه اخو !؟
سحر: تكفى يا اخوي لا تجبرني تكفى
انصعق عقاب انصعق مايدري وش القضيه ووش السالفه كان مرعوب ومنفجع شلون ترفض خلف !؟ وخلف ما ينرفض خلف احسن واحد يزوجه اخته ، اصلا كيف بيواجهه خلف وبيقوله ، وعلاقته بخلف كل شي يجمعهم يمكن ينتهي
انهبل واخذ اغراضه وطلع وتركها وهو بين نارين اخته وخلف كيف ينصفهم وكيف يتعامل مع الوضع
استغربوا كلهم طلعته وتركوه ووقف عبد العزيز بخوف: وش فيه عقاب!؟
مضاوي: تلقاه تهاوش مع سحر كالعاده
عزوز: لا والله فيه شي
وقفوا كلهم وطلعوا لسحر اللي كانت في بكى فضيع والكل مفجوع محد يدري وش فيها
ضمتها ام ناصر وهي تسمي عليها وتهديها والكل منفجع محد يدري وش القصه
_______________________.
في بيت نادر
اللي مانام ولا ذاقت عيونه النوم ينتظر يطلع الصبح ويتصل بأمه وابوه
اخذ التليفون وهو يبعد لابعد نقطه فالبيت ودق ينتظر ردهم واخيراً ردت امه: هلا هلا يا عريس
نادر بغضب: اي عريس واي بطيخ يمه
ام نادر: وش فيك بسم لله عليك
نادر : يممممه ليييه سويتي كذا يمه!؟ ليه زوجتيني بزر
ام نادر: وش بزره الله يصلحك ؟
نادر: يييمه البنت صغيره يمه صغيره
ام نادر: وش صغيره عمرها 15 ماهي صغيره
انجلط نادر: شلووون ماهي صغيره اللي بعمرها للحين يلعبون ويدرسون
ام نادر: اسمعني عاد كل الحريم تزجوا بعمرها واصغر محد مات انا جبتك وعمري 16
نادر بغضب: يمممه البنت من امس تصيح وتبكي
ام نادر : عادي طبيعي كل البنات كذا
نادر: انا ماتزوجت عشان اربي بزر انا ابي زوجه
ام نادر: والله عاد زواج وزوجناك والباقي عليك لكن اسمعني ياويلك ياسواد ليلك لو تأذي البنت بكلمه اعقل واترك الطيش واعرف انها امانه
سكرت في وجهه ونادر مذهول يناظر بقهر ورمى التليفون بغضب واتجهه للغرفه وهو مايشوف من الضيق فتح الباب بكل قوته وفزت شوق
شوق اللي من الليل صحت وشافته ماهو فييييه وكانت خايفه ماتدري تخاف من الوحده والظلام ولا تخاف من نادر كلها كانت جحيم من الصبح وهي تحاول تهدا وتتأقلم بس ما تقدر فجأه رماها ابوها في هالزواج وفرضه عليها مثل فرض الصلاة ولا تقدر تطلع منه ولا تدري وش ينتظرها من نادر
اخذوها من دراستها ومن طفولتها بعد وزينوها وزفوها عروس وهي للحين تجهل معاني الزواج ومسؤلياته
وقفت وهي ترتجف وتناظر الارض تخاف ترفع عينها وتشوفه وحش
لكن برد غضب نادر وذاب وهو يشوفها واقفه بخوف عليها ملابس عاديه بينت صغرها اكثر شعرها مجدل وحواجبها معقوده
اخذ نفس وتقدم وهو يتصرف تلقائياً ما يخطط ابداً واول كلمه نطقها قال: شوق لا تخافين ماني مأذيك ابيك تهدين بس وتسمعيني اجلسي اجلسي
جلست وجلس نادر مقابلها وهو مقهور : اول شي انا ما كنت ادري انك صغيره
رفعت شوق راسها بصدمه وهي تسمع نادر يقول ( صغيره) ! اول واحد يقولها هالكلمه كانت دايماً تسمع كلمة انتي كبيييره وصرتي حرمه ولازم تتزوجين
كمل نادر: امي قالت انك بسن زواج وكبيره وانا على كلامها خطبت لكن انا مستحيل ارضى انك تتزوجين صغيره
شوفي يا شوق اطلبي اللي تبين مني الحين وابشري
شوق بخوف : مابي شي
كان ودها تقول ودني لامي بس خافت من ابوها وسكتت
نادر: شوق انتي كم عمرك
شوق بتوتر: الشهر الجاي ادخل 16
نادر سكت بهدوء: تدرسين!!
شوق : كنت ادرس بس اول ما جيتوا ابوي وقفني
ضاق صدره نادر ووقف : زين تعالي نفطر وبعدين نكمل
طلع نادر وهو حتى المطبخ مستكثر عليها انها تدخله يحسها صغيره على كل شي ومو بس عمر حتى بنيتها صغيره وتكسر خاطره اكثر
حاول يجهز اللي يحصله وطلع ينزله قدامها : قربي ياشوق
كان يحاول يخليها تاكل بس ما اكلت الا لقمه وجلس نادر بصمت يحاول يدور طريقه يكلمها فيها ويهدي الوضع لان وااضح انها مسكييينه يراقبها بهدوء يتذكر اوصاف امه اللي قالتها اييه صدقت في مسألة انها حلوه ومو بس حلوه الا تسلب العقل بس ماعاد يهمه جمال قد ما يهمه هالموقف اللي صاروا فيه
_______________________.
بعد صلاة الجمعه
في بيت ابو خلف الكل موجود الا عقاب وسحر
ابو خلف: عزوز اخوك وين!؟
عبد العزيزز: طلع بدري ولا ورجع للحين
خلف : خير وش فيه!
ابو ناصر: مدري عنه تعرف عقاب تعصف به كل حزه
استغرب خلف بس سكت يعرف عقاب هو بعد
فيصل: جدي متى راجع عمي محمد طول
ابو ناصر: مدري يافيصل مدري
غيث: ان شاء الله اذا جاء يجيب هدايا بعد
ضحك خلف: تدري انه بيجيب
فيصل: غيث موصييييه وصايا الدنيا ماخلى شي
ابو خلف : غييث لا يكون صدق
غيث بخوف: مب بس انا كلهم فيصل وسالم
ابو خلف: ياحبيبي مقصر عليك بشي انت وياه هااه!؟
ابو ناصر: علامك عليهم خلهم يوصون عمهم ويفرحهم وبعدين تعرف محمد يفرح بهالاشياء
خلف: ماصار شي يبه بسيطه
دق الباب ووقف فيصل يفتح الباب مستغرب : حياك الله
جابر: سلام عليكم اسف على الازعاج بس خلف موجود
فيصل : ايه موجود اقلط حياك
دخل فيصل ياخذ طريق : يبه معي ضيف
وقفوا كلهم مستغربين جيته وتقدم جابر يسلم بحرج : انا اسف ازعجتكم هالحزه لكن كنت راد من الصلاة وقلت امر خلف اشوف شلونه من اسبوعين ما شفته وييانا بالسوق
خلف : افا عليك يا جابر تشرف بأي وقت البيت بيتك تفضل حياك الله
جلس جابر ولف ابو خلف : جدد القهوه يا فيصل
فز فيصل وسالم وغيث يساعدهم ويرتب اللي محتاس من جلستهم
جابر: يوم ما شفتك بالسوق سألت عنك وقالوا مريض فالبيت وقلت مابي اجي واتعبك وقلت انطرك لكن ماجيت وامس بالعرس بغيت اجي لك لكن شفتك مشغول ويا ربعك قلت امر عليك اليوم عقب صلاة اليّمعه ، هاه الحين شلونك ان شاء الله احسن
خلف : الله يسلمك يا جابر ما قصرت والحمدلله انا بخير وان شاء الله قريب انزل السوق
ابو ناصر: شلونك يا جابر شلون ابوك واخوك
جابر: حمدلله بخييير ويسلمون عليك وابوي كان خاطره يجي معاي لكن تعبان من طلعة البحر امس
ابو خلف : الله يسلمه ويعطيه طولة العمر
جابر: امين وياك
وقف فيصل يصب له القهوه وهو مبتسم
وخلف مبتسم اكثر منه وقلبه يرقع مايدري ليه فرح بشوفته وتشقق من الفرحه وقال: وش اخبارك انت وكيف امور نهيان اخوك واهل البيت ان شاء الله مرتاحين
ابتسم جابر: حمدلله في احسن حال
بدو يسولفون مع جابر اللي يرد بخاطر وسيع واحترام
_______________________.
عند الحريم
استغربوا هالضيف اللي ييجي هالحزه ودخلوا البنات يجهزون القهوه والشاهي والغدا
فجأه جت اماني تركض : بناااات تخيلو اللي عندنا مين
وعد : انتي ما توبين لو يشوفك خلف قطعك
مضاوي: خليه يولي خلف من عندنا
اماني: يقول غيث عندنا جابر ولد النوخذه
شهقت مضاوي: الچويتي
نزلت ندى ترقص من السطح: هيييه لايكون هالاطخم( الحلو) اللي يدق الباب من شوي
هيا بغضب : وين شفتيه انتي!؟
ندى: كنت اجمع الغسيل وسمعت الباب وطليت من فوق الا اشوفه
مضاوي :اما حلوو!؟
ندى: من فوق حلو بس وجهاً لوجهه مدري
وجدان: تدرين خليف لو يدري وش بيسوي فيك!؟ تكتفت ندى: تدرين لو يدري وش اسوي انا فيك
شهد : تعالي بس نكمل اللعبه
عهد: انتي وياها ترا كبرتوا للحين ألعاب
حنان : خليهم بس الحين وش جاب ولد النوخذه !؟ وعد : اقول خلونا منه سحر وينها
قبل تتكلم مضاوي قالت عهد بسرعه: مريضه بالبيت مو راضيه تجي
وعد : بروح اجيبها بس اخوكم وينه!؟
مضاوي بضحك: هاج من الصبح الظاهر زعل عشان قلنا ما حنا مزوجينك
هيا: انتي الدنيا كلها عندك ضحك وطقطقه
مضاوي: وش ابي في النكد ياعمري
طلعت وعد وتركتهم يحققون وش جاب جابر وماسكين غيث وسالم ويسألونهم
_______________________.
في غرفة سحر
كانت في حالة بكى يرثى لها لكن اول ما سمعت الصوت مسحت وجهها وجلست دقت وعد : سحر
غمضت سحر بضيق: نعم
وعد : ادخل!
سحر: ايه
دخلت وعد مبتسمه:خييير خييير وش فيها بنت العم متضايقه
غمضت سحر بضيق( بنت العم ) مايقولها الا خلف لهم: جيتي وجابك الله
وعد :ليه تنتظريني
سحر بثبات تحاول تمثل القوه: اييه
وعد : وش فيك احد قايلك شي مأذيك
سحر: لا لكن كنت بكلمك بموضوع
وعد : قولي اسمعك
سحر بضيق : ابيك تساعديني انا مابي خلف مابي اتزوجه
وعد انصدمت وبردت اطرافها: كيف!؟؟
سحر :ايه ما ابيه وقولي له هالكلام قولي ما تبيك وعايفتك وخليه يفكني من هالسيره
وعد كانت مذهوله من طريقة كلامها: سحر اهدي وفهميني زين وش تقولين ؟
انفجرت سحر وبكت : وش اللي ما انتي فاهمته مو هذا اللي يبيه خلف مو هو اللي يشوفني اخت ابشرك قولي له اني ما اشوفه لا زوج ولا اخو ولا حتى اشوفه شي
وقفت وعد بذهول : سحر وش هالكلام اعقلي وانتبهي لكلامك انتي من وين جايبه هالكلام!؟
سحر انهبلت وهي تصرخ: سمعتكم امس سمعت كل شي لا تسوييين انك ما انتي فاهمه
وعد انفجعت وسكتت بذهول كانت واقفه ما تعرف وش تقول وكملت سحر: طمني خلف يمديه يرفض براحه انا كلمت عقاب وقلت له ما ابي خلف
غمضت وعد وهي تحاول تهدي : سحر اسمعيني دامك سمعتي الكلام كله اكيد سمعتي كيف خلف تكلم وخلف ما رفضك خلف يعدك اخت ما يقدر يتخطى هالصفه ويتجاوزها وخلف انتي تعرفينه عمره ما يأذي احد واكيد سمعتي كيف طلب مني ما اجرحك ولا احرجك وأذيك وازعلك وهو مستعد يشيل عنك كل لوم وهم خلف مايبي لك الضيق والاذيه لو سكت وتمم هالزواج ما تدرين و بيصير من اضرار بعدين
نزلت عينها سحر بضيق : ادري
وعد : اسمعيني انتي كلمتي عقاب وش قلتي له بالضبط!؟ سحر: قلت له ما ابيه لا تخافين ما قلت شي عن اللي سمعته
وعد : سحر لا تجلسين تقولين لا تخافين!؟ ماني خايفه من عقاب ولا خلف خايف ، ولا حنا خايفين الا على مشاعرك انتي بس ومايهم احد ثاني
بعدين انتي تدرين لو مايخاف الله خلف كان طلع وقال مثله مثل غيره وقال انا ما ابي سحر وكان احرجك قدام الكل لانه فالنهايه مهما سوى محد يقدر يوقف بوجهه
بس خلف كلمني يبيك انتي اللي ترفضينه والرفض يجي منك انتي بكرامتك
ونصيحه يا سحر نصيحه مني عمرك لا تبدين احد على نفسك مهما كان خلف رجال بكره بعده ولا بعد سنين بينسى ويتزوج لكن انا ما ابيك تنكسرين ابيك توقفين والكل يشوفك وترفضينه وترفضين مليون واحد وراه لين تقتنعييين بالانسان اللي بتكملين معاه خليك قويه ماعليك من احد واحد يروح وعشره يجون مايهم المهم نفسك وكرامتك
سحر مدت يدها تمسح دموعها: هذا اللي بيصير
ابتسمت وعد وهي تحضنها : ماعليك انا بكون جنبك وخلف ما رح يدري عن السالفه وبقوله انك جيتي وانك رفضتي قبل لا انا اتكلم بقول انك من البدايه ما تبينه ماعليك كرامتك بالحفظ والصون
حضنتها سحر بضيق ووعد تحاول تهديها وهي ضايق صدرها عليها كانت تتمنى انها تتزوج خلف لكن ماصار نصيب
_______________________.
عند عقاب
اللي طلع يحوس مايدري وين يروووح ووش بيسوي جلس قدام البحر وهو يفكر وش صار عشان ترفض خلف !؟ كيف ترفضه!؟ لو في خلف شي يعيبه كان ممكن يفهم بس مستحيل
سكت بخوف ان سحر رافضته بسبب مرضه شد على يده وهو في موقف شيييين ما ينحسد عليه مايدري كيف بيقرر ومن يكلم
مايدري وش غير سحر مستحيل تكون من كيفها اكيد صار شي ( معقوله احد قال لها شي في زواج نادر!؟؟ ولا ولا هاللي ما تتسمى وعد !؟ )
كان كل شي يطري له حول وعد اكيد عشان تقهره وتنتقم منه بتفرق بين خلف وعقاب والوسيله سحر وعشان تقهره بأخته بعد
فز وهو يقول ( اكيييد اجبرتها اكيييد هالشيطان كل شي تقدر عليه )
اخذ اغراضه ورجع للبيت مسرع وغضبان
_______________________.
في بيت نادر
اللي كان يساير الوضع يحاول يتفادى المشاكل كان يحاول يسولف مع شوق لكن وييين وهي لا تتكلم ولا ترد وخايفه ودموعها مليانه بعيونها ولو بيتكلم معها بتنهار
كل ماحاول يقرب تخاف وتبكي
طلع مايدري وش يسوي يدق على امه ماترد يدق على خالته نفس الحكايه وشوق اللي ماعاد تقدر تسيطر على نفسها وخوفها الانها فجأه حست بغربه ماعاد تقدر تكبت نفسها اكثر مهما كان نادر يتصرف معها بهدوء ما تشوف هالشي لان الكلام اللي عرفته عن الزواج من امها وخالتها مايطمن ابد
قرر نادر يطلع لان وجوده يزيد الطين بله ماكان معه حل الا يدور احد يساعده وماله الا خلف
اخذ طريقه لبيت خلف وهو يدعي ان ابوه مايطلع لكن من الصدف شاف خلف واقف يودع جابر عند الباب وماصدق جابر يروح الا نادى بهمس : خلييييف خليف تعال
التفت له خلف مستغرب وطلع له: نادر هلا وش فيك !؟ نادر: انا في ورطه ومالي غير الله ثم انت تساعدني
خلف : وش فيك تكلم
نادر : خليف البنت بتموت من الصياح عجزت اهديها عجزت اسكتها
خلف : لا حول الله ليييه وش صار!؟ مسوي لها شي
نادر: والله ما سويت شي والله حتى الغرفه ما طبيتها انا كلمتها الصباح وكلمتني عادي لكن فجأه انفجرت ماعرفت اتصرف
خلف : طيب كلمت امها امك احد من اهلها
نادر: محد يرد وامي كلمتها الصبح وقفلت بوجهي
خلف : يا ربيي ! طيب وش الحل
نادر: اسمع شف احد من اهلك يجي يشوف لها حل والله اني خفت انها تموت من الصياح
خلف : ا انادي امي!؟
نادر: امك! مدري فشله
خلف : تدري اصبر اصبر بنادي وعد واجي
نادر: يلا عجل
وقف نادر ينتظر ولف على جيت عقاب : نادر وش عندك هنا
نادر : ادور فزعه
عقاب : وش بلاك بعد
نادر: بلاي هالبزر اللي فالبيت
عقاب : وش بتسوي
نادر: خلف بيتصرف
سكت عقاب بهدوء وهو فيه اللي مكفيه ولف نادر: وش فيك انت !
عقاب : مافيني شي
سكت نادر وهو يفكر مصيبته وعقاب بعد
_______________________.
وفي بيت ابو خلف
دخل خلف مستعجل وينادي : سالم روح قول لوعد تجي في غرفتنا بسرعه
ركض سالم يناديها وجت وعد ومعها كل البنات وتكتف خلف: انا ناديت من!؟
وجدان: وعد
خلف : يعني !؟
اماني : نطلع بكرامتنا
خلف: ياليت
مضاوي : مالت يالاسرار اقول وينه عقاب شفته ؟
خلف : مدري عنه
ندى: عشتوا وش فيك منفس
خلف : ندى ودك تطلعين وراك هالمكنسه صح!؟
ندى: لا والله
طلعوا وهم يطقطقون ولفت وعد وهي شايله هم سحر وعقاب اللي ممكن يسوي كارثه : خير خلف وش فيك
خلف : اسمعي اللبسي عبايتك باخذك مكان
وعد : وين بتوديني
خلف : باخذك رهينه؟؟ وين بوديك يعني خلصي
وعد : وابوي !؟
خلف : انا اتصرف بس عجلي
راحت وعد تلبس والكل يناظر خلف
ام وعد : وين رايحين!؟
خلف : ا بنتمشى قريب ونجي
وجدان: الله الله وحنا بعد نبي نتمشى
خلف : ماهو وقتك بعدين اطلعكم
اماني : خلف وش ذا مافي عدل!
خلف اللي قال بغضب: اسمعيني زين انتي وياها وخروا ترا مالي خلقكم
حنان: وش فيكم !؟
طلعوا وعد وخلف وخافت وعد اول ماشافت عقاب واقف وجنبه نادر لا شعورياً قالت بنفسها ( الله يستر من هالجني)
اما عقاب تسلطت عيونه على وعد وهو متهمها بكل شي صار مع سحر وبعد بتروح تخرب بيت نادر !؟ اتجهه لخلف : خليف وين رايح!؟
خلف ابعده بهمس : بتروح لزوجة نادر
عقاب سحب خلف بطرف : اسمع خبل انت تروح وش تسوي!؟
خلف : تهدي البنت!
عقاب : خلف وعد وش عرفها عشان تروح تهدي احد!؟ هاذي يبي لها انسانه كبيره تنصحها وتعلمها واختك طال عمرها وش عرفها بالزواج ونصايحه
خلف : ما يخالف اقل شي تهديها لين نتصرف امش بس
مشى خلف وخلاه ووعد واقفه بهدوء وقرب خلف يشرح لها السالفه ووعد مفجوعه ما تخيلت ابد هالموقف لكن راحت وهي تشوف نادر قدامهم
وقفوا عند البيت وقال خلف: اسمعي البنت داخل حاولي ياوعد انك تهدينها وماتخوفينها
وعد :طيب طيب
دخلت ولف خلف على نادر: امرها هين ان شاء الله
نادر : اجلسوا اجلسوا لين تنتهي السالفه
لف خلف: عقاب وش فيك!؟ وراه ضايق صدرك!؟
عقاب: ا مافيني شي
خلف: ليه ماجيت للغداء ولا شفناك من الصبح
عقاب: كان عندي شغل
سكت خلف وهو حاس بضيق عقاب بس تركه براحته وجلسوا كلهم بصمت كل واحد مليان راسه مشاكل يبي يحلها وهاذي اول جلسه لهم بهالحمل الثقيل اللي محد قادر انه يتكلم منه
_______________________.
في غرفة شوق
وقفت بخوف وهي تناظر البنت اللي دخلت ووعد تناظرها بحزن وضيق ماتوقعت لهدرجه صغيره
شوق: مين انتي!؟
وعد : لا تخافين انا وعد بنت جيرانكم
شوق ببكى: وش تبين هنا!؟
وعد : نادر صاحب اخوي خلف وهو المسكين ضايق صدره عليك وطلب من خلف اجي اجلس معك واهديك
شوق سكتت بخوف ماتدري وش ترد وقربت وعد وهي تحاول تسلم عليها وقالت: شوق لا تخافين انا ماجيت اخوفك بالعكس جايه اجلس معك ونتكلم ونسولف وابد لايضيق صدرك
شوق ناظرتها بهدوء وسكتت وقالت وعد : وش رايك تجين معي اصلح قهوه ونجلس زين
شوق بتوتر: زين
مشت وعد وهي تدور المطبخ وتصلح قهوه وهي تحاول تهديها وجلسوا بالحوش ووعد تناظر شوق اللي تسحب اكمامها على يدينها بخوف وتوتر وضاق صدرها عليها
لكن قدرت تبتسم وقالت: اول شي كيفك
شوق بهمس: حمدلله
وعد :وثاني شي مبروك الزواج
شوق ناظرتها بحزن: يبارك فيك
وعد : ا ا طيب خليني اعرفك على نفسي وتعرفيني على نفسك طيب
شوق : طيب
بدت وعد تعرفها على نفسها وشوق اللي هدت وبدت تتقبل وعد اللي تسولف ببتسامه وقالت: الحين دورك
شوق : انتي تعرفين اسمي شوق ! انا وحيدة امي وابوي وكنا بالحفر وكنت ادرس اخر سنه بالمتوسط بس اول ما انخطبت وافق ابوي وماعاد كملت وتزوجت
وعد : ماعليك ان شاء الله تكملين ، وانا ادري انك ماتعرفين نادر وادري ان فكرة انك تتزوجين وانتي بهالسن صعبه بعد وادري مستغربه الكل وفاقده اهلك بس تدرين وش بنصحك فيه!
شوق : وشو !؟
وعد : اول شي دام الله كتب نصيبك مع نادر ابي اعلمك شوي عن نادر صراحه نادر من يوم احنا صغار نعرفه وخلف اخوي يحبه حيل وياما قال انه طيب وحبيب وحنون وهذا يعني انه مستحيييل يضرك ولا يأذيك ، وابد ما ابيك تخافين من شي لان مهما كان كبرنا ولا صغرنا بنتزوج لكن النصيب استعجل شوي معك لكن انتي قويه وقدها ولا تخافين ، ادري مشتاقه لامك وابوك بس هاذي سنة الحياه مصيرك بتروحين لهم وتشوفينهم وماعليك من اللي يخوفك يقولك الزواج يخوف و صعب صدقيني كل شي يختلف من حياتك لحياة غيرك
اخيراً تكلمت شوق اول ما ارتاحت لوعد : انتي اكيد متزوجه وعارفه كل شي ! وعد انا خايفه كثيير ماني قادره اتحمل كل اللي قالوه
ابتسمت وعد: اول شي انا ماني متزوجه لكن اعرف ان مو كل شي يقولونه صح ! انا اغلب صاحباتي متزوجات ومبسوطات ومافيه شي يخوف ، بس قولي لي انتي كم عمرك !؟
شوق ضحكت باستهزاء: كبيره على قول امي وصغيره على قول نادر
ضحكت وعد : يعني كم!؟
شوق: 15
بردت ملاامح وعد لكن تداركت وضعها : اجل تطمني من يوم نادر قال صغيره معناته فاهم وعارف ان اللي بعمرك المفروض مايتزوجون
شوق : بس هالكلام مايفيد انا خايفه منه
وعد صدت بضيق : اسمعيني تقدرين تكلمينه وتتفاهمين معاه كيف بتعيشون وصدقيني بيتفهم ويسمعك لكن اذا جلستي تبكين وتصيحين مارح تزيدين الطين الا بله خليك هاديه وانا متاكده نادر متفهم وطيب وبيسمعك
هدت شوق كثيييير وارتاحت وكأنها تطمنت من كلام وعد رغم ان وعد ماتعرف كيف قدرت تتكلم بهالثقه وهي ماتعرف وش وضع نادر وهل هو فعلاً متفهم ولا مابيخاف الله في هالطفله
شوق : مشكوره يا وعد
وعد : ابداً مايحتاج شكر لكن اوعديني تكونين قويه ماتبكين وتنهارين على كل شي وخليك مع ربك وربك بيحلها
شوق : ابشري
وعد : طيب انا بروح وامرك ان شاء الله مره ثانيه
شوق: طيب بس لا تقطعين
وعد: من عيوني
طلعت وعد وهي خلص كلامها ماعاد تدري وش تقول غير انها تتحسب على امها وابوها اللي زوجوها بهالسن
وقفوا الشباب كلهم يناظرونها وصدت وعد ومشت ولحقها خلف : هاه وش صار
وعد بغضب: قلت اللي علي والباقي على الله ثم نادر
خلف : طيب هدت!؟
وعد : خلف كيف يزوجون طفله انا مصدومه انت لو تشوف حالتها والله يتقطع قلبك
خلف : والله ادري بس مافيه حل
وعد : تكفى خلف كلم نادر يرفق عليها بالقوه قدرت اهديها
خلف : طيب طيب
لف على نادر وهو يقوله : اسمع انت ادخل الحين وارفق هاه حاول ما تعصب ولا توتر
نادر: طيب كيف الوضع
خلف : هدتها والباقي عليك
نادر : طيب طيب يلا مشكور
خلف : العفو
تحركوا ووعد على يمين خلف كالعاده ويساره عقاب اللي بعيد شوي وكان ساكت ما يتكلم
ودخل خلف وعد ولف على عقاب : تعال تعال
لف عقاب : وش فيك!
خلف : انت للي وش فيك!؟ وراك ضايق صدرك اشوفك ما انت على بعضك صاير شي احد مزعلك
ابتسم عقاب بضيق وهو في نفسه يقول ( مجنونه يا سحر اذا بتخلين خلف ) : مافيه شي مشاكل بالدوام
خلف : طيب قلي يمكن افيدك
عقاب : لا معليك بسيطه انا بروح اريح شوي وانت بعد ادخل
خلف : براحتك
دخل وخلف ماهو مرتاح لملامح عقاب واول ما دخل البيت نادته وعد اللي تدري ان عقاب يدري بسالفة سحر وهمست: تعال بقولك شي عن سحر
قرب خلف : وشو !؟
وعد : اليوم نادتني وقالت انها من فتره تفكر وهي اصلاً ما كانت تبي الزواج منك يعني وماتدري كيف تفتح السالفه لكن هي قررت وكلمت عقاب
سحبها خلف ودخلوا المجلس وهو يسكر الباب : وشو!؟؟ وعد وشلون من فتره !؟ لايكون سامعتنا امس
وعد : لا لا انا من فتره اشوفها ودها تقول شي بس كنت انشغل وما أسألها واليوم قالت لي
خلف: انتي قلتي لها شي!؟
وعد : لا والله ما تكلمت ولا فتحت فمي هي اللي تكلمت وحتى اني حاولت اشوف اذا سمعتنا لكن ابد ما سمعت وكانت تتكلم بثقه يعني واضح ما تبيك
خلف بشك: وقايله لعقاب؟؟
وعد : ايه
خلف : لايكون عشان كذا عقاب من فتره ماهو على بعضه
وعد : مدري
خلف : الله يستر بس انا ماني مرتاح احس انها سامعتنا
وعد : لا ياخلف اقولك البنت عايفه
هز راسه ب ايه بهدوء وهو يبي يصدق انها هي عايفته عشان ما يحس بالذنب بس اللي مضيق صدره هو عقاب اللي مايبي يخسره ابداً
_______________________.
عند نادر اللي دخل وهو يحاول يبتسم ويطمن الامور
شاف شوق جالسه بهدوء ورفعت راسها بهدوء تناظره تنتظره يقول كلمه تطمنها
وابتسم نادر وهو واقف عند الباب : تستقبليني للقهوه!؟
لا شعورياً ابتسمت شوق : حياك
اتسعت ابتسامة نادر: اييه كذا ورينا الابتسامه وروقي
ارتبكت شوق واختبص نادر خاف انها ترجع تبكي واسرع يجلس وهو يصب لنفسه قهوه وسكت وهو يدور موضوع يتكلم فيه بس قال : شوق
رفعت راسها بهدوء: سم
نادر : سم الله عدوك بس وش رايك تلبسين ونطلع شوي نتمشى ولا نروح الخبر ولا اي مكان
رفعت شوق كتفها : اللي تبي
نادر: زين اجل بنطلع الخبر نغير جو وننبسط
شوق : طيب
نادر : زين جهزي لك شنطه خفيفه وانا بجهز اغراضي
شوق: زين
وقف نادر يجمع اغراضه وكان يراقب شوق وهي تجهز اغراضها لكن ماكانت تجهز اي شي يدل انها عروس سكر شنطته بضيق وهو في نفسه يقول ( الله يسامحك يمه الله يسامحك )
انتظرها لين خلصت وطلع وهي معه كان يدعي ان الله يديم هالهدوء وهو يدعي لخلف واخته
_______________________.
وعند عقاب
دخل الغرفه وشاف عزوز اللي جالس ينتظر ووقف : عقاب وين رحت خوفتني عليك
ابتسم عقاب : وشوله تخاف ماني بزر!؟
عزوز: ادري بس ما احب انك تطلع متضايق اخاف يصير لك شي وانت برا محد معك
تقدم عقاب وهو يبتسم له بحب: للله يا عزوز كبرتك السنين وصرت تشيل هم وتخاف علينا
ضحك عزوز : انا مالي بعد الله سند الا انت وانا مهما كبرت للحين اخاف الدنيا بدونك
اخذ عقاب نفس وهو يحضنه وجلس هادي بهالوضعيه فتره وبعدها ابعد وهو يقول : وانا بعد مالي الا انتم وانا مستحيل اقبل ان شي يخوفكم ويزعلكم
عزوز : طيب وش فيها سحر!؟ هي بعد ضايقه
جلس عقاب وهو يرمي شماغه : طلعت لي بقصة انها ماتبي خلف
جلس عزوز بذهول : ليييه !؟ وش فيه خلف !
عقاب : مدري عنها انجنت وقعدت
عزوز سكت بذهول وهو يسمع عقاب اللي اول مره يكلمه بهالجديه : انا بنهبل ماني مصدق؟؟ كيف ترفض خلف !؟ خلف هاللي ينتصلى على طرف ثوبه ! وكنت متطمن انها عنده فجأه تقولي ما ابيه !؟
عزوز: طيب ياعقاب هذا زواج مافيه غصيبه
عقاب : ماني غاصبها ورضاها عندي بالدنيا !؟ بس انا خايف من العواقب ! لا تنسى ان خلف هو اللي بوجه المدفع اخاف يزعل او يفكر بالموضوع بطريقه شينه ويحسب انها رافضته عشانه مريض
عزوز : لا خلف مايفكر كذا انت تعرف خلف ابو نية طيبه مستحيل يفكر كذا
عقاب : اعرف خلف لكن اعرف عمي بعد بيقوم الدنيا ولا هو مجلسها واخاف نفترق وينتهي كل شي بينا
عزوز سكت بخوف وهم مستحيل يعيشون بدون عيال عمهم اللي من يوم صحووا على الدنيا وهم مع بعض
كان هالخوف مشترك بينهم وكلهم يناظرون بعض بخوف
عزوز : وش بتسوي طيب !؟
عقاب : برجع اكلم سحر بفهم السالفه كلها
عزوز : ايه احسن
عقاب : المهم السالفه بينا لا تطلع
عزوز : طيب طيب
لفوا على دخول مضاوي السريع : عقابوووه وينك ذالف من الصبح ماقلت لنا!؟
ناظرها عقاب بهدوء ولفت مضاوي بخوف تناظرهم: وش فيكم!؟ صاير شي!
عزوز: لا
عقاب : مافيه شي وين خواتي !؟
مضاوي شكت وهي تناظرهم وبعدين قالت: بغرفتهم
طلع عقاب وفتح الغرفه وشافهم جالسين كلهم وعهد تسوي لشهد مكياج ويضحكون على شكلها
فزت شهد بخوف : عقاب والله عهد اللي قالت بتسوي لي انا ما احب هالخرابيط
عهد طارت عيونها : بس نلعب
عقاب : اطلعي انتي وياها
هيا: عقاب وش فيك ! وينك من الصبح
عقاب : موجود اطلعوا وسحر اجلسي
خافت سحر وطلعوا كلهم وتكتف عقاب وسحر اللي كانت شوي وتبكي لكن تحاول تتماسك
عقاب : بالحرف الواحد قولي لي وشوله ماتبين خلف
سحر: قلت لك اشوفه اخو مقدر اتزوجه يا عقاب
عقاب : اتركي هالعذر الكذاب! بتعلميني بالسالفه بطيب ولا كيف!؟ ولا عشانه مريض!
سحر: لا لا والله بس انا ماني مجبوره اتزوجه عشانه ولد عمي عقاب تدري اني من يوم عرفنا الدنيا وخلف مثل اخوي ما اتخيل اني اتزوجه تكفى ياعقاب لا تجبرني اعيش حياة ماهي لي
عقاب : انتي مجنونه ؟ تعرفيييين وش عواقب هاللي تقولينه! انتي بتنهييين حياة كامله كنا عايشينها
ماتدري كيف قالت سحر هالكلام بس قالت: ايه اعرف لكن الاسواء هو اني اتزوج ولا اقدر اعيش بعدها انت تقدر تتخيل وش بيصير بتزوج خلف وانا مابيه !وبعدين وش العواقب ! مشاكل!؟ وهواش ! وتعاسه ! وبعدها طلاق ويمكن بعد عيال يضيعون بالطوشه وفي كل الحالتين المشاكل بتكبر بتكبر وش احسن يا عقاب! اقتصر كل هالمشاكل من الحين ويكون زعل يومين ويتصلح ولا تبي مشاكل طويله ! وزواج فاشل ويمكن نفترق للابد ويمكن توصل للمحاكم ويمكن يوصل الدم لركب !وش تشوف؟
وبعدين انت تعرف خلف تعرف انه مايبيعنا لو تنطبق السماء على الارض
عقاب اللي اقتنع وهو يناظرها بهدوء وطلع وتركها وقف وهو يشوف الكل واقفين عند الباب وبما فيهم جده وجدته
ابو ناصر: وش هاللي سمعته !
دقت ساعة الخطر في قلب عقاب وسحر وعرفوا ان بداية المشاكل وصلت قرب عزوز جنب عقاب ووقفوا
ام ناصر: وش هاللي بتسوينه يا مسودة الوجهه
عقاب : جدتي الله يخليك اهدي مايصير تصارخين
ابو ناصر: الحين تفهموني وش هاللي يصير
عقاب : سحر ما تبي تتزوج خلف
شهقت مضاوي: لييييه !؟ وش فيه خلف !
عقاب : مافيه شي لكن الزواج ماهو غصب
ابو ناصر: انهبلت انت واختك! خلف ماينرد
ام ناصر: انا داريه ان ابليس داخل راس هالبنت!؟ ولا فيه بنت صاحيه ترد رجال يتثقل بالذهب مثل خلف
طلعت سحر وهي تبكي : يتثقل بالذهب ما قلنا شي!؟ بس عمركم سألتوا عن رأي ولا رايه !؟ من وين طلعتوا بموافقتنا على هالزواج
عقاب : بس انتي!؟
ام ناصر : مالك راي ياحبيبتي هذا خليييف عين السيح ماترده الا وحده رديه
عقاب : جددده اختي ماهي رديه!؟ والزواج قسمه ونصيب
هيا : بس ياسحر ليه رافضته!؟ وش يشكي منه خلف
ابو ناصر: انتم تبون تفرقونا!؟ تبون ناصر يزعل!
عزوز: محشوم عمي لكن خاطر اختي اغلى
ابو ناصر: ماشاء الله ماشاء الله ماعاد حتى تحشموني !
عقاب : محشوم ياجدي محشوم لكن عمي بيزعل يومين ويرضى ماهو احسن من المشاكل اللي بتصير لو غصبناها على الزواج وبعدين اعرف خلف ماهو زعلان
ام ناصر: اسمعني عاد انت واختك هالحكي كله مابي اسمعه ولو تموتون ماتردون خلف
عقاب: انا اللي مسؤول عن حياة اخواني وقراراتهم
ابو ناصر: عقاااااب احترم جدك وجدتك
عقاب : على عيني وعلى راسي بس محد يغصب خواتي على شي وانا حي
راحت ام ناصر بغضب ووقف الجد وهو يناظر سحر بنظرات ناريه : وشوله ماتبينه
طلعت سحر ببكى: جدي الله يخليك افهمني خلف مثل اخوي مقدر اتزوجه مقدر ما اشوفهم الا اخواني الله يخليك لا تحملني فوق احتمالي
سحب ابو ناصر يده بضيق : بس يا سحر يابنيتي خلف مهما كان ولد عمك وهو الوحيد اللي اتطمن عليك عنده
سكتت سحر ببكي واتجهه لها عقاب وهو يقربها ويهديها: جدي انت تدري الزواج قسمه ونصيب وانت ماتبي الا الخير لحفادك ماتبي مشاكل وهواش
ابو ناصر: وكيف بتحل هالسالفه
عقاب: ماعليك احله بس انت خلك معنا لا توقف ضدنا
هز راسه ابو ناصر وهو ضايق صدره وطلع وتركهم والكل يناظر سحر
وطلع عقاب وهو ضايق صدره بعد وعزوز بعد
مضاوي: سحر انجنيتي !؟ وشلون تشوفينه مثل اخوك!؟ مهبوله انتي كلنا نعرف انك تموتين في خليف ! وش صار!؟ هاااه
سحر: لا حبيبتي لا اموت فيه ولا هم يحزنون
هيا : يا سحر يا حبيبتي اذا فيه شي علمينا مايصير ترفضينه كذا
عهد: سحر احد قايل شي!؟ وعد قالت شي!
مضاوي : وش دخل وعد !؟
عهد: مدري هي اليوم جت ، يمكن قالت شي
هيا: عن الكلام الفاضي وعد ما تسوي شي كذا!
سحر: محد قال شي بس ماني مجبوره اتزوجه
مضاوي : اقص يدي اذا مافيه شي
طلعت وتركتها وسحر واقفه بضيق صدر والكل ضايق صدره
لكن عقاب اللي سمع كل شي وهو تعمد يوقف يبي يسمع وش يقولون البنات اكيد عندهم اسرار سحر ويعرفونها واول ما سمع طاري وعد تكهرب وطلع وهو يحلف ان لها يد وانه ليقص هاليد
_______________________.
وفي بيت النوخذه
كانت ليلى جالسه وهي تحاول تحسن مستواها في العزف وابوها جالس جنبها مستمتع
وام نهيان اللي انفجر راسها من الازعاج وطلعت وتركتهم وشيخه بعد
ودخل جابر: سلام عليكم
الكل: عليكم السلام
جابر: وين الناس؟؟
ضحك ابو نهيان: امك تقول راسها بينبط من عزف ليلى وراحت وشيخه كالعاده بتقرا
ضحك جابر: بس انتي ذبحتينا بهالعود
ليلى: اللله من اللي يقول اعزفي لي احب اسمع العود منچ
ضحك ابو نهيان: ماعلينا المهم وين كنت!؟
جابر: بعد الصلاة رحت حق خلف قلت ازوره واطمن عليه
لفت ليلى بانتباهه وقال ابوها: وشلونه عاد ان شاء الله بخير
جابر: اي حمدلله تحسن عن قبل
ابو نهيان: الله يشافيه ويعافيه والله ابن حلال
جابر : اي والله
ليلى : غريبه شعندك صاير تهتم !
جابر: ازور المريض لي اجر
ابو نهيان: ايه بارك الله فيك
ليلى: ايه بس مو من عوايده الله يرحم بالكويت يطيحون كل اهل الفريچ مرضى مازارهم
ضحك جابر: والله انا حبيت خلف وابي ازوره شعليچ انتي
ليلى : بكيفك
جابر: بروح اريح شوي
ابو نهيان:خذني معك
ليلى: وتهدوني بروحي!؟
ابو نهيان: خليچ طقطقي على هالعود ليين الله يسهل عليچ
طلعوا وليلى تضحك وسكتت باستغراب تفكر في هالخلف
_______________________.
وعند خلف
اللي وصل السوق وهو اشتاق لحياة السوق وشغله اتجهه للمحل يبي يرتبه ويشوف شغله اكيد متراكم
دخل وهو يرد على الناس اللي تسلم عليه ورد باب المحل وهو يلبس الكمام وبدا يطلع الاغراض عشان يرتب
بس شاف السي دي وجلس وهو يناظره ماقدر يمسك نفسه لا شغله من جديد ويتأمل اخذ وقت يناظرها وابتسم وهو يحس ان على كثر همومه الا انه سعيد اخذ نفس وقبل يزفر وقف قلبه اول مادخل عقاب وسحب خلف السلك يطفيه واعتدل بارتباك: عقاب وش فيك
عقاب جلس بضيق: جيت ابي اجلس معك ضايق صدري
قفل خلف كل شي واتجهه وهو متوقع سبب ضيقته: افا يا عقاب مايضيق صدرك وانا فيه قولي وش فيك وش مضيق صدرك
ناظره عقاب بضيق خايف من اللي بيقوله : خلف انت تدري وش كثر احبك صح
ضحك خلف : الله وش صاير بالدنيا عقاب يعبر عن حبه
ضحك عقاب : والله ان الدنيا منقلبه على راسي يا اخوك
اعتدل خلف بحده وقال: افا وانا اخو عقاب انت ما انت في الدنيا لحالك تنقلب علينا كلنا ماهي عليك لكن نتعاون ونعدلها مايصير يا عقاب تشيل همك لحالك وانا موجود يدي بيدك وكتفي بكتفك وقلبي على قلبك
هنا انفجر صدر عقاب زود : هذا اللي انا خايف منه اخاف يصير شي و يفرق كتفي وكتفك
خلف بدا يفهم : مافيه شي بالدنيا يبعدني عنك الا الموت وحتى لو مت انا بتشيلني على كتفك
عقاب: لا تجيب طاري الموت جعل عمرك طويل
خلف : اجل قلي وش مضيق صدرك
عقاب : تدري ان الدنيا كلها قسمه ونصيب
خلف : ادري
عقاب بتردد قاله عن رفض سحر وانها تشوفه اخو وبسرعه قال: يعلم الله اني ما رضيت بس انت تدري الحياه ما تبنى على غصب
خلف ابتسم : عقاب اول شي انت مضيق صدرك على الفاضي وانت تعرفني اني ما ابيعكم ابد وتعرف اني مستحيل ارضى انك تزعل اختك وتجبرها ومستحيل ارضى ان بنات عمي احد يضايقهم مهما كان وبعدين انت قلتها مافيه حياة تنبني على غصب وانا والله ماعندي اي مشكله بالعكس انا كنت ناوي اقولك من قبل اني مستحيل اتزوج لين اسمع موافقة سحر بأذني وبعدين لا سحر ما اختارت تكون بهالموقف ولا انا بعد اخترت كله كلام كبار ماله مبداء ولا له اساس والله يعلم اني اعدها مثل خواتي وما ابي لها الا الخير
عقاب : يعني!! انت بعد ماتبي !
خلف : انا مايفرق معي فالنهايه هو زواج اذا ما تزوجت هنا بتزوج هناك
عقاب : ولا انت زعلان
ضحك خلف: وش يزعلني بالعكس انا بزعل لو ان فعلاً سحر انجبرت على شي ماتبيه
زفر عقاب براحه: والله اني ارتحت انا خفت تزعل
ابعد خلف يضحك: ماعندك سالفة صراحه راح كل عمري معك ماعرفتني زين
عقاب : اعرفك بس خايف من عمي انا اخاف يسبب مشكله ونفترق ولا امك تزعل
خلف : ابد خلهم علي فالنهايه القرار لي انا وانا المعني انا وسحر ونقرر وش نبي ! واترك ابوي علي
عقاب : يارب عمي محمد يجي وينقذ الوضع
خلف : جدي عرف!؟
عقاب : جدي وجدتي والدنيا قايمه قاعده
خلف : قم ماعليك انا اضبط كل شي
عقاب وقف وهو مرتاح ان خلف ما زعل وقرب وهو يحضنه وابعد خلف يضحك: وش بلاك انت ما يطلع حبك الا المصايب
عقاب : واالله اني خفت
ضحك خلف اللي كان بعد خايف مايدري كيف بيواجهه ابوي هو بعد وطلعوا متجهين للبيت
_______________________.
.
انتهى البارت