منتديات صواديف عشاق - عرض مشاركة واحدة

10-05-2023

(( بيت ابو سعود ))

( الساعة 12 الظهر ))

كانوا لينا ودلع ف الصالة .. ومعاهم سعود اللي كان ماسك جواله وشكله يدل على انه يسوي شي مهم .....
لينا لدلع بصوت واطي : شوفي هذا .. تلاقين قاعد يراسل خويته اللي ف عرعر ..
دلع : هههههههه ..

رفع راسه سعود وطالع دلع بنظرة ما تنفهم وبعدين رجع نزله وقال : دلع .. قومي جيبيلي ماي ...

لينا : لاوالله ... ما عندك رجووول ..؟؟
سعود : من كلمك يالملقووفة .. قومي عدلي كشتك بس ... تخرع بلد !!

على طول لينا قامت تركض لغرفتها لانه اكره ما عندها احد يتطنز على شكلها ... فقامت تتاكد ..

سعود : وانتي .. انا ما قلت ابي ماي ... ؟؟

تنهدت دلع وقامت ..

سعود : ههههه والله مسخرة هالبنت .. !!

رجعت دلع ماسكة كاسة ماي .. وجات بتعطيها سعود .. بس سعود كان حاط رجله ف طريقها .. عشان كذا جات بتطيح بس مسكت عمرها .. اما الماي فانكب نصه على جوال سعود ..

سعود معصب وهو يقوم : انتي ما تطالعين ..؟؟ عميا !!
دلع بانفعال : انت اللي حاط رجولك ف الطريق ..
سعود : يعني مري من فوقها .. فتحي عيونك انتي وتمشي ...

سعود : والله الاعمى يعرف يجيب ماي احسن منك ..

تركها وطلع على غرفته على طول .... اما هي فقعدت ع الكنبة والصيحة بحلقها ..

دخل سالم ....
سالم : السلاااااااااااااااااااام ..
دلع تبتسم مجاملة : وعليكم السلام .. تقبل الله ..
سالم وهو يجلس ع الكنبة اللي قدامها : منا ومنكم .. سعود هنا...؟
دلع : أي ..

شاف سالم انف دلع احمر والكلام بالغصب يطلع ...

سالم بشك : قال لك شي صح ...؟؟
دلع :...............سكتت .. اكتفت بدمعة ..
سالم قام معصب : انا اوريه هالحيوان .. والله ما يصير له خير اليوم ..
دلع بانفعال :والله العظيم ان كلمته لا تكلمني بعدها ولا اكلمك ..
سالم : بســـ..
قاطعته : لا بس ولا شي .. المشكلة بيني وبين اخوك جاء لا تتدخل يا سالم .. ما ابغاك تتهاوش مع اخوك الكبير عشاني .. خليه على قد عقله ..
سالم : طيب خلاص ..
دلع : مو طيب وتروح تتهاوش معاه ...
سالم : خلاص انشالله ما يصير خاطرك الا طيب ...

(( بيت ابو بندر ))

( بعد ساعة )

لا ينشغل بالك
وش قالوا عذالك
لاتتعب تدور
مين اللي قال لمين
حنا كذا "حلويييييييييييييييييييييييييييييييين"

وعلى انغام وكلمات اغنية حلوين لرابح صقر .. خلصوا بندر وثامر تنظيف السيارات على الشارع برى البيت .. وطبعا خلوا الشارع يفيض بالماي ..

بندر وهو ينشف سيارته : اخييييييييييييرا .. ما بغيت اخلص ... ثامر خلصت ..؟
ثامر يعدل شكله على مرايا السيارة : انا خلصت قبلك .. فديتني وفديت الانفينيتي حقتي ..

بندر وهو يرمي المنشفة على الارض ويحرك حواجبه : هههه ... تراها انفينيتي .. ما تجي نص اللكزس اللي عندي ..

مرت بنت منقبة وضعيفة تتمخطر من قدامهم على الرصيف ....

ثامر لبندر : اللللللللللللللحق ....
بندر انهبل وقال وهو يصارخ : يا حلو يا ثامر .. يا قمر انت ..
ثامر يصارخ : هلا والله .. آمر انت يا عمري
بندر يطالع البنت اللي تمشي وبياكلها بعيونه وهو يقول بصوت عالي : ثامر يا حلو .. سجل عندك رقمي .. صفر .. خمسة .. خمسة .. *******
ثامر : وصل .... ابشر بعزك .. انتظر مني مكالمة طيب...؟؟
بندر : على احر من الجمر يالحبيييييييييب ...

التفتت البنت عليهم وعطتهم نظرة غرور ومشت ...

بندر لثامر : فدييييييتهاااا .. شفت شلون تجنن ... عيونها ذباااحة .. تقول سهااام ..
ثامر : خخخخ .. شفت شكلها وهي معصبة .. كانت بتكفخك ..
بندر بحالمية : ظرب الحبيب .. زي اكل الزبييييييييب ..
ثامر : روووح يللا عاااد ..

مرت بنت مبرقعة على الرصيف تمشي بدلع ..

بندر لثامر : الللللللللحق .. دورك يا بطل ..
ثامر يطالع البنت ويقول لبندر : حبيبي يا بعد جبدي يا بندر .. يا عين ابوي اانت .. سجل عندك ..
بندر : كااااااااااك .. عطيني حبيبي .. كم رقمك ...؟؟
ثامر بصوت عالي : اكتب عندك .. صفر .. خمسة .. ستة .. ******
بندر : خلاص حبيبي استنى مني اتصال ف اقرب وقت ..

لفت البنت عليهم تتطنز : ههههههههههههههههاااااي .. موبااااااايلي،،،،...

بندر فقع ضحك .. اما ثامر فطاح وجهه من الفشلة ....
بندر : هذا اللي ياخذ موبايلي وش يصير فيه .. كااااااااااااااااااك .. فشلوووووه فشلوووه
ثامر : مالت عليها هالخايسة .. من زينها .. ما شافت عمرها مع هذا البرقع .. كانها من سلاحف النينجا ....!!!
بندر : هههههههههههههه ... امش بس الله يخسك .. خلينا نكمل شغل ..

دخل ثامر الحوش اما بندر فقعد يتمطط ف الشارع ويحرك عضلاته ... ولمح واحد ف سيارته من الصباح وهو موجود ويطالعهم ما تحرك ..
طلع فيه بندر باستفهام .. اما الرجال فابتسم ونزل من السيارة : ماشالله .. شكلك مداوم ف الجيم .....
بندر بابتسامة : ها..؟؟ أي والله .. لا زم الواحد يهتم بشكله شوي .. وش عندك من الصباح هنا...؟؟
فصخ الرجال نظارته وقال وهو يبتسم : ماعندي سالفة .. تعرف .. عزوبي .. وما اشتغل .. وزهقااان ... وش بسوي غير الهيااااتة ف هالشوارع .. ؟؟؟
بندر : أي والله وانت صااادق .. زهق هالايام .. بس يالله العيد جاي .. ع الاقل فيه اكشن شوي ...
الرجال : أي والله .. وش تسوون انتوا ..؟؟
بندر : والله تعرف ما عندنا سواق .. والوالدة تبغى البيت نظيف قبل ما يجي العيد بـ 3 ايام ع الاقل .. وتبغانا ننظف الحوش والسيارات حقتنا .. تعرف الحريم بعد ....الا تعال .. ما تعرفنا ...؟؟
الرجال وهو يمد يده : أي صح .. انا رائد ..
بندر مد يده يسلم عليه : والنعم يا رائد .. معاك بندر ..
رائد : يا هلا بك يا بندر .. تحتاجون مساعدة ..؟؟

جا ثامر ......

ثامر : يللا ما بتجي..؟؟
بندر : ثامر .. هذا رائد .. عرفته اللي من الصباح ف السيارة ..
ثامر وهو يسلم على رائد : هلا والله .. انا ثامر .. اخو هذا التوام
رائد : ماشالله توام ..؟؟
بندر : أي والله .. بس غير عن بعض ..
رائد : ما تبغون اساعدكم ..؟؟
بندر : لا والله مشكوووور
ثامر : ما تقصر ..
رائد : والله خلون اساعدكم .. زهقان حدي مدري وين ارووح .. ع الاقل اتسلى معاكم ..
ثامر : انا ما عندي مانع .. بس بنتعبك معانا .. ماله داعي ..
رائد : يا رجال لا تعب ولاشي .. ما صدقت على الله احصل لي شي اسويه ..
بندر : خلاص طيب .. حياك .. بس ها .. تشتغل زينا .. مو اقل ..
رائد : خخخخ ولا يهمك ..

دخلوا الثلاثة الحوش .. بندر وثامر ومعاهم رائد اللي كان لابس بنطلون جينز وفنيلة بيضا ..

ثامر مسك الهوز : بندر ننظف الارض اول ...؟؟
بندر : لا خلينا نخلص من الاشجار هذي ..
رائد : وش بتسوون فيها ..
بندر : بنقصقص فروعها واوراقها شوي .. شكلها مرة خايس كذا ..
رائد : اوكي .. ثامر عطني مقص لو سمحت ..

راح ثامر وجاب واحد زيادة لرائد .. وبدوا الكل يشتغل .. كل واحد مسك له شجرة يقصقص فيها على كيفه .. وبالشكل اللي يعجبه ..

التفت ثامر على رائد وشاف فنيلته انشقت بسبب الاشواك اللي ف الشجرة ..
ثامر : ما قلنا لك لا تشتغل .. ما تسمع الكلام ..
رائد : الا هي فنيلة .. مانيب ميت اذا انشقت ..
بندر : سوي زيي .. والله ما بتندم .. خصوصا مع هالجو ..

فكر رائد شوي .. وبعدها وقف وفصخ فنيلته ..
بندر : ماشالله .. وتقول ما عندك عضلات ...؟؟
رائد : هههه .. كنت ارفع اثقال من كم شهر .. والحين وقفت ..
بندر : جيب فنيلتك .. احطها لك ف البيت لا تتوصخ ..
رائد : لا خلاص بوديها السيارة .. ماله داعي
بندر وهو ياخذ الفنيلة : يا شيخ جيبها .. محد ف البيت .. البيت فاضي ..

اخذ بندر الفنيلة ووداها البيت .. ورجعوا يشتغلوا ...

( بعد ربع ساعة )

اذن الظهر وراحوا الكل يصلون الظهر ف البيت .. وبعدها رجعوا لاشغالهم .. وما كان باقي لهم غير الجدران والارضية ..

رائد : يللا اذا شدينا حيلنا .. نخلص الارضية والجدران ف نص ساعة
بندر : خلاص .. رائد انت خذ الهوز ورش الجدران بشكل عشوائي .. مو لازم تتنظف مررة .. وانا وثامر بننظف الارض ونشطفها بالموية ..
رائد : خلاص اوكي ...

ومع الهمة العالية اللي عند الشباب .. خلصوا اشغالهم .. بس بعدها طبعا وقفوا ف الزاوية وقعدوا يرشون بعض موية .. لين ما تغرقوا كلهم .. حتى رائد بنطلونه صار يكب موية وهو يمشي ...

بندر : خخخخ .. الحين انت وشلون بتمشي مع هالبنطلون ...؟؟
رائد : ههههههه مدري والله .. عادي ينشف الحين ..
ثامر : تشربون شاهي ..؟؟
بندر : لا نبغى شي باااارد يبرد ع القلب..
ثامر : بروح اشوف لنا شي ..

وبعد كم دقيقة رجع .. رجع ثامر ومعاه علب بيبسي ...

رائد وهو ياخذ العلبة : جات فوقتها ..

قعدوا الشباب على العتبة حقت الباب وقعدوا يشربون ويسولفون ...
بندر : كم عمرك يا رائد .؟؟
رائد : 26 سنة
ثامر : مو مبين عليك .. محشش ..
رائد : خخخ .. ابوي يقول انه لا يمكن يشغلني معاه ف الشركة حقته .. يقول اني مو قد المسؤولية ...
بندر : افاااا .... دايم كذا الاباء .. حتى ابوي .. يقول احنا ما مننا فايدة ..

( ف نفس الوقت )

قامت من النوم .. اليوم نامت زين وشبعت .. راحت الحمام .. غسلت وجهها وغيرت ملابسها .. لبست بنطلون جينز وبلوزة فوشي بدون اكمام .. وقعدت ترتب شعرها ع المرايا ...

دانة : آآآآآآآآآآه يا حلو الويك اند بدون جامعة .... وناااسة

سوت تسريحات كثيرة بس كلهم ما عجبوها .. وآخرتها استسلمت وخلته مفتووح ...

طلعت من غرفتها ومشت ف الممر ...

دانة : غريبة ... ما في صوت .. اول مرة الهدوووء كذا ف البيت ..

فتحت الباب حق غرفة بندر وثامر شوي شوي عشان ما تقومهم ... بس ... ما حصلت احد

دانة : لا لا لا اكيد في إن ف السالفة .. اجل قايمين من الظهر ...؟؟ هذولي ما يقومون قبل اذان العصر ....

طلعت من الغرفة لغرفة امها ونفس الشي ما حصلت احد .. فقررت تنزل تحت ..

لما نزلت من على الدرج .. شافت الباب حق البيت مفتوح واصوات اخوانها برى ....
دانة : شيسوون هذولي من الصباح .....؟؟

دارت بعيونها على الصالة وطاح نظرها على فنيلة بيضا
دانة : حتى الفنايل بيرمونها ف الصالة .. حشى !! محد يبغى يتحرك ويحطها ف سلة الغسيل ... ؟؟؟

اخذت الفنيلة وودتها لغرفة الغسيل وحطتها ف الغسالة ....
دانة : الله يعين زوجتك عليك يا بندر ... والله انها تكسر خاطري ..

طلعت من غرفة الغسيل متوجهة لباب البيت المفتوح ..

ويوم قربت من الباب شافت واحد واقف بدون فنيل ولابس نظارة شمسية .. ويوم قربت اكثر من الباب .. انتبه رائد لها والتفت ... وطاحت عينه بعينها ... بس اللي يشوفه يقول انه ماصار شي .. لانه رائد كان واقف ويطالع البيت وملامحه هادية .. اما دانة فشهقت يوم عرفته وراحت تركض بسرعة على الدرج لغرفتها ...

بندر : شفيك يا رجال ...؟؟
رائد : لا ولاشي .. بس اثاث الصالة حقكم ماشالله حلو ..
ثامر : الله يهديك احسب عندك سالفة .. واقول انا ليش الاخ سرحااان .. اثره الاثاث عاجبك خخخخخ
رائد : ههههه الله يخس ابليسك .. دايم فكرك يروح بعيد ... ( شاف ساعته ) يللا شباب انا استأذن .. فرصة سعيدة اني تعرفت عليكم
بندر : وين يا شيخ .. اقعد شوي ...
رائد : لا والله خلاص .. الحين الوالدة اللي عندي تبدا تدقدق علي ..
ثامر : هههه احس بشعووورك ...
بندر : طيب بس لحظة .. اجيب لك ملابس زي الناس تلبسها ..
رائد : ما يحتاج يا شيخ .. والله انها الحين بدت تنشف .. بعدين انا رايح البيت الحين .. وبغيرها ..
بندر : ما يصير توصخت وتغرقت ماي ..
رائد : معليش .... كلها خمس دقايق وانا ف البيت .. لا تخاف انت بس عطيني الفنيلة .. و مشكووور ما تقصر .. كفيت ووفيت
ثامر : احنا اللي ما ندري وشلون نشكرك يا رائد .. والله تعبناك معانا ..
رائد : افاا عليك .. احنا ربع واخوان ..

دخل ثامر يده ف جيبه وطلع ورقة بيضا صغيرة وعطاها رائد ..
رائد : ايش هذي ..
ثامر : رقمي ورقم بندر .. وآسف ع الورقة الصغيرة .. تعرف لزوووم الترقيم ..
رائد : خخخخخخ اما انك زااااحف ..

طلع بندر من الصالة : اقول ثامر .. شفت فنيلة الرجال ... ؟
ثامر : لأ
رائد : شصار ...؟؟
بندر : لحظة بس ..

رجع دخل بندر البيت من جديد وراح للمطبخ اللي فيه الشغالة ..
بندر : هي .. راااني .. مافي شوف فنيلة ف الصالة ...؟
الشغالة تهز راسها : نووو بابا .. مافي شوووف ..
بندر : انتي وش شفتي اصلا ؟؟

طلع من المطبخ معصب للدور اللي فوق .. ودق الباب على دانة اللي كانت قاعدة على السرير خايفة من الموقف اللي صار قبل شوي ...

دانة : مين ...؟؟
بندر : انا بندر افتحي الباب ..
خافت دانة " ياويلييييييي ... اكيد قال له .. والله بروح فيها " : أ.. ط.. طيب طيب ..

فتحت الباب بهدوووء ويدها ترتجف : هلا بندر ..

بندر : اقول دانة .. انتي نزلتي تحت ..؟؟
دانة " اقول له او ما اقول ..؟؟ بس اكيد هذاك قال له واذا كذبت بيعرف " : إ... إلا
بندر : طيب شفتي فنيلة موجودة على الكنبة ....؟؟ لونها ابيض ..
دانة بدت تتنفس براحة وهدت : أي ... ليش...؟؟
بندر : وينها ..؟؟
دانة:حطيتها ف الغسالة اغسلها لك ...
بندر فتح عيونه ع الاخير : يا فضيحتنا.................!!!!!
دانة : ليش...؟؟
بندر : الفنيلة فنيلة الرجال ... وشلون الحين يروح البيت ...؟؟
دانة : أي رجال...؟
بندر : واحد بن حلال ساعدنا ف تنظيف الحوش ....
دانة " الحماااار .. قاعد يتقرب من اخواناي هااا....؟؟ ما يستحي .. احسن يستاهل .. مافي فنيلة " : طيب عادي .. خليه يروح بدونها
بندر : شتقولين انتي ..؟؟ والله عيب .. الرجال ساعدنا وتعب .. وآخرتها يطلع بدون فنيلته .......؟!؟!؟!
دانة : طيب عطيه وحدة من فنايلك يعني .. وش اسوي ...؟؟
بندر : اففففف .. خلاص طيب .. لاتنزلين تحت تراه موجود ...
دانة : طيب ..

طلع بندر من الغرفة وراح لغرفة الغسيل .. طفا الغسالة وطلع الفنيلة اللي مغرقة ماي وصابون ...
بندر : يووووه ... هذي ما تنلبس كذا ... الله يهديك يا دانة ...

حط الفنيلة بكيس وطلع لغرفته .. وجاب فنيلة واسعة من عنده لونها اسود .. ورجع لبرا ..

رائد : وينك يا رجال طولت ....
بندر وهو مستحي : والله مدري وش اقولك يا رائد .. بصراحة متفشل منك ..
رائد : ليش...؟
بندر متلوم : والله انا حطيت الفنيلة بالصالة .. واختي الله يهديها ... بالغلط حسبتها فنيلتي .. وراحت حطتها بالغسالة ... وتغرقت ماس وصابون ..
رائد " فديييييييتهااا .. غسلت لي ملابسي " : لا عادي افا عليك ... اروح كذا مسوي اكشن ف الحي .. والله يخقون علي البنات ... ههههه
ثامر : هذا اكشن...؟؟؟!؟؟! والله ماعندكم سالفة .. تطلعون مفاصيخ وتقولون اكشن ..
رائد : هدي هدي يالشيخ .. آسفين .. اعصابك ..
بندر : بس انا جبت لك فنيل واسعة عندي ...
رائد : تسلم ما تقصر .. بس ماله داعي والله ..
بندر : رائد خذها الله يخليك .. حدني متفشل منك .. سامحنا على هالموقف البايخ ..
رائد : ياخوي لاتعقد الموضوع .. خلاص ابشر .. جيب الفنيلة عشان ضميرك يرتاح ..
اخذ رائد الفنيلة حقت بندر ولبسها ...

رائد وهو يسلم على بندر وثامر : انشالله بيننا اتصال قريب ..
ثامر : لاتقطعنا ...
رائد : لا انشالله .. فرصة سعيدة اني تعرفت عليكم ..
بندر : حياك الله ف أي وقت ..
رائد : الله يحييك .. يللا ف امان الله ..

(( بيت ابو عوض ))

( الساعة 6 المغرب )

رجع عوض من الصلاة ودخل البيت .. وقف عند الدرج وقال وهو يصارخ : يا ام كششششششششششششششششششششة ...!!! ما خلصتي.....؟؟

اروى تصارخ من غرفتها وهي طالعة : الا خلصت ... لاتصارخ .... كسرت الدرايش ..
عوض : كيفي مو انتي اللي مشتريتهم .. انزلي يللا خلصينا ...
اروى وهو تنزل : مالت عليك ... بتذلنا على هالمشواااااار ....
عوض وهو يدفها : اقول امشي بس .. لا تاخرينا ..
اروى : اقول من الحين شووووف .. لا تكرفتني وتقول بسرعة بسرعة .. ترى امس صديقتي غادة راحت كذا .. وطلع البنطلون ما يناسب البلوووزة .. خليني اشتري على راحتي .. ولا ترى بتوديني مشوار ثاني ...
عوض وهو شوي ويموتها : طيب خلاص خلاص .. انطمي وامشي .. حشى ..!! محد يقدر يقول لك كلمة ....!!!!؟؟

ركبوا السيارة وكالعادة تهاوشوا على الاغاني .. اروى تبغى البانوراما .. وعوض الام بي سي الخليجية ..... وخذوا من السب والصراخ اللي ف السيارة ....

أروى : اصلا انت واحد قوري .. ما تعرف التحظر والرووومنسية ... حدك هالطير المخنوق والعجيز حق العرب هذا ....!!..!.!
عوض : جيبي صوته بعدين تعالي تكلمي يا ست هيفاااا ... والله انتي اللي ما تفهمين شي بالفن ... حدك هالمسخرة اللي تطلع بالتلفزيوونات ..
اروى : انت وش فهمك ...؟؟ هذا تطور ... مو زيك للحين قاعد لي على الحفلات .. يا بابا اخترعوا فيديو كليبات ... ارتقي شوي .. كم مرة بعلمك ...؟؟!؟!
عوض : لاعطيني كف احسن .. ولا ورى ما تصيرين اكبر مني وتفلعيني ببلوك ....؟!؟!
اروى : يكون احسن والله

وعلى هذا الموال .. كملوا طريقهم ...