من قلب البساطة يأتي الجَمال

رسالة لقلبك..
لا تستبعِد أن يُعطل الله المرافق والطرق لأجلك..
وأن يعمي الأبصار عن شئ تحبه لأجلك..
وأن يهدي قلب أحدهم لأجلك..
وأن يغير قوانين الكون لأجلك..
وهو الذي إذا اضطررت إليه ، ينجيك بذات أسباب الهلاك..
فيغيّر من أجل قلبِك المسكين هذا الذي كنت تظنه لن يتغير..
لا تستبعدها على الله ولا تسكثرها على نفسك..
فالرحيم رحيمٌ مع جميع خلقه..
هي صفةٌ لا تنفك عن ذاته العُليا..
ولكن حين يخرجك من حلق الضيق إلى أوسع الطريق ، لا تنسَ أنه كان يدبر لك سكن قلبك وقت أن ظننت أنه لا جدوي من أي شئ ..
وقت أن كنت تظن به غير ما ينبغي أن تظن..
وحتى إذا تغيرت القوانين ، وتعطَّلت المرافق ، يوقنُ قلبك أنها واللهِ ما تغيرت وتعطلت الا لأجلك..
الله لطيفٌ بعباده..

اني مانعرفش ناخد موقف مع شخص قالولي انه يدوي عليا او مامخلي في قفاي شي رغم انه قدامي كويس و يعاملي فيا افضل معاملة !
اني مانقدرش نحاسب شخص على اللي سمعته مش ضعف مني بالعكس قوه في الله .
و سيدنا عمر بن خطاب"رضى الله عنه" قال :
"عاملوا الناس بما يظهرونه لكم والله يتولى مافي صدورهم".
وكلهم على ربي لو فعلا قالوا ، ولو ماقالوش حانكونوا ماخديناش ذنب حد

في حاجات لازم تركز فيهم باش تعرف في كل موقف كيف تتعامل و شن اللي مفروض تتوقعه لان هو اللي حايصير ..
لو تلاحظ حاتلقى ان وقت ماتفرح حايكونوا حواليك اللي تحبهم .. و لما حاتضايق حايكونوا حواليك اللي يحبوك .
لان في يوم فرحتك حاتلقى روحك تتصل باللي تحبهم باش يكونوا جنبك و معاك و يحضروا الفرحة امتاعك ، و يوم لا قدر الله تفقد شخص و بجوك يعزوك حاتلقى اللي جوك كلهم يحبوك لان قلبهم لجابهم مش اتصالك .
ديما لما تفرح اتصل باللي تحبه .. و لما تضايق اتصل باللي يحبك " وربي يرزقنا باللي حانتصلوا بيه فالحالتين"

احني نعرفوا ان الدنيا معبيه دروس و ان كل حاجه نمروا بيها حانتعلموا منها
لكن ماكنتش نتمنى ان الدرس هذا نتعلمه منك انت ..
ولا كنت نتمنى ان طيحة الشاطر اللي بألف تكون انت سببها ولا كنت نتوقع ان اللي بعلمني ان الدنيا ماتوقفش على حد و ان مافيهاش امان و ان العشرة تهون تكون انت

اللي بيمشي أفتحله الباب و قوله أنستنا ..
و اللي بيرخي الحبل أعطيه الحبل هدية ..
واللي بينساك قوله من معاي ! مافيش حد خير من حد

اكتر نعمة مفروض الانسان يحمد ربي عليها هي ان خلاه يشوف النعم اللي عنده ..
في ناس على قد ما عندهم من نعم و خيرات الا ان مايشوفش فيهم
ولا يحمد في ربي ولا يدعي بدوام النعم عليه ..
تلقاه ديما مهما تقوله و توريه انه في نعمة مايشوفش في شي .
اسأل الله ان ينور بصيرتنا و يخلينا نشوفوا و نفرحوا و نرتاحوا و نحمدوه على كل نعمة
عندنا و غيرنا ماعنداش

في حاجه غايبة شوية على الناس وهي ان الانسان يُحاسب على افعاله و " ردود افعاله " يعني مش تحساب انك لما شخص يقولك كلمة و ترد عليه بعشرة معناها انت في موضع رد الفعل و تبرر لنفسك انك مش غالط .. بالعكس انت غالط زيك زيه و الزوز حاتتحاسبوا و ممكن انت اكتر كل ما كتر الغلط ..
قال تعالى ؛ {مَا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ}
و قال تعالى : (فَمَنْ يَعْمَلْ مِثْقَالَ ذَرَّةٍ خَيْرًا يَرَهُ * وَمَنْ يَعْمَلْ مِثْقَالَ ذَرَّةٍ شَرًّا يَرَهُ)
يعني وين ماكنت تكون و شن ماكان يكون اي فعل اديره او رد فعل غلط حاتتحاسب عليه

الاخلاق و الكلمة الطيبة مش عند اي حد رد بالك تتعشم و تضمن حد و تعطي جنابك
لشخص مزال ماعاشرتاش و مريت معاه بمواقف تتبت حسن نيته و اخلاقه
يقول الإمام علي بن أبي طالب :" خوافي الاخلاق تكشفها المعاشرة "
الحقيقة حاتبان و كل انسان يمثل نفسه فماتعطيش سر و امان
و الحاجات اللي حاتخلي سوء خلقهم يمس نضافتك

عسى ان تكرهوا شيئًا وهو خيرًا لكم .. لعل الله يحدث بعد ذلك امرا ..