من قلب البساطة يأتي الجَمال

وَلَكِنِّي عَزِيزَةُ نَفْسٍ، إِنْ هَانَ قَلْبِي فَارَقْتُ

لمتابعي مدونتي

من النّعم العظيمة هي أن يبعد الله عنك طبع الفضول
لا أنت مهووس بحياة الناس وتفاصيل عيشهم
ولا مهتم بالجديد عنهم ولا أسرارهم
لا تركض وراء القيل والقال وليس لديك رغبة بمعرفة شيء عن أحد
نعمة أن يكون كل همك كيف تجعل نفسك أرقى وأفضل كل يوم
مركزًا مع حالك وتاركًا حال غيرك لخالقهم

نحب الناس إللي علاقتي معاهم مافيهاش إلتزام
إذا فضينا لبعض تواصلنا
وإذا انشغلنا كل واحد عذره معاه
لأننا متأكدين الحب في قلوبنا ليس بكثرة الكلام واللقاء

وقت نعاونك أو نساعدك في حاجة و انت من داخلك إستغلالي وما تستاهلش
هاذي لآن قلبي كبير مش لإنك ضحكت عليا لأن مايفوت عليا شي
اللي نفوت فيه بمزاجي ونعرفه كويس
و وقت نتوقع منك الخير وأنت داسلي الشر هذا لان نيتي طيبة مش لأني غبية
و وقت ما نردش على حاجة وجعتني هذا لأني متربية مش خايفة
و وقت نعطيك فرصة ثانية وثالثة هذا لأني متسامحة ومانحبش المشاكل مش لأن ضعيفة
ولما يطفح الكيل نرجعوك لحجمك الطبيعي

وحدة تعطيها فنجان القهوة تقولك " شكراً ويعطيك الصحة "
ووحدة تقولك " خيرها هكي "
وحدة تجيبيلها ساعة هدية تقولك " بارك الله فيك انّك اذكرتيني"
ووحدة تقولك " باهي شكراً مع انّ عندي عرم "

النّاس نوعين

نوع يقدرك ويجبر بخاطرك بكلامه يقعد ديما خاطرك تشوفيه وتتعاملي معاه
ونوع مش عاجبه شي مهما اديري تتمني معاش تتلاقي معاه

النوع الثاني هذا بالذات لما تتلاقي معاهم تعاملي معاهم هك بس

النوايا هادي تلقوها داخل التمر والبلح
أما اني الحق يهمني اللي نشوفه منك الفعل سيد الموقف

الهزوة مش باهية
الوطى كلنا نمشوا عليها والسمي ماالحقها حد
والدنيا قش في قش واللي ينتفخ ينفش
نستغرب في اللي يتعاملو على إنهم غير .. حياشهم غير .. نسبهم غير .. هما غير ....
يحسابوا روحهم نازلين من فوق بروحهم
راسمين لروحهم في مخيلتهم ان لا وراهم و لا دونهم
مهيئين لنفسهم ان صغارهم غير ومتخيلين انهم إستثناء وانهم ديما غير
وحاسبين روحهم حاجة واو رغم أنهم فارغين تعالو نقوللكم علي اى فئة نحكي
نتكلم بالتحديد( عالناس الهزاية وهي لا شي)
راهو في كل حوش في حاجة ناقصة وقلة راحة في نقطة معينة لكن الرضا والصبر هما اللي يمشو في الحياة النقص وقلة الراحة متوزعة على حياشنا …
الحوش اللي مافيشي موت وفقد ،فيه مريض
وفي حوش فيه مراهق مدهش اماليه، وفي الطايش اللي مشهدر بأهله
وفي ديار تبكي فيها المطلقة المظلومة وماحدش يندري عليها وناس عندهم أرملة تجري وماتدري على صغارها
وفي البو الواعر وفي البو اللي مايصلحش وفي البو اللي مهناش أصلاً وفي الام اللي تفرق في المعاملة وفي الام القاسية
وفي الام الظالمة وفي الام المظلومة
وفي الخوت اللي مايرحموش وفي الخوات المضطهدات وفي الخوت اللي وضعهم سيء لا خدمة لا قدمة وحالهم يبكي
كل باب وراه سر .. وكل حوش فيه ابتلاء شكل
لان حياشنا حياش دنيا ..حياش مؤقتة ولو كانت ملك .. لان المستقر في الجنة يارب اجعلنا من اهل الجنه
لذلك لما تسمعو مشكلة عن فلانة والا العيلة الفولانية صارلهم شي ..
ردددو بالكم منها النفخة هاديكا بتع احني ماعندناش هكي واحني خير منهم
هزوتكم على بنات الناس حتوليلك ..حتلقي من هازي على بنتك ..
و اللي هازية عليها لانها بلا دار نوم مرات مرتاحة اكثر منك يالي ترقدي في دار وراجلك في دار تانية …
وولدك صح ما يدخنش لكن مرات يدير في بلاوي احرف .. وغيرها وغيرها ديمة ادعي باالهدايا وقولي فجيوة في الناس واسكتي
و لو بتقارنو روحكم بغيركم تلقو حالكم انتم اللي يبكي مش غيركم
وراهي الناس تحس ما يفوت عليكم شي !!
تحس بشبحاتك لمناديرهم وتقعميزتك اللي مش مرتاحة وطاستك الي ماكملتهاش تأففاً ..وجيتك اللي فوق من النفس
لذلك تواضعو وإغلبها النفس الدنيئة اللي واهماتك انك احسن من غيرك ..
وراهو في فرق بين صالح ومستور ..و بين الفلوس لما تبدأ رزق أو ابتلاء
وراك تراب يمشي على تراب حوشك وعيلتك وصغارك وفلوسك وجمالك وكل شي عندك فاني ..ف ردي بالك
تواضعو لما تخشو حياة غيركم خشو حياش الناس غاضين البصر
وقبل ما تعفسو عتبتهم نظفو قلوبكم و
خشوا لحياش الناس طرش وعمي وبكاكيش
خشو باش توسعو االخاطر وتجبروا الخواطر وتقولو كلمة باهية راه الدنيا فانية
ان شاء الله ربي يغلبنا علي هالنفس

ماتقدرش تعلم حد الاصول
بس تقدر تباعد ع اللي متعلمهاش الواحد ماعرفش قيمة تربية اماليه غير لما كبر وشاف التصرفات المعفنه آللي تطلع من الناس ربي يكرم أهلنا ويجازيهم كل خير