روح عشقتة وقلب فقدتة للكاتبة : بنت البلاد

روح عشقتة وقلب فقدتة للكاتبة : بنت البلاد

روح عشقتة وقلب فقدتة للكاتبة : بنت البلاد
الفصل الاول
الجزء الاول

يوم ثلاث الساعه 12 في المكتب..
بوفهد: لو سمحتي اختي ممكن تاخذين هالأوراق وتكملينهم عني لأني اليوم طالع اجازه ..
تمت تتطالعه وتتأمله كأنها لآخر مره راح تشوفه.. وبحزن وهي منزله راسها.. وتتنهد: هاتهم خل الاقي شي يشغلني على الأقل..
بوفهد: عاد اسمحي لي ثقلت عليج بالشغل.. روحج اكيد مب ناقصه..
حور وبخاطرها تصيح وتصرخ.. بس مب قادره .. حاسه بكبت في صدرها.. شو تقول وشو تشكي.. اتطالعته بنظرة حزن ولوم.. : لا ماعليك.. وان شاء الله تستانس بهالإجازه..
بوفهد وهو يطالعها وكأن بخاطره شي يقوله لها.. بس يحس كل شي ضده والسكوت احسن شي له ولحور.. وبتعب: استانس.. هيييييييه.. الله يسمع منج.. مع السلامه
حور وبودها تقول له لا تروح.. : مــ.. ع السلامه..
وطلع من عندها وهو طالع دعم خوله الموظفه الثانيه تمت تتطالعه من فوق لتحت: غير نظاراتك الظاهر ماتنفع لأن ماقمت تشوف بها..
بوفهد: روحي انا فايج لج انتي الثانيه..
خوله وهي تضحك: والله بخبر عليك ريلي..
بوفهد وهو ماشي وصاد صوبها ويمشي على ورا: مره خوفتيني منه..
جان يدعم له هالمره شخص ثاني وكان ريال.. وخوله تمت تضحك ودخلت مكتب حور.. من شاف الريال انصدم .. لأنه ريل خوله.. في خاطره: لاحووول وقته وانا ناقص..
خليفه.. (ريل خوله): شو بلاك ياعـ..
بوفهد: لوسمحت انا كم مره اقول لا تنادوني بإسمي وانا في الدوام.. نادوني بإسم بوفهد..
خليفه: ههههه.. يالله مابقى شي وفهد بيي بهالدنيا.. يا بوفهد..
بوفهد اطالعه وصد عنه بغى يروح يره خليفه ورده صوبه: تعال انت هني .. وين ساير.. شو بلاها حرمتي تتشكى؟
بوفهد: ماشي دعمتها شرات مادعمتك.. الإخت حرجت علينا وعلى طول قالت بتخبرك..
خليفه: هههه .. عيل مسوي لك رعب انا..
بوفهد: رح لا فايج انت الثاني.. يلا انا ساير ماصدقت طلعت الإجازه.. الي اشك اني بتهنى فيها..
خليفه وهو يبتسم له ويطبطب على جتفه: هونها ياخوي.. ترا الدنيا ماتسوى.. وعسى ان تكرهوا شيئا وهو خير لكم..
بوفهد ابتسم له: الله كريم
وراح عنه .. اممم .. بوفهد.. مابقول لكم اسمه لأن الأخ مايبانا نزقره بإسمه.. عمره 25 سنه.. ريال والنعم فيه.. كل الي في الدوام وياه يشهد له ولآخلاقه .. من عايله متوسطه.. لا هم اغنيا ولا هم فقارا.. يعني مستورين.. يتميز بوفهد بخشمه الطويل.. وهالميزه في العايله كلها تقريبا.. عنده اخت عمرها 23سنه ماخذه واحد من اهلها.. بحكم ان من عاداتهم البنت ماتاخذ من برع العايله.. الله رازقها ببنت اسمها إيمان.. صغيرونه وحلوه.. فديتها ياربي.. براويكم صورتها بعدين.. واخوه الثاني عمره21 سنه طالب فالتقنيه اخر سنه في الهندسة الإلكترونيه.. اساميهم.. خلها بعدين مع القصه والأحداث..
خليفه وخوله.. هاييل زملاء بوفهد في الدوام.. خوله اكبر عن بوفهد.. عمرها 32 سنه.. وخليفه 35 سنه.. تزوجوا عن طريق تعارفهم على بعض الدوام.. خليفه مات عليها وخطبها.. على قولتها.. ضربته بسهامي وسحبته لقلبي.. يحبون بعض وايد.. ويحبون بوفهد وحور وايد..لطيبتهم .. حور انسانه طيبه ومن النوع الشغوله... ماتتدخل بأمور ماتعنيها.. وبوفهد هو الي مالي عليهم المكان بسوالفه.. خل نرجع يوم دخلت خولة عند حور..
دخلت خوله وهي تضحك على بوفهد..
خوله: هههه لو شفتيه يا حور كيف دعم خليفه ومات من الخوف..
ابتسمت لها حور من ورا خاطرها وهي تشخبط على الورقه الي يدامها.. : يحليله..
خوله: شوبلاج يا حور شالة هموم الدنيا على راسه..
حور: انتي ادرى بالحال ياخوله مايحتاي ارمس..
خوله: تتنهد .. المشكله اني اعرف لكن شو بتسوين .. شو بيدج .. مب حلوه انج تكسرين كلمه ابوج جدام العرب الكل يعرف انج محيره لولد عمج من صغركم و من فتره وكدوا ها الخطبه .. الموضوع لا بيدي و لا بيدج هاي عادت و مشوا عليها اهالينا و لازم ترضين بالمكتوب ..
حور: بس مب على حسابي سعادتي.. تخيلي نفسج لو خذتي خليفه وانتي في حياتج لا شفتيه ولا تعرفين شكله.. شو موقفج..
خوله: ادري والله اني حاسه فيج.. ليش اتحسسيني اني مب حاسه فيج؟
حور: لا بس صعبه.. والله ان ياني بوفهد وياب لي الأوراق وحطاهم يدامي مع اني طالعه اجازه بعد وماقدرت اقول له لا.. هالإنسان ساحرني مسوي فيني شي..
خوله: انسيه يا حور.. باقي كم يوم وانتي بتكونين حرمة متزوجه مايجوز الي تقولينه..
حور وهي تنزل راسها: بعدني ماكملت عندكم 3 شهور بس ماتصورين كيف هالإنسان حبيته.. انا انسانه ماظهر من البيت ولا احتك بالناس وايد.. اقصد الرياييل طبعا.. زين منهم هلي سمحوا لي اشتغل.. تدرين لولا ان ابوي تعبان وراتبه ماصار يكفينا ماكان بيخلينا وتعرفين انه مايحب يطلب من عمامي ولو انهم مابيقصرون ابد.. بس الحاجه.. ويوم ييت وداومت وتعاملت وياه.. حسيته غير.. يعني تخيلي حتى مب قادره اتخيل شكل ريلي..
خوله وهي تقرب من حور وتحضنها: خوله وهي تقرب من وديمه وتحضنها: فديتج والله.. ما اعرف شو اقولج ... انتي من صوب وبوفهد من صوب .. محد يعرف شو فيه .. كل اللي عرفناه انه مرض فجاه و خلاف قمنا نجوف الحزن ف عيونه .. ها الانسان اللي طول عمره يضحك و يسولف بهتت ضحكته و ذبلت سوالفه ... و محد يعرف شو اللي صابه .. و انتي .. آه منج انتي .. مشكلتج ما نتمناها لكافر .. وين لشخص غالي ... يا الله الله كريم يفرجها عليكم ...
حور وهي تقبض ايد خوله وبعيون مليانه دموع: دخيلج ابا عرف شوفيه.. اسألي خليفه.. ابا اطمن عليه..
خوله: حور.. ماقدر اسأل ريلي عن ريال غريب حتى لو كنت انا اكبر عنه..
حور نزلت راسها.. : الله كريم.. انزين وهالأوراق بطيح على جبدي انا بطلع اجازه اليوم.. تدرين عرسي بالخميس..
خوله: ماعليج انا بخلصهم..
حور: مادري لولاج جان شو حالتي..
خوله وهي تضرب حور على جتفها: يلا خل عنج هالرمسه البايخه..
حور: والله هالصدق.. لولاج جان ماداومت..
خوله: انتي ربيعه اختي كيف ماساعدج.. غلاتج من غلاتها وزود
دش عليهم خليفه..: لاحول انتوا الحريم لا قعدتوا ويا بعض مادري شو يصير فيكم.. حور سيري المدير طالبنج..
حور: شووو.. طالبني انا.. خير.. ؟
خليفه: شو بلاج.. سيري بتعرفين شو يبا.. وعن الخوف..
وراح عنهم خليفه.. وصدت حور صوب خوله وهي تعدل شيلتها: اقول عندي سؤال قبل لا روح..
خوله: خير؟؟
حور: بوفهد.. شواسمه؟.. للحين ماعرف اسمه..
خوله توها بتنطق بالإسم.. الا خليفه يزقرها وحور من الزيغه طلعت من المكتب وخوله اسكتت لأنها شافت ريلها.. وصدت صوبه.. : اممم حبيبي..
خليفه: مينونه انتي.. مب صاحية.. نحن في الدوام تقولين لي حبيبي..
خوله وهي ماده بوزها: قلتها بصوت واطي انزين..
خليفه: لا تقولين لا بصوت واطي ولا عالي.. ..( و يطالعها بنظره تحمل معاني الحب و هم يبتسم) .. امريني ؟
خوله: امممم.. بوفهد ليش قدم على اجازه..
خليفه: مب شغلج يلا.. صدق الحريم لقافه.. بعدين بخبرج
خوله: اهااا بنفتقده..
خليفه: صدقج.. سوالفه حلوه. ضحكته و طريقته ف تحليل امور الشغل ..؛(فجأة انتبه لنفسه) انتي ايه ضاربتها سوالف.. يلا على مكتبج.. جنج الا قاعدة في ميلس..
خوله وهي تمشي حذاله: لاحووول.. قلنا انك مديري عاد مب جي..
خليفه: يلا يلا.. الشغل شغل..
خوله وهي تمشي: بقدم استقالتي..
خليفه : يكون احسن..
خوله: ههههههه.. لالا هونت..
ابتسم خليفه وسار مكتبه.
في مكتب المدير حور واقفه ومختبص حالها خايفه شو بيقول لها المدير..
المدير: شوفي ياخوله.. انتي توج مداومه هني واحين بتظهرين اجازه نحن فالعادة مانعطي اجازات الا اذا كان الموظف معدي سنه على الأقل في دوامه ويانا.. وانتي ماكملتي 3 شهور وبتطلعين اجازه.. مابا هالشي يقلل من جهدج الي تعودنا عليه في الدوام.. شفنا شغلج كيف ماشاء الله في هالشهور وتغاضينا عن هالشي خصوصا ان الإجازه بتكون لزواجج .. بالبركه ان شاء الله..
حور وهي منزله راسها وتتنهد: تسلم.. ولا تحاتي .. بكون مخلصة شرات ماتعودتوا علي في شغلي..
المدير: يلا ربي يوفقج
طلعت من المكتب وتنهدت.. اففففففف اشششششوه اتخيله يرفض اجازتي.. بتخبل..
وراحت مكتبها ولمت شنطتها وشويه اوراق وراحت صوب مكتب خوله عشان تسلم عليها..
خوله: يلا اشعليج اجازه بعد 3 شهور شغل..
حور: هههههه.. الله والإجازه..
خوله: يلا عاد فجي هالعقده وتفائلي بالخير..
حور: خير في ريال ماعرف غير اسمه.. خليها على الله..
خوله: ماعليج انتي سيري واهتمي بعمرج(غمزت لها) اباج تردين وكرشتج يدامج..
حور وهي معطتنها ظهرها وتمشي عنها.. : والله انج متفيجه انا ويين وانتي وين..
ومرت على مكتب خليفه وسلمت عليه وسارت عشان تركب موترها وترد البيت..
حور.. هالإنسانه الطيبه الحنون.. كل همها ترضي اهلها وماتزعلهم في شي حتى لو على سبيل حساب سعادتها.. عمرها 23 سنه.. توها متخرجه من التقنيه وداومت عشان تساعد في مصاريف البيت شوي بعد ما خسر ابوها بتجارته و اللي كان ف حسابه اتحول لتسديد الديون .... مع ان ابوها اخوانه مايقصرون عليه بشي... بس هو عزيز النفس.. مايحب احد يشفق عليه او يساعده.. ابو حور وعمام حور مب اشقاء.. لأنهم مش من نفس الأبو.. لكنهم من نفس الأم.. عبدالعزيز ابو حور.. انسان طيب وحنون على عياله.. الله رزقه ببنتين.. ومن بعدها ماحملت زوجته ولا رضى يتزوج عليها دايما يقول يكفيني الله رزقني ببنتين اشحلاتهم.. والله يقدرني على تربيتهم.. من بعد مانولد عبدالعزيز توفى ابوه وتزوجت امه من ريال ثاني طيب وكان وايد حنون على عبدالعزيز وهالشي الي ماخلاه يحس بفراق ابوه.. وله اخو اسمه حميد واخت اسمها شيخه..والباقي بخليه مع الأحداث..
من وصلت البيت طلت على يدتها فغرفتها..
حور: السلام عليج يدوو.. (باست راسها).. اشحالج عساج بخير؟
يدة حور (جلثم): بخير يعلني فداج.. عاد منو قدج عروس..
حور وهي تبتسم من ورا خاطرها:يلا عيل شي تامريني بسير غرفتي عشان ابدل وانزل اتغدا..
جلثم: لا فديتج روحي الله يرضى عليج..
يدة حور هذي ام ابوها.. انسانه حنونه وايد والكل يحبها.. عيا عبدالعزيز ان امه ماتبات الا عنده.. ام حور (لطيفه) تحب ام ريلها وايد لأنها يتيمه ولطيفه ربتها من الصغر.. وزوجتها ولدها عبدالعزيز..
دخلت حور الصالة وشافت امها وابوها قاعدين باست راسها.. وسارت فوق عشان تبدل..
لطيفه: يما حور لا تحيرين لأن الغدا بينحط احين وانتي ماتحبين الأكل يبرد.
ابتسمت حور لأمها: ان شاء الله أميه.. عاد مجوودو وينها؟؟ يت من المدرسة ولا بعدها؟
مجد وهي طالعه من غرفتها: لا حوووووول.. انا فالكلية وبعدكم تقولون مدرسه..
حور وهي تضحك لها: ويا ويهج.. احمدي ربج بعدنا نعدج صغيره وندلعج..
مجد: لا لا .. غديت 20 سنه وين صغيره..
حور وهي تمشي صوبها عشان تدخل الغرفه الي مشتركه بينهم.. وتمطها من شعرها وتدخلها: تعالي يالكبيره عيل..
مجد: هههههه.. انزين قلنا مب صغيره عاد لا تمطون شعري.. بقرع وعقب ريلي مايباني..
حور: هههه ياحبج للريل..
مجد: مب شراتج.. جنه الا بيجتلونج بالخميس.. مب طايعه تهدين..
حور: لو كنتي مكاني شو بتسوين؟
مجد: بستانس بسوي حفله..
حور: والله حزتها بتحزنين.. تخيلي تاخذين ولد عمج الي عمرج ما شفتيه غير يوم كنتي 6 سنين ومن بعدها ماتذكرين شكله.. حتى اني ناسيه اسمه تصدقين..
مجد وهي تيلس على السرير وتنط وتلم ريولها على الفراش: شوفي يا اختي.. نحن مكتوب علينا جي.. ماناخذ برع العايله ليش نعذب اعمارنا ونتضايق.. هذا الواقع الي انتي وانا وحتى بنات عمي لازم يتقبلونه.. اخبرج؟ انا عندي بنات عم؟؟
حور: ههههههه.. حالي من حالج.. انا احيد في وحده كنت اقعد وياها على ايام يدي الله يرحمه.. مادري جان في غيرها ولا لا..
مجد: الله يسامحك يابوي.. موول مايخلينا نحتك فيهم وايد ولا هم يحتكون فينا..
حور: شو بتقولين.. تفكير ابوج ذابحنا.. مايبانا نحس بفرق المستوى المعيشي..
مجد: مع اني ماشوف ان حالتنا تعبانه ذاك الزود.. الحمد لله نلبس ونكشخ ونروح وانيي بس على قد حالنا.. يعني وايد بنات اشوفهن في المدرسه الي يلبسون المريول مساكين سنتين .. ونحن كل فصل 4 مراييل نفصل..
حور وهي تهز جتفها وتعلق عباتها.. : يالله شو بتقدرين تغيرين..
مجد: بس تدرين..احس ان زواجج بيغير كل شي..
حور: كيف يعني؟
مجد: يعني. روحاتنا ويياتنا بتزيد.. وبنشوفهم وبنتعرف عليهم وبنحتك فيهم..
حور: يمكن.. وانا يمكن يكون هذا من الأسباب الي خلتني اوافق على الزواج..
وسمعوا امهم تنادي..
حور: ان شاء الله يايين.. يلا نشي قبل لا تعصب الوالدة مافينا..
مجد: هيه اليوم خل نسير نستلم فستاني..
حور: اوكي.. ونستلم فستاني انا بعد..
مجد: امممم..
حور: شو فيج؟؟ احس شي في خاطرج؟؟
مجد: تهقين بنات عمي فساتينهم كيف بتكون احلى ولا اردى؟
حور: هذا اذا طلع لنا بنات عم.. ههههههه..
مجد وهي تضحك..: ههه على قولتج.. وخل نسير لآن بطني يصاوي..
حور: انتي اليوم مخلصه دوامج من وقت ..
مجد: هيه اليوم نخلص الساعه 1..
حور: اهااا.. وحليلج ماتغدين من اكل امي غير في الويك اند ولا يوم الثلاث..
مجد: شفتي عاد .. هاي ضريبه الي يدخل الكلية..
ومشوا سوا وراحوا تحت وهم يضحكون عشان يتغدون.. وقعدوا كلهم حوالي الطاولة وتغدوا.. ومن بعدها تيمعوا في الصالة وقعدوا.. تمت مجد تتطالع الجريدة وهي حاطه ريلها على ريول حور..
يدتهم من شافه مجد جي عصبت.. يودت عصاها وتمت تضرب قاع ريلها ومجد تضحك..: نشي غربلاتج من بنت.. اشو هالقعدة بعد.. وتقول انا كبيره..
مجد: خليني ادلع عمري عند حور.. بعد كم يوم بتفارقنا.. بغدي روحي..
جلثم: ويديييييييه.. وانا وين رحت.. ولا ريولي ريول عيايز ماترتاحين عليهن..
مجد وهي تصلب عمرها: افاااااا..
وتحط الجريدة على الأرض وتقرب من يدتها وتلوي عليها وتبوس راسها.. : لا خليت منج.. تاج راسي انتي.. ريولج ولا مخدة امريكيه..
كليثهم وهي تضرب مجد على ويهها عالخفيف: عنلاتج.. عيل تشبهيني بالأمريكان الخياس..
مجد: لااااااااا.. ياربي .. تشبيه كنايه..
جلثم: اشو ها الكنايه.. خدامه ؟؟
الكل تم يضحك على ام عبدالعزيز.. وصد عبدالعزيز على بنته: يابنتي تعالي عندي الغرفه ابا ارمسج..
نشت حور: ان شاء الله..
وهي ماشيه خطفت خذال مجد الي يرت كندورتها من تحت .. صدت صوب مجد جان تغمز لها مجد وبصوت واطي: خبريني عقب اوكي..
وتضربها يدتها على راسها: خل عنج اللقافه..
لطيفه: ماتعرفين هاي اذا ماتليقفت ماتصير مجوودو..
مجد: هيه انتوا حطو علي انا المسكينه الطيبه المظلومه..
في الغرفه عند حور وابوها..
دشت حور وصكت الباب وراها..
عبدالعزيز: تعالي يابنتي قعدي حذال ابوج..
حور تقربت من ابوها وقعدت يمه.. : هلا ابوي .. خير في شو بغيتني؟؟
عبدالعزيز: كل خير.. يابنتي انتي بعد كم يوم بتغدين حرمة ولد عمج.. وعاد مايحتاي اوصيج.. انا ربيتج على السنع ومابا في لحظة يرمسون ويقولون بنت عبدالعزيز شي بلاها..
حور: افا يابوي.. تربيتك انا..
عبدالعزيز: عفيه على بنتي.. وبغيت اسألج؟؟ .. انتي يوم قلتي انج موافقه على ولدعمج.. من قلبج وافقتي ولا حسيتي نفسج مغصوبة..
حور وهي مرتبكه: ها.. من قلبي من قلبي..
عبدالعزيز: هيه يبا.. ماباج تحسين في لحظه انج مغصوبه تراج بنتي الغاليه وانا مب مستغني عنج..
حور: لا افا عليك ابوي..
عبدالعزيز: الله يهنيج يا بنتي.. وامس رمست عمج عن موضوع شغلج.. قال لي ان ولده ماعنده مانع تشتغلين دامج تحبين شغلج..
حور: هيه زين لأني مرتاحه في الشغل وكنت خايفه يقول لي لا تشتغلين..
عبدالعزيز: لا ماعليه ماعنده مانع.. هذا كل الي عندي..
حور تقربت من ابوها وباست راسه: لا خليت منك يابوي..
عبدالعزيز وهو منزل راسه وبحزن: والله البيت بيخلا من دونج يا بنتي..
حور: فديتك ابوي انا الي بشتاق لكم.. متعودة انش واصبح على ويوهكم.. (وتنزل الدمعه منها). . احين بصبح بويوه ناس ماشفتهم ولا احتكيت وياهم من سنين.. غير مرت عمي طبعا..
عبدالعزيز: تدرين انا ماحب انج تحتكين وايد وياهم..
حور: ليش يبا.. نحن الحمد لله مب قاصرنا شي.. اذا هم شوي حالهم ارقى فهذا من نعم ربي عليهم ونحن ربي ماحرمنا من نعيمه..
عبدالعزيز وهو يهز راسه: ماعليه يابنتي انا تفكيري شوي غير ولي نظرة لأمور غير عنكم..
حور و هيه تغالب المها .. و تبا اتغير السالفه :.. ابويه ابا اسألك عمي عنده بنات؟؟
عبدالعزيز: هيه اعتقد بنتين.. وحده الي عرست من سنه ف الفتره اللي مرضتي فيها .. انتي كنتي ف المستشفى و ختج وياج ف ما حضرتوا العرس ..
حور: اهاااا .. ان ما خاب ظني اسمها مروه ؟
عبدالعزيز: هيه..
حور: انزين عيل ابوي تامرني على شي..
عبدالعزيز: سلامتج يابنتي..
حور: هيه صدق ابويه بغيت اقول لك اني بظهر بسير الخياط استلم فستانس وفستان مجد..
عبدالعزيز: سيري يابنتي بس لا تأخرين عن الساعه 8:30..
حور: ان شاء الله .. وطلعت من غرفه ابوها .. وشافت مجد في الصاله تسولف ويا يدتها..
حور: : مجوودوه.. يلا اتلبسي بنصلي العصر و بنظهر عسب ما نتاخر ...
مجد: عن اذنج يدوو يوم برجع بنكمل سوالف أول..
حور: ياحبج لسوالف الأول..
مجد: الي ماله اول ماله تالي..
حور: تعالي يا اول وتالي ..
وطلعوا سوا ودخلوا الغرفه من بعد ما صلوا وبدلوا ا ساروا ركبوا الموتر صوب شارع رقه وين المصممين كلهم.. لأن المصمم الي مفصلين عنده هناك..
مجد: حوروو.. ممكن طلب؟
حور: آمري..
مجد: خاطري في باسكن.. ممكن ونحن رادين نمر على باسكن وناخذ لنا ايس كريم..
حور: اوكي.. بس حسب الوقت.. اذا ماكان متاخر عن موعد العودة الي ابوي حدده..
مجد: لا بيمديلنا شوفي الساعه كم احين.. 5:30.. اشكثر بنطول عند الفلبيني هذا مب وايد..
ومن وصلو عند المصمم نزلوا ودخلوا المحل.. وكان المحل فاضي قعدوا لغايه ماطلبت منهم المساعدة انهم يدخلون الغرفه ويجربون فساتينهم قبل لا يستلمونهم..
حور: روووووووعه ميرو فستانج..
مجد: اسكتي مب عايبتني حركه الدانتيل الي من تحت احسها عبيطة..
حور: يالهبله هالحركه محليه الفستان وايد..
مجد : لا تجاملين..
حور: والله صدق ماجاملج..
مجد: يعني حلو..
حور: رووعه اقول لج.. وانا وين فستاني ساعه لين ماتييبه..
مجد: اكيد ثجيل عليها من جي ماتروم اتييبه..
حور: هههههه.. مادري عاد فستان من ذهب..
مجد: هههههه .. هذوا يت اكيد فستانج وياها..
ودخلت المساعده وحطت الفستان على الكنبه الي في غرفه القياس.. وكان رهييييب صدق.. الحركه الي على الصدر مسوينها رهيبه.. وعلى الجتف عباره عن شريط من الكريستال والدانتيل ممزوج.. تمت مجد تتطالع الفستان وهي مبهته .. عايبنها وايد..
مجد وهي تهز عمرها: ابا اعرس حورووو.. فستانج يخبل يخبل..
حور: هههه بس تبا اتعرس عشان تلبس فستان..
مجد: هيه بس ابا اعرس عشان البس فستان ابيض.. كل ما قلت لأمي خاطري افصل ابيض تقولي جي عروس..
حور: هههه ربي يهنيج ياختي ..
وجربت حور الفستان وكانت لامه شعرها الطويل فوق وحاطه الطرحه بس جي.. كان طالع عليها رهييييييب.. صدق مخيط على جسمها.. تتميز حور بخصرها الضعيف وهذا الي يحليها بزياده.. وعيونها الخضر.. هي الوحيدة الي في العايله طالعه عيونها هاللون على امها.. مجد ميته قهر ليش ماطلعن عيونها على امها..
حور: يختي رهيب الفستان.. بس احسه شوي عاري صح؟
مجد: روحي لا.. وين عاري. مب وايد وسيعه فتحه الصدر.. رهيب يجنن..
حور: مادري بس استحي اطلع جي..
مجد: خبله انتي خبله.. انتي عرووووس ولازم تطلعين جي.. مب انا وحليلي امي خلتني اغطي الصدر والجتاف والأكمام..
حور: ههههه يالعياره اونج مغطيه بقطعه دانتيل مطرز وماشي تحتها بطانه وين المغطا...
مجد: ههه نقص على امي ويدوتي اشعليج انتي..
حور: وييييه عيل ياويلي من يدوو بتهزبني لا شافت الفستان جي..
مجد: لا لا مابتقول شي.. انتي عروس..
حور: الله يستر عيل..
وبدلت حور وكانت الساعه وقتها 7:00 وطلعت من غرفه القياس وتفاهمت ويا المصمم ودفعت له باقي البيزات وظهرت من المحل وحطوا فستانها في كرتون لأنه كبير وماتقدر تحطه في كيس.. وركبت موترها ( ألتيما سودا عليها رقم دبي)..
مجد: يلا على باسكن روبنز..
حور: هيه زين ذكرتيني..
مجد: حوروو.. لحظه..
حور: شو بلاج..
مجد: راعي الإستيشن من اول ماطلعنا من المحل يلحقنا للحين..
حور: احلفي.. وينه؟؟
مجد: شوفيه ورانا..
حور اطالعت من الجامه وفعلا شافته ملاصق بموترها وين ماتروح.. وحاولت اتضيعه بس ماشي فايده.. حور اتخاف تسرع وشوي جبانه في السواقه ماتعرف تتصرف..
مجد: خل نروح البيت مابا لا باسكن ولا غيره ..
حور: يالهبله لو سرنا البيت بيدل بيتنا وين.. بنسير باسكن وبناخذ الآيس كريم وماعلي من احد انا..
مجد: مادري كيفج..
حور: شو يعني خل يلحقنا يتحراني بسوي له سالفه..
مجد: لا شكله بيروح هذوا لف .. بيعدي عنا..
حور : فكه..
بس الي ماعرفوه.. هو لف عشان يكون حذال موتر حور.. ونزل الجامه وصد صوب حور.. وعلى على صوت المسجل.. كان حاط اغنية الجسمي..
بكيتك لين ملتني عيوني..
صبرت وطال صبري وانتظاري
حرام النوم ماقارب جفوني
وانت للأسف منت بداري
طبعا حور رافعه الجامه بس سمعت الإغنيه لأنها عاليه .. وصدت صوبه.. ومن شافته انصدمت.. ماتوقعت يكون هو.. وتمت ساكته واسرعت عشان تعدي عنه.. وهو مارد لحقها..
مجد: شباب اخر زمن.. ولا بعد حاط لج اغنيه..
حور تمت ساكته طول الدرب ولا ترمس.. وقفت عند باسكن وطلبت 2 برالاينز مع مكسرات لها ولمجد .. ومن بعدها راحوا صوب البيت.. وهي ساكته ولا تنطق..
مجد: حوووور اشفيج ساكته .. نزل عليج الوحي..
حور: ها.. لا بس تعبت من الحواطه ابا ارد البيت تدرين متعودة ارقد العصر وللحين مارقدت..
مجد: هييييييه.. ماقلت لج باجر بيعطونا اول بروجكت عشان انخلصه قبل رمضان..
حور: عن شو؟
مجد: مادري بس قالت المس ان باجر بيعطونا اول بروجكت..
حور: لا تحاتين بيكون سهل..
مجد: يلا بنجرب شي اسمه بروجكت.. ويييييييه مال اول واجب.. خخخخخ
حور: كبرت البنت قامت تعرف البروجكت بعد
مجد وهي تضرب على جتف حور: يلا عاد.. لا تعيبين..
حور: هههههه..
مجد وهي تحط القبشه على كوب الآيس كريم.. : بتوله عليج حوور.. والله بفتقد وجودج فالبيت ويانا..
حور: لا تجلبينها مناحه دخيلج.. انا عروس لازم ارتاح..
مجد: هههههه.. انزين يالعروس مابتتعبين لو وصلتيني ورديتيني باجر من الكلية
حور: انزيييين لا تاكليني.. ادريبج ما بتصخين لين ماقول لج اوكي..
مجد: يييييييييس..
حور: هبله هالبنت والله.. وتقول انا كبيره..
مجد: غصبن عن الكل كبيره
حور وهي تضرب مجد بطرف صبوعها على خدها: ياقويه انتي ...
وصلوا البيت ونزلوا وطلبت من الخدامه تساعدها عشان تودي فستانها فوق لغرفتها.. وحطت الكرتون على السرير.. ومجد سارت عند يدتها وامها وراوتهم فستانها. وتقعد تمدح فستان حور..
جلثم: ماعندكن سالفة تلبسن هالخرابيط.. اشحلات لبس أول.. ثوب ساتر وحلو.. وذاك الذهب الي على الراس والصدر.. الله يامعيرييس عين الله ترعاك..
الكل تم يضحك..
مجد: ها يدوو .. حنيتي على ايام عرسج..
جلثم: ايه والله.. وين ايام قبل واعراس قبل.. مب شرات احين كل اعراسكم مفاصيخ اعوذ بالله ..
مجد: هاي الموضه يدوو..
جلثم: اشو .. منو موضي هذي بنت منو؟؟
لطيفه: ههه يا يما ماعليج منها هاي بتخبلج بسوالفها..
مجد: يوووه احين انا الغلطانه قلت بسولف وياكم.
ونشت وشلت فستانها وصعدت فوق عند حور الي كانت سادحه على الفراش..
مجد: بترقدين..
حور: هيه شوي تعبانه من الصبح وانا واعيه
مجد: انزين اخبرج انتي اكدتي على حجزي وياج في الصالون..
حور: هيه اتصلت في ليندا واكدت على الحجز..
مجد: ياااي منو قدي بيمكيجوني في الفندق بلا مذلة صالونات وزحمتهم..
حور: تعرفين احاول اتخيل كيف شكل ريلي مب قادرة..
مجد: ههههه .. اتخيله حلو.. لأن مرت عمي حلوة وعمي روحه حلو..
حور: انتي وييييييين تفكيرج وانا وين.. مافكر في الحلاة يامخ.. يعني ابا اتخيل كيف ملامحه وهيئته.. شخصيته.. صوته.. كلامه..
مجد: انا مستغربه من شي واحد . من يوم ماخطبج ماطلب يشوفج مع اني اتوقع مايرفضون..
حور: ااااااااه.. تلاقينه نفس حالتي
مجد: الله يوفقج ياختي.. انا مستعيله على زواجج تدرين..
حور: ليش يعني؟؟
مجد: اممم اولا لأنه اول عرس بيكون في بيتنا.. وثانيا.. بستوي خالوو.. وهذا حلم حياتي..
حور: ههههه.. وانا بعد ابا استوي خالوو مب بس انتي..
مجد: اممم ياريت خل يخطبني ولد عمي انا مابرفض..
حور: انتي خل نشوف اذا في حد على عمرج..
مجد: لا تحبطيني يعني شو بتم طول عمري عانس..
حور: ههههه لا لا .. لا تقولين هالكلام.. بندور لج ماعليج..
مجد: هههه سخيفه.. خل ادخل النت ملانه..
حور: صكي الليت ابا ارقد..
مجد: افف انزين..
تمت حور على الفراش سرحانه وهي تتذكر بوفهد وقلبها معورنها.. انسان شافته في فتره وحبته.. وحست به حبت اسلوبه وشخصيته .. وخلاص ألحين لازم تشله من باله .. باقي لها يوم وبتصير ملك انسان ثاني.. تنهدت وغمضت عينها.. لأن اليوم الثاني وراها شغل اول شي راح يملجون الصبح ومن بعدها راح تروح الصالون عشان تتحنى وتزهب لعرسها.

الموضوع الأصلي: روح عشقتة وقلب فقدتة للكاتبة : بنت البلاد || الكاتب: صواديف عشاق || المصدر: منتديات صواديف عشاق

https://s-eshq.com/vb

كلمات البحث

العاب ، برامج ، سيارات ، هاكات ، استايلات

المصدر: منتديات صواديف عشاق

---

v,p uarjm ,rgf tr]jm gg;hjfm : fkj hgfgh] hgfgh] uarjm tr]jm

ف مدينه جمير ..


خوله : حبيبي
خليفه : يا عيوني يا احلى خوخه
خوله : ههههههه خوووخه عاده
خليفه : ههههههههه ادلعج شو اسويبج
خوله : فديت روحك .. شو رايك نيلس ع ها الكوفي ؟
خليفه : اوكيك بس ترى عقب الكوفي لج مفاجاه
خوله : شو هيه حبيبي ؟
خليفه : يا غناتي ان قلت لج ما بتكون مفاجاه ههههههههه
خوله : تراك بتقولي بتقولي
يلسوا ع الكوفي و طلبولهم كبتشينوا و ترمسون ..
خوله : يلا حبيبي قولي
خليفه : يا غناتي تراني حاجز لنا الليله هنيه و ع سالفه الثياب تراني حاسب حسابي و اخترت لج لبس ع ذوقي .. شو رايج !
خوله و هيه تبتسم : يعلني ما خلا منك .. مالي راي من عقبك .. و انت اتفصل و انا البس


( و كملوا سوالفهم و كلها غزل ف غزل )
*ملاحظه .. هالفقره عن خوله وخليفه كتبتها ربيعتي الغاليه.. روح الأحزان
ومن نشت الصبح عالساعه 7:00 وتريقت وطلعت ويا مجد عشان توصلها الكليه لأن دوامها الساعه 8.. ومن بعدها ردت البيت ودخلت السياره في الكاراج وقال لها ان المطوع موجود عشان تملج.. كان ودها تصيح بس يودت عمرها.. الود ودها تصرخ وتقول لا مابا.. بس ماتقدر.. وقعدت في غرفتها تتريا ابوها يدخل عليها بالدفتر.. بس استغربت يوم دخل عليها ابوها بروحه..
حور: وين الدفتر ابوي؟
عبدالعزيز: الملا يقول لازم يسمعج تقولين انج موافقه.. يعني البسي عباتج وشيلتج وتغطي ونزلي..
حور: ان شاء الله..
لبست عباتها وتغشت.. ونزلت من الدري شافت الملا قاعد ومعاه 2 بعد شهود عشان يسمعونها.. وسألها الشيخ وقالت انها موافقه ووقعت وصعدت غرفتها وقعدت تصيح وهي حاضنه المخدة .. ليش مكتوب علي اخذ انسان ماعرفه ولا يعرف شي عني.. يادوب اعرف اسمه.. ااه يا قلبي .. ونشت مسحت دموعها وسارت تزهب عشان تروح عند مجد وتطلعها من الكليه عشان يروحون الصالون ويتحنون.. وامها وياهم بعد عشان تتحنى.. اما جلثم يدتها ففضلت تقعد تحني عمرها فالبيت.. عقولتها هالنقوش لكم انتوا مب لنا نحن...
لطيفه: يما حور اشبلاج؟؟
حور قريبه من امها وتقول لها كل الي في خاطرها بس ساعات تفضل الكتمان .. : ماشي يمي مابلاني بس تدرين مرتبكه باجر عرسي..
لطيفه: الله يوفقج يا بنتي وافرح بعيالج ان شاء الله.. ماتصورين فرحتي بنتي الكبيره بتعرس..
حور: زيدي من هالدعوات اللي تفرح القلب..
ونزلوا تحت عشان ياخذون الإذن للخروج لمجد.. ومن بعدها راحوا صوب صالون مراسم الي فالشارجه عشان يتحنون وكانو حاجزين بإسم حنا للعروس.. وقعدوا ثلاثتهم وعاد اليوم الأربعا وزحمه الصالون.. خذوا لهم جريب الثلاث ساعات لغايه ماخلصوا ومن بعدها ركبوا الموتر وردوا البيت لأن حور عندها اشغال ثانية عشان العرس.. ومجد كانت متحنيه وطالعه الحنا عليها وايد حلوه.. اممم انا ماوصفت لكم اشكالهم..
حور.. بيضا وعيونها وساع ورموشها طوال.. والي يميزها عدسه عينها الخضرا وطولها .. خشمها صغير وحلو.. الي يشوف حور يعجب فيها من النظره الأولى لأنها تتميز بجذابيه كبيره.. والكل يحبها لطيبه قلبها وابتسامتها الي ماتفارق ويهها ابد..
مجد.. البنت الشيطانه والدلوعه في نفس الوقت.. مجد اجتماعيه وايد وتحب السوالف.. ومن النوع الي تعيش حياتها كيف ماكانت ومايهما شي.. ممكن تتضايق شوي بس محد يحس بضيقها.. تربت مع اختها حور وتعلقت فيها.. من الصغر وهي وياها وكل لحظه تعيشها مع حور.. قلبها ابيض شرات حور.. شكلها.. عيونهم وساع هالعايله بس الإخت عيونها سود على ابوها .. وشعرهم طوال لأن عندهم منقود البنت تقص شعرها قبل العرس.. واسود وغليض.. مجد بشرتها شوي غامجه .. وهاللي معطيها جمالها الخاص.. تتميز بإبتسامتها الخجوله.. وغمازاتها القريبه من شفتها. .. ضعيفه وطولها عادي .. بس الضعف محلنها بزياده..
مجد وحور تموا سهرانين للفجر يسولفون.. كأنها حاسه ان هاي اخر لحظات تستانس فيها مع حور لأنها بتنشغل في حياتها..
مجد: اذا يبتي بنت سميها مجد..
حور: مينونه .. تبينها تطلع شراتج.. لا لا لا.. مابا.. بسميها ندى..
مجد: ياحبج للأسامي النادرة..
حور: أحلى اصلا..
مجد: انزين انزين.. لا تحشرينا عاد..
حور: مجوود والله بتوله على حشرتج..
مجد: اممم مع اني اشك بهالشي... بس يلا بسوي عمري مصدقة..
حور وهي تفر عليها المخده: سخيفه ودبه..
مجد وهي تنش تتطالع عمرها في المرايه: ويييييين دبه.. ياحسره علي..
حور: ههههه..
ومن بعد ما اذن الفير صلوا وراحوا يرقدن لأن وراهم نشه من الصبح وشغل وايد..
=-=-=-=-=-=-=
في بيت مروه بنت حميد.. بنت عم حور..
قاعده ويا ريلها وتسولف وياه
مروه: تدري يا خالد ان بنت عمي صار لي سنيييين ماشفتها.. ويوم عرسي كنت متشوقه لأني بشوفها .. لأن ودي اتعرف عليها اكثر.. بس للأسف كانت وقتها مرقدة فالمستشفى لعملية مسوتنها.. وماشفتها وبعدها سافرنا انا وانت..
خالد: انزين وعمج ليش مايزور بيتنا ولا بيت عمي حميد.. يعني تخيلي احين بتاخذ ولد عمها الي في حياتها ماشافته غير يوم صغار.. انا عن نفسي حور بنت خالي.. بس ماعرف شكلها..
مروه: عمي الله يهداه مسوي لنا حاجز.. احس انه ساعات مايحب ابوي تصدق..
خالد: لا خالي عبدالعزيز طيب.. ومب انه مايحب ابوج.. يعني يمكن ليش ان يدي تزوج يدتي من عقب وفاة ابوه..
مروه: انا بعد حاسه جيه.. بس يالله احس بعد زواج حور بيقربنا وبيخلي الأمور بينا طبيعيه.. عقب مابيقدر يمنعنا منهم او يمنعهم منا..
خالد: هيه صدقج.. الله يمرر هالزواج على خير.. ويوفق اخوج مع حور..
مروه: يلا انزين انا بسير الصالون ويا اختك عشان نتزهب.. تدري العرس فليل.. وماشي وقت..
خالد: وانا بسير صوب الرياييل لأن هناك بعد تدرين حفلة ويوله..
مروه: الله يعينك ياخوي.. احسه مووول مب مستانس..
خالد: ماعليج بنخرشه وبنخليه يستانس..
مروه: ههههه هيه دامك انت فالسالفة اجزم انه بيستانس..
وطلعت مروه من الصاله عشان تزهب لأن بتمر عليها نوره اخت خالد ويروحون الصالون..
مروه.. بنت حلوه وطيبه.. والكل يحبها.. طول عمرها تحب انها تكون ويا حور ولا مجد وتتعرف عليهم.. بس الظروف كلها كانت ضدهم.. شو بيدها تسوي.. متزوجه من ولد عمتها خالد.. انسان طيب وطموح.. دايما يدخل في مشاريع واسهم.. ومايعرف شي اسمه يأس ولا خساره.. بالعكس كل خساره تخليه طموح بزيادة..
نوره اخت خالد في نفس عمر مروه ومتزوجه من ربيع اخوها.. .. اخوها سلطان وربيعه فيصل الي هو زوج نوره.. الله رزقها ببنتين مثل القمر لأنها تزوجت قبل مروه من خلصت الثانويه عرست اما مروه فكملت دراستها وبعدين فكرت في الزواج.. العنود ومهره بنات نوره.. تحبهم ودلعهم وايد.. بينهم سنة..
وصلت نوره ودقت هرن لمروه الي طلعت لها وسارن سوى صوب الصالون.. كانو حاجزين عند مورا..
مروه: اسميني مستناسه واتريا الحفلة بفارغ الصبر ابا اشوف العروس والمعرس كيف بيطلعون..
نوره: هي والله.. خاطري اعرف هالإنسانه كيف شكلها.. يعني انتي على الأقل شفتيها يوم صغار انا مووول.. لأن اصلا انا طفولتي ماكنت هني.. كنا برع.. على ايام ما كان ابوي يداوم في فرنسا..
مروه: مانروم عليج.. فرنسيه..
نوره: هههههههه وياريتني اعرف ارطن فرنسي..
مروه: بونجور..
نوره: بونسوار..
مروه: ههههههه
وصلن الصالون ونزلت على طول وتريوا دورهم..
=-=-=-=-=-=-=
حور كانت في الفندق تتزهب.. وخلصوا لها المكياج وطلبت منها عشان تلبس الفستان ومن بعدها تسوي لها شعرها.. وتبدأ بمكياج مجد..
حور: اقول مجوود اوكي مكياجي..
مجد كانت معطه ظهرها لحور لأنها تلبست فستانها وصدت تشوف حور وتمت مبهته وهي تتطالعها..: انتي اختي.. ماصدق..
حور: هههههه خل عنج..
مجد: والله .. انتي اذا ريلج اليوم ماتخبل ماكون انا مجوودو
حور: يعني حلو..
مجد: فضييييع .. والله ماشاء الله عليج.. خل اقرا عليج..
حور: ههههههه من حلاتي عشان يحسدوني..
مجد: والله ما اجامل.. تعالي..
سحبت حور وسارت عند ليندا.. : اقولج ليندا.. بالذمه حور مب حلوة ..
ليندا: بتجنن.. لك هنيالووو زوجها
مجد: شفتي.. تقول لج هنيالوو..
ابتسمت حور وكملوا لأن المصورة الي من استوديو الزورق وصلت عشان تصور حور..
=-=-=-=-=
عند الرياييل..
خالد: ياريال فج هالويه واضحك..
أحمد: تراني من الصبح اقول له.. تقول جنه اليوم ميت له حد..
عبيد: انتوا والله مب حاسين بالموقف.. باخذ وحده ماعرف غير اسمها.. لا شكلها لا صوتها ولا طبعها.. تخيل تطلع وحده شيفه ماتنشاف..
خالد: ياريال انت شايف مرت عمك اشحلاتها.. يعني اميد طالعه على امها حلوة..
أحمد: ياخي خلاص ماتروم تغير شي..
عبيد: انا قلت لأبوي ابا اعرس.. وهوعلى طول فرح واستانس.. ويوم سألني عن البنت قلت له البنت الي في بالي.. وقالي مالك غير بنت عمك.. وانا وقتها تعلثمت.. وتعرف انا انسان ماحب اغضب ابوي مني..
خالد: انت رضيت بهالشي ولازم ترضى فيه للنهايه..
عبيد: انت يا احمد بترضى تاخذ بنت عمك وانت ماشايفنها ولا تعرف شي عنها..
سكت احمد وماقدر يرد على اخوه لأنه عارف ان كلام اخوه صح.. بس شو يقدر يغير.. هذي عاداتهم وتقاليدهم مايقدرون يغيرون شي منها..
وعدى الوقت عندهم واليويله مرتبشين .. وعبدالعزيز ابو حور.. وحميد بو عبيد.. مستانسين من الخاطر.. اليوم عرس عيالهم.. ولو ان عبدالعزيز كان شوي متضايق .. بس ماكان يبين هالشي.. لأن بنته راح تفارقه..
..
عند الحريم في الصاله.. بدوا الحريم ايون ورباعه حور كلهم تيمعوا على طاوله وحده قريبه من الكوشه.. فالإستقبال كانت جلثم يدة حور.. وأم حور وام عبيد وام خالد..
فالغرفه فوق.. تصورت مجد ويا حور.. وخلصت المصورة وبدت تلم اغراضها عشان تنزل الصاله وتصور هناك..
مجد: حوروو اخاف انزل..
حور: ليش عاد..
مجد: احس ماعرف حد..
حور: رباعتي هناك.. سيري اقعدي عندهم.. ولا يلسي عند امي ولا يدتي..
مجد: اففف.. انزين فستاني حلو..
حور: انتي شو تقولين .. والله الي بيشوفج اليوم بيتخبل عليج..
مجد: اففف شو هالحاله.. الله يسامحك يابوي.. والله ماعرف حد بمشي جني داشه عرس ناس غرب..
حور: يلا عاد سيري..
مجد: انزين انتي بتمين بروحج..
حور: عادي شو يعني..
مجد: اففففففف يلا انا سايره..
حور وهي تتطالعها وتضحك: وبتروحين جي.. بلا عباة ولا شي..
مجد: ها.. اووه تعالي نسيت.. اتحرى عمري في البيت..
لبست عباتها وتغشت ونزلت .. ضيعت في البدايه ماعرفت الدرب للصالة.. شافها واحد وتم يضحك عليها لأنها رايحه وراده في نفس المكان.. جنها مضيعه شي..
.. : لو سمحتي اختي انتي مضيعه شي؟؟
مجد وهي ترفع راسها وتتطالعه.. ياربي محلااااااه.. اذا بيوزوني واحد جي انا موافقه.. اوووه انا وين مضيعه الصاله وقاعده اتأمل.. كانت متغشيه وتتطالعه من تحت الغشوه.. الي كانت الغشوة شوي شفافه يعني ينبان ويهها على الخفيف.. : هيه ماعرف وين الصالة..
.. : في عرسين هني .. إنتي لأي عرس..
مجد وفي خاطرها: أبيييييييه احين الوهقه انا ماعرف اسمهم حتى..
.. : اختي مارديتي علي..
مجد: ها.. عرس اختي وولد عمي..
ضحك عليها الشاب .. بس من سمعها قالت عرس اختي وولد عمي.. عرف انها تقصد عرس عبيد اخوه..
أحمد: انتي بنت عمي؟
مجد رفعت عينها.. وتتطالعه مستغربه: ها.. مادري اذا انت ولد عمي ولا لا..
أحمد : ههههه.. عالعموم لا توقفين وايد هني مب حلوة في حقج.. شوفي سيري يدام.. بتشوفين باب على يسارج ادخليه وبتحصلين هناك مثل صالة قبل لا تدخلين صالة العرس.. وبتعرفين يوم بتكونين هناك..
مجد: مشكور.. وبعدين انت معرس ليش قاعد هني؟؟
أحمد: ههههه.. يحليلج معذوره .. انا اخوه .. وياي اوصل عمتي..
مجد: هيه عمو شيخة.. انزين مشكور..
راحت مجد وأحمد تم يطالعها من بعيد وتتطمن انها دخلت المكان الصح ومشى وهو يهز راسه..: ههه والله دنيا بنت عمي يدامي ولاقدرت اعرف انها بنت عمي.. بس مزيونه مبين من صوتها.. ولا عيونها.. وقف شعر يمي من شفت عيونها..
مشى وركب موتره عشان يرد عند الرياييل..
دخلت مجد الصاله من بعد ما طلعت عباتها.. تمت تدور على امها ولا يدتها.. شافت في ويهها يدتها وتقربت منها بسرعه..
مجد: يدووو يدوو..
جلثم وهي تتطالع بدقه وماعرفتها: منو انتي؟؟
مجد: انا مجوودو..
جلثم: غربلاتج .. اشو هالهباب الي على ويهج..
مجد: مكياج يدوو..
جلثم: صابغين ويهج وقاصين عليج.. اشو ها..
مجد: يدوو يعني انا طالعه خسفه..
جلثم وهي تبتسم لها: لا والله قمر من يومج.. بس بدون هالصباغ..
مجد: يعني اسير اغسله..
جلثم: لا تعالي يابنت اسولف وياج.. وسيري سلمي على عمتج ومرت عمج وبناتهم..
مجد وهي تحايس بثمها: يدو ماعرف اشكالهم؟؟
جلثم: الله يسامحك ياعبدالعزيز.. زين جي بنت عم ماتعرف بنات عمها.. سيري عند امج خل توديج عندهن..
مجد تمت تدور على امها ومن لقتها تقربت منها وكانت واقفه ويا ام عبيد وعمتها شيخة.. وسلمت عليهم.. وشافت حرمه تقرب منهم.. استحت وسارت ورا امها..
مروه: اقول عمتي وين العروس خل نسير عندها..
لطيفه: يما مجد سلمي على بنت عمج مروه..
مروه صدت صوب مجد: هاي مجد.. ماشاء الله عليها يوم احيدها كانت ياهل.. غدت حرمه اشحلاتها..
تمت مجد تتطاله مروه من فوق لتحت.. وتشوف فستانها.. وفي خاطرها: ويه فستاني وايد احلى .. هههه..
مجد: اشحالج مروه؟؟
مروه: بخير يعلني افداج.. تعالي خل اعرفج على بنات عمج..
تضايقت مجد شوي بس مابينت هالشي.. والله زمن.. قامو يعرفوني على بنات عمي.. ومشت ويا مروه والكل كان يطالع مجد ويسمي بالرحمن .. لأنها كانت طالعه جميله بالفعل.. وتقربوا من طاوله كانو قاعدين فيها بنات عمها..
مروه: يا جماعه هاي مجد بنت عمي عبدالعزيز..
نشت نوره وسلمت على مجد وحضنتها. : فديتج محلاج.. وياج نوره بنت عمتج
نزلت راسها مجد.. : تسلمين..
وتقربت منها وحده ثانيه من شافتها مجد استغربت.. ويت صوبها مبتسمه..
خلود: اشحالج بنت خالي؟؟
مجد: الحمد لله بخير.. بس ويهج مب غريب علي؟؟
خلود: هيه كنا في رحلة المنطقة الغربيه سوى بس انا كنت من مدرسه وانتي من مدرسه ثانيه.. وانا خلود اخت نوره..
مجد تضايقت اكثر.. بنت عمتي كانت وياي وقربي ولا ادري انها بنت عمتي.. بس شي الي ونسها ان الكل سلم عليها بحراره واهتمام.. حست بحبهم وشوقهم انهم يتعرفون عليها.. وارتاحت لهم..
مروه: انزين مجد نحن نقدر نسير عند العروس ولا لا..
مجد: هيه اكيد.. بس خل اسلم على بنات هناك وبييكم وبنسير سوى..
مروه: اوكي..
سارت مجد عشان تسلم على رباعة حور ..
خلود :سبحانك يارب.. بنت خالي وياي ولا ادري انها بنت خالي..
نوره: ماشاء الله عليها تنحب احسها طيبه..
خلود: هيه تعاملت وياها وفنانه الصراحه راعية سوالف وطيووبه..
مروه: بس ادعوا ان هاي تكون بدايه علاقتنا فيهم
خلود: لا حبيبتي انا لو شو ماصار مابنقطع عن بنت خالي.. انا من شفتها وتعرفت عليها حبيتها وندمت ليش ماخذت رقمها...
نوره: ههههه.. الله يخليكم لبعض عيل..
تقربت مجد: يلا خل نروح..
وكلهم لبسوا عبيهم عشان يصعدون فوق عند حور.. ودخلت بالأول مجد..
مجد: عندي لج ضيوف..
حور وهي قاعده على الكنبه: اكيد خوله..
مجد: لا.. اتوقعي منو..
حور: اكيد مواز وشيووم..
مجد: يلا تعالو داخل..
دخلوا كلهم ومن شافو حور انبهروا بجمالها.. وهي تمت تتطالعهم بإبتسامه بس ماتعرفهم..
مروه: معذورة اذا ماعرفتينا.. انا بنت عمج واخت ريلج.. وهاييل بنات عمتج شيخة.. هاي نوره.. وهاي خلود..
تقربوا منها وباسوها وسلموا عليها.. وحور ادمعت عيونها: والله دنيا ماعرفكم الا يوم عرسي..
مروه: ماعليج بنعوض هالأيام كلها.. بس ياحظك ياعبيد.. حصل له حرمه لو يحلم مابيلقى شراتها..
نوره: هيه والله صدقج.. ماشاء الله عليها.. هي والقمر واحد..
خلود: لا لا لا.. محد شراتي انا ومجد..
ابتسمت مجد: ههههههه..
خلود: مجوود خل ننزل ونرقص يختي من الصبح اسمع هالربشه ميوده عمري..
مجد: هيه والله اتريا حد يشجعني انا..
مروه: احسن عشان نحن الكبار نقعد نسولف شوي..
وطلعو خلود ومجد عشان ينزلون الصالة ويستانسون.. وطول الدرب يسولفون ويتذكرون ايام رحلتهم.. ومروه ونوره قعدوا ويا حور..
مروه: انا كنت اترياج تحضرين يوم عرسي بس امج قالت لي انج فالمستشفى فماقدرتي تحضرين..
حور: والله كان ودي بس عاد الظروف ماسمحت..
نوره: وعرسي انا بعد ماحضرتيه تراج.. مديونه لي..
حور: هههه عندج عيال؟
نوره: هيه بنتين.. العنود ومهره..
حور: لج مني احضر عرسهن ان شاء الله..
مروه: وانا بعد عرس بنتي لازم تحضرينه..
حور: وشو اسم بنتج.
مروه: ايمان..
حور: الله يحفظها..
نوره: اخبركن.. مب جنه الساعه 10 لازم تنزل العروس وخل السوالف لبعدين..
حور: كيف انزل احين.. مابا هونت..
مجد: ها صدق.. يلا طلعي فستانج خل انزل بدالج
الكل تم يضحك ونشوا يساعدون حور

ونشوا كلهم وجهزوها عشان تنزل وكلموا خلود عشان تكلم الفرقه يجهزون الإغنيه الي بتنزل عليها.. الكل كان يتريا لحظه نزول حور.. كلن يتخيل كيف بيكون شكلها.. نزلت .. ومن بدت الإغنيه فتحوا الباب وشغلوا الدخان عليها وظهرت من وسط الدخان.. والحريم واقفين بعيد عن التصوير ويطالعون حور.. الي كانت طالعه آيه من الجمال.. كانت ماسكه باقه ورد بسيطه وورديه فيها شوية خيوط كريستال.. الكل يطالع حور ويسمي عليها.. مشت وكانت خايفه تصعد الدري بروحها.. سارت مجد وقبضت ايدها وساعدتها تخطي خطواتها على الدري وصعدت الدري وصدت على الناس واطالعتهم وتمت تبتسم لهم ومشت وعدت بخطواتها لغايه ماوصلت للكرسي وقعدت.. ومن بعدها الكل سار صوبها وقعدوا وياها.. وخوله وموزه وشيما رباعه حور تقربوا منها وسلموا عليها.. كانت مستانسه لتعرفها على بنات عمها وعمتها.. وارتاحت لهم.. وحست بالراحه شوي.. تقربوا منها الحريم عشان يسلمون عليها ويباركون لها ومن بعد يروحون قبل لا يوصل المعرس..

عالساعه 12 كان الوقت الي راح يدخل فيه عبيد ومعاه ابوه وابو حور طبعا مايقدر يدخل لأن من عاداتهم ابو العروس يدخل صالة عرس بنته..
مروه: اقول حور بيدخل المعرس..
حور فجت عيونها.. وحست برعشه في كل جسمها.. تتنافض.. : مجد.. وين مجد؟؟
مروه: تحت.. ماعتقد بتيي فوق لأن المعرس مايتحلل لها..
حور: انزين انتي تمي حذالي..
مروه: مايستوي يا حور..
حور: دخيلج دخيلج.. والله ماقدر اكون بروحي..
مروه: انزين انا واقفه هني شوي على جنب.. اوكي.. بغيتي شي بس حركي ايدج..
حور : اوكي..
ونشت حور وقفت .. والفرقه بدت اتدق الزفه الخاصه بالمعرس.. وعلى كل دقة تحس حور ان قلبها يدق عشر مرات اكثر.. وتتنافض.. ومن انفتح الباب الي بيدخل منه عبيد.. غمضت حور عيونها وهي خايفه تتطالع..
عبيد حالته كانت مختبصه. كلمه توديه وكلمه اتييبه.. مب حاس بالي يسويه..
أحمد: اركد ياعبيد الكل لاحظ عليك
عبيد: حط نفسك مكاني.
أحمد: بقولك شي.. شفت اخت مرتك اليوم؟؟
عبيد: كيف؟
أحمد: مادري كانت مضيعه وانا مادري شو الي خلاني اسير اكلمها.. وبالحظ دريت انها بنت عمي... بس تصدق حلوة ولو اني شفتها وهي متغشيه..
عبيد: ياللوتي عينك ليزر حتى من تحت الشيله..
أحمد: يلا عيل روح وادخل لا تحير مب زين ..
عبيد: دعواتك ياخوي..
أحمد: بالتوفيق.. الله يسهل عليك..
قبض عبيد ايد ابوه وراحوا صوب الباب عشان يدخلون الصاله.. حور واقفه على اعصابها ومب قادره توقف تحس شوي وبيغمى عليها.. فتحوا الباب ودخل عبيد ويا ابوه .. رفع راسه وشاف حور من بعيد بس ويهها ماكان واضح له وايد.. بس من وقفتها كانت تبين انها حلوه.. نزل راسه.. واما حور فكان الموقف شرات الصاعقة لها.. مب مصدقة الي تشوفه يدامها.. معقوله.. لا مستحيل مستحيييييييييييل.. اكيد من كثر ما افكر فيه قمت اتخيله.. صكت عيونها ونزلت راسها وردت رفعته وشافته من قرب وهو رفع راسه في نفس الوقت وطاحت عينه في عينها بهت.. مايعرف هو في حلم ولا علم... من كثر ما افكر فيها قمت احلم فيها.. ورد يطالع .. مستحيل معقوله..
وقف يدامها عشان يبوس راسها بس مب قادر يتصرف..وقف يطالع في عيونها وهي منزله راسها وترتجف..
بوعبيد: يلا ياولدي بتم على هالحال بوس راس مرتك ..
تقرب وباس راسها وهي ابتسمت .. وقف حذالها وده يصد بس مب قادر.. وسلم عليه ابوه وبارك له.. وتقرب من حور وباس راسها وبارك لها.. ومشى عشان يروح.. وتم ينثر الأنواط على اليهال ..
عبيد: انتي حور؟
حور: وانت بوفهد؟؟
صد عبيد صوب حور وهي منزله راسها: حاس اني في حلم .. والله اني في حلم انا متأكد..
حور: كيف جي.. ابا افهم..
عبيد: انا مب قادر استوعب شي..
مروه تقربت من حور وهي تضحك.. : ها يالمرتبكه شو الحال..
حور: اسكتي لأن بيغمى علي.. وبعدين تعالي خبريني .. أكيد هذا عبيد ولد عمي.. يعني اخوج؟؟
مروه: بسم الله عليج.. ليش عندج شك ..
حور: هيه الصراحه..
مروه: ليش؟؟
حور: بعدين مب وقته احين
وقعدوا بمساعدة مروه والكل يطالعهم ويسمي بالرحمن .. كانو لايقين على بعض.. طولهم وجمالهم.. تقربت مروه وسلمت عليهم وباركت لهم.. ومن بعدها يابت لهم العصاير عشان يشربون بعضهم..
عبيد: مروه تعالي..
تقربت مروه من عبيد: هلا ياخوي..
عبيد: قرصيني.. كفخيني.. عضيني.. سوي شي..
مروه: هههههههه ليش كل ها؟
عبيد: حاس نفسي في حلم..
مروه: لا ياخوي انت في علم وهاي مرتك على سنة الله ورسوله..
حور: لو اقول لج يا مروه السالفه بتضحكين ومابتصدقين..
عبيد: انا مب قادر استوعب شي..
مروه: فهموني شو السالفه؟؟
حور: عبيد زميلي في الدوام.. وانا ولا ادري انه ولد عمي.. ولا هو يدري اني بنت عمه..
مروه فجت عيونها مصدومه: صدق؟
عبيد: وهاي احلى صدفه.. احين ارتحت..
حور: انا شو اقول.. احس نفسي في حلم مابا انش منه..
مروه: الله يهنيكم ويخليكم لبعض..
حور وعبيد يطالعون بعض: آمين يارب..
ونشوا عشان يقطعون الكيك وكانو مستانسين من الخاطر.. الي يشوفهم يقول هاييل ماخذين بعض عن حب وقناعه.. ولا كأنه ماخذنها ولا هو يدري عنها شي.. ارتاحت نفسيته وقدر يتعامل بعفويه ويا حور.. وهالشي الي ريح لطيفه وام عبيد..
نشوا المعاريس عشان يزفونهم لغرفتهم فوق.. ويتصورون.. الكل مشى وراهم لحد المصعد ولبست حور عباتها وتغطت بقطعه بيضا عشان الدرب الي بتمشي فيه..
عبيد: مروه رمسي أحمد ايي يدفع للفرقه..
مروه: ان شاء الله..
الكل تم ايبب ويسلم عليهم .. وحور من شافت مجد وامها.. دمعت عيونها وبدت تصيح.. ربعت مجد صوبها وحضنتها وتصيح من الخاطر..
حور: بس حبيبتي عورتي قلبي..
مجد: بتوله عليج والله بتوله عليج..
حور: انا اكثر..
وسلمت عليهم وراحوا.. وكانت حور بروحها ويا عبيد في المصعد..
عبيد مسك ايدها .. : لا تصيحين.. تراج بتشوفين اختج ومابتفارقينها..
حور: ماتدري تعودت طول عمري وانا عايشه وياها واحين ابتعد عنها وابدأ حياة يديدة.. صعب..
عبيد: مايكفي ان بوفهد وياج..
ابتسمت حور وصدت صوبه.. وانفتح باب المصعد.. تم عبيد ضاغط على الفص عشان ماينصك الباب وطلعت حور وطلع من بعدها.. : عندي كلام وايد ابا اقوله لج..
عبيد: انا شو اقول عيل..
حور: ماتصور فرحتي كيف..
عبيد: انا مستانس اكثر عنج يا حور..
ودخلوا غرفتهم وقعدت حور على الكنبه وعبيد قعد مجابلها لأن فستانها كان مغطي الكنب كله..
=-=-=-=-=
تحت اتصلت مروه في أحمد.. وطلبت من الحريم يتغطن.. نوره ماغطت ويهها لأنها معرسه.. وخلود غطت وقعدت على جنب ويا مجد.. وراح احمد عند الفرقه ورا الحاجز ودفع لهم البيزات.. وسار صوب الحريم وسلم على يدته ومرت عمه ..
احمد: اشعليكم عبيد عرس..
جلثم: الفال لك ياولدي..
أحمد: هههههههههه.. لا لا خلني اتهنى بشبابي.. اقول يدوو منو هالغرشوبه الي يمج.. ممكن تخطبينها لي..
الكل تم يضحك لأن الي يرمس عنها احمد هي امه..
ام عبيد: عنلاتك من ولد امك انا..
أحمد: اوه صدق.. ماعرفتج..
نشت ام عبيد وتقربت من ولدها توها بتضربه شرد عنها وسار ورا مروه..همس في اذنها: انا اقصد الي ورى يدتي مب الي حذالها..
مروه: ياللوتي هاي مجد بنت عمك..
أحمد: ادريبها.. غاويه.. خذت قلبي..
مروه: استح.. وبعدين انت كيف تشوفها وهي متغشيه..
أحمد: احم احم.. انا احمد.. مايفوتني شي..
مروه: هيه اقول انا بعد..
جلثم: انتوا ايه في شو ترمسون؟
مروه: ههههههههه .. اقوووووووول
أحمد: افا اختي غناتي.. خلج كتومه..
مجد: خلود منو ها؟
خلود: ها اخو عبيد.. يختي مادانيه..
مجد: ليـــش؟
خلود: بس جي ماينزل لي من زوري.. اااااااه يا جاسم وينك..
مجد ضحكت: منو جاسم؟؟
خلود: ولد عمي.. ماتعرفينه.. ياربي غاوي.. بس مغرور.. لكنه يعيبني..
مجد: هيه.. وهو شو يحبج؟
خلود: ليتني اقدر اعرف..
مجد: هههه يحليلج.. تدرين مستانسه اني عرفتج.. لقيت وحده تعوضني غياب حور عني..
خلود: قولي من حظي انا.. لأن نوره معرسه وعايشه برع البيت.. وانا بروحي ويا سلطان اخوي هذا الإنسان العزوبي العازف عن الزواج.. ههههه.. وعلاوي.. الصغيرون.. هذا صف رابع .. بس ملسون الهرم..
مجد: انزين خلود ممكن اطلب طلب؟؟ بس اخاف ترديني؟؟
خلود: افا عليج.. تامرين انتي..
مجد: امممم.. ممكن تباتين الليله عندي..
ارتبكت خلود.. ماودها ترد مجد.. بس خايفه من خالها.. : ها.. مجد انا عادي عندي.. بس اخاف من خالي..
مجد: لا ابوي طيب مابيقول شي..
خلود: بسير ارمس امي بشوف شو رايها..
رمست خلود امها وماكان عندها اعتراض ووافقت.. بس نفس الشي الخوف من عبدالعزيز.. ورمست لطيفه الي رحبت بالفكره وايد وماكان لها اي اعتراض.. وقالت خلو عبدالعزيز علي انا برمسه..
=-=-=-=-=
عند المعاريس.. كان الجو رهيب ووايد حلو.. مستانسين من الخاطر.. تم عبيد يطالع حور ويتأملها طول الوقت وهي ساكته ومستحيه..
عبيد: انا ادري انج حلوه بس ماتخيلتج بالهحلاة كلها..
حور: انا كنت خايفه وايد من سالفة الزواج هذي.. لأني ماعرف منو بيكون زوجي وبعيش مع منو... كيف بيكون شكله؟؟ كيف شخصيته .. صوته..
عبيد: نفس الي انا فكرت فيه.. تصدقين انا يوم قررت الزواج ورمست ابوي.. قلت له عنج انتي.. قالي مالك غير بنت عمك.. ماقدرت انطق بشي وسمعت من خليفه انج بتعرسين اكتئبت صدق.. ولما قدمت على اجازه ماقلت لخليفه اني بعرس قلت له نقاهه.. بيشكون ان نحن متفقين وقاصين عليهم
حور: حسافه ان خوله روحت قبل لا تدخل انت..
عبيد: ههههه.. ماعليج انا عزمت خليفه ومن قلت له المكان.. طول الوقت يضحك.. حسيته يعرف شي بس ساكت.. طلع الهرم كاشف سالفة انج مرتي.
حور: هيييييييه وانا اقول ليش خوله تضحك طول الوقت وتقول لي.. بتفرحين انا متأكده..
عبيد: حور والله اني مستانس..
حور: بس يعني معقوله انت ماتدري.. يعني عن طريق اسمي.. ولا مكان شغلي ابوي ماقال لك..
عبيد: انا من الضيج الي فيني.. حتى ما سألت ابوي شو اسم مرتي.. يعني ماكنت اعرف اي شي عنج.. داش شرات الأهبل ماعرف الي باخذها كبيره ولا صغيره ولا اي شي عنج..
حور: هههه لا انت حالك اردى عن حالي عيل.. انا بس كنت اعرف اسمك..
عبيد: هههههه.. حور.. نشي خل نتوضأ ونصلي ركعتين شكر عشان يبارك لنا ربي بهالزواج.
حور: ويه خل اطلع هالفستان المآساة..
عبيد: والله انج قمر يا حور..
حور: احم احم..
وسارت حور وبدلت ثيابها وسبحت وتوضت وصلت لها ركعتين شكر لله .. وحست براحه نفسيه.. تقرب عبيد منها وباس راسها: لج عهد مني اكون لج الزوج والأبو والأخو .. واكون لج مخلص طول عمري..
حور ارتاحت وايد اكثر من قبل له.. كانت مرتاحه له من قبل لا تعرف انه ولد عمها.. واليوم تونست بزياده..
اكيد حسيتوا ان هاي نهاية القصه.. وانا اقول لكم.. بالعكس.. هناك أحداث اكثر يايه في الدرب.. هاي مقدمه للحدث الرئيسي للقصه.. فكرة حور وعبيد ممكن تقولون مكررة.. بس الإسلوب مختلف.. لكن هذي فكرة في راسي حبيت انفذها. بغض النظر عن تكرارها.. في النهايه كل من كتب هالفكرة كتبه بإسلوبه وغيرها..

الجزء الأول

الفصل الثاني


=-=-=-=-=-=



عبيد وهو واقف مجابل المنظره ويعدل غترته ويغني.. : لايق عليك الحسن والزين.. متميزن بالوصف فتان


تذبحني النظرة من العين.. وأموت أنا في بحر الأعيان..


عبيد طويل وهالطول محليه وجسمه معضل شوي.. خشمه طويل وعينه شوي مشودوده عفوق وواسعه.. حياته مرتبين الي يشوفهم يقول مرسومين رسم ولو كانن حياة حرمه كانت بتطلع احلى.. لحيته وشواربه غلاض شوي وهالشي الي يعطيه وقار وشخصيه للي يشوفه ..


وقفت حور وراه وقعدت تتطالعه فالمنظرة.. : أول مره اكتشف ان صوتك حلو..


عبيد: ههههه يعني انتي الي بتكتشفين موهبتي للنجومية.. خلاص موافقه اقدم على نجوم الخليج؟


حور وهي تحط ايدها على خصرها: نعم نعم.. نجومية..ونجم الخليج؟؟ هيه عشان البنات يطيحون عليك وانا اموت..


عبيد وهو يلعب بعيونه: تدرين يعني ريلج حلو والبنات يتخبلون عليه..


وماوعى الا بضربه على جتفه.. : عاد خل اشوف منو بيرمسك..


عبيد ربع وراها وحط ايده على جتفها ولفها صوبه.. : عاد اهون عليج ماترمسيني في صباحية عرسنا..


حور وهي منزله عينها: ماكنت اتخيل اني بكون مستانسه في اول صباح في عرسي لو كنت انت مب ريلي..


عبيد: هههههه.. ولا انا.. ويلا خل نروح قبل الساعه 12 عشان الفندق مايحسبون علينا اليوم الياي..


حور: انا جاهزه بس بلبس عباتي وبلف شعري وبتغطى ونظهر..


عبيد: خلاص عيل انا بتصل في الريسبشن عشان يشلون الأغراض وبنزل تحت..


حور: لاااااااا..


عبيد: شوفيج؟؟


حور: لا تخليني انزل روحي.. بنزل وياك..


عبيد وهو يبتسم لها.. : خلاص اوكي عيل لا تأخرين فديتج..


وبسرعه سارت حور ولبست عباتها.. وتوها بتعطر.. يود عبيد العطر من ايدها وسحبه..


عبيد وهو رافع وحده من حياته: فالسياره تعطري لو سمحتي..


حور استغربت من تصرفه بس طبعها الهادي خلاها تبتسم وشلت العطر وحطته في شنطة ايدها ولفت الشيلة وتغشت.. وقبض ايدها عبيد ومشوا سوى صوب باب الغرفه عشان يطلعون.. ومن بعد ما تأكدوا ان كل اغراضهم نقلت للسياره نزلوا وخلصوا امورهم مع الفندق وطلع عبيد من الفندق ويا حور.. وركبوا الموتر..


حور من ركبت الموتر ضحكت على الخفيف..


عبيد: شوفيج؟


حور: هههه تذكرت يوم لحقتنا من كم يوم وشغلت لي اغنيه.. هههههههه واخر شي تطلع انت ريلي..


عبيد: ههههه هي والله شفتي الصدف كيف..


حور: احلى صدفة في حياتي..


عبيد: لا تزعلين من تصرفي يوم منعتج تعطرين فوق.. هذا لأني ماحب ان كل من مر حذاج يشم ريحتج.. وهالشي في الشرع مايجوز وانتي عارفه..


حور صدت صوبه بإبتسامه: لا افا عليك مب حور الي تزعل من هالأشيا..


حط ايده على جتفها ورد ايده على شفته وباسها.. ضحكت حور على حركته وكملوا دربهم لغايه ماوصلت حور بيت اهلها وهناك كان المقرر ان الكل يجتمع فيه.. وهذي اول مره تصادف ان العايله كلها تجتمع في بيت واحد..


حور قبل لا تنزل من الموتر: كلهم هني الظاهر؟


عبيد: هيه شفتي كيف زواجنا لم الشمل..


حور: الحمد لله يارب..


تغطت حور وشلت شنطتها ومشت صوب باب البيت.. كان واقف ابوها وابو عبيد وأحمد وخالد (زوج مروه) .. سلطان ( أخو نوره).. فيصل(زوج نوره).. علاوي الصغير..


تقربت عند ابوها وعمها ومعاها عبيد...


عبدالعزيز: مبروك ياعيالي..


عبيد وحور: الله يبارك فيك..


حميد: ربي يبارك لكم ويخليكم لبعض..


عبيد: آمين.. وحور دخلي داخل..


تخطت حور الباقي لأنها ماتعرفهم.. وكانت متغطيه.. وقف يدامها علاوي الصغير ومد ايدها..


علي: السلام عليكم..


حور اطالعته مستغربه .. ماعرفته.. وتوها بتسلم عليه.. سمعت حد يناديه..


سلطان: علوو.. عيب عليك تسلم على الحريم.. منقوود ياولد..


علي تم يتحايس بثمه وصد صوب حور: هاييل مايخلون الواحد يتهنى.. روحي داخل يلا.. ماعندنا حريم يقعدن برع..


ضحكت حور على حركاته ودشت داخل.. ومشى علي صوب اخوه سلطان والكل يضحك عليه كيف قافط..


علي: غديت ريال لازم تفشلني..


سلطان: يوم انك غديت ريال ماتستحي تمد ايدك للحريم؟


علي: انزين انا بعدني صغير..


فيصل: توك تقول ريال كيف صرت صغير..


علي: اوهووو خلاص خلاص.. لا ترمسون بهالموضوع وياي..


الكل ضحك الا علي الي كان مكشر ومعصب..


حور من دخلت البيت الكل تم ايبب لها وتقرب منها وباسها على خدها وبارك لها.. وتقربت منها امها وحضنتها بحراره وسلمت عليها..


لطيفه: فديتج والله وكبرتي وكبرتينا وياج..


الا تحس بنغزه في ظهرها.. تصد الا اليده تنغزها بعصاتها: تتحرى عمرها شباب اونج كبرتينا.. خوزي خل اسلم على بنتي..


وتقربت حور من يدتها وهي حاسه بشووووق لهم كأن ماشافتهم من فتره طويله ولا كأنه بس ليله وحده.. ومن شافت مجد الي واقفه على ينب وتبتسم لها وعيونها مليانه دموع.. تقرب صوبها وتحضنها: يحليلج يا اختي.. فديييييييتج والله..


مجد: مبروك يالعروس..


حور: الله يبارك فيج.. صدت صوب امها.. أمي.. تعالو كلكم هني بقول لكم شي وبتضحكون من الخاطر..


الكل قعد وتيمع في الصاله.. نوره ومروه ومجد وخلود وحور وامها وعمتها ومرت عمها ويدتها..


حور وهي تحط الشنطة حذالها وتفتح عباتها وشيلتها وتفرهم حذالها على الكنبة.. : سمعوا.. تدرون عبيد طلع منو؟؟


الكل: منو؟؟


مروه: تستهبل هاي.. ولد عمج بعد منو..


حور: لااااااااا.. انتوا سمعوني بالأول..


مجد: ليش انتي قلتي شي مفيد عشان نسمع..


حور: بس بس.. يالسخيفه..


خلود: لو سمحتي لا تقولين سخيفه عن طبجتي..


حور: عاشت البنت لها محاميين..


خلود: هههههههه.. انتي خلاص كنسلنا ويزتج وتحولت للأخ عبيد..


حور: لا والله.. ماعلينا حسابج بعدين.. ياراعية الفيز.. سمعوا تدرون ان انا وعبيد نشتغل في نفس الدائرة.. ولا ندري ان نحن عيال عمومه ولا حتى ان بعد فتره راح نتزوج..


نوره: حلفي..


مروه: هههههههه فلم مكسيكي..


لطيفه: احين ارتحت.. لأنج شايفه ريلج قبل لا تعرسين..


جلثم: اشوو؟... منقووود بنت العم تشوف ولد عمها قبل العرس..


شيخة: امي ذاك زمان الأول.. زماني انا ولطيفه وام عبيد.. الحال تغير.. والصراحه من حق البنت تشوف ريلها ومن حقه يشوفها..


جلثم: اشو هالرمسه البايخه تشوف ويشوف.. لا حشى منتن بناتي الي ربيتكن على العادات والتقاليد..


ام عبيد: يا عمتي.. ذاك الزمان الي ترمسين عنه تغير.. وبعدين هالشي مذكور في الدين ان البنت لازم تشوف الريال وهو من حقه يشوفها..


خلود بصوت واطي: عاد قالو بنت العم ماتشوف ولد عمها.. بس مب بنت العم ماتشوف بنت خالها ولا بنت عمها..


مجد: سكتي دخيلج مافينا على حشرة العيايز..


جلثم: انتن.. في شو ترمسن وتصاصرن من الصبح..


مجد: ها ماشي.. بس مستغربين كيف الصدف... حور تشوف ريلها في الدائره الي تشتغل فيها ولا تدري انه ولد عمها..


جلثم: بنتي شو تسوين في هالدايره.. تخبزون ولا شو بالضبط؟؟


الكل ضحك..


نوره: يدتي الله يهداج.. في شو بيخبزون.. دائرة يعني مكان شغل.. مب خبز وخمير..


جلثم: شو عرفني بخرابيطكن هاي.. اتحراها تطري الدائرة الي نخبز عليها..


حور: ههههههه اتخيل عمري اخبز وعبيد يبيعهن..


الكل تم يضحك..


حور: الا اقول .. مروه ونوره وين عيالكم؟؟


نوره: بناتي راحن فوق ودتهن ميره عشان يلعبن..


مروه: وانا بنتي راقده في غرفة يدو..


ميره: اففففف متى بستوي خالوو..


جلثم: هيه والله ودي اشوف عيالكم كلكم حوالي ..


حور: الله يعطيج طولة العمر يدوو وتشوفين عيالنا وعيال عيالنا بعد


الكل: آمين..

ميلس الرياييل..


أحمد: شفت ياريال يوم قلت لك خلك عادي..


عبيد: ابوي الله يسامحك ماقلت لي ان حور تشتغل وياي..


بوعبيد يصد صوب عبدالعزيز اخوه: بذمتك كم مره سألتك تقول لي مادري وين تشتغل..


عبيد: معقوله ياعمي ماتعرف بنتك وين تشتغل..


عبدالعزيز: ههههههه.. لا كنت اعرف انها تشتغل وياك.. بس ماحبيت اقول واخليكم تفاجئون.. عاد شو رايكم بالمفاجئة؟؟


سلطان: الصراحه احس انها صدمه مب مفاجئة.. وبعدين يا عبيد ماعرفتها من اسمها؟


عبيد استحى يقول انه مايعرف اسم عمه .. مابغى يحسس عمه انه غير عن ابوه.. : هي والله اسميني غبي.. بس لأني ماسألت عنها من جي مادري شو اسم ابوها..


عبدالعزيز: الله يوفقكم على كل حال.. ويرزقكم بالذريه الصالحة..


علاوي مل من قعدتهم.. يحس هالسوالف اتملله. صد صوب أحمد ولد خاله.. : اخبرك.. هني ماعندهم بلي استيشن.


أحمد وهو يصاصره: من وين لهم البلي استيشن وهم ماعندهم ولد..


علاوي: لا قلت يمكن يعني بناتهم غير.. ماعندهم بنت على قدي اتزوجها لا كبرت.. لأنكم مابتسمحون لي اخذ وحده من برع..


فيصل: صصصصه.. لا يسمعك عمي وينسفك من الحياة..


علاوي: لا دخيلك كله ولا الوالد مانروم عليه..


أحمد: يالجبان..


علاوي: قول جبان.. قول خواف اي شي.. دام السالفة فيها الوالد راضي..


..


صد احمد صوب عبيد الي كان يالس حذاله وتم يرمسه بصوت واطي شوي..


أحمد: ياخي عبيد خاطري اعرف اسم بنت عمي الغاويه..


عبيد وهو يضحك بخبث: ياللوتي احشم هاي بنت عمك..


أحمد: شو بلاك ابا اعرف اسمها انزين بنت عمي هاي مب غريبه..


عبيد: مجد ..


أحمد: متأكد..


عبيد: هيه لأن امس سألت حور وقالت لي ماعندها غير اخت وحده اسمها مجد.. وهي في الكلية احين..


أحمد: زين يابوك عرفنا شي عن بنت عمنا.. عنبو ولد عم مايعرف ان له بنت عم..


عبيد: ههههههه هي والله وانا اداوم وياها في نفس المكان ولا ادري انها خطيبتي..


أحمد وهو يسوي حركات بثمه: ياخي عايله خربوطه.. عادات وتقاليد اونه.. قاصين علينا ..


عبيد: اسكت لا يسمعك عمي ولا ابوي..


أحمد: هههههههه بستوي شرات علاوي.. لا وصلت السالفه لأبوي ولا عمي.. اسكت وانا جلب بعد..


عبيد: ههههههه محشوم يا بوشهاب..


أحمد: على طاري بوشهاب.. ماقلت لك ان بوشهاب ودرني..


عبيد: له له.. البارحه كان وياك في عرسي..


أحمد: صدق انك قوطي.. ماطري بوشهاب ربيعي.. بوشهاب الي خبري خبرك..


عبيد وهو يستوعب: هييييييه.. غربلات عدوينك ياريال.. انت ماشاء الله عليك ماخليت بوشهاب واحد في حاله..


أحمد: شو ذنبي يوم ايوني.. عاد خويك مايروم يقول لا..


عبيد: يالهرم.. بسك لعب على بنات الناس والله عيب عليك.. احشم.. تراهن بنات عرب وناس محترمين مب زين الي تسويبهن..


أحمد وهو يرمس بجد ويطالع عبيد بتركيز في عينه: ياعبيد.. ان كانن بنات ساترات وحاشمات اعمارهن والله ماييتهن .. بس هن يابن هالشي لأعمارهن.. وانا يا عبيد ريال ادور متعتي خل يحمدن ربهن اني ماسويبهن شي بس ارمسهن.. لو غيري على الي يسونه معاي والله مارحموهن.. تخيل انهن يطرشن لي صورهن وعن عري وانا امسح الصورة على طول.. لو غيري استغل الصور واستغلهن..


عبيد: لا تخلي بوعبيد ينزل راسه الأرض بسببك يا احمد..


أحمد: ماعاااااااش الي ينزل عين ابوي القاع.. وان كنت انا..


عبيد: تحذر ياخوي.. والله اني احبك واحب مصلحتك..


أحمد هز راسه وتم ساكت.. وتمت تدور في باله مجد.. تذكر يوم شافها تساند على الكنبه وطلع تليفونه تم يلعب به ويفكر في مجد.. صح انه ماشافها عدل.. ولا بيقدر يشوفها على هالعادات الي عندهم.. بس حسها مايفارق اذنه.. يتذكرها وهي ترمس وكيف مضيعه واتدور في مكانها.. رن تليفونه في هالوقت .. وكان بوشهاب.. الي خبري خبركم.. استأذن ونش..


سلطان: الله يهديه اخوك..


عبيد: هههه ذيل الجلب عوي شو بتقول..


طلع احمد وتم يتمشى في الحوي ويرمسها ويضحك.. وفي هالوقت كانت مجد في غرفه حور الي كانت تلم باقي اغراضها وترمس مروه ونوره.. مجد وخلود كانو جريب الدريشه ويسولفون.. فتحت مجد الستاره شوي عشان تشوف برع.. شافت احمد.. وتمت تتطالعه..أحمد مغرور شوي لجماله.. حنطاوي وخشمه طويل شرات اخوه عبيد شرات ماقلت قبل .. هذي علامة العايلة.. أحمد طبعه يخف لحيته شوي واما شواربه شوي تكون أغلض.. الكل يحط عليه.. بس هو ولا مهتم.. من طبعه لا اطالع وحده وركز فيها يرفع حاجبه اليسار عيونه عيون بدويه وسيعه وخامله شوي عنده شامه صغيره شوي في رقبته ومطول شعره شوي على حد اذنه وشوي اطول ... تقربت منها خلود واطالعت احمد وتساندت على الدريشه وجابلت مجد: هيه انتي وين سرحتي..


مجد: ههههههه.. لا بس اشوف ولد عمي فيها شي..


خلود: ابد مافيها شي.. وماعليج منه يغازل اكيد احين..


مجد: اشووو؟؟


خلود: يحليلج نسيت انج ماتدرين عنه شي.. هذا الي تشوفينه مامخلي بنت لحالها.. ياما اكتشفت ان بنات اعرفهن يرمسهن.. من جي اقول لج مادانيه..


مجد: لو درت به يدتي تدرين شو بتسوي..


خلود: هههههه.. لا ماتخيل شو بتسوي فيه..


مجد تمت تتطالعه وتحس قلبها يعورها.. ماترضى ان ولد عمها يكون جيه.. تذكرت اسلوبه وهو يرمسها امس .. قبل لا يعرف انها بنت عمه كان عاق الكلفة شوي.. صكت الستاره بقهر ومسكت ايد خلود ..


مجد: خل نروح غرفتي ابرك من مجابل ويهه عيل..


خلود: هههههه.. كرهته البنت..


حور: ها مجوود كيف الغرفه من دوني.. ماخفتي..


مجد: لا .. خلود نامت عندي..


خلود: اي نامت.. ليش خلتني ارقد.. قعدنا للصبح نسولف وطلعت لي صوركم يوم صغار وتميت اطالعهن..


مروه: الله لا يغير علينا.. صح انكن بس ثنتين.. بس على لمتنا قبل ويمعاتنا.. كنا نطريكم ونحن مانعرفكن ومفتقداتكن.. وين احين بعد ماعرفناكن..


نوره: أحسن شي استوى ان مجد خذت عبيد..


خلود: قولو هذا من حسن حظي.. لقيت وحده تماشيني..


نوره: وانتي الصادقه لقيتي وحدة خبلة شراتج..


مجد: خلود جني سمعت وحده تغلط علينا..


خلود: هيه جنه.. بس ليش ان العروس قاعده بنطوفها هالمره احتراما للعرووووووووس..


الكل تم يضحك ومشن برع الغرفه صوب غرفه مجد.. بس مجد ماكانت قادره تشل احمد من بالها.. انقهرت بالسالفه الي سمعتها.. ودها تنزل وتهزبه واتطيح فيه.. بس مب قادرة..


خلود: مجوود شو ياج سرحتي فجأة من بعد ما شفتي احمد؟؟


مجد: ها.. لا ماشي.. بس تضايقت ماحب ولد عمي يكون جي..


خلود: عيل انا شو اقول.. الي بنات اين ويرمسن لي عنه ومايدرن انه ولد خالي.. واسمعهن وودي اشق ويوهن مب حبا في ولد عمي.. بس لأني مارضى حد يرمس عن هلي..

مجد: شو يقولون مثلا..

خلود: مب عن شي يقولونه.. يعني شرات رمستهن عن اي شاب.. حلو.. ويخبل.. ويهبل.. رقمني.. وياب لي هدية.. ووعدني .. وبيسوي لي.. وانا شريت له الهديه كذا.. ومن هالرمسات الفاضيه الي دوم تسمعينهن من هالنوعيه من البنات..

مجد: هيييه.. انزين.. وماقلتي لي انتي ليش مادرستي في الكلية؟
خلود: يختي ماحب نظام الكلية.. جنه في مدرسة.. من جي من البدايه كتبت جامعه زايد..
مجد: اهااا.. وشو تدرسين..
خلود: بزنس.. أكاونتنج.. (محاسبة)..
مجد: الله يوفقج.. لا انا عاد جرافكس.. اموووت في شي اسمه رسم وتصوير..
خلود: هيه امس قلتي لي.. بس الي استغربته ماراويتيني ولا رسمة..
مجد: رسمة؟ .. تدرين ان حور الي وياي في الغرفه ماشافت ولا رسمة من رسوماتي..
خلود: ليش؟
مجد: مادري اتردد اراويها لأي احد.. اشك انها مب حلوة من جي..
خلود: وممكن انا اشوفها..
سكتت مجد لأنها متردده تراويها لأي شخص. بس ماحبت ترد خلود وخصوصا لأنها في بداية علاقتهم ويا بعض.. نشت وسارت صوب الكبت.. ويابت لها كرسي عشان توصل للرف العلوي للكبت.. وخذت لها كرتون لونه ازرق مخطط.. ونزلته.. وفتحته وكان فوقه وشاح الثانويه العامة الي كانت لابسته يوم حفل التخريج



::




ومن تحته كان مجموعه أوراق كرتونيه على حجمها a3 .. وطلعتهم كانو جريب ال 23 لوحة.. وقعدت تتطالعهم خلود بإعجاب.. تتميز الرسومات بدقتها وجمالها.. وخصوصا رسمة الحصان الي رسمتها.. كانت فضيعة واااااايد.. ومجد ساكته تتطالع تعابير ويه خلود بصمت وهي مرتبكه..
خلود: حرام عليج عندج هالموهبه وماتراوينا..
مجد: مادري احس رسوماتي مب ذاك الزود
خلود: حرام عليج والله انهن فضيعات واااااااايد عايبني وحلوين.. حرام انج تخسرين هالموهبة..
مجد: اشكرج على التشجيع..
خلود: لحظه منو هالصغيره الي في الصورة..
مجد: هههههههه هاي اخت ربيعتي يابتها عندنا الكلية جان احن على ربيعتي الا اتييب لي صورة اختها عشان ارسمها ورسمتها..
خلود: لا بس الصراحه ماشاء الله عليج احس الملامح يايبتهم صح..
مجد وهي تفتح بوكها وتطلع الصورة وتعطيها لخلود..: هاي البنت شوفيها؟
خلود: مجوودو والله نفس الشي.. عيل بعطيج صورتي بترسميني


مجد: بحاول


خلود: لا شو بحاول ترسميني ..

مجد: ههههه ان شاء الله..
وشلت خلود رسمة البنت والحصان وحنت الا تراويهن لنوره والبقيه..
مجد: لا اذا عرفت حور والله بتزعل لأني ماراويتها وهي الي وياي في الغرفه
خلود: حرام عليج عاد..
مجد: لا خلي انا صورت حور وعبيد بالتليفون امس.. برسمهم سوى وبقدمه هدية زواجهم.. وبعدين عاد راويها الي تبين
خلود وهي تتطالع مجد بطرف عين وتقعد على الفراش: اوكي.. موافقه.. بس اذا مارسمتي صورتي انا بعد بفشي السر في العايله
مجد: ههههه خلاص اوكي موافقه
وقعدن يسولفون لحد الساعه 9:00 فليل الي لازم تجهز فيه حور عشان يروحون المطار لأن الطياره الساعه 12.. راح يسافرون بريطانيا.. مدينة اسمها كاردف.. هالمدينة الي درس فيها عبيد <<< اخترت هالمكان لأن اناسافرت له وعندي له صور بتفيد في القصه..
مجد وهي في الغرفه ويا حور: بتوله عليج اختي..
حور: وانا اكثر.. عاد شو تبيني اييب لج من هناك؟؟
مجد : اي شي حلو منج..
حور: هههه ان شاء الله..
تقربت مجد من حور وحضنتها والدمعه نزلت على جتف حور: احبج يا اختي الغاليه
حور: يالله عاد لا تخليني اصيح.. ترا عبيد بيضحك علي وانتي ترضين انه يضحك علي
مجد: اكسر ضروسه.. هههه قوية البنت
حور: ههه اقول انا بعد
نوره: هههه والله انكن سوالف..
مروه: حور اشكثر بتمون هناك؟
حور: مانقدر انطول .. تدرين عاد رمضان قرب.. يمكن اسبوعين بس ولا عشرين يوم..
مروه: تروحون وتردون بالسلامه..
حور: الله يسلمج.. يالله انا جاهزه خل ننزل..
طلعت حور من الغرفه شافت امها يدامها تقربت من امها وحضنتها وادمعوا اثنينهم.. قعدت اليدة تحرطم عليهن..
جلثم: لحووول.. هب حالة هاي على كل مره تبجبجن.. تراها الا بتسافر ويا ريلها هب سايره عند حد غريب..
لطيفه: ههههه روحي يابنتي ربي يحفظج..
حور وهي تقرب من يدتها: يعني شو انتي ماتولهين علي احين وانا بعيدة عنج..
جلثم والدمعه في عينها: يعلم الله بمعزتج عندي يا بنت عبدالعزيز..
حور: ربي لا يخليني منج يدووتي..
ومن بعد ما سلمت على الكل تغشت وطلعت من الصاله وسارت صوب عمها وابوها وسلمت عليهم وربكت الموتر.. وركب عبيد من بعدها..
حور: بتودر السياره فالمطار؟
عبيد: لا احمد اخويه وسلطان ولد عمتي في السياره الثانيه بيون ورانا عشان احمد يشل موتري..
حور: اهااا..
وراحوا المطار ومن وصلوا نزلوا اغراضهم ودخلوا المطار واحمد نزل من موتر سلطان وشل موتر عبيد اخوه وساروا.. وحور وعبيد من بعد ما خلصوا الإجرائات راحوا صوب البوابه وقعدوا لحد ما يفتحون الباب ويركبون الطياره ..
حور: عبيد انا بتم تحت الغشوه طول هالسبع ساعات فالطياره
عبيد وهو يضحك: هههه هيه.


حور بانفعال: احلف.. والله بموت


عبيد: ههههههه.. بسم الله عليج يعل ربي يطول بعمرج ويحفظج.. بس بالأول قولي لي .. الصبغ الي على ويهج شليتيه؟


حور: ماحاطه شي غير الجحال..


عبيد: خلاص لا قعدنا في الطياره شلي الغشوة مب مشكلة..


حور:اشششوه ريحيتني .. اتخيل طول هالدرب وانا متغشيه شو بيستويبي؟؟


عبيد: اخبرج انا لاحظت شي في جوازج..


حور: شو ؟


عبيد : انه فاضي ومافيه ختم ولا دولة..


ابتسمت حور وبانوا ضروسها من تحت الغشوة لعبيد الي تم يتصدد حواليه اذا حد شاف حور.. لأنه من النوع الغيور جدا.. : لأني ياحبيبي ماسافرت لآي مكان


عبيد: عيل شوفي جوازي.


شلت حور جواز عبيد وقعدت تتصفح اوراقه ماشاء الله .. ممزور اختام دول كثيره.. : وحليلي راس مالي ختم هالسفرة


عبيد: ماعليج انا ان مامزرت لج هالجواز اختام ماكون عبيد


حور: ههههه


ومن نادوا عليهم نشوا ودخلوا الخرطون وحور تتطالع حواليها.. : عبيد مادري خايفه .. امسات سامعه عن طياره طايحه في دوله ماذكر وين بالضبط..


عبيد: لا تخافين واقري دعاء السفر وربج الحافظ


حور: والنعم بالله..


ومشوا والمضيفه راوتهم كرسيهم وقعدوا.. قعدت حور حذال الجامه وتمت تتطالع برع.. وشافت السيارات الي تمشي في ارضيه المطار.. والعمال..


عبيد: تدرين.. انا كنت ناوي ادرس طيران. بس امي الله يهداها.. ماخلتني..


حور وهي عاقدة حياتها: ليش؟


عبيد: تخاف.. تقول لا.. اخاف عليك ومادري شو.. انا مب بايعه ولدي..


حور: هيه صدقها لا لا زين يوم ماخلتك..


عبيد: انتوا ليش ماتفكرون بعقل.. لو الله رايد اني اموت بحادث.. بموت بحادث حتى لو بالسياره..


حور وهي تقبض ايد عبيد: بسم الله عليك.. لا تقول هالرمسه لا تخرع قلبي دخيلك..


ابتسم لها عبيد وطبطب على ايدها وطلب منها تربط الحزام لأنهم طلبوا هالشي منهم..


حور تمت محتاره وهي اتدور على الحزام ماتدريبه وين.. : وين حزامهم هذا..


عبيد ابتسم لها.. ولوى صوبها جان ادزه حور: عبيد استح نحن فالطياره..


عبيد: هههههه.. شوفيج ضنيتي فيه السوء.. ماقصدت شي.. كل السالفه اني بسحب الحزان الي هناك عشان اربطه لج..


حور: شكرا مابا.. روحي بدور عليه..


نشت حور وقفت مكانها وشافت الحزام وسحبته وقعدت وبعدين ربطته حولها وعبيد يضحك عليها من الخاطر.. : صدقيني ان ماقطعتج عند خليفه وخوله.. تريي انتي بس..


حور : ههه حرام عليك.. بس على طاري خليفه وخوله ذكرتني بموضوع بغيت ارمسك فيه؟


عبيد: خير ان شاء الله؟


حور: عن الشغل انت راضي اني اشتغل؟


عبيد: صح اني شديد في بعض الأمور.. بس هذا مب معناته اني بكون شديد لدرجة اني امنعج من الشغل.. عادي حبيبتي انا ماعارض للشغل.. خصوصا هالأيام .. راتب واحد مايكفي الواحد انه يمشي حياته ..


حور: وانت تباني دوم اتغشى.. وانت تدري اني فالدوام ماتغشى..


عبيد: اصلا قوانين الدوام تمنع البنت تتغشى.. وانا شفتج قبل وشفت كيف كنتي اتداومين.. محتشمه وساتره ولا حاطه شي في ويهج.. فماعندي مانع..


حور ابتسمت وارتاحت لكلامه.. وبدت الطياره تتحرك وهي زايغه.. واتم تتطالع من الجامه.. : متأكد مابيستوي شي ..


عبيد: ههههه.. شو بيستوي يعني.. انتي قريتي دعاء الركوب..


حور: هيه..


عبيد: خلاص.. وعشان ماتخافين. .. بندي هالجامه الي يمج.. وغمضي عيونج وريحي عشان ماتحسين بشي..


حور: بس خاطري اشوف الطياره وهي تصعد كيف..


عبيد: اوكي بس لا تخافين..


حور وبعفويه توها بترمس الا الطياره ترتفع وصوت المحرك يزداد خافت.. وصدت صوب الجامه وحست اذونها تنصك من الهوا.. والطياره ترتفع بشكل مائل..


عبيد: تم يطالعها ويتأملها .. ونزل الغشوه من على ويهها..


حور صدت صوبه: اوه تعال نسيت اني متغشيه..


عبيد: خليني اشوف هالويه الحلو.. ولهت عليه..


حور: ههههه.. تصدق .. تصورت السفر بالطياره غير يعني يخوف .. بس احسه عادي بس لحظه اول مايرتفع هني الخوف..


عبيد: حتى هذا مايخوف بس انتي مخوفه روحج..


حور: هههه يمكن..


ومر الوقت عليهم.. وراهم درب 7 ساعات فالطيارة..


فالبلاد..


كان يوم الجمعه.. وانجبرت خلود ترد بيتهم لأن وراها دوام اليوم الثاني...


مجد وهي ترمس خلود من تليفون البيت: اففف مب شي البيت من بعد ماظهرتي.. احين احس البيت فاضي..


خلود: خلاص باجر تعالي بيتنا.. انا ييتكم .. أحين دورج..


مجد: احين بنيلس نتعازم على بيوت بعض.. يلا عاد انتي تعالي وبلا رمسه زايدة.. انا اخاف اطلب من ابوي..


خلود: خلاص اوكي.. عيل جهزي رسمتي باجر..


مجد: تمصخرين انتي.. لا لا اكيد تمصخرين.. انا رسمة الويوه تاخذ علي فترة أقل شي أقل شي.. 5 أيام..


خلود: عنبوووج.. شو بترسمين موناليزا..


مجد: خلودوو اذا تميتي اتعايبين بغير رايي..


خلود: ههههه.. خلاص اوكي اوكي..


وكملوا سوالف شوي ومن بعدها بندوا الخط.. قعدت مجد تتطالع تليفونها وتجلب فالمسجات.. تذكرت أحمد والي سمعته عنه.. فرت التليفون بعيد عنها.. : الله يلعن التليفون والي اخترعه دام اشكال احمد يستغلونه في سوالفهم البطاليه.. اففف انا ليش حارقه اعصابي عليه.. (وهي تهز جتافها).. وانا اشلي اصلا افكر فيه واقهر في نفسي.. نفاده..


نشت من على الفراش ومشت صوب المنظره وقعدت مجابلتها وقعدت تمشط شعرها.. غصبن عنها ادمعت عينها..


مجد: وينج يا حور.. كنتي في هالوقت تمشطين لي شعري وانا اضحك واسولف وياج..


=-=-=-=-=

مجد: آآآآآآآي شعري شعري.. حورووو انتي شو ماتعرفين تمشطين عدل.. هاتي..
حور وهي تسحب المشط بإيدها عشان ماتطوله مجد.. : يلا بس شوي شوي.. الله يخليج..
مجد: انتي عندج شعر مشطيه..
حور: انتي تمشطين شعري انا ماقول لج شي.. وانتي ماتخليني..
مجد: انتي ماتعرفين تمشطين اصلا..
حور: خليني اتعلم..
مجد وهي تحط ريلها اليمين فوق ريلها اليسار.. : هيييييييه (تغمز لها) عشان تمشطين شعر عبيدوو..
حور: يالخايسه.. شو هالرمسه..
مجد: صدق نسيت عبيد ريال اكيد مايطول شعره..
ضحكت حور وغفلت مجد ويودت شعرها وقعدت تمشطه ومجد تحرطم ويضحكون سوى..
=-=-=-=-=-=
صدت مجد من المنظرة وعطتها ظهرها وجابلت السرير.. وقعدت تصيح وهي تتذكر اللحظات الحلوة.. الله يوفقج يا اختي ويهنيج مع ريلج.. ويساعدني في وحدتي..
حطت المشط على التسريحة ومسحت دموعها.. وفتحت الكبت عشان تطلع لها بيجامه للنوم.. وشافت البيجاما الي شرته لها حور من لاسنزا.. لونها وردي.. البودي وردي مايل للفوشي اكثر.. والبنطلون وردي فاتح عليه ورود صغيره بالفوشي.. لبسته وبطلت شعرها.. كانت تهبل اكثر.. اللون كان طالع لايق وايد على بشرتها والي محلنها طول شعرها الأسود.. ماكان طايع اييها نوم.. قعدت على السرير وتتصفح مجله.. وشعرها مفروش على السرير.. وكل ما تتطالع شي خصله شعرها تخرب عليها وترفعها.. وفي لحظه هيه ترفع خصلتها شافت الجامه.. وسمعت وقتها حشره في الحوي عندهم.. ردت الخصله ورا اذنها.. ومشت صوب الجامه.. وانصدمت.. احمد شو يابه عندهم في هالوقت.. وابوها واقف ويا احمد ويعطيه اغراض.. وقتها عرفت ان احمد ياي ياخذ اغراض حور لبيتهم.. قعدت تتطالعه وهو يضحك.. لاحظت غمازته الي على خده اليمين.. وعيونه كيف تضوق يوم يضحك.. بس ماكانت قادره اتدقق زود غير الملامح الي تظهر في ويهه بوضوح.. حست براحه يوم شافته.. وسمعت يدتها تنادي عليها.. فزت.. وربعت عشان تروح ليدتها قبل لا تحشرها لأنها تأخرت.. وماكانت منتبهه للزل الصغير الي يدامها.. زلقت وطاحت على جنب ايدها.. وقعدت تصرخ وتصيح.. ربعت لها أمها في الغرفه ..
لطيفه من فتحت الباب وشافت مجد طايحه على الأرض حطت ايدها على قلبها: ويديه بنتي.. (ربعت صوبها) شوياج ؟؟ شو مستوي؟؟
مجد وهي تصيح: اميي.. ايدي تعورني تعورني..
لطيفه: عبدالعزيييييييييييز.. عبدالعزييييييييز..
جلثم كانت في الصالة تحت .. وماتروم تصعد على الدري لأن ريلها تتعب.. سارت صوب باب الصاله وفتحتها.. وكان احمد بعده واقف ويا عمه..
جلثم: عبدالعزيز الحق على بنتك مادري شو ياها اتصرخ وتصيح..
عبدالعزيز: مجد.. شو بلاها..
واحمد من سمع طاري مجد انخبصت حالته.. ماعرف شو يسوي.. وده يدخل وخايف.. مب عارف شو يسوي.. عبدالعزيز على طول ربع داخل وصعد فوق.. ودخل غرفه مجد وشافها في حضن لطيفه واتصيح..
عبدالعزيز: مامن شر بنتي شوفيج؟؟
مجد: ايدي .. ماحس بها ايدي تعورني..
عبدالعزيز: شو ترين.. لبسي عباتج خل نسير المستشفى.. يلا يا حرمه ساعدي بنتج وانا .. اووه نسيت موتري في الوكاله.. خل بنسير ويا احمد..
مجد من سمعت طاري احمد نست العوار.. ونشت ويا امها ولبستها عباتها بس ماكانت قادره تحرك ايدها وخايفه ان ايدها تكون مكسوره ولا شي فزود ما طاعت اتحركها من حالها.. ولبست عباتها والكم الثانيه ماحطته في ايدها.. ولطيفه لبست عباتها ونزلوا..
جلثم: واعليه يابنتي شو ياج..
مجد والدموع تذرف من عيونها: يدوو ايدي تعورني..
كلثم: كله مني اكيد ربعتي يوم انا زقرت عليج..
مجد: لا يدوو لا تقولين جي.. روحي ماشفت يدامي وطحت..
جلثم: وين سايرين بيي وياكم؟؟
لطيفه: بسرعه اميييه عشان مانتأخر..
وطلعوا كلهم ومجد ماكانت متغشيه..
مجد: امي انا ماتغشيت ابوي بيحرج علي..
لطيفه: وين ترومين تيودين غشوتج.. ماعليج من ابوج خله علي..
ومشوا صوب الموتر وفتح احمد لهم الباب وبعده ماشاف ويه بنت عمه كان مستحي من عمه.. وطلعت جلثم وركبت الموتر ويا لطيفه ومجد .. وعبدالعزيز كان يالس يدام..
عبدالعزيز: مامن شر بنتي..
مجد بصوت مبحوح: الشر ماييك ابوي..
احمد وده يضحك.. لأنه الواحد يوم يكون متألم مايحس بالي حواليه .. كيف مجد مركزه بكل شي.. احمد كان فيه فضول يشوف ويه مجد خصوصا بعد ما لمح انها مب متغشيه.. وتم يعدل الجامه ..
عبدالعزيز: شوفيها الجامه ولدي؟
أحمد ارتبك: ها.. لا بس مب قادر اشوف الموتر الي وراي عدل..
عبدالعزيز: هيه ابوي زين تحذر في السواقه..



تنهد احمد يوم مشت على عمه السالفه.. وقدر يشوف مجد وشافها حاطه راسها على جتف امها ومغمضه عيونها وهي تدمع.. غمضها حالها.. وحس بها تتألم.. بس استانس لأنه شاف ويهها.. ويه هاي الخطيبه عيل مابا خلود المتكبره.. وماحس الا بإيد عمه على جتفه: احمد يا ولدي الإشاره اخضرت والسيايير اتهرن وراك.. شو تتريا..
احمد افتشل وبسرعه حرك موتره .. وكان قريب من مستشفى راشد.. ونزلوا الحوادث نزل احمد وفتح لهم الباب وترياهم كلهم ينزلون عشان يبند الباب.. وتوها مجد بتنزل بس من شافت أحمد انخبصت وماعرفت كيف تتصرف وماكانت منتبهه كانت بتطيح لأنها بس معتمده على ايدها اليمين.. يود احمد كف ايدها اليسار وساعدها.. صدت صوبه وهي محمره من الحيا.. من شاف عيونها احمد حس بشي مب قادر يفهمه.. حس هالنظره غير.. ياما مرت عليه نظرات بنات بس شرات هالنظرة ماكانت..
مجد: مشكور..
لطيفه: يزاك الله خير ياولدي.. تعالي..
ومشت مجد ويا امها وهي تتذكر ايده.. ضمت ايدها ورصت عليها وتحس بدفاه.. ودخلوا عند الطبيب.. ودخلت وياهم اليدة.. وتم احمد برع الغرفه يترياهم..
جلثم: دختور.. اشو هذا.. ( كانت تأشر بععصاها على سماعات الطبيب) لشو تستخدمه؟؟
الدكتور كان مواطن توه متخرج شكله .. : هذا يمي سماعات عشان اسمع دقات القلب..
جلثم: هيييييييه.. ينباع في السوق؟
مجد ميته من الضحك على يدتها.. والدكتور كان يفحص ايدها وهي سرحانه في يدتها.. وامها وابوها ياسين مجابلينها ويضحكون..
الدكتور: هيه ... ليش بنتج دكتوره تبين تشترين لها؟؟
جلثم: لا.. ابا اشتريه لعمري خبرك انا حرمه عودة ماسمع عدل.. عشان اسمع فيه الرادو..
الكل ضحك.. وأولهم الدكتور ماقدر ايود عمره زود..
عبدالعزيز: الله يهديج يمي .. ها مادخاتره.. شو دخل الرادو..
جلثم: ماعليك منهم.. اقول دختور شو فيها بنيتي..
الدكتور: الظاهر فيه كسر .. بس لازم بالأول نسوي لها اشعه ونتأكد.. بكتب لها تحويل لغرفه الأشعه..
جلثم: شو اشعته بعد؟؟ شو يسوي هذا؟؟
الدكتور: نبا نصور ايدها عشان نشوف اذا عظامها مكسوره ولا لا..
جلثم: هيييييييه
لطيفه تقرب من اليدة: أمييه لا ترمسين ويا الدختر وايد بيتوه ومابيعرف شو قاعد يسوي..
جلثم: افا.. دختور انت متضايق من رمستيه؟
الدكتور يبتسم لها: لا اميه.. بالعكس والله ..
وطلب الدكتور من السستر تروح ويا مجد لغرفه الأشعه .. وسارت ويا لطيفه والسستر عشان يصورون ايدها..
جلثم: انزين يا ولدي انت وين درست عشان تغدي دختر..
الدكتور وهويبتسم لها: والله يمي انا درست في استراليا؟؟
جلثم وهي تصاصر عبدالعزيز: أخبرك وين هاي البلاد الي يطريها؟
عبدالعزيز ماعرف كيف يفهم امه.. سكت شوي ورد عليها: بلاد الشقر اميه..
جلثم: واعليه ياولدي ودوك الشرقيه؟
استغرب الدكتور من جلثم.. اي شرقية.. واما عبدالعزيز فتم يضحك.. صد صوب امه: امييه هب الشرقيه.. الشقر الشقر.. الي درس فيها عبيد..
جلثم: هييييييه ديارهم خياس يا ولدي.. تذكرت يوم سرت ويا حميد وحرمته عند عبيد.. بارده بلادهم .. عظامي عورتني..
الدكتور كان يسمعها وهو يخلص الأوراق الي يدامه ويضحك.. ودخلت السستر ومعاه مجد وعطت الصور للدكتور وحطهم على الشاشه عشان تضوي ويقدر يشوف بوضوح..
الدكتور: امممم.. الحمد لله مافي كسر.. بس في شرخ في عضمة الرسخ.. الأحسن تسوي جبس..
جلثم: واعليه يابنتي ماتشوفين شر.. كله مني يوم اني زقرتج..
مجد: لا يدوو.. حرام لا تقولين جي.. مني انا ماستحي على ويهي واربع في الغرفه..
جلثم: دكتور.. يعني احين بتلفون ايدها..
الدكتور: هيه ان شاء الله..
وطلعت جلثم ويا لطيفه وتم عبدالعزيز ويا الدكتور الي بدأ يجهز الجبس عشان يجبسون ايدها .. ومجد تتطالع وتحس بعوار كل ما يلف الدكتور ايدها بس تغمض عينها..
الدكتور: ماعليه سامحينا بنعورج بس عشان الجبس مجبور..
مجد تبتسم له: لا ماعليه..
تمت تتطالعه كيف يلف ايدها بحذر ولين.. حريص بكل حركه يحرك ايد مجد فيها.. كان قريب منها وايد .. تمت طلع ابوها من الغرفه وسار عند لطيفه وامه وأحمد الي كانو يالسين برع.. تمت مجد تتطالع الدكتور وتلاحظ حركات عينه كيف يدقق و تحس في ملامحه طفل بريئ عانا وايد.. صدت عينها وقعدت تتطالع ايدها.. تذكرت شي ونطقت.. ومجد كانت طول الوقت ساكته ورمستها كانت شوي وبصوت واطي.. فماكان يدقق الدكتور على صوتها بس هالمره صوتها كان قريب من اذنه .. : دكتور..
رفع عينه: نعم..

ابتسم لها الدكتور : اهااا يعني تبين اجازه.. اسميكن انتو البنات ماتطوفن شي..
ابتسمت مجد.. ولف الدكتور ايدها بالغلط وتألمت..
الدكتور: اسف والله اسف..
مجد: ها لا عادي..
تم يشتغل في لف ايدها وهو يحس برجفتها وارتباكها.. ونظرة عينها الي مليانه خجل.. وصوتها الي يرد الروح.. تنهد..
مجد: يدتي لعوزتك اكيد بسوالفها؟؟
الدكتور: هههه.. لا وحليلها.. ذكرتني بيدتي الله يرحمها.. كنت وااايد احبها.. ( حس ان هالسؤال فتح جروح قديمه ووقعد يرمس بلا حاسيه ان مجد انسانه غريبه عنه) .. توفت يدام عيني فمن اشوف اي حرمه عوده اتذكرها وماقدر اتحمل.. الله يرحمها
مجد تضايقت ان سؤالها فتح شي موجود في قلبه.. : الله يرحمها.. اسفه على سؤالي..
الدكتور تم منزل راسه ماحب ان مجد تشوف دمعته بس الي ماحس به ان دمعته نزلت على الجبس ولاحظتها مجد تضايقت اكثر.. وهو رفع راسه وابتسم.. : يحرق الجبس عين الواحد.. لا تستوين دكتوره احسن..
ضحكت مجد واعجبت بشخصيته كيف يحاول يخفي آلامه بأي طريقه.. وخلص ونادى على السستر عشان تكمل وهو يغسل ايده.. وقعد على مكتبه بعد ماخلص..
الدكتور: شو اسمج؟
مجد: مجد عبدالعزيز (الفلاني)..
الدكتور: وفي اي كلية؟
مجد: كلية تقنية دبي ..
الدكتور: مجد شو تخصصج.. ؟
مجد ابتسمت.. : جرافكس..
ودخل عبدالعزيز في هالوقت والدكتور ماحب يسكت عن يشك عبدالعزيز بشي..
الدكتور: تخصص حلو وله مستقبل.. الله يوفقج..
عبدالعزيز مانتبه ان الدكتور يكلم مجد.. تحسبه يرمس السستر.. ونشت مجد وايدها مجبسه..
مجد: ابوي طلبت من الدكتور اجازه للكلية..
ابتسم لها عبدالعزيز: زين سويتي.. مشكور دكتور ويزاك الله ألف خير..
نش الدكتور ومد ايده سلم على عبدالعزيز.. وتوهم بيظهرون بإرتباك: لو سمحت الوالد..
صد عبدالعزيز صوبه ويبتسم: هلا..
الدكتور: نسيت اكتب لكم موعد عشان التصوير الياي..
عبدالعزيز: هيه يزاك الله خير..
وكتب لهم الدكتور الموعد وسلم لهم الورقه وطلعت مجد من الغرفه وهي تبتسم .. وجابلت احمد من صدت.. وكان مبتسم وهو واقف ويا يدته ولطيفه امها.. تغيرت ملامح ويهها.. ومشت وعدت حذاله ويا ابوها وهي تتطالعه بطرف عينها.. استغرب احمد.. وضحك.. في خاطره.. : أكيد من تأثير الجبس..
وركبوا الموتر وصلهم أحمد البيت وسلم عليهم ... وكانت مجد واقفه في الحوي وقتها...
أحمد: وماتشوفين شر يابنت عمي..
مجد ردت عليه بس مب من الخاطر: الشر ماييك..
ودخلت البيت وصعدت لغرفتها وقعدت.. تمت تتطالع الجبس وتضحك.. تتذكر الدكتور وطيبته وحرصه.. وخطر على بالها احمد في نفس الوقت.. : اففف من هالإنسان جنه يني .. في كل مكان يظهر.. ويييييين الفرق بينه وبين الدكتور.. طيب وحنون.. وهو.. عينه زيايغه.. عنبووه مايحشم اني بنت عمه يتم يطالع من الجامه يتحراني ماشفته.. وعلى كل شوي فاج لي هالثم .. جنه يسوي دعايه معجون اسنان.. اما الدكتور حساس برمسته.. ويوم يرمسني ماكان يطالع في عيني بتركيز.. عفااااااان الله على هالولد عم.. وسارت طلعا عباتها ولاحظت انها لابسه بيجامتها.. ابييييييه فشيلة سايره المستشفى ببيجاما...
.......
من بعد 7 ساعات فالطيارة وصل عبيد ويا حور مطار أمستردام وعندهم توقف لمدة ساعتين ونص فالمطار.. قعدوا يدورون فالسوق الحرة وعبيد كل مايشوف ان في شي يعيبها ياخذه لها.. وخذوا لهم أكواب نفس الشكل وقبضه الكوب تنحط ويا قبضة الكوب الثاني ويكون على شكل قلب..
حور: احين نحن تشرينا من هني شو خلينا لهناك؟؟
عبيد: مايغلا عليج شي..
حور: عيونك الغاليه..
ومشوا صوب البوابه الي بيسافرون منها من امستردام لكاردف.. كان الطابور طويل.. وكل من يشوفهم يتأمل فيهم.. كانو لايقين على بعض.. الطول والشكل.. ومن بعدها ركبوا الباص الي بيوصلهم للطياره.. وركبوا الطياره ورحلتهم راح تكون 45 دقيقه.. وقضوها سوالف .. قعدت حور ترمس عن طفولتها وسوالفها ويا مجد..
عبيد: هههههههه يحليلكم.. انا الي ضايقني انكم كنتوا وايد بعاد عنا.. يعني حتى مروه ماكنتوا تحتكون فيها..
حور: ابوي فيه عزة نفس غير طبيعيه.. يحس بالفرق حتى من عمي ليش لأن ابوه غير.. ويخاف ان نشوف بيتكم ولا انتوا كيف حياتكم ونقارنها بحياتنا مثلا.. مع ان هالشي لا فبالي ولا فبال مجد..
عبيد: الله يهديه عمه.. بس الحمد لله يوم انتي صرتي من نصيبي.. ياخوفي كان مايفاوق مثلا..
حور: هههههه.. لا عاد ابوي مب لهالدرجة..
عبيد رفع الجامه.. وتم يطالع.. كان الضباب مغطي السما مب قادرين يشوفون شي تحت.. : شوفي الضباب كيف كثيف؟
حور: والطيار كيف يسوق فالضباب..
عبيد: هاييل ماشاء الله عليهم خلاص تعودوا .. ضباب مطر وغيره.. قادرين يتصرفون.. وربج الحافظ بعد
حور: يالله بس نوصل بالسلامه يخوف الوضع
عبيد: هههههه يحليلج
وفي هالوقت تعرضت الطياره لمطبة هوائية وليش ان الطياره صغيره فحسوا بالمطبة.. زاغت حور وقبضت ايد عبيد: ابيه بنطيح..
عبيد: ههههه.. لا هاي مطبة هوائية عادي..
حور: جي شارع عشان يكون فيه مطبات..
عبيد: لا.. هاي سحابه يوم يتخطاها تهز بالطياره وخصوصا ان حجم الطيارة صغير..
حور: يخوف..
عبيد: دامج ويا عبيد لا تخافين ابد..
حور: فديت عبيد عيل..
عبيد: ههههههههه

نهاية الجزء..


الجزء الثاني
=-=-=-=
الفصل الأول
=-=-=

أول ماوصلوا مطار كاردف .. بعد ما طلعو كان سيارة تاكسي تترياهم بتوديهم على الفندق الي حاجزين فيه.. وتمت طول الوقت حور تتطالع المناظر حواليها.. والمناطق الخضرا الي في هالمدينه..
عبيد: عسى بس عيبج المكان؟؟
حور: رووعه والجو رهييييييييب.. يعني لا برد ولا حر..
عبيد: بعدج ماشفتي شي.. بوديج وبحوطج.. وبخليج تستانسين في كل لحظة تعيشينها هني..
حور: الله لا يحرمني منك.. والفندق بعيد؟ لأني تعبااانه واحس اني ابا يوم كامل ارقد فيه..
عبيد: لا مب وايد بعيد..
حور: كم سنة درست هني؟
عبيد: جريب 5 سنين..
حور: من جي حافظ كل شي فيها..
وبعد ماوصلوا الفندق واستلموا مفاتيح الغرفه على طول ساروا الغرفه وكل واحد فيهم بس يفكر وين الفراش عشان يرقد ويرتاح.. ورقدوا..
فالبلاد في هالوقت كانت مجد راقدة.. وعالساعه 2:00 تم يرن تليفونها.. وهي ماتسمعه.. من بعد كذا مره رن التليفون .. نشت .. وتمت تتطالع الرقم.. وكانت خلود الي متصله..
ردت وبتعب: الووو
خلود مصدومة: مجوودوو انتي راقدة ؟؟
مجد: هيه انا فالبيت ماداومت اليوم؟
خلود: وليش ان شاء الله.. عيل يالخاينه اتخليني اداوم اليوم وانتي الي تغيبين؟
مجد: لا مب جي... بس انا انكسرت ايدي امس ومجبسينها فعطوني اجازه 3 ايام
خلود : ويه ويه ويه .. كل هذا وانا اخر من يعلم..سلامات فديتج ماتشوفين شر
مجد: جني ارمس يدتي ماشي فرق.. ههههههه.. الله يسلمج
خلود: وبعدين كيف انكسرت ايدج؟؟ شو مسوية انتي
مجد: يختي يدتج يوم تزقر الواحد تخرعه.. تخليج تخصبقين وماتعرفين كيف اتوصلين نفسج لها.. وانا من خرعتي ربعت وزلقت ريلي بالزوليه واندبغت على ايدي..
خلود: هههههههه.. جان زين كنت هناك.. اتخيل شكلج..
مجد: حرام عليج خلودوو لا تضحكين علي.. الله بيراويج..
خلود: ويه بسم الله علي.. انزين سمعيني انا عندي كلاس للساعه 4 وعقب الدريول بييبني بيتكم اوكي..
مجد: اوكي.. وخليني ارقد لغايه ماتيين انتي..
خلود: اشعليج انتي.. ارقدي ارتاحي ونحن نجتهد في سبيل الوطن..
مجد: هههههه
=-=-=-=-=
في بيت حميد (بوعبيد)
أحمد كان قاعد ويا امه وابوه ويسولف..
ميثا: ههههه.. الله يقطع سوالفك يا احمد..
أحمد: ادريبي دمي خفيف.. اوووووووه صدق نسيت اخبركم؟؟
حميد: خير ياولدي ..
أحمد: أمس وانا كنت عند عمي عبدالعزيز.. بنت عمي.. مجد طاحت وديناها المستشفى وجبسوا إيدها..
ميثا : واعليه.. وحليلها كيف طاحت..
أحمد: مادريبها..
حميد: عيل يا ميثا من الواجب ان نزورهم ونتحمد لمجد بالسلامه..
ميثا: هيه اكيد..
أحمد: ويستوي انا ايي وياكم؟؟
ميثا: والله ..
حميد يقاطعها: يستوي ليش مايستوي..
صدت ميثا مستغربه من ريلها كيف بيخلي ولده يسير بيت فيه بنت.. استانس احمد ونش سار غرفته..
ميثا: حميد.. كيف تخلي الولد يروح بيت عمه وفيه بنت..
حميد: اشو هالرمسه .. بنت عمه تراها.. وبعدين يا حرمه ترا نحن ماكنا راضين ان عبيد ياخذ حور وهو ماشايفنها وخفت اطلب من عبدالعزيز ينقد علي ويحرج.. واخوي العود مابا ازعله.. وانا ابا احمد يشوف بنت عمه على الأقل.. والبنت مب صغيره يمكن يعيل في الزواج ويودر سوالفه..
ميثا: ههههههه.. صدقت والله.. بس عن عبدالعزيز يحرج لا شاف احمد..
حميد: اخوي وانا اعرفه.. دامه امس رضى ان احمد يكون موجود يوم ودوها المستشفى .. مابيعارض.. خصوصا بعد زواج حور وعبيد..
ميثا: الله يكتب الي فيه الخير.. ترا مجد بنت غاويه وطيبه ماشاء الله عليها ربي يحفظها..
حميد: اكيد تربية لطيفة.. وترا لطيفة تربية أميه..
ميثا: والنعم لطيفه حرمه والنعم فيها..
=--=-=-=-=


في بيت فيصل ريل نوره..
الكل بيستغرب كيف اهل نوره وافقوا على زواج نوره من ربيع اخوها.. يعني برع العايله.. ابو نوره انسان متفتح شوي.. وشايل من باله هالأفكار الجيدمة ان البنت مالها غير ولد عمها ولا ولد خالها.. دايما يقول دام نصيب البنت يانا .. والريال ماينعاب.. ليش نرده.. في بداية زواج نوره.. زعل عبدالعزيز وحميد من اختهم فتره ومن بعدها تراضوا.. واقتنعوا بفيصل لأنه ريال زين والنعم فيه..
...
في هالوقت كانت نوره ويا العنود ومهره بناتها قاعدات في الصاله.. العنود عمرها سنتين ونص.. ومهره كملت ال8 شهور.. عائلة فيصل شوي مختلفين عن طبيعه اهل نوره.. يعني ممكن العايله كلها تجتمع رياييل ويا حريم.. بس طبعا الأخوان والنسايب بس.. اما اي احد غريب مايختلط ويا حريم العايله..
فكانت نوره قاعده ويا عمتها واخت ريلها.. وفيصل قاعد ويا اخوه عادل وابوه.. دش عليهم اخوه خالد..
خالد: السلام عليكم يا جماعة..
الكل: وعليكم السلام..
خالد صد صوب فيصل أخوه: هااااااا.. اشحالك بو البنات؟؟ ياك بنت بعد هااا.. ههههههههههههه..
افتشل فيصل ونوره تضايقت كان ودها ترد بس احتراما لريلها وان هذا ريال عيب ترادده.. تضايق ابو فيصل من رمسة خالد ولده.. ونفس الشي عادل..
عادل: تضحك على اخوك ونسيت عمرك..
خالد: ليش؟؟ .. انا الله رزقني بولدين الحمد لله..
عادل: ولدين؟؟ بس من بعد كم بنت؟؟ بعد 4 بنات ياك الولد.. ومن كم حرمة؟؟ حرمتين.. لاتنقد على اخوك ماياه..
بوفيصل: صدقه عادل.. وبعدين بنات ولا اولاد كله خير ونعمه من الله...
خالد :فكونا لااااه.. جني الا ارتكبت جريمة..
نشت نوره وهي حاسه بغصه وشلت مهره الرضيعه وسارت غرفتها.. لحقتها ام ريلها..
ام فيصل: أميييه نوره تضايقتي من رمسة خالد.. تراه مايقصد الا يسولف؟؟
نوره: أميه انا ماتضايقت من خالد كثر ماتضايقت منج انتي.. مارديتي عليه؟؟ يعني ترضين يضحك على ريلي.. وبعدين بقولج شي عمتي.. تراه ان ضحك.. ما ضحك علي انا ولا على فيصل.. ضحك على ربه .. لأن ربه هو الي رزقنا ببنات.. وكلهم بنتين بس الله يحفظهم لو الله يرزقني ب10 بنات.. والله اني مستانسه ولا بزعل.. كله خير
ام فيصل افتشلت.. تعرف ان الحق ويا نوره بس شو بتسوي.. : الله يحفظ لج بناتج ويرزقج بالذرية الصالحة.. ان كانو بنات ولا اولاد.. المهم عيال صاحين وسالمين
نوره: تسلمين.. بس خالد خل يخاف ربه في عياله..
دخل فيصل والضيق ضارب حده عنده.. وقعد على الفراش تقربت منه امه ولوت بإيدها على جتفه.. : ولدي يا فيصل لا تزعل من خالد تراه اخوك ومايقصد..
فيصل: شو اخوي ومايقصد وضحكته ملت البيت كله..
ام فيصل ظهرت من الغرفه وهي مب عارفه شو تسوي.. ترمس خالد ويزعل وتكبر السالفة .. ولا فيصل شو تقول له...
نوره: فيصل انسى الي قاله اخوك ..
فيصل: فشلني.. وان كنت ابو البنات يشرفني يكون عندي 10 بنات بعد.. بس المهم اني اعرف كيف اربيهن.. يعني الولد شو بيزيدني ولا بينقصني.. يمكن الله يرزقني بولد مايشرفني انه يشيل اسمي.. الله يقدرني على تربية عيالي ها اهم شي
نوره: وانا بعد اقول نفس الشي .. ولا تخلي هالرمسه الي قالها اخوك ويمكن ماكان يقصد شي منها تكون سبب في خلافات بينك وبينه ..
فيصل: والله اني كنت اروم ارد عليه.. بس الحشيمة لأبوي الي قاعد.. وانه اكبر عني..
نوره: ماعليه الله يسامحه.. لا تشيل بقلبك حبيبي..
فيصل: نوره محد غيرج فاهمني او يقدر يريح بالي..
تبتسم له نوره وتحط ايدها على جتفه: انت ريلي واعرفك كثر ماعرف نفسي..
فيصل: أحبج..
نوره: هيه جي خلني اشوف هالضحكة الي ترد الروح...
فيصل: ههههههههه.. تدرين ان عبيد وحور كانو شايفين بعض قبل عرسهم
نوره: هيه حور خبرتنا السالفة والله اني ضحكت يوم سمعت السالفة
فيصل: سبحانك يارب.. بنت عم ماتعرف ولد عمها ولا هو يعرف بنت عمه.. الا في ليلة العرس
نوره: اللوم كله على خالي بعدهم عن الكل..
فيصل: اسمحي لي.. بس ها خالج احسه غريب ساعات طيب.. وساعات مادري كيف..
نورة: بس خصلته طيبه لو شو ماسوى
فيصل: بس مب اطيب عني
نورة: لا والله .. وليش يعني ان شاء الله؟
فيصل: لأني تعلمت الطيب من اطيب قلب فهالدنيا
نوره ابتسمت له وعطته مهره عشان يشلها..
....
طلعت مجد من الحمام .. وشافت خلود قاعدة تتعبث بلابتوبها..
مجد: شو تسوين؟؟
خلود: عندج صور وايدة حلوة؟؟
مجد: هيه استخدمهم للفوتوشوب عندي..
خلود: يعني اتصممين بعد..
مجد: هيه ساعات مب دوم.. اكثر شي للكلية يوم اسوي بوسترات وهالسوالف
خلود: ياحظج.. ليتني اعرف هالسوالف.. انا مووول مايخصني..
مجد: انتي اصلا عندج هواية اشك؟
خلود: هيه عندي.. احب السباحه وايد ومشتركه في نادي اروح له دوم..
مجد: الله وناااااااسه
خلود: شو رايج تشتركين ويانا
مجد: هيه بإيدي المجبسة اروح النادي
خلود: هههههههه لا بعد ماتخلصين من ايدج..
مجد: يصير خير..
خلود: فيني رقاد بس مابا ارقد
مجد: ارقدي خل انا بعد ارقد عيل
خلود: بل عليج.. توج ناشه من الرقاد من شوي وتبين تردين ترقدين
مجد: قل اعوذ برب الفلق.. كافي حاسدتني على الإجازة تبين تحسديني على الرقاد بعد
خلود: هههههه.. انزين مجوود خاطري اعرف انتي عندج ربيعه جي وايد وياج
مجد : لا

خلود: شووووووو تمصخرين انتي؟
مجد: صدق.. انا من النوع الي ماحب اوثق بربيعتي واقول لها كل شي.. الربيعه ربيعه عندي.. واحلى ربيعه في حياتي وصدق احبها ومستحيل اخش شي عنها.. حور..
خلود: الله يخليج لها.. عيل انا مامني فايدة بروح
مجد وهي تسحب خلود من ايدها: خلودووو وين سايره تعالي.. انا ماقصدج انتي.. انتي بنت عمي واختي غير عن رباعتي .. يعني بتكونين شرات حور ان شاء الله..
خلود: فديتج والله ودي.. لأني انا نفسي احتاج وحده اكون وياها دوم واسولف وياها .. وزين يوم تلاقينا..
مجد: نشي خل ننزل نقعد عند يدوو.. وخل اخبرج شو سوت بالدكتور امس..
خلود: أكيد هلكته بالأسئلة. ادريبها يدتي..
مجد: شو ماهلكته.. قولي ذبحته.. بس الدكتور كان طيب وحليله..
خلود: ههههههه اكيد طيب دامه تحملها وتحمل اسئلتها..
اليده وهي واقفه مجابلتهم على الدري..: منو هاي الي تحملها وتحمل اسئلتها؟؟
مجد: اقول خلودو انا نسيت شي فوق بروح اييبها وبيي..
جلثم: وين وين.. تعالي لا تروحين فوق ولا شي.. ويلا قولن كنتن ترمسن عن منو؟؟
خلود وهي تحايس بثمها وفيها ضحكة..
مجد: كنا نرمس عن استاذ في الكلية.. يتحمل وحده فالكلاس وايد تسأل..
جلثم: وحده في القلاص؟؟ كيف جي بعد؟
خلود: ههههههه.. يدو كلاس كلاس.. يعني صف في الكلية..
جلثم: شو عرفني برمستكن المايعه الي مالها طعم هذي من وين اتيبنها.. غربلاتكن من بنات.. لا بركتن فيكن..
مجد: خيبه خيبه .. كل ها عشان كلمة كلاس.. مايسوى علينا..
جلثم: خيبه اتخيبكن وتكسر عظام عدوينكن..
مجد: كفايه عظامي الي انكسرت..
جلثم: واعليه لا تذكريني كل ما تذكر اني السبب اتلوم..
خلود: هههه يحليلج يدو.. لا مب بسبتج وليش تلومين.. من حوباتها هاي مجوود .. ماتشوف يدامها..
مجد: صدقها خلود يدتي..
جلثم: انزين.. خل اخبركن.. نشن تلبسن شي ساتر لأن عمتكن وريلها بيونا..
مجد: ان شاء الله يدو..
خلود: انا ماعندي شي البسه..
مجد: لبسي شي من جلاليبي الي في الكبت..
خلود: بيي قياسي انا دبه..
مجد: هو بيي بس بيكون ضيق عليج..
خلود: هههههه.. ماعليه موضه
جلثم: تبين تلبسين جلابيه من جلاليبي..
خلود: ها.. شو.. لا لا لا مشكوره.. جلابيه مجوود اهون..
ومشن بسرعه قبل لا تيودهن يدتهن وتحرطم.. ومجد تضحك على خلود..: اتخيلج تلبسين جلابيه يدوو.. اولا بتطلع قصيرة عليج.. وثاني شي وسييييييييعه.. ههههه شي شي تصدقين
خلود: ماعليه ضحكي اشعليج.. انا اراويج.. مرت احمدوو..
صدت مجد وحاطه ايدها اليمين على خصرها: يهبي يكون ريلي.. هاللي ناقص
خلود: ومنو غيره فالعايله ان شاء الله بتاخذينه؟؟
مجد: مادري اي احد بس ماباه.. صايع بوالبنات.. مايستحي تخيلي انا الي بنت عمه مــ..
وقعدت ترمس وتقول لخلود سالفته امس وهم في الموتر.. وخلود تضحك.. وتلبسن ونزلن عند يدتهن.. خلود لبست لها جلابيه لحور لقوها في الكبت ولاقت على خلود.. بس كانت طويله عليها.. خلود حلوه.. عيونها دائريه وثمها صغير.. وويها دائري .. الي يميز خلود انها مليانه شوي .. تحتاج انها تضعف شوي مب وايد.. بس المتن محلنها..
=-=-=-=-=
وصل عمها حميد ومرته ميثا وأحمد بيت عبدالعزيز ..
عبدالعزيز: حي الله من يانا..
حميد: الله يحييك ويبجيك.. ياخوي.. وسلامات مجد مامن شر ان شاء الله..
عبدالعزيز: الشر ماييك ياخوي.. وتدري شطانة البنات..
ميثا: واعليه يا مجد.. وينها خل اشوفها؟
عبدالعزيز: داخل.. حياج..
وتوه حميد بيلحق مرته وبيدخل وراها واحمد وراهم.. وقف عبدالعزيز بويه أحمد: عوين؟؟
أحمد قفط وافتشل.. : ماشي قلت اسلم على يدتي ومرت عمي..
عبدالعزيز: هههههههه شو بلاك محمر وحالتك لله.. صدق انك ماتستحي تبا تدخل البيت قبل لا تسلم علي..
ارتاح احمد وتقرب من عمه وباس راسه .. ودخلوا سوا.. وكان حميد قاعد حذال امه ولطيفه وميثا قاعدات سوا وحذالهن خلود ومجد..
عبدالعزيز: تغطن يا بنات احمد بيدخل..
تغشن البنات ودخل احمد.. وسار صوب يدته على طول..
مجد: وععععع.. ومنو يكون احمد عشان يدخل..
خلود: نشي خل نسير فوق..
مجد: يلا شو تترين..
خلود: لا خلاص غيرت رايي... سيري روحج
مجد: وليش ان شاء الله؟؟
خلود: نسيتي اني لابسيه جلابيه اطول عني.. تبينه يضحك علي هالهيس..
مجد: هههههههه.. نشي اشعليج منه.. مايطالع..
خلود: احمدوو مايطالع؟؟ اذا احمد مايطالع منو بيطالع..
مجد: ههههه.. يلا خل نروح عيل.. وماعليج منه..


خلود نشت ويا مجد ومانتبهت بغت تخرطف لأن الجلابيه طويله.. يودت ايد مجد المجبسه.. والكل تم يضحك..


واحمد من شاف الموقف وده يموت من الضحك بس ميود عمره..


حميد: خلود يابنتي تحذري.. اشعنه لابسه جلابيه هالطول..


جلثم: تقولك موضه..


عبدالعزيز: امييييييه.. والله وتعلمتي الموضه بعد..


جلثم: شو عرفني.. من قعدت وياهن خبلن فيني بهالرمسات المايعه وتعلمت منهن..


أحمد: أسميهن مخبلين فيج عيل يدو..


سمعته مجد صدت صوب الباب وشافها وضحك وهي مغيضه من تحت الغشوة وتروح عند خلود وهي تحرطم.. وتقلده يوم يرمس وهي تشل الغشوة.. : أسميهن مخبلين فيج عيل يدوو..


خلود: هههههههه انتي شكلج كارهتنه من الخاطر.. مع اني امسات حسيته حبيتيه..


مجد: شوووو احبه.. احب واحد لعاب ويه ماشي شغل..


خلود: هههههه..


------


في بريطانيا.. كانت حور مع عبيد يحوطون في (Lake Side) .. يتمشون وحور كل شوي تصور وتتأمل المناظر..


عبيد: شو رايج؟؟


حور: روعه روعه ..


عبيد: احلى مافي هالحديقه يوم تتمشين الجو الحلو.. كنت ساعات ايي هني ويا كتابي واقعد اذاكر اتصدقين..


حور: والله الواحد تفتح نفسه للمذاكره في هالأماكن..


عبيد: انزين تعالي خل نقعد هني ونتصور..


حور: وكيف ان شاء الله؟؟


عبيد: خليني اطلب من هالريال يصورنا..


حور: لا استحي..


عبيد: يلا عاد..


حور وهي ترفع حياتها وتبتسم..


عبيد راح عند شيبه يتمشى ويا حرمته في الحديقه.. : hello can you take a photo from me and my wife


الشيبه: yes sure..


عبيد تقرب من حور وقعدوا على الكرسي .. وتم يطالعها .. وحط ايده على جتفها وتقرب منها وصورهم الشيبه.. نش عبيد صوبه عشان ياخذ الكيمرا..


عبيد: thank you


الشيبه: any time.. you and your wife look so beautiful


عبيد: hahaha.. thank you ..


وراح عبيد صوب حور وقبض ايدها وكملوا مشيهم في الحديقه.. وقفوا عند البجعات الي في البحيره ... وقعد عبيد يفر لهم أكل.. وحور وياه.. وهي مستانسه

.. وماحست الا بجلب وراها ينبح.. ماعرفت كيف تخش عمرها في حضن عبيد من الزيغه.. وهو يضحك عليها من الخاطر..


حور: عفان الله صدق خياس.. طيح قلبي


عبيد: وين وين.. خل ازخه..


حور: ويا ويهك انزين..


عبيد: احبج والله.. ليتج كل يوم تتخرعين كشخه..


حور: هههههه.. لا لا تستانس وايد..


وراح عبيد خذ له آيس كريم ولحور وقعدوا ياكلون منه ويتمشون.. وتسولف حور طول الوقت وهو يسمعها كأنه اول مره يسولف وياها..


حور: عبيد تدري مفتقدة منو؟؟


عبيد: أكيد مجد؟


حور: لااااااا.. مب مجد.. هاي مشتاقه لها اكيد.. بس انا الي اقصدها احين خوله.. وخليفه.. سوالفهم فنانه والله..


عبيد: صدقج.. لهم وحشة.. عنلاته هالشيبه خليفه.. كان يضحك عليه يومها.. بس انااراويه ..


حور: ولا خولوو عيل شو.. نذله..


عبيد: في سؤالي خاطري اسألج اياه بس مب عارف يمكن تزعلين؟


حور: خير.. اسأل..


عبيد: اممم.. منو مسمي اختج مجد هالإسم..


حور وهي تضحك: هههههههههه.. عادي مب مستغربه من سؤالك.. انا سميتها هالإسم..


عبيد: ليش؟؟


حور: كانت وحده من اعز رباعتي اسمها مجد.. وهي انتقلت مدرسه ثانيه يوم مجد انولدت..وكنت زعلانه.. وعاندت الا نسميها مجد.. وابوي عاد مستحيل يرفض لها شي..


عبيد: ههههه اسميج عيل عنيده.. الله يعيني.. وشو ناويه اتسمين بنتج ان شاء الله؟؟


حور: امممممم.. سارا..


عبيد: اموووت واعرف هالأسامي من وين اتيبينهن؟؟ .. عليج اسامي عجب..


حور: ههههه .. احين اسم سارا اسم عجب.. حلو؟؟


عبيد: لا مب حلو..


حور: وليش شو تبا ان شاء الله..


عبيد: ريم.. ريماني.. ريمووو.. شوفي اشحلات الإسم..


حور: هيه حلو .. خلاص بنسميه بنتنا عيل..


عبيد: ليش جي تقولينها من ورا خاطرج.. جنج الا مجبورة..


حور: ههه ارضى بطلباتك يا سيدي..


عبيد: هيه لا تنسين اني رئيس قسمج فالدوام..


حور: هالبلشه .. خل نروح عيل..


عبيد: ههههههه .. (تم يطالع حواليه .. وصد صوبها وبصوت عالي فالشارع) أحبــــــــــــــــــــــ ـــــــــــــج


حور وهي تتطالع حواليها ومحمره..: فشلتني..


عبيد: احين منو يفهم هني.. واذا فهموا شو يعني... مرتي واحبها واموووووووت عليها..


حور وهي تبتسم له.. : أحبك يا بوفهد..


عبيد: وينه فهودي اتريااااه بفارغ الصبر..


حور: الله يكتب الي فيه الخير..


.............


حور انشغلت هاليومين وهي تتشرى في الستي سنتر (وسط المدينة عبارة عن شارع كله محلات وسوق .. وزحمة ناس).. حور تمت تتشرى هدايا لمجد ومروه ونوره وخلود وامها.. وعبيد مب مقصر عليها بشي.. ومن عقبها شافو واحد من الشحاتين الي هناك.. من عادتهم يقعدون يغنون عشان يعطونهم بيزات على غناهم.. والأخ عبيد صور المغني..



ومجد استانست في اجازتها.. غابت يوم السبت والأحد والإثنين.. وبالثلاث داومت.. سارت الكلية والجبس في ايدها..


عنود: مجووووووود شو مستوي بج؟؟


مجد: يختي شطانه زايدة فيني فرغتها في ايدي..


هند: عنبوج مب شطانه هاي الي تكسر الإيد..


مجد: انزين انتوا رمستوا السير عن الرحلة الي نباها للإمارات مول ولا لا ..


عنود: هيه قال بيرمس السوبرفايزر.. عاد نحن وحظنا..


مجد: اففف مابا اروح بإيدي المكسوره فشيله..


هند: لا ماعتقد بيودينا خلال هالفتره.. لأن الرحلات عادة بعد رمضان ..


مجد: احسن بكون فجيت الجبس وقتها..


عنود: ماتشوفين شر ان شاء الله..


مجد: الشر ماييكم..


وهي قاعدة وصل لها مسج طلعت تليفونها عن السير يشوف لأنه ممنوع في الكليات والجامعات انهم اييبون المبايل.. جنه عيال مدارس.. وكان واصل لها مسج من خلود..


خلود: سمعت اليوم اميه تقول بنسير المزرعه .. شو رايج اتيين..


مجد اطالعت المسج ودها تروح بس خايفه من ابوها.. ردت عليها بمسج..


برمس ابوي اذا وافق بيي..


خلود ردت عليها بسمج..


حاولي وياه بلييييييييييز


وردت مجد التليفون في شنطتها وقعدت تشخبط فالورقة الي يدامها.. تذكرت صورة خلود الي خذتها.. طلعتها من الشنطة وحطته بحيث ساندته على الشنطة بحيث السير مايشوف..


عنود: مجوود.. منو هالغاويه؟ حور؟


مجد: لا وين حور اكبر عنها.. هاي بنت عمتي.. خلود..


بهتت عنود وصدت صوبها.. : انا صار لي فوق ال 6 سنين وياج.. عمري ماسمعتج تطرين بنت عم ولا بنت عمه.. هاي اول مره ترمسين عنها..


مجد ابتسمت لها..: خلي المواجع فالقلب دخيلج..


عنود: شو السالفه..


السير شافهم وعطاهم ذيج النظرة الي قفطتهم.. وتموا يضحكون..


عنود: الله يعين الي بي دي إيه.. أكيد زيروو..


مجد: هههه عادي دامج قاعدة وياي اتوقعي اي شي..


وقرروا يسكتون.. الا مجد الي ماتحب هالكلاس وتحس بالملل فيه.. يودت القلم وبدت ترسم صورة خلود.. وكل شوي تمسح وترد ترسم.. خلص الكلاس وطلع السير وكان عندهم بريك.. عيت تطلع من الكلاس.. وقعدت روحها ترسم الصورة وتحدد ملامح خلود بشكل رهيب وحلو.. سمحت صوت وحدة تحنحن عند الباب صدت صوبها تغيرت ملامح مجد.. اععع شو يابها هاي احين.. فايجة اجابل هالويوه انا..


سميه: اشحالج شيخة مجد..


مجد وهي تأفف.. : بخير الحمد لله..


سميه: هيه انتي.. ليش جي ترمسيني من طرف خشمج.. حشمي..


مجد: شوفي سمووي.. يوم انتي بتحشمين نفسج من هالهباب الي مسوتنه بعمرج بحشمج..


سمية: وليش شو مسوية مب عايبتنج..


مجد وهي تتطالعها بتحدي.. وتعلي صوتها: لا مب عايبتني.. عندج مانع..


سميه : اصلا انا الي ماعندي سالفه اضيع وقتي وارمس وياج.. وين فطوم؟؟


مجد: اتشوفينها في الكلاس؟؟


سميه: لا..


مجد: خلاص يعني انا ماعرف وين.. ولا تبيني قبل لا تظهر تكتب لي وين بتسير وعالساعه كم ..


سميه وهي تتطالع مجد بنقمه وتمشي عنها وتدعم هند وعنود في دربها..


عنود: عمى.. ماتشوفين..


تقرب سميه من عنود وتقبضها من عباتها وتيرها: ايه انتي لا تر..


تقاطعها عنود وهي تفج ايد سميه عنها بقوة وادزها على اليدار وهند تضحك.. ويمشون عنها ويدخلون الكلاس عند مجد..


عنود: هاي يت تسأل عن فطوم؟؟


مجد: هيه كالعادة.. جنه ماعندها وحده غير فطوم..


هند: يختي هاي وايد مستريله.. ولا تقبض عنودو من عباتها وتيرها.. بس عنود ماقصرت فيها..


عنود: المشكلة انها تتحراني بسكت لها او اني شرات هالبنات الي يخافون منها .. تخسي وحده من اشكالها تخوفني..


مجد: الله يعافينا منهم.. مادري ليش البنات جي يسون في اعمارهن.. شو الفايدة يعني..


هند: مصاخه.. ماشي مذهب..


عنود: اموووووت واعرف شي واحد.. اهاليهم مايشوفونهم..


مجد: كيف عايشات حياتهم.. حلاتج وانتي بنت ورقيقه .. مب جي شرات ماهي تتصرف.. جنها واحد من الشباب..


هند: الله يستر بس.. وياما سمعنا بلاوي من هالبنات الله يستر من الي ياي..


مجد: صدقج.. والهبله فطوم الي تماشيها..


عنود: والله اني امسات سايره بيت فطوم بس عشان اقول لها عن عمايل هالإنسانه.. قعدت اقرا في راسها ووعدتني تبتعد عنها شوي.. والله عالم صادقة ولا لا..


مجد: يلا خل نسير نلحق على الكلاس قبل لا نتأخر.. وينحط لنا ليت..


هند: ههههه.. انا من كثر الليتات عندي. تقولين عرس..


تموا يضحكون وشلوا ملفاتهم وساروا صوب الكلاس..


راحت مجد الكلاس وقعدت تتطالع المحاضر بس بالها بعيد.. يوم السبت موعدها للمستشفى.. يعني بتشوفه.. حست ان ودها تشوفه ويسدها انه شخصيته عايبتنها ولا فكرت في شي اكثر من الأعجاب.. ابتسمت ورفعت راسها تتطالع السير وهو يشرح..

مروه: خالد ضحكها عشان الصورة..


خالد: شو يعني تبيني اغدي مهرج عشانها..


مروه: ههههههه.. هيه يلا عاد عشان الصورة..


خالد: بابا إيماني.. حبيبي.. شوفيني..


مروه تمت تتأمل ريلها كيف يلعب إيمان ويسوي لها حركات ويبتسم .. ابتسمت وفي خاطرها مستانسه ان خالد يحب بنته وحزينه على حال نوره وكيف اهل ريلها يعاملونها لأنها يابت بنتين..


خالد: هاي بنتج ماعرف لها.. ماتضحك لي..


مروه صدت صوبه .. : انت ماتعرف .. خوز انا بلعبها



وقعدت مروه تلعب إيمان لغايه ماضحكت وصورها المصور في نفس الوقت.. والصورة طلعت رهيييييييبه.. ماشاء الله عليها تجنن.. الله يحفظها..






خالد: شوفي اللوتيه تضحك لأمها .. وابوها تمد له البوز..


مروه: معلوم انا امها تراني..


خالد: وليش انا مب ابوها يعني..


مروه: ههههههه.. ابوها ونص..


خالد: ههههه ونصين بعد.. هاللي ناقص مب ابوها اونه..


.. .. ..

في البيت


خلود ومجد كانو قاعدين عند يدتهم يسولفون..


جلثم: مجوود اشو ها الي راسمينه على إيدج..


مجد: هههه.. هاييل بنات الكلاس موقعين لي على ايدي..


جلثم: ويديييه.. ماحيده دفتر ولا جيك عشان يوقعون عليه.. شو هالمنكر بعد..


مجد: هههه شو عرفني عنهم..


لطيفه: أمييه أم حسين يارتنا يايه..


جلثم: خلاص عيل انا احين بسير بقعد عندها... وانتن لا تقعدن تحشن في الخلق هب زين..


خلود: هههه مارمسنا عن حد.. بس عن عنود.. ومرت عبدالله .. ومرت خالي.. وفطوم.. و..


جلثم وهي تخزها بالعصا.. : عنبوج كل هاييل حاشه فيهم.. مانسيتي حد..


خلود تمت تضحك على يدتها ومجد بعد.. نشن وسارن صوب غرفتهم عشان يسولفون على راحتهم..


مجد: تدرين خلودوو لولاج جان انا ميته من الضيج في هالبيت..


خلود: انا بعد والله من قبل لا اعرفج كنت وايد اتضايق في البيت من الملل.. وتدرين عاد امي لو الموت ماتخليني اسير بيت وحده من ربعي.. تسوي لي تحقيق منو ها.. بنت منو... من وين عرفتيها.. ومادري شو.. تقولين بيخطبونها .. خخخخخخ


مجد: لازم ترا نفس الشي امي .. لولا خوفهم وحرصهم ماسوو جيه.. المهم خلنا من هالرمسه.. خلودوو خاطري اسير مركز ابن بطوطه .. وايد يمدحونه..


خلود: ويا ويهج تبين تروحين بإيدج المجبسه هاي..


مجد: شو يعني عادي.. طاف مايهمني.. ابا استانس.. وينج يا حوروو.. لو قلت لها على طول بتوديني..


خلود: ههههههه.. افا وانا وين سرت..


مجد: جب جب.. حالج من حالي ترا..


خلود: هههه صدقج.. انزين كيف نروح.. فكري..


مجد: خليني افكر..


خلود: اممممم.. شو رايج ارمس نوروو اختي تودينا ويا ريلها..


مجد:لا لا لا استحي..


خلود: انا بعد استحي بس شو الحل في رايج..


مجد: شوفي انا برمس ابوي جان بيودينا هوه..


خلود: يلا نشي شو تترين..


مجد: تعالي وياي..


خلود: ها.. لا اخاف دخيلج..


مجد: لا تخافين ابوي طيب والله.. يلا عاد تعالي..


خلود: بنش والله يستر..


نشت مجد ويا خلود وساروا الميلس عند ابو مجد .. الي كان يقرا جريدة..


مجد: السلام عليك ابوي..


رفع راسه عبدالعزيز ابتسم لهم وصك الجريدة.. : هلا والله بالغلا.. تعالي حذال ابوج..


مجد يلست عند ابوها ولصقت فيه وقعدت تتدلع له.. : اوه صدق نسيت .. خلود بنت عمتي برع بعد..


عبدالعزيز: وليش ماتدخل..


مجد: تستحي..


عبدالعزيز: تعالي خلود يابنتي.. افا تستحين من خالج..


دشت خلود وهي تبتسم وقعدت حذال مجد..


مجد صدت صوب ابوها وهي تحايس بثمها ومب عارفه كيف تبدأ..


عبدالعزيز: الحلوة شي في خاطرها صح؟؟


مجد: المشكلة انك فاهمني ماقدر اخش عنك شي..


عبدالعزيز.. : ههههههه.. بنتي تراج لازم اعرفج... قولي الي في خاطرج..


مجد: ابوي انا وخلوود اليوم مخلصين دوامنا بسرعه واحين توها الساعه 5 العصر.. خاطرنا نطلع اليوم .. ملانين يعني شوي..


عبدالعزيز ابتسم لهم: وين تبون تسيرون؟؟


خلود وهي عرضت ابتسامتها.. واستانست من الخاطر..


مجد: ابن بطوطه مول..


عبدالعزيز: هذا الي في شارع شيخ زايد..


تهز مجد راسها بمعنى هيه..


عبدالعزيز: بس ابويه ها وايد بعيد وانا الصراحه ميهوود اليوم ماروم اوديكن..


نزلت راسها مجد محبطة .. وخلود ساكته بس انحبطت شراتها..


عبدالعزيز: يا الله.. كله ولا اني اشوف هالحزن في ويوهكن.. تدرون شو..


مجد رفعت راسها: شو؟


عبدالعزيز: برمس احمد ولد عمكن يوديكن واتكونن وياه..


فجت مجد عيونها وخلود اكثر عنها.. نشت مجد وحطت ايدها على راس ابوها: ابوي.. انت من صدق ترمس..


عبدالعزيز: ههههه.. شفيج.. هيه من صدق.


صدت مجد صوب خلود: امبوووووووسيبل.. أنا أظهر ويا أحمد ولد عمي؟؟


عبدالعزيز: هيه ابوي شو فيها.. تراه ولد عمج شرات اخوج..


مجد: بس ابوي ماحيدك تسمح لهالشي... أو بالأحرى انا نختلط ويا عيال عمومتنا.. خصووووصا الأولاد..


عبدالعزيز: مجد ذاك قبل مادري شو الي ياني وحرمتج اني وحور من عيال عمومتكم.. بس احين وعيت بغلطتي ومابا احرمكن من سعادتكم.. وترا من بعد عيني منو بيشيلج في عيونه وبيحط باله عليج.. ترا من بعد عمج ولد عمج يا مجد.. انا الله مارزقني بعيال من عقبج ولا رزقني بولد قبل حور.. حور تطمنت عليها وربي رزقها بريال والنعم فيه .. وترا ابوج كبر.. ومابقى من العمر اكثر من الي راح.. وانتي كبرتي وابا اني ارتاح ان في ناس بيديرون بالهم عليج من بعد عيني يا مجد.. وانا بعدتج من هالناس الي بيدارونج من بعدي.. واحين حسبت حساب غلطتي وابا اصححها..


ادمعت عين خلود ومجد.. ونشت خلود حست ان قعدتها مالها معنى.. وسارت ترمس امها عن الطلعه .. وطبعا ام خلود ماعندها مانع انها تظهر ويا ولد خالها (أحمد) دامهم مابيكونون روحهم بس بشرط يطلع علاوي وياهم.. ووافقت خلود

مجد نشت وحضنت ابوها وباست راسه: ربي يطول بعمرك يابوي لا تقول هالرمسه.. انت الي بتربيني وبتكبرني محد غيرك..


ابتسم لها عبدالعزيز وباس راسها: يلا يا بنتي سيري تزهبي برمس ولد عمج خل ياخذج ويا خلود ويطلعكم ويونسكم..


مجد: اممم انزين بس انا استحي منه..


عبدالعزيز: شو قلنا تراه شرات اخوج.. وانا ماعندي مانع تظهرين ولا تقعدين وياه دامكم مب مختلين روحكم.. يعني تقعدون في مكان عام ولا يمعه اهل.. وطبعا ماتتمادين وياه وتقولين اخويه خلاص مابتحجب يدامه ولا تعلين صوتج وتضحكين.. انا ماحب هالحركات..


مجد: لا افا عليك يابوي.. لا توصي.. تربيتك انا


عبدالعزيز: وانا واثق.. وخلني ارمس احمد وتزهبي انتي وخلود..


مجد: تسلم ابوي..


وطلعت مجد وهي مستانسه لأنها بتطلع.. ولو انها ماحبت انها تظهر ويا احمد.. بس وافقت غصبن عنها عشان تطلع .. ماشي حل ثاني..


عبدالعزيز اتصل فأحمد وطلب منه.. الي ماصدق ووافق على طول.. وفي خاطره بعد استغرب من انه عمه سمح بهالشي..


ميثا: يما احمد كنت ترمس منو؟


أحمد: عمي عبدالعزيز.. ليش؟؟


ميثا: لا شفتك سرحت.. فقلت شي فيك... اشحاله عمك.. عساه بخير؟


أحمد: بخير الحمد لله.. اميه .. تدرين عمي شو طلب مني؟


ميثا: شو؟


احمد: قالي مجد وخلود يبن يظهرن .. ويباني اوديهن..


ميثا فججت عيونها: احين خلود عادي ياما صارت انت ظهرتها هيه ونوره.. بس مجد؟ معقولة عبدالعزيز بنفسه طلب هالطلب؟


أحمد: وانا هالي مخليني اسرح ومستغرب..


ميثا: سبحانه الي يغير ولا يتغير..


أحمد: شفتي كيف زواج عبيد غير كل موازينهم..


ميثا: الحمد لله .. وترا مجد روحها المسكينه ماعندها اخو.. ومنو بيقوم بواجب الأخوه وياها غيرك..


أحمد: يالله زين يوم غير رايه عمي.. يلا انا ساير اتزهب عشان امر عليهم واوديهم.. شي تامريني؟


ميثا: سلامتك.. حط بالك عليهن اميييه..


أحمد: افا عليج.. خواتي هن.. كيف توصيني عليهن..


ميثا: ادريبك.. يالله امي لا تأخر عليهم..
ونش احمد سار غرفته وبدل وكشخ آخر كشخته.. لبس كندورة بنيه وسفره بيج وعدل شعره بحيث يطلع شوي من الغتره ورا.. وتعطر وتدهن وظهر...
مجد وخلود كانن جاهزات.. ولابسات الشيله يترين احمد يوصل.. مجد كانت لابسه تنوره جينز وبودي وردي.. وعباتها مسكرة طبعا.. وشيلة فيها تطريز على شكل فراشه.. وخلود كانت لابسه تنورة سودا وبودي أحمر وشيلتها عليه رسم بالأحمر .. كانو طالعين حلوين مع انهن ماحطن شي في ويوهن غير جحال وجلوز..
عبدالعزيز: يلا نشن احمد يترياكن برع..
مجد من سمعت طاري احمد تأففت وخلود تضحك عليها.. : يالله بتحسين فيه يوم اقولج مادانيه ..
مجد: مايحتاي اصلا امبوني مادانيه..
خلود: اقول.. لو ماظهرنا مب كان احسن..
مجد: لا.. مب احسن.. بس المهم عندي احين ان هاي اول واخر مره بنظهر ويا هالإنسان..
خلود: هيه انا اقول جي بعد..
وتغشن وطلعن من البيت وركبن ورى وتم عبدالعزيز يوصي احمد ومن بعدها ركب الموتر..
أحمد: مرحبا بنت العم.. وبنت العمه.. اشحالكن؟
مجد وخلود من غير نفس: بخير..
أحمد: انزين وين تبن تروحن؟؟
خلود: بالأول مر على علوو اخوي امي تباني اوديه..
أحمد: لا حووول.. لازم هذا الياهل ايي ويانا..
خلود الود ودها تفره بشي بس ساكته.. : هيه لازم.. واخويه مب ياهل..
أحمد: اوه اسف نسيت ماترضين على اخوج..
مجد وبصوت واطي تساسر خلود: دمه ثجيل كيف بنتحمله..
خلود: حسيتي فيني احين..
أحمد: اخبركن تراكن مب روحكن في الموتر..
خلود متعوده شوي على احمد من جي تقدر ترد عليه : اسرار بنات..
أحمد: هيه نسيت اسف..
رن تليفون احمد في هالوقت..
خلود وهي تأشر لمجد: وحده من الربع.. هههه..
أحمد من شاف الرقم اختبص شوي.. لأن خلود ومجد موجودين فكيف بيرد.. رد من عقبها : الووو.. مرحبا بو الشباب..
مجد وهي تتطالعه بنقمه من تحت الغشوه.. بو الشباب اونه.. ايا العيار..
أحمد: لا اسمح لي ماروم امرك اليوم تدري اليوم مرتبط ويا الأهل شوي..
حنان: حبيبي عاد والله ولهانه عليك..
أحمد: خلاص يالله عيل مب مشكلة..
خلود ودها تغلس عليه بأي طريقه.. تقربت من السيت شوي وعلت صوتها عشان الي في الخط تسمعه وتغايض احمد.. : اقول احمد افتح الإف إم.. ملل..
حنان: تقول ويا الأهل وانا اسمع صوت وحده..
أحمد وده يفر التليفون على راس خلود ويجتلها.. ومجد تضحك من الخاطر..
خلود وهي تحاول ترقق صوتها شوي.. : أحمممممممممد يلا عاااااد بند الخط وشغل الإف إم..
أحمد: خلاص بو شهاب برمسك عقب ان شاء الله.. مع السلامه
حنان وبزعل: بس احمـ..
قطع الخط احمد في ويهها قبل لا تكمل كلامها.. وصد ورا وهم واقفين عند الإشاير.. : انتي ماتعرفين تتريين لين ما ابند من ربيعي وترمسين..
خلود: اوه كنت ترمس.. سوري مالاحظت..
احمد: لا والله.. مره ثانيه ركبي سماعات في اذنج..
خلود: هيه يبالي عشان اسمع بوالشباب الي ترمسه..
فهم احمد خلود شو تقصد من رمستها وتم يطالعها بغيض.. ومجد شافت ان الإشاره احمرت.. واحمد مب منتبه..
مجد وبصوت خجول: الإشاره اخضرت..
من سمع احمد صوتها صد صوب الإشاره وحس بشي غريب.. هالصوت فيه دفا غريب.. خسج الله يا خلود خليتيني انسى ان هالبنت قاعده ويانا.. وصلوا عند بيت خلود وركب علو يدام..
علي: السلام عليكم..
خلود: وعليكم السلام.. اشحالك اخويه؟
علي: بخير.. ومنو الغرشوبه الي حذالج؟
مجد تمت تضحك.. : بنت خالك.. مجد..
علي وهو عاقد حياته: اي مجد؟
انحرجت مجد وقتها وحست بالموقف الخايس الي انحطت فيه بسبب ابوها.. علي ماعاد يعرف ان له بنت خاله اسمها مجد..
أحمد: اخت حور .. الي عرست من فتره..
علي: هيييييييه.. هلا والله ببنت الخال.. اشحالج؟؟
خلود: هههههه بلاك ترمس جنك ريال عمره 20 سنه..
علي: شو تحريني ياهل انتي.. طاعوو هذي..
أحمد: قلت لج مايبانا انييبه ياهل.. قلتي لا اخوي ريال..
علي وهو يقرب من احمد: عندك مانع..
احمد وهو يطالعه بطرف عينه: لا ابوي ماعندي مانع.. ريال ماقلنا شي.. بس ايلس مكانك..
يلس علي ورفع ريله وسانده على مقبض الباب..
أحمد: انت ايييه.. وين تحرى عمرك يالس لي هاليلسه..
علي: كيفي.. كل الرياييل يقعدون جيه
ووتموا طول الدرب مجد وخلود يسولفون بهدوء وأحمد يحاول يسمع بس مب قادر.. بس طول الوقت يلاحظ حركات مجد ويبتسم..
علي: انت مينون؟
أحمد: ولعنه.. ليش؟
علي: كل شوي تبتسم ويا عمرك؟؟
أحمد: لاحوووووول.. حرام ياخي الواحد يفكر بينه وبين نفسه..
علي: هيه حرام..
مجد وهي تهمس لخلود: أكيد تذكر بوالشباب.. هههههه..
خلود: هيه اكيد بعد منو غيره.. هههههه..
أحمد: اخبركن.. وصلنا ماتبن تنزلن ولا تبن تكملن سوالف في الموتر..
وشوي الا يسمع صوب الباب ينفتح وينزلن ويمشن صوب البوابه وعلي يتحرطم وراهم..
علي: ايه انتن.. صدق ماتستحن.. بنات اخر زمن..
خلود: صدقه احمدوو هذا الواحد ماييبه..
مجد: اشعليج منه طنشيه وخلينا نمشي..
أحمد بسرعه بند الموتر ولحقهم ودخل وراهم..
أحمد: انتوا ايه اتريوا انزين ماشين رواحكم جنكن الا يايات رواحكن ..
خلود: لا حووول ولا جنه كل وحده فينا طول نخلة.. هب يهال نحن..
أحمد كان وده يصفعها.. كل مايرمس هاي توقف بويهه وترد عليه.. ومجد ساكته وده مره مجد الي ترمس وياه.. ومشوا .. ومجد وخلود تموا يطالعون المبنى من داخل وكل شوي يدخلن محل ويطلعون بلا مايشترون شي..
أحمد: انتوا ايه دوختوا راسنا.. ماخليتو محل ماطبيتوه.. تم شي.. ولا تتشرون بعد..
مجد: أحمد انزين مايستوي نشتري شو مانشوف لازم شي يدخل الراس..
أحمد من سمع صوت مجد بهت ماقدر ينطق بأي كلمة.. رقيقه هالبنت وصوتها صافي وناعم.. يدخل الإذن ويتخلخله ويسبب له شي غريب في جسمه.. سكت وفي لحظه رفع راسه انصدم باللي شافه.. لاحوووول ها وقته يعني ودرت كل السناتر حضرتها ومايت الا هالسنتر.. الشرده نص المريله.. : علو تعال..
ماعطى مجال لعلي يصد الا سحبه ودخل محل رياضه كانو مارين حذاله.. عشان البنت ماتشوفه... كانت وحده من الي يرمسهن.. منيره.. وهي مع خلود في الجامعه.. من شافتها خلود..
خلود: اوهووو هاي شو يابها هني..
مجد: منو؟
خلود: اششش يايه صوبي..
منيره طبعا عرفت خلود ليش إن الغشوة كانت خفيفه شوي وتبين ملامح خلود ويوم تقربت من خلود تأكدت انها هيه وسلمت عليها..
منيره: هلا والله خلودووو شو يايبنج هني؟
خلود: والله الي يابج يابني.. يايه احوط واتشرى.. عندج مانع..
منيره وهي تتطالعها بنقمه: لا ماعندي مانع.. ومنو الحلوة الي وياج..
خلود: بنت خالي.. مجد..
مجد: هلا اشحالج؟
منيره : الحمد لله انتي اشحالج؟
مجد: الحمد لله..
منيره: يلا عيل اخليكم بسير .. اشوفج باجر خلود..
خلود: اوكي..
وراحت منيره عنهم.. وصدت خلود وراها وشافت ان أحمد وعلي محد.. ضحكت..
مجد: ابييه هالإثنين وين.. لا يكون ضعنا..
خلود: انا بقولج شو السالفه.. سلمج الله منيره هاي وحده من صيدات احمدوو.. دوم ترمس عنه.. ومن جي الأخ اختفى..
مجد من سمعت هالسالفه وخصوصا انها شافت منيره ولاحظت اختفاء احمد اكد لها هالمعلومه.. تضايقت في خاطرها ان لها ولد عم بهالشكل.. وكرهته زود.. صدت وسارت صوب المحل وخلود تمت واقفه اتصلت في علي.. الي طلع لها هو ويا احمد من المحل ومشوا صوبهم..
علي: وين مجد؟
خلود وهي تتطالع.. : توها كانت هني.. وين سارت هاي..

أحمد: انتي ليش ودرتيها روحها..
خلود: انت ماتفهم.. اقولك توها هني حذالي.. لاحووول.. ها هذي في بودي شوب..
وراحت صوبها.. : ايه انتي ليش تروحين وماتقولين لي؟
مجد: شفتج ترمسين في التليفون قلت بدخل هني وبعدين ماسرت مكان بعيد..
خلود: هيه يلا عيل..
وبعد ماكملوا شرواتهم.. قالهم احمد انه عازمهم على مطعم حاتم..
مجد: اسفه انا ابا ارجع البيت
خلود: مجوود شو الي غير رايج.. مب انتي بغيتي هالطلعه..
مجد وهي تتطالع احمد بنقمه من تحت شيلتها وبصوت جاف: كيفي.. تعبت.. فيها شي..
احمد استغرب من تصرفها.. : بس هاي اول مره اعزمكم فيها بتردوني..
علي: يلا عاااد بنتم واقفين في النص يدام الخلق نتشاور..
خلود: مجوود طنشي السالفة الي قلت لج عنها.. وخلنا نستانس..
وبعد لحظة سكوت مشت مجد صوب حاتم والكل مشى وراها..
أحمد وهو يقرب من خلود: شوفيها؟
خلود مشت عن احمد وسارت صوب مجد ولا ردت على احمد.. اوهووو انا بعد غبي ماعرف اسأل منو..
وقعدوا وطلبوا لهم عشا .. مجد وخلود قعدوا حذال بعض.. وكانو رافعين الغشوة طبعا عشان يقدرون ياكلون السلطة.. (كانو قاعدين على زاويه بعيده شوي عن الناس.. ) خلود كانت مجابله احمد وعلي مجابل مجد.. احمد كان يراقب عيون مجد الي مليانه قهر وغضب.. وده يعرف شوفيها بس متردد يسأل .. وصل العشا وبدوا يتعشون الا مجد الي تمت تاكل شوي شوي .. واخر شي ماقدرت تكمل اكلها..
أحمد: مجد ماكلتي شي.. اذا مب عايبنج بطلب لج شي ثاني..
مجد: لا شكرا شبعانه..
احمد: مجد شوفيج؟؟ شي مضايقنج.. حد ضايقج هني.. ؟
خلود تعمدت ترمس عشان تحسس احمد بالموضوع.. : لا بس من سلمنا على منيره ربيعتي وهي مادري بلاها..
أحمد من سمع ان منيره ربيعة خلود انصدم.. رفع عينه: مم.. ممنيره.. ها.. منو منيره؟
رفعت عينها مجد وعطت احمد النظره الي تفهمه انها عارفه كل شي.. وعلي شرات الأطرش في الزفه ياكل ولا عليه بالي يصير حواليه.. عايش حياته الريال.. اما احمد فانصبغ لونه من شاف نظرة مجد له.. حس انها عرفت عنه.. ماكان وده ان مجد تدري عنه وتحط في بالها فكرة شينة عنه..
خلود: منيره ربيعتي شو بلاك.. ماسمعت .. ولا تباني اقول اسمها بالكامل..
أحمد: بس انتي.. عنبو مب طول لسان عليج..
علي والأكل في ثمه: لحظه.. شو بلاها اختي؟؟
خلود: انت خلك بأكلك وكمل الأكل في ثمك بعدين ارمس..
وفي هاللحظه سمعوا واحد يسلم عليهم..
جاسم: السلام عليكم..
أحمد رفع راسه وشاف جاسم.. ولد عم خلود.. الي من شافته تشققت من الوناسه وقعدت ترتب شيلتها اما مجد فعلى طول تغشت..
أحمد: هلا مرحبا جاسم.. حياك اقرب..
جاسم: لا ماعليه بس شفتكم قلت اسلم انا ياي ويا ربيعي..
علي وهو يطالع جاسم وياكل: شوف تبا تعال كل ماتبا برايك..
جاسم: هههههه كمل الأكل في ثمك بعدين ارمس.. ههههه.. وماعليك تراني ياي اكل هني.. اوه خلود.. هلا بنت العم اشحالج؟
خلود وهي محمره من الحيا: الحمد لله بخير.. انت اشحالك؟؟ واشحال عمو وعمي؟
جاسم: بخير ربي يسلمج.. انزين عيل برايكم بسير عند ربيعي..
أحمد: وينه خل اسلم عليه؟
جاسم: يعقوب جان تعرفه؟
أحمد: هييييه يعقوب(الفلاني).. اعرفه شقايل ماعرفه..
وسارو أحمد ويا جاسم صوب يعقوب يسلمون عليه..

** جاسم ولد عم خلود.. عمره 22 سنة... مخلص دراسته في المعهد البترولي ويشتغل في الجزيرة.. جاسم اسمراني شوي .. لكنه حلو ومملوح.. مغرور شوي لكن قلبه طيب وحنون وايد على اهله وخواته.. ومايرفض لهم طلب.. طويل شوي وخدوده مغززه شوي وحياته مرسومين رسم ومحلينه بزياده.. **
أحمد: يلا خلصتن؟
علي: لحظه بعدني..
خلود: علوو فضحتنا تسلم على جاسم وبثمك اكل كيف جيه؟
علي: شو اسوي مايا صوبنا الا وانا اكل شو يعني تبيني مارد السلام عيب..
مجد : عفان الله شافني ولا قال السلام عليكم..
أحمد بإنفعال: واشله يسلم عليج.. يستوي لج ولا يستوي لج؟؟
مجد: شو بلاك مشتط علي.. ماقلت شي انا.. وتراني كنت متغشيه عنه الا يسلم..
نشت مجد وهي مغيضه شاله شنطتها .. وطلعت خلود وراها وناسيه تتغشى وبدون لا تنتبه كانت بتخرطف من العيله.. فمن رفعت راسها جبلت جاسم.. إلي اشر لها بإيده تغشي.. عاد منو ايود خلود من الوناسه.. انطرت من الفرح.. وتغشت وخطفت صوب مجد ويودتها من ايده.. : وافديته يغار علي.. قالي تغشي..
مجد: متفيجه.. من حلاته عشان يغار..
خلود: مجوود عن الغلط.. تراه القلب..
مجد: ايه انتي مينونه .. من متى واحمد صار القلب..
خلود: هههههههه انتي تطرين احمد؟؟ .. انا اطري جاسم ولد عمي..
مجد: قولي جي من الأول..
أحمد وعلي مشوا بسرعه بعد مادفعوا ورا خلود ومجد يادوب يلحقون عليهم...
علي: عنلاتكن.. ترين خل نوصل لكن..
أحمد: عازمنكن على فلم يديد في السينما شو رايكم؟
مجد: تعبانه والوقت تأخر وراي كلية باجر.. ابا ارجع البيت..
خلود وهي ماده بوزها وتغز بمجد: يلا عاد فرصه..
علي: ايه انتو ماتبون انا ابا.. من الصبح ونحن ندور عشانكم.. خل ندخل السينما عشاني..
أحمد: محد عزمك انت.. انا اعزم بنات العم..
مجد تمت ساكته ومشت صوب السينما وهي ساحبه خلود وراها.. جاسم كان طول الوقت يراقبهم من المطعم ليش انه مجابل السينما.. ومستغرب منو الي ويا خلود .. لأنه مالاحظها غير الحين يوم شاف خلود تمشي وياها.. ماظني تكون نوره .. انا اشعلي لا شفت خلود بسألها خلاف..
يعقوب: بو حمود.. في شو سرحان..
جاسم: ها.. ماشي..
توه بيصد يعقوب ورا.. الا جاسم يهزبه: لا تصد.. هلي وراك..
يعقوب: قول جيه انزين من الأول..
ومشوا كلهم صوب السينما وخذ احمد التذاكر ومجد كانت تتطالع اعلانات الأفلام اليديده.. وخلود دخلت ويا علي مانتبهت ان مجد بعدها واقفه.. تقرب احمد منها..
احمد: مجد انا اسف على اسلوبي.. ماكان قصدي ازعلج بس مادري كيف حسيت ماحبيت واحد غريب عنج يشوفج..
مجد صدت صوبه وتمت تتطالعه ودها تقول له بالي في خاطرها بس مب قادره.. ماتحب حتى انها تلاسنه وترمسه.. : وين القاعه..
أحمد نزل راسه محبط.. : تعالي وراي..
مشت مجد وراه وحاز في خاطرها انها تعامله بهالطريقه بس مجبورة.. وراحوا القاعه ودخلوا وكان ظلام.. ومجد خايفه لأن الدعايه توها بادية والليتات مصكرة.. وكانت تمشي يدام احمد.. وهو يطالعها كيف تخطي خطواتها بحذر على الدري.. ودخلت ويلست حذال خلود.. وبين خلود وأحمد كان علي.. الي كان ياكل فراخ ..
أحمد مد ايده بياخذ عنه الا يضربه على ايده: سير خذ لك واحد لك..

أحمد: اخبرج خلود.. هذا على منو طالع زطي.. ماحيد لا عمتي ولا عمي زطي..
خلود وهي تضحك: الله العالم
وتموا يتابعون الفلم وأحمد طول الوقت وباله عند مجد.. حاز في خاطره انه زعلها ماكان وده بهالشي.. ومن بعد ماخلص الفلم ركبوا الموتر وكلهم سكووووت.. وخلود ماحبت ترمس مجد في الموتر لأنها تدري بتلبق عليها وبتحرج.. وأول شي نزلوا مجد البيت.. ومن بعدها راح احمد يوصل خلود وعلي.. وتوها خلود بتنزل..
أحمد: خلود كلمي مجد واتأسفي لها عني..
خلود وهي تتطالعه تبتسم: على شو ولا على شو بتتأسف يا احمد..
استغرب احمد من رمستها وماعطته مجال خلود وبندت الباب..
علي: شو السالفه؟؟
أحمد: انت خلك في بطنك ومالك شغل..
علي:خخخخ يلا شكرا على العزيمة..
وسار احمد البيت والضيجة ضاربه فيه.. ويفكر في رمسة خلود.. معقولة تقصد منيره.. يعني خلود تعرف عني؟؟ وشل تليفونه واتصل في منيره.. يمكن يقدر يعرف شي منها..
أحمد..: هلا وغلا..
منيره: هلا ملاييييييين بالحلا كله.. اشحالك؟
أحمد: بخير يعلج بخير.. انتي اشحالج؟
منيره: تمام .. مشتاقه لك .. وينك ماتتصل من يومين
أحمد: شو اسوي شوي مربوش ويا الأهل من عرس اخوي وسافر وانا مرتبش ويا الأهل.. وغير الكلية تدرين الدوامات وجي..
منيره: الله يعينك.. بس ولهت عليك تدري..
أحمد وهو يتحايس بثمه وحاس عمره طفران منها.. : انزين.. ماقلتي لي شو سويتي اليوم وين سرتي.. تراج هاليومين ماقمتي تخبريني شي مووول..
منيره وبدلع: حبيبييييييي.. مب جي.. بس انت ماتسأل وانا عاد اترياك تسأل عني عشان اعرف انك مهتم فيني.. وبعدين انا اليوم سرت ابن بطوطه ويا امي وابوي (جذابه طبعا) .. عاد هناك اشوف لك وحده اففففف مادانيها..
أحمد بدا يمسك طرف الخيط الي يباه.. ومتجاهل سالفة انها جذبت عليه: منو الي ماتدانينها..
منيره: وحده وياي في الCollege وايد سخيفة ودمها ثجيل من الخاطر..
أحمد: أي وحده فيهن؟؟
منيره: خلود (الفلاني).. ماقلت لك عنها.. ساعات يوم ايلس ويا رباعتي تكون قاعدة ويانا.. وكل وحده ترمس عن حبيبها عاد انا ماقصر وارمس عنك .. عيل بس هم عندهم حبايب.. تقعد تذمني وتحرطم.. يعني اشمعنى علي.. تغار بشكل مني..
أحمد وهو مشتط من الخاطر: وانتي ويا هالويه لييييييييش ترمسين عني يدام البنات؟
منيره: ليش شوفيها لو رمست عنك.. حبيبي واحب ارمس عنك بكل خير..
أحمد: سمعيني يا منيره.. هذا اعتبريه مب انذار.. تهدييييييييد.. اياني واياج في يوم من الأيام ترمسين عني يدام أي مخلوق فاهمه اذا تبين النفس تكون طيبه عليج احشمي ولا ترمسين عني..
منيره: نعم نعم.. شو هالرمسه اليديدة بعد.. تهدد.. من متى احمد متعلم التهديد
أحمد: من اللحظه الي بديتي تجذبين فيها علي.. ياما جذبتي وانا اطنش واطنش.. وخلاص طفح الكيل... شفت بعيني وايقنت انج اكبر جذابة ..
منيره: لو سمحت لا تغلط ولا تقول عني جذابه..
أحمد وهو يعلي صوته: اخبرج اذا انتي بعدج ماعرفتي نفسج.. فسمحي لي انا بعرفج عليها.. وخذي الرمسه الي تثبت انج جذابه.. اليوم انا شفتج بعيني وانتي تمشين ويا ربيعتج في ابن بطوطه.. وشفتج يوم تسلمين على هالبنت الي ترمسين عنها.. وشفتج سايره صوب المطاعم.. شفت كل شي بعيني بس انتي ماشفتيني.. كنت في محل من المحلات واقف اطالعج ..
انصدمت منيره في هاللحظة وماقدرت تنطق بأي كلمة..
أحمد: ههههههههه.. شفيج صخيتي.. عرفتي منو الجذاب احين.. يلا بخليج يالجذابه.. بس تذكري رمستي عدل.. ان رمستي عني ماتلومين الا نفسج.. عمري ماكنت نذل ويا بنت.. بكون نذل هالمره بس عشان اعلمج كيف ترمسين عني..
وبند الخط في ويهها واغلق التليفون ومن الغيض الي فيه فر التليفون على الجامه وكسرت المرايه وتناثرت في الغرفه.. وماحس الا بباب غرفته ينفتح وتدخل امه..
ميثا: أمييييييه احمد شفيك؟
أحمد: ماشي بالغلط فريت التليفون على الجامه..
ميثا: طاح الشر فديتك.. اهم شي ماستوابك شي..
أحمد: لا امي الحمد لله..
ميثا: يما احمد دير بالك على عمرك.. مالي غيرك..
أحمد تقرب من امه وباس راسها: لا تحاتين .. وينها الخدامه خل تخم المكان..
ميثا: احين بزقرها وانت اظهر من الغرفة خل تخمها
أحمد: ان شاء الله
طلع احمد وسار يلس في الميلس لغاية ماتخلص الخدامه تنظيف غرفته
=-=-=-=

عند مجد
كانت ياسه عند يدتها وتسولف لها عن الطلعة..
جلثم: يحليلج يا مجوود.. عيل سرتي السينما.. شو من أفلام جفتي؟
مجد: 40 years old version
جلثم وهي تعقد حياتها وتجرب اذنها: ها.. اشو ها..
مجد: اوووووه نسيت ماتعرفين انجليزي..
جلثم: انا عيوز شو عرفني بالعنجليزي..
مجد: قصته حلوة عن ريال عمره 40 سنه عمره ماجابل حريم وبعد..
تقاطعها اليدة: عنلاتج سايره تشوفين رياييل في السينما.. اشو ها.. شو من مذهب عليج رايحه تجابلين رياييل.. وينه احمد عنكن كيف خلاكن تروحن هالمكان..
تمت تضحك مجد من الخاااااطر.. كيف اتفهم يدتها احين .. : افا تربيتج مب واثقة منها..
اليدة: هيه امي واثقه بس سايره عند رياييل ولا بعد عمره 40 سنة .. وانتي بنت صغيره.. مب زين عليج..
مجد: ههه.. خلاص يدوو مابسير مره ثانية..
جلثم: هيه زين خلج جيه.. عيل يلا روحي ارقدي .. باجر لازم تروحين الكلية..
مجد باست راس يدتها.. ويودت يدتها ايدها المجبسه..: تريي خليني اقرا عليها..
ضحكت مجد وتريت يدتها تخلص قراية وبعدها راحت غرفتها ترقد عشان الكلية.. بس قبل لا ترقد كانت حاسه بضيج وعلى طول طلعت الرسمة وقررت تكملها عشان تخلصه لخلود وتفاجئها فيها..
=-=-=-=-=-=
في بريطانيا
حور وعبيد توهم كانو رادين من السوق
عبيد: الله يسامحج ياحور.. ماخليتي حد ماخذتي له..
حور وهي تبتسم له برقه وخدودها محمره .. : فديتك شو اسوي تدري اول مره مسافره وابا اخذ للكل..
عبيد: ربي يخليج لي.. انزين هالأجياس كلها..
حور وهي تتطالع الأجياس وتتأكد من الي فيهن.. : هيه هاييل .. تسلم ايديك حبيبي..
عبيد: شوفي انا مابا اشل اغراض.. ابا اشل عيالي..
حور وهي تنزل راسها وتمشي صبعها على القنفة.. : تدري اني مستعيله على هالشي ابا احس بإحساس الأمومه واعيشه كل لحظة...
عبيد: عاد اخبرج مب تصيرين شرات باقي الحريم من تربي تهمل عمرها وتمتن.. اباج اتمين رشيقه
حور: هههههه.. لا شو متفيجة انا.. ابا اهتم بعيالي..
عبيد: وانا وين رحت..
حور وهي تحايس ثمها.. : اممم.. انت الكل بالكل..
عبيد: اخبرج تعالي انزين خل بتصل لأمي عشان تكلمينها
حور: هيه دخيلك ولهانه على الأهل وبرمس امي وابوي بعد..
عبيد: خلاص يلا خل عنج الأجياس وتعالي..
وراحت حور عشان ترمس اهلها..
...

في الإمارات

خوله وخليفه توهم كانو رادين من السوق وداخلين بيتهم.. (بيت خوله عباره عن فلة منفصلة في نفس الحوي من بيت ابو خليفه).. حطوا أغراضهم في المطبخ..
خوله وهي تبتسم لخليفه برقه: تسلم ايديك يا أحلى ريل في الدنيا..
خليفه وهو مغتر بنفسه وكأنه ينفض الغبره الي على جتوفه: افا عليج.. حاضرين للحلوين..
خوله: أقول وينه حمودي.. ماله حس..
خليفه: يمكن عند امي..
خوله: لا توني مريت عند عمتي قالت لي انه مب عندهم رد البيت ..
خليفه: تلقينه في غرفته يلعب..
مشت خوله صوب غرفه محمد ولدها بس مالقته.. ودورته في الحمام مالقته.. خافت..: خليييييييييفه.. محمد محد في الغرفه ولا الحمام..
خليفه: وين بيكون بتلاقينه مني ولا مناك.. حمووووووود.. وينك؟؟
خوله: حمود ماما وينك..
ومحد كان يرد عليهم.. خوله ارتعبت من الخوف.. ومشت صوب غرفتها مالقته.. بس سمعت حشره في الحمام.. دخل خليفه وراها الغرفه وشافها توها بتفتح باب الحمام..
خليفه: لقيتيه؟
خوله: لا بس اسمع حشره في الحمام..
خليفه: .. ادخلي شوفي..
ودخلوا سوا.. الا يشوفون الأخ تارس الحوض ماي ومفضي الشامبو كله في الحوض.. ويسبح ومستانس ..
خوله: انت هني وانا ادور عليك..
محمد يطالعهم ويضحك.. : أثبح..
خليفه: حمود ماعليك من امك.. شوفني خل اصورك..
خوله: لا شو تصوره جي ..
خليفه: حمود ماعليك من امك شوفني


كان طالع تحفة صدق في الصورة.. وتمت تضحك خوله على ولدها.. ومن عقب طلعت عباتها عشان تسبحه وتظهره من الغرفه..
خليفه: ماحيدني نظيف يوم صغير.. مادري على منو طالع..
خوله: مايبالها رمسة.. علي طبعا..
خليفه: ههههههههه .. ولو اني اشك.. بس بسوي عمري مصدق.. اخبرج ماعندج اخبار عن المعاريس..
خوله وهي لافه الفوده حوالين محمد وشالتنه.. : اي معاريس؟
خليفه: روميو وجولييت الدوام.. حور وعبيد..
خوله: هيييييييه.. هههه.. خس الله ابليسك.. لا ماعرف عنهم شي. تدري شهر عسل وين بيذكرونا
خليفه: تصدقين احلى ايام ايام شهر العسل.. تحيدين شهر عسلنا..
خوله: هيه احيد..
خليفه: شو رايج بعد نسير..
خوله: هالمره غير حمود ويانا..
محمد وهو يلعب ..: وين بنلوح؟
خوله : بنسافر ماما ..
خليفه: لا شو اقولج شهر عسل.. يعني بروحنا.. خله عند امي ونحن بنسير..
خوله: لا مايهون علي ولدي اخليه روحه..
خليفه: لاحووووول.. هالعيال يخربون على الأبهات شهر عسلهم شو هالحاله..
خوله: اصلا انا مستانسه على حمود تدري ليش؟
خليفه: ليش؟
خوله: أولا لأنه شايل اسمك.. وثاني شي.. لأنه ثمرة حبنا..
خليفه: هههه كلام جرايد.. شو وين تبين.. شير نحن..
خوله: اوهوووووو انت محد يرمس وياك..
تقرب منها خليفه وباسها على يبهتها..: فديت روحج انا..
خوله: هيه سفل فيه في الدوام.. وفي البيت تستوي رقيق..
خليفه: بعد الله راد اكون مديرج.. ههههههه
خوله: ان شاء الله ينزلون ترقيتي ونكون نفس المستوى واشوف عاد شو بتسوي وقتها
خليفه: الله لا قال ان شاء الله..

الجزء الثاني..
الفصل الثاني
=-=-=-=-=-=

يوم الخميس..
مجد: شوفي خلودوو والله ان ما وقفتي مكانج بعفد عليج وبضربج بإيدي المجبسة
خلود: خيبه خيبه.. مجرمة بنت خالي وانا مادي..
مجد: تعالي اقول لج..
خلود وهي تحط ايدها على خصرها وتهزه: واذا ماييت شو بتسوين؟؟
مجد وهي ترص على اسنانها وهي ترمس: افففففففففف لا تقهرينييييييييييييي.. بذبحج بذبحج..
دش عبدالعزيز وشاف مجد واقفه في طرف من الصالة وخلود في الطرف الثاني ومحتشرات.. : شفيكن؟
مجد: ابا اذبحها..
خلود: شفت خالي بنتك كيف مجرمة.. تبا تذبحني..
عبدالعزيز وهو يضحك..: هههه وليش تبين تذبحينها؟؟
مجد: هي تعرف ليش.. ؟؟ تعالي هني..
عبدالعزيز: الله لا يحرمني من هالضحكة ان شاء الله... احين مرتاح قلبي يوم اشوفج مستانسه من بعد زواج حور كنت خايف ان زواجها يأثر عليج..
مجد: هو مأثر مأثر.. والدليل ايدي .. خخخخخ
خلود: لا مايخصه.. اصلا من حوباتج ايدج جي استوابها..
وراح عنهن عبدالعزيز وكانت خلود تتطالع خالها ومب منتبهه الا تفز بضربه على ظهرها..: والخييييييييييبه.. كسرتي ظهري..
مجد: هاولا شي..
خلود وهي تبوس راس مجد: خلاص سامحيني ممكن عمتي..
مجد وهي شاقه الحلج.. : هيه خلاص سامحتج.. خخخخ..
وراحوا صوب الغرفه يقعدون فيها على راحتهم ويسولفون..
خلود: اقول مجوود دافنشي.. مارسمتي صورتي ؟؟
مجد: ها.. صورتج؟؟ هيه بديت فيها يبالها يومين بس وبخلصها..
خلود: مجوووووود لا تمصخرين.. مايسوى علي كل ها صورة.. لو اسير القرية العالمية واعطيها للرسام بيرسمها في نص ساعه
مجد: ايه انتي تبين ارسمج خليني على راحتي.. اتشبهني برسام القرية العالمية.. انا مجد بنت عبدالعزيز اتشبهيني برسام القرية العالمية.. خبلة انتي..
خلود: هههههههه.. خلاص عيل بنعيش وبنشوف شو بتسوين.. الا تعالي.. أحمدوو ماله حس هاليومين مامر صوب بيتكم؟؟
مجد: انتي خبله ولا متخبله.. ؟؟ اصلا هو متى يمر صوبنا عشان ايي هاليومين؟
خلود: لا ترا من عرست حور وهو ياكم.. نسيتي منو وداج المستشفى؟؟ ويوم خالي حميد يانا... ويوم الثلاث ودانا السنتر..
مجد: وخير. يعني لازم ايينا كل يوم؟؟
خلود: انتي ليش جي كارهتنه.. احسج اكثر عني انا كارهته.. انا خلاص تعودت عليه.. هو طيب بس حركاته ماحبيتها وهو حر في النهاية
مجد وهي معصبه ومتنرفزه: لا .. مب حر.. مايدري ان وراه اهل.. ماحشمنا بين العرب تبيني ماكرهه بعد..
خلود: بل بل.. شقى مكبره السالفة هذي.. هدي يابنت الناس هدي.. مايسوى عليج..
مجد وهي تصد الصوب الثاني وعاقدة حياتها..: دخيلج خلود غيري السالفة لأن طاري هالإنسان تييب لي الجلطة..
خلود: بسم الله عليج.. المهم خلنا نسولف في شي ثاني
وقعدت خلود تسولف لمجد عن الجامعه وشوي شوي .. نست مجد الموضوع وبدت هي الثانية تسولف عن الكلية وعجايبها..
....
حور: اخبرك عبيد انت خذت الساعه وين حطيتها يوم عطيتها لك؟
عبيد وهو يتعطر: عالتسريحة..
حور: بس مب موجودة..
عبيد : دوري عدل بتشوفينها
حور: انا مادور على خيط انزين.. الا هي ساعه كبيره يعني تنشاف..
عبيد وهو يضحك بخبث: هيه صدق رديتها في العلبة مالتها..
حور: يا الله... يقولي تسريحة واحين العلبة..
وسارت حور صوب الشنطة وطلعت العلبة ويوم فتحتها تفاجئت وفجت عيونها وعبيد يراقبها ويضحك.. رفعت راسها صوب عبيد وهي تضحك: فدييييييييييتك والله انها روووووعه روووووووعه ..
عبيد وهو يقرب منها ويمسك العلبة ويطلع الساعه ويحط العلبه على السرير ويمسك إيدها ويلبسها الساعه ومن عقبها رفع ايدها وباسها.. وهي محمره من الخجل..
حور: الله لا يخليني منك..
عبيد: انتي تسوين الدنيا ومافيها بعيني يا حور..
حور: بس عبيد هاي الساعه مبين عليها وايد غالية ...
عبيد: شو يعني.. تراها ماتغلى عليج.. ومافي شي يسوى غلاتج اصلا..
حور ماقدرت تحمل ورمت نفسها في حضنه وتمت تصيح من الفرحه وهو يمسح على راسها..
عبيد: شو بتمين اتصيحين؟؟.. ما تبين نظهر..
وهي تنش وتمسح دموعها بسرعه..: لا لا بنسير..
عبيد: هههههههههه فديتج.. يالله لا تأخرين اترياج..
حور: ثواني بتجهز وبخلص..
وراح عبيد الصاله يترياها لين ماتييه... وحور قعدت تتلبس.. لبست لها تنورة بيضا طويله وبودي هاي نك أبيض ووردي.. وبالطو وردي طويل واسكارف ابيض.. وتجحلت وحطت الغلوز الوردي الفاتح.. وتوها فتحت العطر بتعطر.. تذكرت ان عبيد مايرضى.. ردته مكانه وشلت شنطتها وطلعت له الصالة..
حور: يلا حبيبي انا جاهزه..
عبيد: الله يعيني اليوم كيف بقدر اصبر عن جمالج..
حور: ههههههههههههه
....


في بيت جاسم..


جاسم يتيم الأب.. توفى ابوه بمرض خبيث( بسم الله عليكم) وهو كان عمره 12 سنة.. وهالشي أثر عليه.. بس اعمامه ماقصروا وياه ابد.. خصوصا ابو خلود... وهذا الي خلاها تتعلق فيه زياده لأنه كان دوم في بيتهم .. وقعداتهم ويا بعض.. بس الفتره الأخيره يوم دخلت خلود الجامعه وهو انشغل بالدراسه .. ماصارت قعداتهم شرات قبل.. صاروا يستحون من بعض وايد.. أم جاسم حرمه طيبه وعلى نياتها.. .وتصدق كل شي تسمعه.. حصه.. عنده اختين اصغر عنه.. وحده عمرها 17 سنه )فاطمه... ومنى عمرها 15 سنه.. فاطمه ومنى دوم ويا بعض.. ويحبون بعض.. ويحبون جاسم وايد.. لأنه وايد يهتم فيهم.. رغم انه اكبر عنهم ... هو اكبر من فاطمه بـ 6 سنين ومن منى بـ 8 سنين.. بس يحاول يعطيهم كل اهتمامه وحبه ومايقصر عليهم بشي.. فاطمه معظم وقتها تقضيه على النت.. اما منى فماعندها هالإهتمام وايد.. ماتحب الكمبيوتر... عكس اختها.. منى لها اهتمامات شعريه أكثر.. وهالي مميزنها..


فاطمه: اااااااااه منوووووي تعالي شوفي هالحلاة .. ماقدر والله بتخبل..


منى وهي تصد صوبها بعدم اهتمام: مابا اشوف شي .. خليني ياسه اكتب قصيدة يديدة..


فاطمه: انتي ويا هالكلام الفاضي الي تكتبينه.. اخبرج تعالي شوفيه انتي بس .. والله انه غاوي...


نشت منى وهي تمشي بهيازه صوبها: خل اشوف هذا الي مطير عقلج.. ولو انه مب اول واحد طير لج عقلج..


فاطمه وهي تفتح الصفحة وتراويها صورة فزاع...


منى: انتي ماعندج سالفه.. الله يخلي له جماله بس مب لدرجه اني اتفداه واذبح عمري عشانه...


فاطمة: انتي ماتفهمين فالحب والرومانسيه..


منى: هههههههه.. تقول مافهم اونه.. انا كلي احساس ورومانسيه ولا من وين يظهر الكلام الحلو الي عندي اياه..


فاطمه: خلج في احاسيسج وخلني في احاسيسي..


وقعدت فطوم تيمع الصور من النت وتحطهم في فولدر خاص.. وصل لها مسج في نفس الوقت.. فتحت المسج تقراه..


(حبيبتي وينج من يومين وانا اتصل وانتي ماتردين شو صاير.. مشتاق لج)


ارتبكت فاطمه وشلت التليفون وتمت تتطالع وراها اذا كانت منى وراها او لا.. وشلت التليفون وكتبت المسج


(شوي حشره عندي هاليومين من احصل فرصه بتصل.. انا بعد ولهانه عليك موووت)


منى: منو مطرش مسج؟


فاطمه: ها.. عن اللقافه تليفوني ولا تليفونج..


منى: ههههههه... احب اغيض فيج تدرين هوايتي..


فاطمه: خلج في جوج وخليني في جوي الجميل..


دش عليهم جاسم الي من شافته فاطمه من الزيغه بندت الصفحة الي يدامها وشلت التليفون..


جاسم: شوفيج اخترعتي؟؟


فاطمه: هاا.. ماشي بس فجأة فتحت الباب .. شوي شوي..


جاسم: ههههههه.. اشحالكم؟؟


منى: بخير.. اقول جاسم اقرا هالقصيدة وشوف شو رايك فيها؟؟


جاسم: انتي يبالج انطلع لج ديوان.. لأن قصايدج دوم حلوة..


منى: فدييت اخوي الي يشجعني.. مب اختي.. كله تحبط احاسيسي..


جاسم: هههههههه.. انزين انتي عطيني وبقراهن اليوم وبعطيج رايي.. بس بالأول بغيت اسألكم عن شي..


فاطمه: خير؟؟


جاسم: بنت عمكم خلود شفتها أمسات في مركز ابن بطوطه .. كانت هيه وولد خالها وعلوو وبنيه ثانيه ماعرفتها؟؟ أحمد عنده اخت جي على عمر خلود؟؟


منى: لا ماعنده غير مروه..


فاطمه وهي تغمز لأخوها : ليش عايبتنك البنت يعني؟؟


جاسم: سيري لا.. انا تدرين اني احب بنت عمي.. بس يعني شفت وحده غريبه وياهم من جي أسأل..


منى: اتوقع تكون اخت الي سرنا عرسها من اسبوع.. عرس اخو احمد.. لأن يومها خلود كانت طول الوقت ويا هالبنت..


جاسم : أهاااا..


فاطمة: أقول جاسم دامك تحب بنت عمي.. وطبعا هي تحــ... (سكتت في هالوقت)...


جاسم: بلاج قطعتي قولي تحبني ليش مستحية..


منى: انتي غبيه البنت قالت لج ماتبا جاسم يعرف..


جاسم وهو يضحك: ههههههه ليش ماتباني اعرف؟؟


فاطمة: لآنها تخاف تنصدم وتعرف انك ماتباها ولا شي..


جاسم: وانتوا اكيد قلتوا لها لاااااااا.. جاسم يمووووووت عليج..


منى: لا ماقلنا لها.. ولاشي.. خلها تعرف هالشي منك احلى..


فاطمه: هيه وانا بعد اقول جي..




جاسم: يا سبحان الله .. اول مره تتفقون على شي.. بالعادة تتنافسون في كل شي..


منى: ههههههههه.. عشان تعرف ان الدم واحد..


فاطمة: انزين خل اكمل.. ليش ماتخطبها دامك تحبها؟؟ تراك تشتغل وما عليك قصور..


جاسم: ومنو قال اني انا مافكرت بهالموضوع... لا حبيبتي فكرت وبرمس امي اليوم او باجر بالموضوع..


منى وفاطمه: لا اليوم اليوم اليوم..


جاسم: ههههههه شو رايكم الحين الحين الحين..


ربعوا قبل جاسم صوب امهم يزقرونها.. وقتها وصل مسج على تليفون فاطمة.. وكان طايح على الأرض.. سار جاسم صوب التليفون وشله من على الأرض وكان بيفتح المسج .. بس تردد.. مب حلوه اكيد وحده من رباعتها وبتزعل لو فتحت المسج..


وطلع من الغرفه ودش الميلس ونادى على فاطمة الي من شافت التليفون في ايده تيبست مكانها ..


يبتسم لها جاسم: وصل لج مسج توه..


ربعت فاطمه وسحبت التليفون واحمدت ربها انه مافتح المسج..


ام جاسم (حصه): هلا بولدي.. شو هالخبر الزين الي اسمعه؟؟


جاسم: لحقوا يخبرونج؟؟.. ماشاء الله عليهم.. انزين شو رايج اميه؟


حصه: والله يا جاسم يا ولدي لو تدور الدنيا احسن من بنت عمك مابتلقى لك... فأكيد موافقه وماعندي مانع اميه الله يوفقك ان شاء الله..


استانس جاسم وباس راس امه..: ومتى ان شاء الله بتروحين لهم؟؟


حصه: انا اليوم الفليل ناويه امر على شيخه اسلم عليها.. وبرمسها بالموضوع..


منى: بيي وياج امي..


حصه: عيب انتوا خلكن هني.. وجاسم بيتم وياكن.. لأني ابا ارمس عمتكن على راحتي..


فاطمه: جاسم بهالمناسبه اعزمنا على العشا برع؟؟


جاسم اطالعهم وأشر على عيونه: من عيووووني..


منى وهي تغمض عيونها وتهز راسها وهي مبتسمه: تسلم لي عيونك يارب..


......


خلود: اخبرج مجوود ترا انا لازم ارد البيت.. واباج تيين وياي وتباتين الليله عندي.. شو كل يوم انا ابات عندج.. شو انتي ماتنزلين اتيين بيتنا ولا شو


مجد: خيبه خيبه.. كلتيني.. قولي تعالي بيتنا وخلاص.. بعد ليش ماتنزلين ومادري شو..


خلود: ههههه.. انزين يلا سيري قولي لأبوج واستأذني منه... وانا بتصل في ابوي عشان يردنا..


مجد : أووووووووووكي


طلعت مجد من الغرفه وهي تلف شعرها وترفعه عفوق .. جان يطيح المقبض من ايدها .. واتدحرج على الدري.. ربعت وراه ونزلت تاخذ المقبض وانسدل شعرها على جتفها وشوي منه على الأرض وهي موخية.. رفعت راسها وهي حاسه بوجود شخص يراقبها.. رفعت راسها شافت عيون ماتوقعت انها تشوفها بهالحاله بالمره.. شلت عمرها وربعت على الدري بسرعه صوب غرفتها وقلبها يدق من الخوف.. دخلت الغرفه وبندت الباب وساندت ظهرها على الباب..


خلود: شوفيج جنه الا حرامي ملاحقنج..


مجد وهي تتنفس بسرعه .. ومحمره: ابوي.. بيذبحني..


خلود: ليش؟؟ بس عشان بتيين بيتنا


مجد: لاااااااا... ولد خالج الي مادانيه ياينا.. وانا مادري انه في الصالة.. وكنت نازله جيه.. عاد ابوي الشراره تطلع من عينه يوم شافني نازله جيه.. ميته خوف بيذبحني.. سيري بيتكم انا مابيي ماتجرأ اطلب منه..


خلود: ههههههههه... الله يعينج عيل..جاك الموت ياتارك الصلاة..


مجد: بس عاد.. متفيجة انتي..


الا سمعت صوت دق الباب... فجت عيونها مجد على الآخر وقلبها في ريولها من الخوف..: بسير انخش في الحمام..


خلود: ايه تعالي بتوهقيني مافيني..


مجد: اخاف احسه بيكفخني بيعدمني شي بيسوي بي..


خلود: هيه اذا مافتحتي الباب بيسوي كل ها.. مب عشان نزلتي يلا فتحي الباب بلا مصاخه..


فتحت مجد الباب وهي ترتعد من الخوف.. من شافت ابوها بلعت ريجها ونزلت راسها..


عبدالعزيز: انتي محد قالج ان احمد تحت ؟


مجد: مـ.. مــ.. ممما كنت اعرف.. ممحد قالي..


عبدالعزيز: بلاج خايفه جي مابسوي بج شي.. سيري المطبخ سوي عصير .. لأن امج سايره بيت الجيران ولحين ماردت..


مجد: ان شاء الله... ابوي احمد ليش ياي؟


عبدالعزيز: انا قلت له اييني بغيته في شغله..


مجد: اهااا.. خلاص احين ببدل ثيابي وبنزل اسوي العصير..


عبدالعزيز: عفيه عبنتي..


خلود: خالي..


عبدالعزيز: نعم بنتي..


خلود: خالي ممكن مجد اتيي وياي البيت اليوم وتبات عندي ترا كل يوم انا طايحة عندكم وهي ماتيي صوبنا..


عبدالعزيز: خلاص مب مشكلة..


استانست مجد من الخاطر من بندت الباب حضنت خلود وقعدوا يناقزون..


خلود: اخبرج سيري سوي العصير.. قبل لا يغير رايه ابوج..


مجد: اوه صدق نسيت..


وراحت مجد بدلت ونزلت تحت وخطفت من الصالة الي هم قاعدين فيها : السلام عليكم


أحمد وهو منزل راسه: وعليكم السلام


ومشت صوب المطبخ وقعدت تسوي العصير.. وهي تحرك العصير عشان تذوب السكر... تذكرت الدكتور وهو يحرك عجينة الجبس.. ضحكت.. يوم السبت بشوفه.. ياي وناسه..


وجهزت العصير ودته على الطاوله المتحركة الصغيره صوب ابوها واحمد..


أحمد: تسلم ايديج بنت العم...


مجد من ورا خاطر..: الله يسلمك..


وخطفت عنهم وصعدت فوق..


وتوها على الدري..


عبدالعزيز: اخبرج قولي لخلود تزهب عشان احمد بيوصلكم..
مجد لا إراديا: شووو.. احمد بيوصلنا.. (انتبهت لعمرها) ها اوكي.. بس خل ارمس امي ..
عبدالعزيز: امج بتأخر شكلها خليها انا برمسها.. ماعليج.. بس لا تحيرين على ولد عمج عشان يوصلكم
مجد هزت راسها وسارت فوق.. ودخلت الغرفه: افففففففففف.. احين شو هالنحاسه الأخ أحمد بيوصلنا..
خلود: اشعليج انتي المهم حد يودينا..
مجد: انزين ...
وفتحت الكبت مجد جان تشوف تليفونها الجديم.. طلعته وحطت بطاقتها فيه..
خلود: شو تسوين؟
مجد: ابا اشوف شي من زمان ماشفته.. تولهت على ذيج الأيام
خلود: اي ايام؟
مجد: الثانويه.. هههههه.. شوفي مسج اتصالات يوم خبروني بالنسبة الحلوة.. بعدني محتفظة فيه..
خلود شلت التليفون وقعدت تشوف المسج ..


خلود: وييييه انا مسحته ولا احتفظت فيه..
مجد: بالعكس انا وايد اشيا عندي محتفظة فيها مال ايام الطفوله والدراسه.. انزين يلا خل نجهز عن ابوي يحرج علي عشانه.. لني ناقمتنه مادانيه..
خلود: هههههه انا جاهزه..
وشوي تجهزوا سوا.. وطلعوا من الغرفه عشان يروحون ويا احمد.. الي من شافهم نش وسلم على عمه وطلع من الميلس وركب الموتر يترياهم.. كانو طبعا متغشيات وسلموا على ابوهم وعلى طلعتهم شافت مجد امها داخله .. استئذنت منها وراحت.. ويدتهم في هاليوم كانت في بيت حميد عند ولدها الثاني..
ركبوا الموتر ورا طبعا .. بدون لا ينطقون بأي كلمة..
احمد:اشحالكم؟
خلود: الحمد لله انت اشحالك؟
احمد: بخير يسرج حالي..
وتم ساكت طول الدرب.. ومجد ولا ردت عليه.. تحس كارهته وايد.. اما هو فكل شوي اتيي في باله صورة مجد وهي نازله من الدري بلبسها وشعرها الطويل.. ويتنهد كل ما يذكر الموقف.. أول ماشافها انبهر بها.. ونزل راسه لأن عمه كان وياه.. من وصلوا البيت ..
خلود: مشكووور يزاك الله ألف خير..
أحمد يبتسم غصبن عنه: العفوو.. ساعات احسج شرات يدو من رمستج..
خلود: هههههه.. انزين مابتنزل اتسلم على اميه.؟
أحمد: لا مستعيل لأن ربعي يتريوني فالكوفي.. مره ثانيه ان شاء الله .. سلمي عليها وايد..
مجد وهي تحرطم: ربعك ولا ربيعتك..
حس احمد ان مجد قالت شي.. صد عورى وهي نزلت وبندت الباب.. حزت فخاطره على معاملتها له.. انزين انا ريال كيفي اتصرف بالطريقه الي اباها.. مب نشادة عني عشان تحاسبني على الي قاعد اسويه.. ولا اني كنت وياها وخنتها.. افففففف انتي من دخلتي حياتي وجلبتيها .. وتأفف وحرك الموتر من عند البيت سار صوب ربعه..
دخلت خلود من شافت مرت عمها استغربت..
مجد: منو هاي؟
خلود: مرت عمي.. ام جاسم..
تقربوا منها وسلموا عليها.. وساروا الغرفه...
حصه: ها ياشيخة ماقلتي لي رايج؟؟
شيخه: والله يا حصه مايبالها رمسه.. ولدج ريال ماينعاب بشي ماشاء الله عليه.. برمس ابوها وبنشاور البنت ان شاء الله وبنرد عليج..
حصه: لا تحيرين علي عاد لأن ولدي حده مستعيل..
شيخة: ماعليج كله خير..
حصه: الا منو هالبنت الي كانت ويا خلود؟
شيخة: هذي بنت اخوي عبدالعزيز..
حصه: ماشاء الله .. احيدها مره شفتها يوم صغيره.. بعد ماشفتها..
شيخه: هيه ماشاء الله عليها كبرت وحلوت.. اه بس لو عندي ولد على كبرها جان خطبتها..
حصه: هيه مبين عليها بنت والنعم فيها..
شيخه: الا ماشربتي العصير يا ام جاسم؟؟
حصه: تسلمين..
وقعدوا يسولفون..
خلود ومجد في الغرفه..
خلود: اموووووت واعرف مرت عمي ليش يايه بدون بناتها بالعادة لازم يكونن نشمية وهلاله وياها...
مجد وهي تضحك: ههههههه منو نشمية وهلاله..
خلود: ههه صدق ماتعرفين... هاييل سلمج الله بناتها..

فطوم ومنايه...
مجد: هييييييييه... ماحصل لي الشرف اتعرف عليهم..
خلود: ماعليج لاحقة وبتعرفين عليهم وبتطفرين منهم بعد..
مجد: هههه..